Jizọs Ana-akụzi Ihe Ka Ha Na-aga Jeruselem

Jizọs nọtụrụ ogologo oge na Galili bụ́ ebe ndị mmadụ na-ege ya ntị karịa otú ha si ege ya na Judia. E wezụgakwa nke ahụ, mgbe ọ gwọrọ otu nwoke ahụ́ na-adịghị na Jeruselem n’Ụbọchị Izu Ike, “ndị Juu malitere ịchọsi ike ka ha gbuo ya.”—Jọn 5:18; 7:1.

A nọzi n’ọnwa Septemba ma ọ bụ Ọktoba n’afọ 32, oge a ga-eji eme Ememme Ụlọ Ndò eruwekwala. A na-eme ememme a abalị asaa, nwezie mgbakọ dị nsọ n’abalị nke asatọ ya. Ememme a na-egosi na oge ọrụ ubi nke afọ ahụ agwụla. Ọ bụkwa oge e ji aṅụrị ọṅụ nakwa oge e ji enye Chineke ekele.

Ụmụnne Jizọs, ya bụ, Jems, Saịmọn, Josef, na Judas gwara ya, sị: “Hapụ ebe a gawa Judia.” Jeruselem bụ ebe ndị mmadụ na-agbakọta efe ofufe na Judia. N’oge ememme atọ ndị Juu na-eme kwa afọ, Jeruselem na-ejupụta na mmadụ. Ụmụnne Jizọs gwara ya, sị: “Ọ dịghị onye na-eme ihe ọ bụla na nzuzo mgbe ọ chọrọ ka ọha mara ya. Ọ bụrụ na ị na-eme ihe ndị a, gosi ụwa onwe gị.”—Jọn 7:3, 4.

N’eziokwu, ụmụnne Jizọs a “enweghị okwukwe” na Jizọs bụ Mesaya. Ma, ha chọrọ ka ndị ga-agbakọta maka ememme ahụ hụ ọrụ ebube ndị Jizọs na-arụ. Ma, Jizọs ma nsogbu ihe ahụ ha na-asị ya mee nwere ike ịkpatara ya. Ọ gwara ha, sị: “Ụwa enweghị ihe mere ọ ga-eji kpọọ unu asị, ma ọ kpọrọ m asị, n’ihi na m na-agba àmà banyere ya na ọrụ ya dị njọ. Gawanụ ememme ahụ; agawabeghị m ememme a, n’ihi na oge m a kara aka eruchabeghị.”—Jọn 7:5-8.

Ụmụnne Jizọs mechara soro ndị ọzọ na-aga Jeruselem gawa. Mgbe abalị ole na ole gachara, Jizọs na ndị na-eso ụzọ ya si ụzọ ọzọ ebe ndị mmadụ na-agaghị ahụ ha gawa. Ha si ụzọ Sameria, kama isi ụzọ nke dị nso n’Osimiri Jọdan, nke ndị mmadụ na-esikarị. Jizọs zipụrụ ụfọdụ ndị na-eso ụzọ ya ka ha gaa kwadebere ha ebe ha ga-anọ na Sameria n’ihi na ha ga-anọbọ chi n’ebe ahụ. Ma, ndị ebe ahụ jụrụ ịnabata ha n’ihi na ha chọpụtara na Jizọs na-aga Jeruselem maka ime ememme ndị Juu. Ihe a mere ka iwe bịa Jems na Jọn, ha ajụwa Jizọs, sị: “Onyenwe anyị, ị̀ chọrọ ka anyị gwa ọkụ ka o si n’eluigwe daa wee laa ha n’iyi?” (Luk 9:54) Ma, Jizọs baara ha mba maka ikwudị ụdị ihe ahụ ekwu.

Ka ha nọkwa na-aga, otu onye odeakwụkwọ bịakwutere Jizọs, sị ya: “Onye Ozizi, m ga-eso gị gaa ebe ọ bụla ị chọrọ ịga.” Jizọs sịrị ya: “Nkịta ọhịa nwere ọgba, anụ ufe nke eluigwe nwekwara akwụ́, ma Nwa nke mmadụ enweghị ebe ọ ga-atọgbọ isi ya.” (Matiu 8:19, 20) Ihe Jizọs na-ekwu bụ na odeakwụkwọ ahụ ga-ata ahụhụ ma ọ bụrụ na ọ chọrọ ịghọ onye na-eso ụzọ ya. Ma, ọ dị ka odeakwụkwọ ahụ dị okomoko. Ọ gaghị achọ ịta ahụhụ dị́ n’ịbụ onye na-eso ụzọ Jizọs. Ihe a kwesịrị ime ka onye ọ bụla n’ime anyị jụọ onwe ya, sị: ‘M̀ ji obi m niile chọọ ịbụ onye na-eso ụzọ Jizọs?’

Jizọs gwara nwoke ọzọ ha hụrụ n’ụzọ, sị: “Bụrụ onye na-eso ụzọ m.” Nwoke ahụ zara ya, sị: “Hapụ m ka m buru ụzọ gaa lie nna m.” Ma, Jizọs ma nke bụ́ eziokwu gbasara nwoke ahụ. Ọ bụ ya mere o ji sị ya: “Hapụ ndị nwụrụ anwụ ka ha lie ndị ha nwụrụ anwụ, ma gị onwe gị, gaa kwusaa alaeze Chineke n’ebe niile.” (Luk 9:59, 60) Ọ ga-abụ na nna nwoke ahụ anwụbeghị n’ihi na a sị na ọ nwụọla, ọ ga-esi ike nwa ya nwoke ịnọ ebe a, ya na Jizọs ana-akparịta ụka. O doro anya na nwoke a adịbeghị njikere ime ka ihe gbasara Alaeze Chineke bụrụ ihe kacha ya mkpa ná ndụ.

Ka ha na-agakwa, nwoke ọzọ bịakwutere Jizọs sị ya: “M ga-eso gị, Onyenwe anyị; ma hapụgodị m ka m sị ndị ezinụlọ m ka e mesịa.” Ma, Jizọs sịrị ya: “Ọ dịghị onye ọ bụla nke jidere aka n’ọ́gụ̀ ma na-ele anya n’ihe ndị dị n’azụ nke kwesịrị nnọọ ekwesị maka alaeze Chineke.”—Luk 9:61, 62.

Onye ọ bụla chọrọ ịbụ onye na-eso ụzọ Jizọs kwesịrị itinye uche ya niile n’ozi ọma Alaeze Chineke. Ọ bụrụ na onye ji ọ́gụ̀ na-akọ ihe ana-ele anya ebe ọzọ, ihe ahụ ọ na-akọ nwere ike ọ gaghị adị mma n’anya. Ọ bụrụkwa na o dowe ọ́gụ̀ ya ma lewe anya n’azụ, ọrụ ya ga-agbawa ọnyụpa. Otú ahụ ka ọ dịkwa onye ọ bụla na-ele anya n’azụ ka ọ hụ ihe dị n’ụwa ochie a. Onye ahụ ga-esi n’ụzọ ahụ na-eduba ná ndụ kpafuo.