Olee Mgbe Alaeze Chineke Ga-achịwa Ụwa?

OLEE IHE NDỊ JIZỌS KWURU NA HA GA NA-EME?

Jizọs sịrị: “Mba ga-alụso mba ọzọ agha, alaeze ga-alụsokwa alaeze ọzọ agha. A ga-enwe oké ala ọma jijiji, ụkọ nri na ọrịa na-efe efe ga-adịkwa n’ebe dị iche iche.” (Luk 21:10, 11) Ọ bụrụ na ihe ndị a niile ana-eme n’otu mgbe, ha ga-egosi n’eziokwu na “Alaeze Chineke dị nso.” Ihe ndị a hà emewela ugbu a n’otu mgbe, hà na-emekwa n’ụwa niile? Lee ihe ndị a chọpụtara.

1. AGHA

N’afọ 1914, agha a na-ahụtụbeghị ụdị ya dara. Ndị na-akọ akụkọ ihe mere eme na-ekwukarị na ọ bụ n’afọ 1914 ka ọtụtụ ihe gbanwere n’ụwa n’ihi na ọ bụ n’afọ ahụ ka a lụrụ agha mbụ zuru ụwa ọnụ. Ọ bụ n’agha ahụ ka a malitere iji ọtụtụ ngwá agha ndị jọgburu onwe ha alụ agha, dị ka ụgbọala na-atụ bọmbụ, ụgbọelu na-atụ bọmbụ, égbè na-awụpụ mgbọ, kemikal ọjọọ a na-agbanye n’ikuku, na ngwá agha ọjọọ ndị ọzọ. E mechakwara lụọ agha ụwa nke abụọ, nke a nọ na ya mepụta ngwá agha ọgwụrụ mba ma jiri ya gbuo ọtụtụ ndị. Kemgbe afọ 1914, ụmụ mmadụ ka na-alụ agha n’ebe dị iche iche. Agha ndị ahụ ataakwala isi ọtụtụ nde mmadụ.

2. ALA ỌMA JIJIJI

Otu akwụkwọ a na-akpọ Britannica Academic kwuru na n’afọ ọ bụla, a na-enwe ihe dị ka otu narị ala ọma jijiji ndị nwere ike “imebi ihe buru ibu.” Otu nchọpụta e mere n’Amerịka kwukwara na “ihe ndị merela eme (kemgbe ihe dị ka afọ 1900) gosiri na a ga na-enwe ihe dị ka oké ala ọma jijiji iri na isii n’afọ ọ bụla.” Ụfọdụ ndị nwere ike ikwu na ihe mere o ji dị ka à na-enwezi ọtụtụ ala ọma jijiji bụ n’ihi na e nweela ngwá ọrụ ọgbara ọhụrụ ndị e ji amata gbasara ala ọma jijiji. Ma nke bụ́ eziokwu bụ na n’ụwa niile, oké ala ọma jijiji na-akpatara ọtụtụ ndị ahụhụ, na-atakwa isi ọtụtụ ndị karịa otú ọ na-emebu.

3. ỤKỌ NRI

A na-enwe ụkọ nri n’ụwa niile n’ihi agha, mpụ, nrụrụ aka, ụkọ ego, ileghara ọrụ ugbo anya, ma ọ bụkwanụ ileghara ihe ndị nwere ike ịkpata ọdachi anya. Ngalaba Òtù Mba Ụwa nke Na-ahụ Maka Ihe Oriri kwuru ihe ha chọpụtara banyere ụkọ nri n’afọ 2018. Ha sịrị: “N’ụwa niile, narị nde mmadụ asatọ na iri abụọ na otu (821,000,000) na-anọ agụụ. Otu narị nde na iri abụọ na anọ (124,000,000) n’ime ha anaghịdị ahụ tụrụ rachaa.” Erighị ezigbo nri so n’ihe na-akpata ọnwụ ụmụaka dị ihe dị ka nde atọ na otu narị puku (3,100,000) kwa afọ. N’afọ 2011, ọ bụ otu erighị ezigbo nri a kpatara ọnwụ ihe dị ka ọkara ụmụaka niile nwụrụ n’ụwa niile.

