Igbe Ajụjụ

◼ Gịnị ka nne na nna kwesịrị ịkụziri ụmụ ha ka okwukwe ha sikwuo ike?

E nwere ọtụtụ ihe ndị nne na nna na-eme iji zụọ ụmụ ha “n’ọzụzụ na nduzi echiche nke si n’aka Jehova.” (Efe. 6:4) Dị ka ihe atụ, ndị nne na nna ma na ha na ụmụ ha ịtụle ihe mmụta dịịrị ụbọchị kwa ụtụtụ bara uru. Ụfọdụ na-ejikwa oge ha ji enwe ofufe ezinụlọ ele vidio anyị ma ọ bụ kwurịta otú ihe dị n’isiokwu gbasara ndị na-eto eto ga-esi baara ụmụ ha uru. Ụfọdụ na-eme ihe ngosi dabara n’otu akụkọ Baịbụl ma ọ bụ mụọ ihe ha ga-ekwu n’ozi ọma. Ma, ọ bụrụ na anyị chọrọ ka okwukwe ụmụ anyị sikwuo ike, anyị kwesịrị ịna-akụziri ha ihe ndị gbara ọkpụrụkpụ dị na Baịbụl.—Hib. 6:1.

Chegodị otú anyị si amụrụ ndị mmadụ ihe. Anyị gaa ozi ụlọ n’ụlọ ma ọ bụ gaa nletaghachi, anyị na-agbalị ka anyị na onye ahụ mụwa akwụkwọ bụ́ Gịnị n’Ezie Ka Bible Na-akụzi? Anyị na ya mụchaa ya, anyị amụwa akwụkwọ bụ́ “Nọrọnụ n’Ịhụnanya Chineke.” Gịnị mere anyị na ha ji amụ akwụkwọ abụọ a? Akwụkwọ Baịbụl Na-akụzi na-enyere ha aka ịmụta ihe Baịbụl na-akụzi. Ma, akwụkwọ “Ịhụnanya Chineke” na-eme ka ha mata otú ha ga-esi na-eme ihe ha mụtara na Baịbụl. Ịmụ akwụkwọ abụọ ahụ na-enyere ndị ghọrọ Ndị Kraịst ọhụrụ aka ịgbanye mgbọrọgwụ n’ime Kraịst, ma “gbasie ike n’okwukwe.” (Kọl. 2:6, 7) Akwụkwọ ndị a ga-abakwara ụmụ anyị uru. Anyị kwesịrị ịkụziri ha banyere àjà Kraịst chụrụ, Alaeze Chineke, na ihe na-eme mmadụ ma ọ nwụọ. Ha kwesịrị ịma ihe mere Chineke ji kwe ka ụmụ mmadụ na-ata ahụhụ nakwa ihe ndị na-egosi na anyị bi n’oge ikpeazụ. Obi kwesịrị isi ha ike na e nweghị ndị ọzọ na-akụzi eziokwu si na Baịbụl ma e wezụga Ndịàmà Jehova. Ha kwesịkwara ịghọta ihe mere Chineke ji nye iwu ndị dị na Baịbụl, marakwa otú ha ga-esi na-azụ “ikike nghọta” ha. (Hib. 5:14) Ka ndị nne na nna na-agbalị ịkụziri ụmụ ha ihe ndị a, ha kwesịrị icheta afọ ole ha dị nakwa ụdị ihe ha ga-aghọtali tupu ha akụziwere ha isiokwu ụfọdụ. Ma, ụbụrụ na-aghọ ọtụtụ ụmụaka nkọ nke na ha nwere ike ịmụta ihe ndị miri emi dị na Baịbụl mgbe ha ka pere mpe.—Luk 2:42, 46, 47.