Ya Ẹla nya Ohe la Ila Ọchịchị Lala IJisọsị

1. Ịyẹ à tị́ kaa ri ọdatị nya anchẹ nya iJihova bala angịlẹ kị byi ịlaa nyị ri angịnyị nya ịKịrayịsị?

ỊNGỊHYẸ ọlẹ kọ kaa ri ọdatị nya anchẹ nya iJihova bala angịlẹ kị byi ịlaa nyị ri Angịnyị nya ịKịrayisị ri, ahị kaa kpa ẹrụ ọnyịịla pyẹ la ila ọchịchị. (Tay. 2:14) Ma, ẹrụ ọnyịịla ọ-kpa pyẹ tị ka lang ujwo ụka ọhẹ myị́. Ọhẹka, ọ ka lang jaabwọ kọ la ọngọgbahị nya ọjịra-jịra ọhẹ kọ kaa họ ụkụrwọ la ila ọchịchị. Ọ yẹkẹẹ: “Ụka ọhẹ, irya nya ẹla Ohe oyaya á kaa wẹ ẹpwụ nyam kpong-kpong ka.”

2. Ịyẹ à tị́ du kọ kaa lujwo la ọ-ka kpa ẹrụ ọnyịịla pyẹ la ila ọchịchị ụka ọhẹ?

² Ụkụrwọ ịkịla ọ-họ ha iJihova ka kpụhị ịpyọ gụ́ ẹla nya Ohe o-ya je angịnyị myị́. Ịyẹ tị́ du? Chajị ụka kahị nwụ Ube nya Ịpyị-Adịrahụ lee ọ-kpahị jwaa, ụka kahị da aanahị ịlẹ ká ẹla họ ta ụbwọ, lee kori kahị jwaa ọhụ ụka ọkịla, ahị kaa yẹ ang ọnyịịla ọlẹpwụ nyamwụ ahyaahị du kahị kaa chị ọkẹkẹnị. Ụka kahị ja họ ụkụrwọ bala aanahị, ahị jẹ́-ẹ họ ụkụrwọ ẹ-ẹpwụ nya okpunyi bala ọ-mẹ ọháha jẹ ẹ-ẹga nya awụlẹ. Ahị tị kaa jẹ́ nyori ang ọlẹ kahị wẹẹ họ ha aanahị nyị myaa lẹhị ịnyịnyị. Ọhẹka, ahị kaa ya ẹla nya Ohe ẹ-ẹga ookpokpo ẹ-ẹpwụ nya ẹka ịmanyị tị́ lẹ, ma angị ịmanyị-ịmanyị à kaa ke ụrụ wo lahị kem lẹ. Lee ahị ka dọmwụ gbachị angịlẹ kị kaa pwa la o-wo ẹla nyahị gbang-gbang myị́. Ahị tị jẹ́ ịnyịnyị nyori jaabwọ ká ocheju wẹẹ ju chwẹẹ gụ́ olene, angịnyị ka tụụhị pyịpyị gụ́ ọọwa. (Mat. 10:22) Ịyẹ à tị́ ka dahị ụbwọ nyọka họ ụkụrwọ ọwẹ kịnyaa lee ọ-dọmwụ họọ la ila ọchịchị gụ́ olene?

3. Ẹlịyẹ ahị tị́ jẹ́ u-uhye nya iJisọsị bwu oja ọ-chụ kpịta ọlụpwụ nya iLuku 13:6-9?

