Ihe Anyị Ga-amụta n’Aka Zefanaya Onye Amụma
1. Olee ihe ndị na-eme na Juda mgbe a họpụtara Zefanaya ka ọ bụrụ onye amụma, oleekwa ihe anyị ga-amụta n’aka ya?
1 N’ihe dị ka puku afọ abụọ na narị isii gara aga, Jehova họpụtara Zefanaya ka ọ bụrụ onye amụma. N’oge ahụ, ọtụtụ ndị Juda na-efe Bel. Ọ dịbeghịkwa anya e gburu Eze Emọn, nwa ya bụ́ Josaya amalite ịchị. (2 Ihe 33:21–34:1) N’agbanyeghị na Zefanaya si n’ezinụlọ eze, ọ tụghị ụjọ ịgwa eze na ndị niile a ma ama na Juda ahụhụ Jehova ga-ata ha. (Zef. 1:1; 3:1-4) Anyịnwa kwesịrị inwe ụdị obi ike ahụ Zefanaya nwere. Anyị ekwesịghị ikwe ka otú anyị na ndị ezinụlọ anyị si dịrị mee ka anyị ghara ịgwa ha eziokwu gbasara Jehova. (Mat. 10:34-37) Gịnị ka Zefanaya gwara ndị Juda, gịnịkwa ka ndị Juda mere mgbe ọ gwara ha ya?
2. Olee ihe anyị kwesịrị ime ma ọ bụrụ na anyị chọrọ ka Jehova chebe anyị n’ụbọchị iwe ya?
2 Chọọnụ Jehova: Ọ bụ naanị Jehova ga-azọpụtali mmadụ n’ụbọchị iwe ya. Ọ bụ ya mere Zefanaya ji gwa ndị Juda ka ha chọọ Jehova, ezi omume, na ịdị umeala n’obi tupu ụbọchị iwe ya eruo. (Zef. 2:2, 3) Anyị na-emekwa ka Zefanaya. Anyị na-agwa ndị mmadụ ka ha chọọ Jehova, ma anyịnwa kwesịkwara ikpebi na anyị agaghị akwụsị iso Jehova. (Zef. 1:6) Otú anyị ga-esi na-achọ Jehova bụ ịna-amụ Okwu ya nakwa ịna-arịọ ya ka ọ na-edu anyị. Otú anyị ga-esi chọọ ezi omume bụ ịna-akpa àgwà ọma. Otú anyị ga-esikwa gosi na anyị na-achọ ịdị umeala n’obi bụ ịna-erubere ọgbakọ Jehova isi, na-emekwa ihe ọ bụla a gwara anyị mee n’egbughị oge.
3. Gịnị mere obi ga-eji sie anyị ike na ozi ọma anyị na-ekwusa ga-arụpụta ezigbo ihe?
3 Ihe Ọ Rụpụtara: Ihe Zefanaya gwara ndị Juda mere ka ụfọdụ n’ime ha gbanwee. Ihe ahụ ọ gwara ha kacha nyere Josaya aka. O mere ka Josaya malite mgbe ọ ka bụ nwata chọwa Jehova. Ka oge na-aga, o kpochapụrụ ihe niile e ji ekpere arụsị na Juda. (2 Ihe 34:2-5) Taa, n’agbanyeghị na ụfọdụ mkpụrụ anyị na-agha na-ada n’akụkụ ụzọ, n’ebe nkume dị, ma ọ bụ n’etiti ogwu, ụfọdụ na-ada n’ala dị mma, mịakwa mkpụrụ. (Mat. 13:18-23) Obi siri anyị ike na Jehova ga na-agọzi mbọ anyị na-agba ikwusa ozi ọma Alaeze ya.—Ọma 126:6.
4. Gịnị mere anyị ji kwesị ‘ịna-echere Jehova’?
4 Ụfọdụ ndị Juda ekwetaghị na o nwere ihe Jehova ga-eme ha. Ma, Jehova mere ka o doo anya na ụbọchị iwe ya dị nso. (Zef. 1:12, 14) Naanị ndị ọ ga-azọpụta bụ ndị na-erubere ya isi. (Zef. 3:12, 17) Ka anyị ‘na-echere Jehova,’ ka anyị na ụmụnna anyị jiri obi ụtọ na-efekọ Jehova ọnụ.—Zef. 3:8, 9.