Baịbụl kwuru na ụmụ mmadụ ‘anaghị ebite ndụ aka nakwa na nsogbu na-ezu ha ahụ́.’ (Job 14:1) Ma, ọ̀ bụ otú a ka Chineke chọrọ ka ndụ anyị dịrị? Ọ bụrụ na ọ bụghị, oleekwanụ otú o bu n’obi ka ndụ anyị dịrị? È nwere mgbe ihe ga-emecha dịrị anyị otú o bu n’obi? Chọpụta otú na-akasi obi Baịbụl si zaa ajụjụ ndị a.

1. Olee otú Chineke chọrọ ka ihe dịrị anyị ná ndụ?

Jehova chọrọ ka ihe dịrị anyị nnọọ mma. Mgbe o kere mmadụ abụọ mbụ, bụ́ Adam na Iv, o mere ka ha biri ebe mara mma a na-akpọ paradaịs, ma ọ bụ ogige Iden. Baịbụl kwuru, sị: “Chineke gọziri ha. Chineke sịkwara ha: ‘Mụọnụ ọmụmụ, baanụ ụba, junụ n’ụwa, na-elekọtakwanụ ya.’” (Jenesis 1:​28) Jehova chọrọ ka ha mụọ ụmụ, mee ka ụwa niile bụrụ paradaịs, na-elekọtakwa ụmụ anụmanụ. Ihe o bu n’obi mgbe ahụ bụ na mmadụ niile ga-ezu okè, ahụ́ agbasie ha ike, ha adịrịkwa ndụ ruo mgbe ebighị ebi.

Ọ bụ eziokwu na ihe niile agaghị otú Chineke si chọọ,a ma ihe o bu n’obi agbanwebeghị. (Aịzaya 46:​10, 11) Ọ ka chọrọ ka ndị na-erubere ya isi dịrị ndụ ruo mgbe ebighị ebi mgbe ọ ga-eme ka ihe niile dị mma.​—Gụọ Mkpughe 21:​3, 4.

2. Olee ihe anyị ga-eme ka ndụ anyị nwee isi?

Jehova kere anyị otú anyị ga-ama ‘na ọ bụ ya kwesịrị ịna-eduzi anyị,’ ya bụ, o kere anyị ka ịmụ gbasara ya na ife ya na-agụ anyị agụụ. (Gụọ Matiu 5:​3-6.) Ọ chọrọ ka anyị na ya dịrị n’ezigbo mma, ‘ka anyị na-eme uche ya n’ihe niile, ka anyị hụ ya n’anya, ka anyị jirikwa obi anyị niile’ na-efe ya. (Diuterọnọmi 10:12; Abụ Ọma 25:14) Anyị mee ihe ndị a, obi ga na-atọ anyị ezigbo ụtọ n’agbanyeghị nsogbu ndị anyị nwere. Ọ bụrụ na anyị ana-efe Jehova, ndụ anyị ga-enwe isi n’ihi na anyị ma na anyị na-eme ihe dị ya mma.

3. Otú Jehova chọrọ ka ihe dịrị ụmụ mmadụ magburu nnọọ onwe ya

Kpọnyenụ VIDIO a. Unu lechaa ya, unu eleba anya n’ajụjụ a:

VIDIO: Vidio si na vidio bụ́ Gịnị Mere Chineke Ji Kee Ụwa? (1:​41)

• Gịnị mere Chineke ji kee ụwa anyị a mara ezigbo mma?

Gụọnụ Ekliziastis 3:​11. Unu gụchaa ya, unu eleba anya n’ajụjụ a:

• Gịnị ka ihe amaokwu a kwuru na-akụziri gị gbasara Jehova?

4. Ihe Jehova bu n’obi agbanwebeghị

Gụọnụ Abụ Ọma 37:​11, 29 na Aịzaya 55:11. Unu gụchaa ha, unu eleba anya n’ajụjụ a:

• Olee otú anyị si mara na otú Jehova bu n’obi ka ndụ dịrị anyị agbanwebeghị?

5. Ife Jehova na-eme ka ndụ anyị nwee isi

VIDIO: M Mụtara Ihe Mere Chineke Ji Kee Anyị (5:​03)

• Olee uru ịmụta ihe mere Chineke ji kee anyị baara Terumi?

Gụọnụ Ekliziastis 12:13. Unu gụchaa ya, unu eleba anya n’ajụjụ a:

• Ebe ọ bụ na Jehova emeerela anyị ọtụtụ ihe ọma, olee otú anyị ga-esi gosi ya na obi dị anyị ụtọ?

NCHỊKỌTA

Jehova chọrọ ka anyị dị ndụ ebighị ebi n’ụwa ebe a mgbe ọ ga-eme ka ihe niile dị mma. Ọ bụrụ na anyị ejiri obi anyị niile na-efe ya, ndụ anyị ga-enwe isi, ma taa ma echi.

