Ọháha a Gung Gbịla Nyọka Kịnyaa la o-Ya Ẹla nya Ohe!

1. Ịyẹ ahị tị́ jẹ́ bwụ ọjịra-jịra ọ-la ọmyịmyị nya ẹka nya 2023?

ỤKA ká ọjịra-jịra ọ-la ọmyịmyị nya ẹka nya 2023 ka cheju,a ahị ye ọ-nwụhọ ịkpịpyọ-kpịpyọ u-uhye nya ọmyịmyị nyahị ịhyẹ bala ẹla o-ya dodehe ịhyẹ u-uhye nya ẹrụ ọnyịịla ọ-kpa pyẹ. Ọ-chụ pwokwita, ahị wẹ ka jẹ́ nyori, angịhyẹ ka la iwe nyọka chẹkpẹ ju angịnyị nya iJihova ụka ká ịBabịlọn ọtụka a ta ayịreji kpa. Ahị wẹ ka jẹ́ nyori la Ọya Ọkụrụ Ọhọhẹ 2023, áhị ka baba nyọka da ụkụrwọ ọlẹ kahị họ ẹ-ẹpwụ nya ẹrụ ọnyịịla ọ-kpa pyẹ ju kaka. Ọyẹda ịwẹ du ka ẹrụ ọnyịịla nyahị á ju apyobwuna, lee o-ju agaga ẹ-ẹpwụ jaabwọ kọ la ene kaka? Ehe, ịnyị ọ la ka!

2. Ịyẹ tị́ du ká ẹrụ ọnyịịla ọ-kpa pyẹ nyahị wẹẹ ju agaga gụ olene ẹnụ myị́ ẹnụ? (ỊMakị 13:10)

² Jaabwọ ká ahyẹẹnụ wẹẹ chịpwụrụ, ịnyị ẹrụ ọnyịịla ọ-kpa pyẹ à wẹẹ ju agága gụ olene lẹ. Ịyẹ tị́ du? Chajị ụka ọlẹ kọ hi ene nya ayịreji á la gbuu kaka. Kụ ẹhị yẹ ẹla ọlẹ ká iJisọsị ya neeji u-uhye nya ẹrụ ọnyịịla ọ-kpa pyẹ ụka ọhyẹẹkpẹ lẹẹ wẹẹ. (Wa ịMakị 13:10.) Jaabwọ kọ la ụ-ụpwụ nya ịMatiyu, iJisọsị ya nyori ị ka kpa ẹrụ ọnyịịla chajị nya ịpyị-adịrahụ nya Ohe Oluhye pyẹ ẹ-ẹga myị́ ẹga nya odehe ọlẹ ene ká “ọmyịmyị” nya odehe ka pwụ eji. (Mat. 24:14) Omyi ẹla ọwẹ wẹẹ ya ẹla rụ ocheju gbang-gbang nya odehe nya ọkwọ ọlẹ kọ ji ụbwọ nya Olegu Onyobyi. IJihova hu “ẹnụtụrụ lee awa” ọlẹ ká ang ịwẹ wuu ka họ nọ lẹ. (Mat. 24:36; 25:13; Ụkụr. 1:7) Ahyẹẹnụ ọnyị myị́ ọnyị wẹẹ kpahị tụ ju ụka ọọwa chwẹẹ gụ́ olene. (Rom. 13:11) Gbee ka ọmyịmyị nya odehe ka pwu eji, ahị ka kịnyaa la ọ-ya ẹla nya Ohe.

3. Ịyẹ a tị́ kaa gụhị gbịlaa nyọka ya ẹla nya Ohe?

³ Jaabwọ kahị wẹẹ kụ irya u-uhye nya ẹrụ ọnyịịla ọlẹ kahị kaa kpa pyẹ, ịtọ ọkpọnchị ọhẹ lẹẹ kahị baba nyọka kpa wụla ịlọhị yẹ: Ịyẹ tị́ du kahị kaa kpa ẹrụ ọnyịịla pyẹ? Nyọka chọọ kpii, ọháha ịnyị. Ụkụrwọ nya ẹla Ohe ọyaya ọlẹ kahị kaa họ mẹjẹ nyori ahị la ọháha. Ẹrụ ọnyịịla ọ-kpa pyẹ háahị, angịnyị háahị, ọlẹ kọ tị gụ wuu ri, iJihova bala ẹnyị nyamwụ háahị. Ahị kụ ẹhị yẹ ọnyọnyọọnyị nya ala ịwẹ wẹẹ.