³ Ahị ka jẹ́ ang bwu ẹga nya iJisọsị u-uhye nya ẹrụ ọnyịịla ọ-kpa pyẹ la ila ọchịchị. Ụka ká iJisọsị jam ọdehe, ọ́ kaa tụ ẹta ka ẹkpẹ ẹ-ẹpwụ nya ẹrụ ọnyịịla ọ-kpa pyẹ kpon-kpong ka. Ẹlịlẹhị ri, jaabwọ ká ụka juwa chịpwụrụ, ịnyịnyị ọ họ ụkụrwọ ọwẹ la ila ọchịchị gụ́ olene lẹ. (Wa iLuku 13:6-9.) Jaabwọ ká ọngọ kpẹhị rịrị ẹrụ oliku ọhẹ họ ụkụrwọ ẹ-ẹpwụ nya ẹka ịta ju okoji nya ifigi ọlẹ kọ myị nwụ ugbe ka, ịnyịnyị iJisọsị à bịrị ẹka lala ịta juwa ya ẹla nya Ohe je ala iJuu lẹ, ma iru nyaa á tị wẹ ka ri angịjụgbẹyị nyamwụ ka. Ọ lịnyị odu lẹ, jaabwọ ká ọngọ kpẹhị rịrị ẹrụ oliku ọwẹ á myị abwọ chọọ pyẹpyẹ ka, iJisọsị-ị́ myị abwọ chọọ pyẹpyẹ ẹ-ẹga nya angịnyị lee o-pwuru la ẹrụ ọnyịịla ọ-kpa pyẹ ka ịnyịnyị. Ọkọkọ nyọọwa, iJisọsị kaa họ ụkụrwọ la ọngịrị-ọngịrị gụ́ olene chajị ká ẹla nyamwụ ka wu angịnyị ọyị ka ọkịlẹtụ.

4. Ang ine iyina ahị tị́ ka jẹ́ bwu ọgụ-ẹpẹtẹ nya iJisọsị?

⁴ Ẹ-ẹpwụ nya ang ọjẹ́jẹ ọlẹ, ahị ka ya ẹla u-uhye nya abwọlẹ ká iJisọsị ya ẹla nya Ohe la ila ọchịchị, ọgụgụ ri ẹpwụ nya ọya ịrwọnyẹ ihyẹẹkpẹ nya ọhịhị nyamwụ odehe ọlẹ. (Kụ ẹhị yẹ ang ọjẹ́jẹ u-uhye nya iLuku 10:1 ọlẹ kọ ri, “After these things.”) Kori kahị ju ihi nya ẹla ọlẹ kọ mẹjẹ bala ọ-họ jaabwọ kọ họ, ahị ka jẹ́-ẹ họ ụkụrwọ ọwẹ la ila ọchịchị alẹ ịnyịnyị. Ahị kụ ẹhị yẹ ang ine ịlẹ kahị ka jẹ́ bwu ọgụ-ẹpẹtẹ nya iJisọsị wẹẹ: (1) Ọ hu irya nya iJihova kụ ịlahị, (2) ọ ya ẹhị reeji nya ọmwụ ọyẹyẹ ịla ịBayịbụụ, (3) ọ kpụnịrọ iJihova nyọka dọọ ụbwọ, bala (4) ọ kịnyaa la ọ-ya ẹhị rịrị nyori angịhyẹ ka ke ụrụ wo lọọ pyii.

Ọ HU IRYA NYA IJIHOVA KỤ ỊLAHỊ

5. Ányị iJisọsị à tị́ mẹjẹ nyori ọ hu irya nya iJihova kụ ịlahị ẹ-ẹpwụ nya ọhịhị nyamwụ?

⁵ IJisọsị ya “ẹrụ ọnyịịla chajị nya ịpyị Adịrahụ nya Ohe Oluhye” la ila ọchịchị chajị ọ jẹ́ nyori ọwa à ri ụkụrwọ ọlẹ ká Ohe tịtọ kọ ka họ lẹ. (Luk. 4:43) Ẹrụ ọnyịịla ọ-kpa pyẹ à ri ụkụrwọ ọlẹ ká iJisọsị hu nya ang ọhọhẹ ẹ-ẹpwụ nya ọhịhị nyamwụ lẹ. Ụka kọ dọmwụ hi ọya ịmanyị-ịmanyị ká ọhịhị nyamwu ka myị odehe ọlẹ, ọ kaa “jẹ bwu epweji ịtụka bala ichiche,” juwa mẹ ang jẹ angịnyị. (Luk. 13:22) Ọ myịmyị mẹ ang jẹ angịjụgbẹyị ịkịla nyọka kpa ẹrụ ọnyịịla pyẹ lala ọwọwa ịnyịnyị.—Luk. 10:1.

6. Ányị akụrwọ ịkịla ịlẹ kahị kaa họ ha iJihova à tị́ da ori wu ụkụrwọ nya ẹrụ ọnyịịla ọ-kpa pyẹ? (Yẹ ifoto ịnyịnyị.)

