ANG ỌJẸ́JẸ 18

Mẹ Ang Inyeewe Jẹ Angịnyị

1 Ala ịKọrịntị 9:19-23

ẸLA ỌLẸ KÁ KA HỌ: Họ ká angịlẹ kị wẹẹ ke ụrụ wo lang a kụ irya kpori-kpori ju ẹla ọlẹ ká wẹẹ ya, chajị kị ka jẹ́ nyori ịwa nyị jẹ́ ang ọkpọngchị ọlẹ kọ́ ka daa ụbwọ.

JAABWỌ KÁ KA BWU HỌ ỊNYỊ:

Kpịtịya nya ang ọlẹ ká angịnyị jẹ́ ene. Ọkọkọ nyọka ma ẹla ọlẹ kị jẹ́ ene ya myịmyị, daa ụbwọ nyọka yẹ ẹla ọọwa bwu ụgbẹyị ọkịla.

Ya ẹla chagaga ụka ká pwụ ẹga nya ang ọlẹ ká angịnyị jẹ́ ene-ene. Ma, ụka ká tị juwa ya ẹla u-uhye nya ang ọlẹ kị jẹ́ ene ka, à ya ẹla dụmwọ-dụmwọ.
Wa ụpwụ yẹẹyẹẹ bala ọ-kụ irya kpori-kpori. Kori kọ chịkpẹẹ hang, ya ẹla u-uhye nya ẹla ịlẹ ká angịịwa jẹ́ yẹẹyẹẹ-ka lee ẹla ịlẹ kị juwa họ, nyọka gba ẹhị nya ẹla kpehe. Kụ irya kpori-kpori u-uhye nya ẹla ọlẹ ká wẹẹ ka ya bala abwọlẹ ká ẹla ọọwa bala ẹla ị-chụ pwokwita ịlẹ ká tị tịtọ nyọka gba kpehe, da ori wu awụlẹ.

Jaabwọ ká wee kụ ẹhị yẹ ẹla ọlẹ ká wee ka ya, tọ ịlọng ịtọ ẹla lala ịlẹ, nyọka dang ụbwọ kụ irya kpori-kpori, ‘ịyẹ tị́, ịyẹ tị́ du, ụka oyina tị́, oowo tị́, bala anyị tị́.’ Ya ẹla la ila ọchịchị bwula ọ-tọ ịtọ ẹla bala ọ-wẹ ịtọ ẹla ịwẹ ụka ká juwa ya ẹla.
Mẹjẹ nyori ẹla ọlẹ ká wee ya ju apyobwuna yẹẹyẹẹ. Ya jaabwọ ká ẹla ọlẹpwụ nya ịBayịbụụ ka jẹ́-ẹ da angị ke ụrụ wo lang ụbwọ ẹ-ẹpwụ nya ahyẹẹnụ ọnyị myị́ ọnyị. Ya ẹla u-uhye nya iwe-ahụrụ, abwẹla bala ẹla ịdatị-datị ịlẹ ká angịnyị họ, kị tị baba ha angị ke ụrụ wo lang ịnyịnyị.