AHỊ KAA YA ẸLA NYA OHE CHAJỊ ẸRỤ ỌNYỊỊLA Ọ-KPA PYẸ HÁAHỊ

4. Ányị ọ tị́ kaa lahị ụka kahị wo oja ọnyịịla?

⁴ A kpịtịya nya ụka ọhẹ ọlẹ ká wo ojá ọnyịịla wẹẹ? Ọhẹka ọngọhẹ ẹ-ẹpwụ nya ugbịyegu nyang ma ọnyị onyeewe lee à ye ụkụrwọ ụma ọlẹ ká tọ kpanga. Ọ ka chịng kpakpa nyọka ya oja ọnyịịla ọwẹ ju alugbiyegu lee aligu nyang. Ịnyịnyị ọ lang nyọlẹ ká wo oja ọnyịịla ọlẹ kọ há gụ wuu, ko ri oja nya Ịpyị-Adịrahụ nya Ohe lẹẹ?

5. Ányị ọ tị́ lang ụka ka jẹ́ ẹlịlẹhị ịla Omyi Ẹla nya Ohe bwaa? (Yẹ ifoto ịnyịnyị.)

⁵ Kụ irya kẹkpẹ ká yẹ jaabwọ kọ lang nyọlẹ ka jẹ́ ẹlịlẹhị ọla ịBayịbụụ bwaa wẹẹ. À wẹ ka jẹ́ nyori a há Adang ọlepwoohe yẹẹyẹẹ, ọ tịtọ ká ka ri ọngọhẹ ẹ-ẹpwụ nya ugbịyegu nya angị gbịgba họọ, ọ chehe nyọka myị ajuju bala akama ịlẹ kahị wẹẹ yẹ, a tị ka la iwe nyọka yẹ aanang ịlẹ kị byi hing ẹ-ẹpwụ nya igu myimyi ụ-ụwa odehe onyeewe—bala ẹlịlẹhị ịkịla lụmẹ-lụmẹ. (Mak. 10:29, 30; Jọn. 5:28, 29; Rom. 8:38, 39; Ọwụ. 21:3, 4) Ẹlịlẹhị ịwẹ kpụng ugbodu nyii. (Luk. 24:32) Ẹlịlẹhị ịịwa háng yẹẹyẹẹ, à tị tịtọ nyọka ya je ọng myị ọng wụụ!—Kụ ẹhị yẹ iJeremaya 20:9 ịnyịnyị.

6. Ẹlịyẹ a tị́ jị́ bwụ oja nya Ernest bala Rose?

⁶ Kụ ẹhị yẹ oja ọlẹ wẹẹ. Adịda nya ọọnahị ọlẹng ọhẹ ká ẹnyị nyamwụ ri Ernestb gbu hyoo ụka kọ gu ẹka iwo. Ernest yẹkẹẹ: “M̀ kaa tọ ịlọm wo: ‘Epwoohe ọ rụ ka wẹ ẹẹ? Lee ịnyamwụ tị́ myị́ gboyi myị́ oyi ị-ịwẹ lẹ?’ Ụka kam yẹ anyị ịlẹ kị la adịda juwa, ọ kaa mam ma.” Ernest kaa ka iworu nya adamwụ ụka myị ụka, ya arụụ kụ eeji bọọba, lẹ ọ kaa raabwọ yẹkẹẹ: “Chuchu, Ohe, m̀ tịtọ kam ka jẹ́ ẹga ọlẹ ka adam ji.” Nyọlẹ kọ la ẹka 17 nyọlẹ ka adamwụ gbu kpa, Alibeenu nya iJihova tọ Ernest wo kori kọ ka jẹ́ ịBayịbụụ, ọ tị myị ahyaahị. Ọ chị ọkẹkẹnị yẹẹyẹẹ nyọlẹ kọ wẹ ka jẹ́ nyori egu nyị́ jẹ́ ingịngịhyẹ kaka, jaabwọ ká ọngịnyị kaa nune pyịị, bala o-ri ịBayịbụụ chehe nya owuleji bwu oligu gbe ijuju. (Ọngọ. 9:5, 10; Ụkụr. 24:15) Ọ ye ọwẹwẹ nya ịtọ nyamwụ ịlẹ kị kaa ri olo họọ lụka ọtata ugbẹnyị lẹ! Ernest chị ọkẹkẹnị yẹẹyẹẹ u-uhye nya ẹlịlẹhị ịlẹ kọ wẹẹ jẹ́. Rose ahụ nyamwụ yẹ julọọ ẹ-ẹpwụ nya ang ọjẹ́jẹ, ọwa ịnyịnyị tị ya jaabwọ ka ang ọlẹ kọ wẹẹ jẹ́ kpọọ ịpyọ. La ẹka nya 1978 ị hu enyi Ohe. Ị tị kpa ẹlịlẹhị ọnyịịla ọwẹ ya je ala ugbiyegu, aligu nyaa tụ angịlẹ kị tịtọ nyọka wo. Chajị nya ila ọchịchị nyaa, Ernest bala Rose ahụmwụ jẹ da angịnyị gụ 70 ụbwọ wẹ ka hu enyi Ohe lẹ.