4. ỌRỊA NA-EFE EFE

Ngalaba Òtù Mba Ụwa nke Na-ahụ Maka Ahụ́ Ike kwuru, sị: “Malite n’afọ 2000, ọtụtụ ajọ ọrịa na-efe efe bụzi okwu a kpụ n’ọnụ. Ọrịa ndị a rịara n’oge gara aga, dị ka ọgbụgbọ na ọnyụnyụ na ịba ọcha n’anya alọghachila, ndị nke ọhụrụ apụtakwala, dị ka ọrịa mmịnwụ, oké ahụ́ ọkụ, ọrịa MERS, Ebola na ọrịa Zika.” Nke kacha ọhụrụ n’ime ha bụ ọrịa koronavaịrọs. Ọ bụ eziokwu na ndị sayensị na ndị dọkịta amatala ọtụtụ ihe banyere ọrịa dị iche iche, ma ha enwebeghị ike ịgwọ ọrịa niile.

5. OZI ỌMA A NA-EKWUSA N’ỤWA NIILE

Jizọs kwuru ihe ọzọ so n’ihe ndị a ga-eji ama na Alaeze Chineke adịla nso. O kwuru, sị: “A ga-ekwusakwa ozi ọma Alaeze Chineke n’ebe niile n’ụwa ka ọ bụụrụ mba niile àmà, mgbe ahụkwa ka ọgwụgwụ ga-abịa.” (Matiu 24:14) Ka a na-enwe nsogbu dị iche iche n’ụwa, ihe karịrị nde mmadụ asatọ (8,000,000) si ná mba niile na-ekwusa ozi ọma Alaeze Chineke na narị mba abụọ na iri anọ (240). Ha na-ekwusa ya n’ihe karịrị otu puku (1,000) asụsụ. Ụdị ihe a emetụbeghị mbụ.

OLEE OTÚ IHE NDỊ A NA-EMENỤ SI GBASA ANYỊ?

Ihe ndị ahụ niile Jizọs sị na a ga-eji ama na Alaeze Chineke adịla nso na-emecha taa. Olee ihe mere anyị kwesịrị iji chebara ihe ndị a echiche? Ọ bụ maka na Jizọs kwuru, sị: “Mgbe unu hụrụ ka ihe ndị a na-eme, maranụ na Alaeze Chineke dị nso.”​—Luk 21:31.

Ihe ndị ahụ Jizọs kwuru a ga-eji ama na Alaeze Chineke dị nso na oge Baịbụl kwuru ihe ndị ahụ ga-eji eme na-enyere anyị aka ịmata na Chineke mere ka Alaeze ya malite ịchị n’eluigwe n’afọ 1914.a N’oge ahụ, o mere ka Ọkpara ya bụ́ Jizọs Kraịst bụrụ Eze. (Abụ Ọma 2:2, 4, 6-9) N’oge na-adịghị anya, Alaeze Chineke ga-amalite ịchị ụwa, ọ ga-ebibi ọchịchị ndị ọzọ niile ma mee ka ụwa ghọọ paradaịs, ebe ụmụ mmadụ ga-ebi ruo mgbe ebighị ebi.

Jizọs gwara anyị ka anyị na-ekpe ekpere, sị: “Ka alaeze gị bịa. Ka uche gị meekwa n’ụwa, dị ka ọ na-eme n’eluigwe.” (Matiu 6:10) N’oge na-adịghị anya, ihe a ọ gwara anyị na-ekpe n’ekpere ga-emezu. Ma, gịnị ka Alaeze Chineke na-eme kemgbe ahụ ọ malitere ịchị n’eluigwe n’afọ 1914? Oleekwa ihe ndị anyị na-atụ anya na Alaeze ahụ ga-eme mgbe ọ ga-amalite ịchị ụwa?