⁶ Ẹrụ ọnyịịla ọ-kpa pyẹ à ri ụkụrwọ ọlẹ ká iJihova bala iJisọsị tịtọ kahị ka họ alẹ ịnyịnyị lẹ. (Mat. 24:14; 28:19, 20) Ụkụrwọ ọnyị myị́ ọnyị kahị ja họ ha iJihova da ori wu ụkụrwọ nya ẹrụ ọnyịịla ọ-kpa pyẹ. Ọ-chụ pwokwita, ahị kaa nwụ ebe nya Ịpyị-Adịrahụ chajị ká angịlẹ kahị kaa ya ẹla nya Ohe je ka wẹ ka gbịgba ụ-ụwa. Ụkụrwọ ọlẹ kahị tị kaa họ ị-ịBẹtẹlụ bala ẹga ịkịla kaa da ẹrụ ọnyịịla ọ-kpa pyẹ ụbwọ ịnyịnyị. Ụka ká ayịreji o-bwu agaga á họ, ahị kaa maga ká aanahị ka la ang ịlẹ kị baba chajị kị ka jẹ́-ẹ dọmwụ nya ọjịra-jịra ọkaka bala ẹrụ ọnyịịla ọ-kpa pyẹ ahyaahị. Ụka kahị jẹ́ ọbaba nya ẹrụ ọnyịịla ọ-kpa pyẹ bala ọ-kpịtịya nyori ọwa à ri ụkụrwọ ọkpọnchị ọlẹ ká iJihova tịtọ kahị ka họ lẹ, ọọwa kaa guhi gbịla nyọka kpehe nya ẹla Ohe oyaya ụka myị́ ụka. János, kọ ri ọngọgbahị nya ọjịra-jịra ọhẹ bwu Hungary, yẹkẹẹ: “M̀ kaa kpụ ịlọm ịtịya nyori ụkụrwọ ọkịla ọhẹ-lọhẹ á ji ahị ka họ ha iJihova kọ ka ku ọmwakpa nya ẹrụ ọnyịịla ọ-kpa pyẹ kaka; ụkụrwọ ọhọhẹ ọlẹ kahị la à wẹ lẹ.”

7. Ịyẹ tị́ du ká iJihova tịtọ kahị ka kịnyaa la ẹrụ ọnyịịla ọ-kpa pyẹ? (1 ITimoti 2:3, 4)

⁷ Ahị ka jẹ́-ẹ họ ká ila nya ẹrụ ọnyịịla ọ-kpa pyẹ nyahị ka wuru gụ́ ọọwa kori kahị kaa kpa angịnyị i-irya jaabwọ ká iJihova kaa họ. Ọ tịtọ ká angịnyị lụmẹ-lụmẹ ka wo oja ọnyịịla ọwẹ bala ọ-jẹ́ ẹlịlẹhị u-uhye nyamwụ ịnyịnyị. (Wa 1 iTimoti 2:3, 4.) Chajị nyọlẹ ká ẹrụ ọnyịịla ka jẹ́-ẹ chị angịnyị da wẹẹ, iJihova kaa dahị ụbwọ kahị ka jẹ́-ẹ yoo je angịnyị gụ́ ọọwa. Ọ-chụ pwokwita, ụpwụ ọlẹ kọ ri Angịnyị a Háng—Họ kị Ri Angịjụgbẹyị mẹjẹẹhị jaabwọ kahị ka bwu dọmwụ nya ẹla oyaya bala ọngịnyị la irya nyọka họ kọ ka ri ọngọjụgbẹyị. Kori ká angịnyị á dọmwụ myị gbịgba ha iJihova lẹẹlẹẹ ka, ị ka la iwe nyọka họ ịnyị myị́ ene nya ocheju nya akama ọtụka okpelego wẹẹ. Ị ka kpịtịya nya ẹla ọlẹ kahị wẹẹ ya jaa lẹẹlẹẹ du kị ka chụ nyọka gbịgba ha iJihova ị-ịlahị myị́. Ma, ọ ka chịkpẹẹ nyọka lịnyị myị́, kori kahị kịnyaa la o-ya ẹla nya Ohe jaa lẹẹlẹẹ.

Ọ YA ẸHỊ REEJI NYA ỌMWỤ ỌYẸYẸ ỊLA ỊBAYỊBỤỤ

8. Ọmwụ ọyẹyẹ oyina à tị́ da iJisọsị ụbwọ nyọka kpa ụka nyamwụ họ ang la ẹla ọjẹ́jẹ?