7. Ịyẹ tị́ kaa họ ụka ká ẹlịlẹhị ịla ịBayịbụụ a da ụtẹ yeji ẹ-ẹpwụ ọkịlẹtụ nyahị? (ILuku 6:45)

⁷ Kori ká ẹlịlẹhị ịla ịBayịbụụ a da ụtẹ yeji ẹ-ẹpwụ nyahị lẹ aalẹ, áhị ka jẹ́-ẹ ya ọnụ ba awụlẹ ẹnẹnẹhẹ kaka. (Wa iLuku 6:45.) Ahị ka jẹ́-ẹ ya lala angịjụgbẹyị nya iJisọsị ịla ụka onyogo ịlẹ kị yẹkẹẹ: “Áhị́ ka jẹ́-ẹ tụ ọnụ nyahị pịrị myị́, hi ọ-ka juwa kpa ya ẹla dodehe rụ́ iJisọsị je angịnyị u-uhye nya ang ịlẹ kahị yẹ lẹhị nya ịlọhị bala ọ-kpa ụrụ nyahị wo pyii kaka.” (Ụkụr. 4:20) Ẹlịlẹhị háahị yẹẹyẹẹ du kahị kaa tịtọ nyọka ya je ọng myị́ ọng jaabwọ kọ ka chịkpẹẹ myị́.

AHỊ KAA YA ẸLA NYA OHE CHAJỊ ANGỊNYỊ HÁAHỊ

8. Ịyẹ à tị́ kaa gụhị gbịlaa nyọka ya ẹrụ ọnyịịla je angịkịla? (Yẹ akpa ọlẹ ko ri “Angịnyị a Háng—Họ kị Ri Angịjụgbẹyị.”) (Yẹ ifoto ịnyịnyị.)

⁸ Lala iJihova bala iJisọsị, ahị la ọháha ẹ-ẹga nya angịnyị. (Etu 8:31; Jọn. 3:16) Angịlẹ kị ‘jẹ́ Ohe Oluhye ka’ bala angị ‘la ẹhị ọrịrịị-rịrị ọnyịịla ka’ kaa lahị ahyẹẹrwẹrwa. (Efe. 2:12) Akama ịla ọhịhị nya angịnyị chaa abwọ kpụ ẹpwụ nya ụjẹ okporikpori, ma ahị tị la ori ọlẹ kahị ka jẹ́-ẹ ya gbịlaa kpehe, kọ ri oja ọnyịịla nya Ịpyị-Adịrahụ nya Ohe. Ọháha bala ahyẹẹrwẹrwa ọlẹ kahị la ẹ-ẹga nya angịlịnyị kaa gụhị gbịlaa nyọka họ ịngịngịhyẹ ọlẹ kahị ka jụ họ myị́ nyọka kpa ẹrụ ọnyịịla waa ọyị. Oja ọnyịịla ọwẹ ka jẹ́-ẹ ya ẹhị ọrịrịị-rịrị haa, nyọka la ọhịhị ọnyịịla pwụ ẹgẹhẹ lẹẹlẹẹ, bala ọ-ka la iwe nyọka yẹ ọhịhị ọlam-ọlam—kọ ri “ọhịhị ọmyịmyị-ka”—ẹ-ẹpwụ nya odehe onyeewe nya Ohe.—1 Tim. 6:19.