Ajụjụ ndị e ji echeta ihe a mụrụ

• Olee otú Jehova chọrọ ka ndụ dịrị Adam na Iv mgbe o kere ha?

• Olee otú anyị si mara na otú Chineke chọrọ ka ihe dịrị ụmụ mmadụ agbanwebeghị?

• Gịnị ka ị ga-eme ka ndụ gị nwee isi?

IHE Ị GA-ELEBAKWU ANYA

Chọpụta ihe na-egosi na e nwere ebe bụbu ogige Iden n’eziokwu.

“Ogige Iden Ọ̀ Dịrị Adị Ka Ọ̀ Bụ Akụkọ Ifo?” (Ụlọ Nche, Jenụwarị 1, 2011)

Chọpụta ihe mere obi ga-eji sie anyị ike na ụwa ga-adị ruo mgbe ebighị ebi.

“À Ga-ebibi Ụwa?” (Isiokwu gbara n’Ịntanet)

Chebara ihe Baịbụl kwuru mere Chineke ji kee gị echiche.

“Oleedị Ihe Chineke Bu n’Obi Kee Anyị?” (Isiokwu gbara n’Ịntanet)

Chọpụta otú otu nwoke chere na ụwa zuuru ya si chọpụta otu ihe kọrọ ya.

Ndụ M Enweela Isi Ugbu A (3:55)

2. Ole ndị ga-eso Jizọs chịa?

Ọ bụghị naanị Jizọs ga na-achị n’Alaeze Chineke. Ya na ndị si ‘n’ebo niile, ndị na-asụ asụsụ niile, ndị agbụrụ niile nakwa ndị mba niile ga na-achị ụwa.’ (Mkpughe 5:​9, 10) Ole ka ndị ga-eso Kraịst achị dị? Ọtụtụ nde mmadụ aghọọla ndị na-eso ụzọ Jizọs kemgbe ọ bịachara n’ụwa. Ma, ọ bụ naanị otu narị puku na puku iri anọ na puku anọ ga-aga eluigwe ma soro Jizọs chịa n’Alaeze Chineke. (Gụọ Mkpughe 14:​1-4.) Ndị Kraịst ndị ọzọ ga-ebi n’ụwa, Alaeze ahụ ana-achị ha.​—Abụ Ọma 37:29.

Alaeze Chineke na-achị achị ugbu a. N’oge na-adịghị anya, ọ ga-eme ka ọtụtụ ihe gbanwee n’ụwa. Ka anyị leba anya n’ụfọdụ n’ime ihe ọma ndị Alaeze Chineke ga-emere gị.

1. Olee otú Alaeze Chineke ga-esi mee ka udo dịrị n’ụwa, a na-ekpekwa ikpe ziri ezi na ya?

Jizọs bụ́ Eze Alaeze Chineke, ga-ebibi ndị na-eme ihe ọjọọ, bibiekwa ọchịchị ụmụ mmadụ n’agha Amagedọn. (Mkpughe 16:​14, 16) N’oge ahụ, nkwa a dị na Baịbụl ga-emezuru n’isi. Baịbụl sịrị: “N’oge na-adịghị anya, ndị ajọ omume agaghịzi anọ.” (Abụ Ọma 37:10) Jizọs ga-eji Alaeze ahụ mee ka udo dịrị ebe niile n’ụwa, a na-ekpekwa ikpe ziri ezi.​—Gụọ Aịzaya 11:4.

2. Olee otú ndụ ga-adị mgbe uche Chineke ga-eme n’ụwa?

Alaeze Chineke chịwa ụwa “ndị ezi omume ga-enweta ụwa, ha ga-ebikwa na ya ruo mgbe ebighị ebi.” (Abụ Ọma 37:29) Chegodị otú ụwa ga-adị mgbe ndị niile bi na ya bụ ndị ezi omume hụrụ ma Jehova ma mmadụ ibe ha n’anya. O nweghị onye ga-arịa ọrịa. Ha niile ga-adịkwa ndụ ruo mgbe ebighị ebi.

3. Olee ihe Alaeze Chineke ga-emere anyị ma e bibicha ndị na-eme ihe ọjọọ?

E bibicha ndị na-eme ihe ọjọọ, Jizọs ga-achị otu puku afọ. N’oge ahụ, ya na otu narị puku na puku iri anọ na puku anọ ndị ga-eso ya achị ga-eme ka ndị mmadụ zuo okè, gharakwa ịna-eme mmehie. Ná ngwụcha otu puku afọ ahụ, ụwa niile ga-abụ paradaịs mara ezigbo mma. Ndị niile bi na ya ga-enwe obi ụtọ n’ihi na ha na-erubere Jehova isi. Jizọs ga-enyeghachizi Nna ya, bụ́ Jehova, ọchịchị ka ọ chịrị gawa. N’oge ahụ, ‘a ga-edo aha Chineke nsọ’ otú a na-edotụbeghị ya na mbụ. (Matiu 6:​9, 10) Ọ ga-edo ewu na ọkụkọ anya mgbe ahụ na Jehova bụ ezigbo onye ọchịchị, onye ihe gbasara ndị ọ na-achị na-emetụ n’obi. Jehova ga-ebibizi Setan, ndị mmụọ ọjọọ, na onye ọ bụla ọzọ na-enupụrụ ya isi. (Mkpughe 20:​7-​10) Ihe ọma ndị Alaeze Chineke ga-emere anyị ga-adịru mgbe ebighị ebi.