⁸ IJisọsị jẹ́ jaabwọ ká ọmwụ ọyẹyẹ ịla ịBayịbụụ ka bwu họ jịra. Ọ jẹ́ nyori ẹrụ ọnyịịla ọ-kpa pyẹ nyamwụ nyị́ ka kpoye nya ẹka ịta ba ẹhya ka. (Dan. 9:26, 27) Ọmwụ ọyẹyẹ myị́myị́ du kọ jẹ́ nyori ụka ju chwẹẹ kị ka yọọ akama bala ọ-ka nwọọ ịnyịnyị lẹ. (Luk. 18:31-34) Nyọlẹ ká iJisọsị jẹ́ ẹla ọlẹ ká ịBayịbụụ ya neeji wẹẹ, ọ kpa ụka nyamwụ họ ang la ẹla ọjẹ́jẹ. Lẹ, ọ ya ẹla nya Ohe la ila ọchịchị chajị kọ ka họ ụkụrwọ ọlẹ ká Ohe ya họọ kpá.

9. Ányị o-wo etu nya ọmwụ ọyẹyẹ à tị́ ka dahị ụbwọ nyọka kpa ẹrụ ọnyịịla pyẹ la ila ọchịchị?

⁹ Ẹla ọlẹ kahị jẹ́ u-uhye nya ọmwụ ọyẹyẹ ịla ịBayịbụụ ịlẹ kị wẹẹ họ jịra lẹẹlẹẹ bala ịlẹ kị ka họ jịra ị-ịlahị ka guhị gbịla nyọka kpa ẹrụ ọnyịịla pyẹ la ila ọchịchị. Ahị jẹ́ nyori ụka ọlẹ kọ hi ha odehe onyobyi ọlẹ la kpii lẹ. Ahị yẹ nyori ang ịlẹ kị wẹẹ họ odehe lẹẹlẹẹ bala abwẹla nya angịnyị pwoku ẹla ọlẹ ká ịBayịbụụ ya neeji nyori nyị ka họ la ahyẹẹnụ ihyẹẹkpẹ. Ahị jẹ́ jaabwọ ká uji ọla arịrị nya Anglo-American World Power bala Russia tụ angịlẹ kịị chẹkpẹ jwoo ri ọ-họ jịra nya ọmwụ ọyẹyẹ u-uhye nya adịrahụ nya oye edii bala adịrahụ nya oye ẹtẹ la “ụka ohyẹẹkpẹ” ọlẹ. (Dan. 11:40) Ahị jẹ́ ịnyịnyị nyori Anglo-American World Power à ku ọmwakpa nya ẹpẹtẹ nya ukpeku ọlẹ kị chabwọ ụ-ụpwụ nya ịDanẹlụ 2:43-45 lẹ. Ahị jẹ́ myị̀myị̀ nyori Ịpyị-Adịrahụ nya Ohe ka ta eji ọkpakpa nya angịnyị ehe ayịreji lụka okpii, jaabwọ ká ọmwụ ọyẹyẹ ọwẹ họ kahị jẹ́. Ọmwụ ọyẹyẹ ịwẹ wuu mẹjẹ nyori ocheju nya odehe ọlẹ ju chwẹẹ lụmẹ lẹ, lẹ ahị ka kpa ụka nyahị họ ang la ẹla ọjẹ́jẹ bwula o-ya ẹla nya Ohe la ila ọchịchị.

10. Ụgbẹyị ọkịla oyina ọmwụ ọyẹyẹ ịla ịBayịbụụ à tị́ ka jẹ́-ẹ juhi ọhụ nyọka kịnyaa la ọ-ya ẹla nya Ohe?