9. Ọna nya ẹlịyẹ ahị tị́ kaa da angịnyị gbe ijuju? Ịyẹ tị́ du kahị ka họ ịnyị? (Isikẹlụ 33:7, 8)

⁹ Ọháha ọlẹ kahị la ẹ-ẹga nya angịnyị à dudu kahị ka ya jaa nyori ayịreji ọtata nya odehe ọtịpyọ ọlẹ ju chwẹẹ lụmẹ lẹ̀ lẹ. (Wa Isikẹlụ 33:7, 8.) Angịnyị kaa lahị ahyẹẹrwẹrwa tụ alugbịyegu nyahị ịlẹ kị jẹ́ iJihova lẹka. Ịrụ nya angịnyị wẹẹ họ ụkụrwọ nya ahyẹẹnụ nyaa la ọ-jẹ́ ang ọlẹ kọ wẹẹ warị ka. Ang ọọwa ri “akama ọtụka okpelego lụmẹ kaka kpoye, ọlẹ ká akama ọtụka ọlịnyị á ji ẹnẹnẹhẹ lẹka bwu ọmwụ ọdada nya odehe ọlẹ wuu. Akama ọtụka ọlịnyị ọkịla á tị ka ji gu ọwẹ kaka ịnyịnyị.” (Mat. 24:21) Ahị tịtọ kị ka jẹ́ ang ọlẹ kọ ka họ ụka nya eje ọlala—ịgba ọgbagba nya ọnọọkịla ka ta ayịreji, ene ká odehe ọtịpyọ ọlẹ ka tọọda ụka nya Amagẹdọn. (Ọwụ. 16:14, 16; 17:16, 17; 19:11, 19, 20) Abwọ ọrịrị nyahị ri ịrụ nya angịnyị a ke ụrụ lahị kị wẹ ka gbịgba ha iJihova lẹẹlẹẹ mẹ. Ma angịlẹ kị tị myị ke ụrụ lahị lẹẹlẹẹ ka, tụ alugbiyegu nyahị bẹẹ?

10. Ịyẹ tị́ dudu kọ la agaga lẹẹlẹẹ nyọka ya ang ọlẹ kọ wẹẹ ka họ ị-ịlahị je angịnyị?

¹⁰ Jaabwọ kị dọọ wụlẹ ẹ-ẹpwụ nya ang ọjẹ́jẹ ọlẹ kọ jene nya ọlẹ, ọ ka ri irya nya iJihova myị́ nyọka kpa ọchịda wẹ angịlẹ kị yẹ irya da ụka kị yẹ ayịreji ọtata nya ịBabịlọn Ọtụka. Kori ko ri ịnyị aalẹ, ụka ọlẹ à ju agaga gụ wuu nyọka ya jaa ang ọlẹ kọ wẹẹ wẹ ị-ịlahị lẹlẹ. Kụ irya nya ẹla ọlẹ wẹẹ: Ang ọnyị kahị mẹjaa lẹẹlẹẹ ị ka kpịtịya ụka ọọwa lẹ. (Kụ ẹhị yẹ Isikẹlụ 33:33 ịnyịnyị.) Ị ka kpịtịya nya ang ịlẹ kahị mẹjaa, du kọ ka gwaa gbịlaa nyọka yẹjulahị ẹ-ẹpwụ nya ịgba ọgbagba nya iJihova ene ka ụka chịpwụrụ myị́. Lala ọngọ kpẹhị rịrị alagba ọla iFilipayị ọlẹ kọ yẹ irya da ụka ka ‘ọpyị ọ-hụ́ jigi-jigi ọtụka-ọtụka kpeji’ ọ chịkpẹẹ myị́ ká angịlẹ kị myị ke ụrụ lahị lẹẹlẹẹ ka ka ye irya da ụka ká ayịreji nya ịBabịlọn ọtụka ka hụ odehe wụụ jigi-jigi.—Ụkụr. 16:25-34.

AHỊ KAA YA ẸLA NYA OHE CHAJỊ IJIHOVA BALA ẸNYỊ NYAMWỤ HÁAHỊ

11. Ányị ahị tị́ kaa bwu ya ogbo, ihi, bala ọngịrị ha iJihova? (Ọwụrụụ-wụrụ 4:11) (Yẹ ifoto ịnyịnyị.)