MỤTAKWUO IHE

4. Alaeze Chineke ga-ebibi ọchịchị ụmụ mmadụ

Baịbụl kwuru na “mmadụ nọ na-achị mmadụ ibe ya ọchịchị nchịgbu.” (Ekliziastis 8:9) Jehova ga-eji Alaeze ya mee ka ọchịchị nchịgbu a kwụsị.

Gụọnụ Daniel 2:​44 na 2 Ndị Tesalonaịka 1:​6-8. Unu gụchaa ha, unu eleba anya n’ajụjụ ndị a:

• Gịnị ka Jehova na Ọkpara ya, bụ́ Jizọs, ga-eme ndị ọchịchị na ndị niile na-akwado ha?

• Olee otú ihe ị mụtarala gbasara Jehova na Jizọs si eme ka obi sie gị ike na ha agaghị emegbu onye ọ bụla?

5. O nweghị eze dị ka Jizọs

Jizọs, bụ́ Eze Alaeze Chineke, ga-emere ndị ọ ga na-achị n’ụwa ọtụtụ ihe ọma. Kpọnyenụ VIDIO a ka unu hụ otú Jizọs sirila gosi na inyere ndị mmadụ aka na-agụ ya agụụ nakwa na Chineke nyere ya ikike inyere ha aka.

VIDIO: Jizọs Gosiri Ihe Alaeze Chineke Ga-emere Anyị (1:​13)

Ihe ndị Jizọs mere mgbe ọ nọ n’ụwa gosiri anyị ihe ndị Alaeze Chineke ga-emere anyị. N’ihe ndị e depụtara ebe a Jizọs ga-emere anyị, olee ndị ị kacha atụ anya ịhụ mgbe ha ga-eme? Gụọnụ amaokwu Baịbụl ya na nkwa nke ọ bụla so ka unu mụtakwuo gbasara nkwa ahụ.

6. Ihe Alaeze Chineke ga-emere anyị n’ọdịnihu magburu onwe ya

VIDIO: Hụperetụ Ihe Ọma Ndị Ga-eme n’Ọdịnihu (4:​38)

Gụọnụ Abụ Ọma 145:16. Unu gụchaa ya, unu eleba anya n’ajụjụ a:

• Olee otú obi dị gị ịmara na Jehova ga-eji “ihe na-agụ ihe ọ bụla dị ndụ nyejuo ya afọ”?

NCHỊKỌTA

Alaeze Chineke ga-eme ihe Chineke chọrọ ka o mee. Ọ ga-eme ka ụwa ghọọ paradaịs, ndị ga-ebikwa na ya bụ ndị ga na-efe Jehova ruo mgbe ebighị ebi.

Ajụjụ ndị e ji echeta ihe a mụrụ

• Olee otú Alaeze Chineke ga-esi doo aha Chineke nsọ?

• Olee ihe mere anyị ga-eji kwere na nkwa ndị dị na Baịbụl ga-emezu n’Alaeze Chineke?

• N’ime ihe niile Alaeze Chineke ga-emere anyị, olee nke ị kacha atụ anya ya?

IHE Ị GA-ELEBAKWU ANYA

Chọpụta ihe Amagedọn bụ.

“Gịnị Bụ Agha Amagedọn?” (Isiokwu gbara n’Ịntanet)

Chọpụta ihe ndị ga-eme n’oge Jizọs kpọrọ “oké mkpagbu.”—Matiu 24:21.

“Gịnị Bụ Oké Mkpagbu Ahụ?” (Isiokwu gbara n’Ịntanet)

Chọpụta otú ezinụlọ nwere ike isi nọkọọ tụgharịa uche n’ihe ọma ndị Alaeze Chineke ga-emere ha n’ọdịnihu.

Hụ Onwe Gị na Paradaịs (1:50)

Gụọ isiokwu bụ́ “Ọtụtụ Ihe Nọ Na-enye M Nsogbu n’Obi” ka ị hụ otú otu onye na-enupụburu ọchịchị isi si chọta ihe ọ na-achọ.

“Baịbụl Na-agbanwe Ndụ Ndị Mmadụ” (Ụlọ Nche, Jenụwarị 1, 2012)