¹⁰ Ọmwụ ọyẹyẹ ịla ịBayịbụụ ri ẹla ịkpọnchị ịlẹ kahị ka nwụlanọ nyọka ya je angịnyị ịnyịnyị. Ọọnahị ọnyang ọhẹ kọ juwa ịị Dominican Republic ká ẹnyị nyamwụ ri Carrie yẹkẹẹ: “Ụka kam kụ irya u-uhye nya ang ịnyịịla-ịnyịịla ịlẹ ká iJihova chehe nyọka họ ị-ịlahị, m̀ kaa yẹ nyori m̀ baba nyọka ya je angịnyị.” Ọ myị́myị́ yẹkẹẹ: “Ụka kam yẹ akama ịlẹ ká angịnyị wẹẹ chịpwụrụ bwu alẹ, ọ du kam kaa kụ irya nyori ị baba nyọka jẹ́ ang ịnyịịla-ịnyịịla ịlẹ ká iJihova myọnụ nyọka họ haa ịnyịnyị.” Ọmwụ ọyẹyẹ ịla ịBayịbụụ juhi ọhụ nyọka tụ ẹta ka ẹkpẹ ka chajị ahị jẹ́ nyori iJihova kaa chị ẹkpẹ juhi ẹ-ẹpwụ nya ụkụrwọ nya ẹla Ohe oyaya. Ọọnahị ọnyang ọkịla ko ri Leila bwu ẹpwụma nya Hungary, yẹkẹẹ: “Ụpwụ nya Ayịsaya 11:6-9 kaa gum gbịla nyọka ya ẹrụ ọnyịịla je angịlẹ kọ lala o-ri nyị́ ka myị-ị̀ ke ụrụ ka, chajị m̀ jẹ́ nyori iJihova ka jẹ́-ẹ da ọng myị́ ọng ụbwọ nyọka yẹda myị́.” Ọọnahị Christopher, bwu Zambia, tị yẹkẹẹ: “Jaabwọ ká ịMakị 13:10 ya neeji, ẹrụ ọnyịịla wẹẹ pyẹ chị odehe ọnụ, lẹ o ri ihi ọtụka ham nyọka la ụbwọ ẹ-ẹpwụ nya ọ-họ jịra nya ọmwụ ọyẹyẹ ọwẹ.” Ọmwụ ọyẹyẹ oyina bwu ịBayịbụụ à tị́ kaa gung ahụ gbịla nyọka kịnyaa la ẹla nya Ohe oyaya?

Ọ KPỤNỊRỌ IJIHOVA NYỌKA DỌỌ ỤBWỌ

11. Ịyẹ tị́ du ká iJisọsị baba nyọka kpụnịrọ iJihova nyọka dọọ ụbwọ kpa ẹrụ ọnyịịla pyẹ la ila ọchịchị? (ILuku 12:49, 53)

¹¹ IJisọsị dahịhile nyori iJihova ka dọọ ụbwọ nyọka kịnyaa la o-ya ẹla nya Ohe la ila ọchịchị. Ịlẹhị lẹ, iJisọsị kaa ya ẹla chị ihi ju angịnyị ụka kọ ja kpa ẹrụ ọnyịịla pyẹ, ma ọ jẹ́ nyori ẹrụ ọnyịịla nya Ịpyị-Adịrahụ nyị ka ju ọmwụ nya o-wo lawụlẹ ka bala ọtụpyịpyị. (Wa iLuku 12:49, 53.) Ẹla Ohe oyaya nya iJisọsị du ká alegbeju nya ịgba ọgbagba maga ugbabwọ ịmanyị tị́ nyọka nwọọ. (Jọn. 8:59; 10:31, 39) Ma iJisọsị kịnyaa la ẹla nya Ohe oyaya chajị ọ jẹ́ nyori iJihova nyị juwa tọọ. Ọ yẹkẹẹ: ‘Ám ụbwọọm la ịlọm kem ka. Ma, am bala Adam ọlẹ kọ dum ẹrụ warị ịnyị! Ọwa á myị tụụbwọ him da ụbwọọmwụ kpong-kpong ka. Chajị, am ayịdang jam kaa họ ang ọlẹ kọ juwa kpọọ ịpyọ ụka wuu.’—Jọn. 8:16, 29.

12. Ányị iJisọsị à tị́ nwụla angịjụgbẹyị nyamwụ nọ nyọka kịnyaa la ọ-kpa ẹrụ ọnyịịla pyẹ ẹ-ẹpwụ nya ọtụpyịpyị?