¹¹ Ang ọhọhẹ ọlẹ kọ dudu kahị kaa ya ẹla nya Ohe gụgụụgụ à ri ọháha ọlẹ kahị la ẹ-ẹga nya iJihova bala ẹnyị ọla ịgọgọ nyamwụ ẹẹ. Ahị kaa yẹ ẹrụ ọnyịịla ọ-kpa pyẹ lala ụgbẹyị ọhẹ ọlẹ kahị kaa ya ogbo ha Ohe nyahị. (Wa Ọwụrụụ-wụrụ 4:11.) Ahị wụụ myị nyori iJihova a chịla nyọka ye ogbo bala ihi bala ọngịrị wuu lẹ. Ahị kaa ya ogbo bala ihi họọ ụka kahị họ ka angịkịla á jẹ nyori ọwa ri “Ọngọlẹ ká họ ang myị́ ang wuu” lẹ, bala o-ri ọwa à ya ọhịhị hahị du kahị jam la ọhịhị lẹ. Ahị tị kaa ya ọngịrị nyahị họọ ụka kahị kpa ọngịrị, ụka, bala ang ọlala nyahị họ ụkụrwọ nya ẹrụ ọnyịịla ọ-kpa pyẹ jaabwọ kahị ka jụ họ myị́. (Mat. 6:33; Luk. 13:24; Kol. 3:23) Ọ kaa háahị nyọka ya ẹla nya Ohe, chajị Ohe háahị. Ahị tị kaa tịtọ nyọka ya ẹnyị nyamwụ je angịnyị, bala ụma nya Ohe ọlẹ ko ri. Ịyẹ tị du?

12. Ányị ahị tị́ kaa ya ogbo ha iJihova ẹ-ẹpwụ nya ẹrụ ọnyịịla ọ-kpa pyẹ nyahị?

¹² Ọháha ọlẹ kahị la ẹ-ẹga nya iJihova à dudu kahị kaa chị ịgọgọ ju ẹnyị nyamwụ lẹ. (Mat. 6:9) Ahị tịtọ nyọka ya je angịnyị nyori ịnịịkịla ịlẹ ká Olegu Onyobyi me ba iJihova á rị ẹlịlẹhị ka. (Ọmwụ. 3:1-5; Job. 2:4; Jọn. 8:44) Ụka kahị ja kpa ẹrụ ọnyịịla pyẹ, ọ kaa háahị nyọka ya je ọngọ myị́ ọng ọlẹ kọ ka myi-ị ke ụrụ, ụma nya ọngọlẹ ká Ohe ri bala abwẹla ịlẹ kọ la. Ahị tịtọ ká angịnyị wuu ka jẹ́ nyori abwẹla nyamwụ ọlẹ kọ gụgụ wuu à ri ọháha ẹẹ, nyori eji ọkpakpa nyamwụ la kpẹẹkpẹẹ bala ọ-la kpakpa, bala o-ri Ịpyị-Adịrahụ nyamwụ ja ka chị akama nyahị eju bala ọ-ka kpa okpunyi bala ọkẹkẹnị wẹ angịnyị ehe wụụ. (Eje. 37:10, 11, 29; 1 Jọn. 4:8) Ụka kahị ya ẹla ọnyịịla u-uhye nya ẹnyị nya iJihova ẹ-ẹpwụ nya ẹrụ ọnyịịla ọ-kpa pyẹ nyahị, ahị wẹẹ chị ịgọgọ ju ẹnyị nyamwụ. Ahị tị ka chị ọkẹkẹnị ịnyịnyị chajị ahị wẹẹ họ ang ọlẹ kahị baba nyọka họ lala ọlibeenu nya iJihova. Ịyẹ tị du kahị ya nyị́?

13. Ịyẹ tị́ du kọ ri ihi ọtụka nyọka ri Alibeenu nya iJihova? (Ayịsaya 43:10-12)

¹³ IJihova wụrụhị nyọka ri “alibeenu” nyamwu. (Wa Ayịsaya 43:10-12.) La ẹka ịmanyị-manyị kẹkpẹ, ileta o-bwu ẹga nya Angị Kpẹhị Rịrị Ogu ya nyori: “Ihi ọlẹ kahị la kọ gụgụ wuu à ri ọ-ka wụrụhị alibeenu nya iJihova lẹlẹ.”c Ịyẹ tị́ du kahị ya ịnyị? Kụ ẹhị yẹ ọ-chụ pwokwita ọlẹ wẹẹ. Kori ká baba nya ọngịnyị ọ-ka ring ibeenu ẹ-ẹga ọ-la eje, ọ la gbagbịla nyori à ka chụ ọngọlẹ ka jẹ́ bala ọ-dahịhile yẹẹyẹẹ, ọngịnyị ọlẹ kọ ya ẹla kị ka myị jụ ẹla ọọwa bala ọ-ka jẹ́-ẹ rụng ịgba. Nyọlẹ ká iJihova chụhị nyọka ri ibeenu nyamwụ wẹẹ, ọ mẹjẹ nyori ọ jẹ́ẹhị yẹẹyẹẹ, ọ tị dahịhileehị nyori ahị nyị ka jẹ́-ẹ ri ibeenu nyọwa nyori ọwa ụbwọọmwụ à rị Ohe nya ịlẹhị lẹ. Ihi ọtụka o ri hahị nyọka ri ibeenu nyamwụ lẹ, ọọwa tị dudu kahị kaa kpa ụka nyahị wuu ya ẹnyị nyamwụ ju angịnyị, bala ọ-ka họ kị ka jẹ́ nyori ala ịlẹ ká angịnyị wẹẹ ya ba Ohe alẹ wụụ ri ọnọọkịla. Kori kahị kịnyaa la o-ya ju angịnyị aalẹ, ahị wẹẹ hịhị pwoku ẹnyị nyahị, kọ ri Alibeenu nya iJihova lẹ!—Eje. 83:18; Rom. 10:13-15.

AHỊ KA KỊNYAA LA Ọ-YA ẸLA NYA OHE GBEE PWỤ OCHEJU

14. Ang ọnyịịla oyina ahị tị́ wẹẹ ya ẹhị rịrị gbe kọ ka họ myị ị-ịlahị?

¹⁴ Ahị wẹẹ ya ẹhị rịrị la ọkẹkẹnị gbe ang ịlẹ kị wẹẹ ka họ ị-ịlahị lụka o-kpii! Bwụla ahị ọwawa nya iJihova, ẹhị ọrịrịị-rịrị nyahị ri iru nya angịnyị ka yẹju lahị yẹẹyẹẹ ene ká akama ọtụka okpelego ka dọmwụ. Ahị tị myịmyị chị ọkẹkẹnị yẹẹyẹẹ nyori, ụka nya akama ọtụka okpelego wẹwẹ kọ ri ụka ọlẹ kọ ka lujwo gụ wuu, ọ chịkpẹ myị́ ká angịnyị ka kpehe bwụ odehe nya Olegu Onyobyi wẹ ka yẹju lahị ya ogbo ha iJihova!—Ụkụr. 13:48.

15-16. Ịyẹ ahị tị́ ka kịnyaa la ọhọhọ lẹẹlẹẹ? Ụka oyina ọọwa tị́ cheju?

¹⁵ Ma, ahị la ụkụrwọ ka họ lẹẹlẹẹ. Ahị la iwe nyọka họ ụkụrwọ ọlẹ kị ka ma họ ẹnẹnẹhẹ kaka—kọ ri ẹrụ ọnyịịla nya Ohe ọ-kpa pyẹ chị odehe wuu ọnụ. Ahị tị ka da ọna ya je angịnyị ịnyịnyị nya ang ịlẹ kị ja ka họ lụka o-kpii. Angịnyị baba nyọka jẹ́ nyori ayịreji ọtata nya odehe ọtịpyọ ọlẹ ju chwẹẹ la agaga lẹ. Ụka ká eje ọlala ọọwa á pwụ eji lẹ, ị ka jẹ́ nyori ẹla ịlẹ kahị kaa ya bwụ ẹga nya iJihova lẹlẹ.—Isi. 38:23.

¹⁶ Lẹ, ịyẹ ahị tị́ ka cheje nyọka họ? Ọháha ọlẹ kahị la ẹ-ẹga nya ẹrụ ọnyịịla ọ-kpa pyẹ, ẹ-ẹga nya angịnyị, bala ọgụgụụgụ, ẹ-ẹga nya iJihova bala ẹnyị nyamwụ, a gụhị gbịlaa nyọka ya ẹla nya Ohe la ila ọchịchị, la agaga, bala ọngịrị nyahị wuu gbee da ụka ọlẹ kọ ka yẹkẹẹ, “Ọ nwà lẹ” mẹ!