¹² IJisọsị kpụ angịjụgbẹyị nyamwụ ịtịya nyori ị ka jẹ́-ẹ kpụnịrọ iJihova nyọka daa ụbwọ. Ọ họ kị jẹ́ myị̀myị̀ nyori iJihova ka daa ụbwọ kori kị dọmwụ la ọ-tụ pyịpyị wẹwẹ. (Mat. 10:18-20; Luk. 12:11, 12) Nyọlẹ ká iJisọsị jẹ́ nyori iru nya angịnyị ka tụ ẹrụ ọnyịịla pyịpyị wẹẹ, o byaa nyị kpa ẹla ọjẹ́jẹ họ ẹla. (Mat. 10:16; Luk. 10:3) Ọ tị byaa ịnyịnyị nyori kori ká angịnyị nyị́ ke ụrụ wo laa ka, nyị ya ẹla jaa la agbụrụ ka. (Luk. 10:10, 11) Ọ myị́myị́ byaa nyị rụnyẹ rụ kori ká angịnyị nyị́ taa pyịpyị. (Mat. 10:23) Ịlẹhị lẹ, iJisọsị kaa ya ẹla nya Ohe la ila ọchịchị bala ọ-kaa dahịhile iJihova, ma ọ kaa yẹ abwọ hi ẹla ọ-la uhi-uhi jaabwọ kọ ka họ ba myị́.—Jọn. 11:53, 54.

13. Ịyẹ tị́ du ka jẹ́ myị̀myị̀ nyori iJihova ka dang ụbwọ?

¹³ Angịnyị lụmẹ-lụmẹ kaa tụ ụkụrwọ nyahị pyịpyị alẹ, lẹ ahị baba nya ụbwọ ọdada nya iJihova nyọka jẹ́-ẹ kpa ẹrụ ọnyịịla pyẹ kịnyaa. (Ọwụ. 12:17) Ịyẹ tị́ du ká ka jẹ́ myị̀myị̀ nyori iJihova ka dang ụbwọ? Kụ ẹhị yẹ abwọ ọrịrị nya iJisọsị ọla ụpwụ nya ịJọn egbeju 17 wẹẹ. IJisọsị bịlẹ iJihova kọ ka kpẹhị rịrị alẹrụ nyamwụ, iJihova tị wẹ abwọ ọrịrị ọọwa. Ụpwụ nya Ụkụrwọ nya Alẹrụ ja oja nya abwọlẹ ká iJihova da alẹrụ ịịwa ụbwọ nyọka ya ẹla nya Ohe la ila ọchịchị, nanana nyori angịnyị taa pyịpyị. Ẹ-ẹpwụ nya abwọ ọrịrị nyamwụ, iJisọsị myị́myị́ bịlẹ iJihova nyị kpẹhị rịrị angịlẹ kị ka la ọmyịmyị u-uhye nya ang ọmẹjẹ nya alẹrụ nyamwụ bala ọ-wẹ ka ri angịjụgbẹyị nyamwụ ị-ịlahị. À ri ọngọhẹ ẹ-ẹpwụ nyaa ịnyịnyị. IJihova á hwabwọ la ọ-wẹ abwọ ọrịrị nya iJisọsị ọọwa lẹka; Ọ ka dang ụbwọ jaabwọ kọ da alẹrụ nya iJisọsị ụbwọ ịnyịnyị.—Jọn. 17:11, 15, 20.

14. Ịyẹ tị́ du kahị jẹ́ myị̀myị̀ nyori ahị ka jẹ́-ẹ kpa ẹrụ ọnyịịla pyẹ la ila ọchịchị myị́? (Yẹ ifoto ịnyịnyị.)

¹⁴ Jaabwọ ká ocheju wẹẹ ju chwẹẹ gụ́ olene, ọ ka lujwo hahị gụ́ ọọwa nyọka ya ẹrụ ọnyịịla myị́. Ma iJisọsị họ kahị jẹ́ myị̀myị̀ nyori ahị ka yé ụbwọ ọdada ọlẹ kahị baba nyọka họ ụkụrwọ ọwẹ la ila ọchịchị pyii. (Luk. 21:12-15) Lala angịjụgbẹyị nya iJisọsị, ahị ka ya iwe da ha angịnyị kị ka chụ kori kị ka ke ụrụ lee ị́ ka ke ụrụ ka, ma áhị kaa da ịwẹẹ balaa ka. Ụka kị dọmwụ hile akụrwọ nyahị ịhyẹ wẹwẹ, aanahị kaa yé ụbwọ ọdada nyọka kịnyaa la ọ-kpa ẹrụ ọnyịịla pyẹ chajị ị kpụnịrọ iJihova, ọkọkọ nya ọngịrị nya ịlaa. Jaabwọ ká iJihova ya ọngịrị ha anchẹ nyamwụ lụka nya oyi ọhọhẹ, ọ kaa ya ọngịrị hahị alẹ chajị kahị ka jẹ́-ẹ “ya ẹrụ ọnyịịla ọọwa wuu dodehe jịra” gbee kọ ka ya nyị nwà lẹ. (2 Tim. 4:17) Jẹ́ myị̀myị̀ nyori kori ká kpụnịrọ iJihova, à ka jẹ́-ẹ kpa ẹrụ ọnyịịla pyẹ la ila ọchịchị kịnyaa.

Ọ KỊNYAA LA Ọ-YA ẸHỊ RỊRỊ NYORI ANGỊHYẸ KA KE ỤRỤ

15. Ịyẹ tị́ mẹjẹ nyori iJisọsị dahịhile nyori angịnyị ka ye ẹrụ ọnyịịla ọ-kpa pyẹ nyamwụ myị?

¹⁵ IJisọsị la ahị ọdahile nyori angịhyẹ ka ke ụrụ wo la ẹrụ ọnyịịla. Ọọwa dọọ ụbwọ nyọka kpa ẹrụ ọnyịịla pyẹ la ọkẹkẹnị bala ila ọchịchị. Ọ-chụ pwokwita, nyọlẹ kọ lala ẹka ookpokpo myị́ ká iJisọsị dọmwụ nyọka kpa ẹrụ ọnyịịla pyẹ lẹ, ọ yẹ nyori iru nya angịnyị nwụlanọ nyọka ke ụrụ wo la ẹrụ ọnyịịla, lẹ ọ chwaa kaka pwoku egbe nya ekeji ịlẹ kị ga kpụ ọ-hyahya lẹ. (Jọn. 4:35) Ị-ịlahị nyọọwa, ọ myị́myị́ byi angịjụgbẹyị nyamwụ yẹkẹẹ: “Egbe ịlẹrụ nya Ohe Oluhye Adịda ga kpụ ọhyahya lụmẹ lẹ!” (Mat. 9:37, 38) Nyọlẹ kọ nọ chẹẹ, ọ myị́myị́ ma ẹla ọọwa ya yẹkẹẹ: “Egbe ịlẹrụ nya Ohe Oluhye Adịda ga kpụ ọhyahya lụmẹ lẹ, . . . anụ raabwọ bịlẹ Ohe Oluhye Ayịdọlẹrụ chajị kọ ka du alụkụrwọ ị-myị ẹrụ nyamwụ wẹ ẹpwụ nya ẹrụ kaka hya egbe ịịwa họọ mẹ.” (Luk. 10:2) IJisọsị kaa dahịhile ụka myị́ ụka nyori angịnyị ka ke ụrụ wo la ẹrụ ọnyịịla myị́ wẹẹ, ọ tị kaa chị ọkẹkẹnị ụka kị họ ịnyị.—Luk. 10:21.

16. Ányị ẹla ị-chụ pwokwita nya iJisọsị à tị́ mẹjẹ nyori ẹrụ ọnyịịla ọ-kpa pyẹ ka cheju ụ-ụgbẹyị ọnyịịla? (ILuku 13:18-21) (Yẹ ifoto ịnyịnyị.)

¹⁶ IJisọsị da angịjụgbẹyị nyamwụ ụbwọ kị ka họ ụkụrwọ la ila ọchịchị bwula ọ-kpaa ịtịya nyori ẹrụ ọnyịịla ọ-kpa pyẹ nyaa nyị ka cheju ụ-ụgbẹyị ọnyịịla. Kụ ẹhị yẹ ọ-chụ pwokwita nyamwụ imiiye ịhyẹ wẹẹ. (Wa iLuku 13:18-21.) IJisọsị kpa oja nya ẹjẹ nya ịmọsịtadị ochiche ọlẹ kọ nwà ka ri okoji ọtụka-ọtụka mẹ ang jẹ nyori ẹrụ ọnyịịla nya Ịpyị-Adịrahụ nyị ka pyẹ ụ-ụgbẹyị ọ-la ẹbyẹbyị, ịngịngịhyẹ nyị́ tị ka woo kpa myị́ la ọ-nwa ka ịlahị ka. Ọ myị́myị́ chụ ẹrụ ọnyịịla nya Ịpyị-Adịrahụ kaka pwoku ijọnwa. Chajị ẹrụ ọnyịịla ọwẹ ka pyẹ yịrị odehe yịrị bala ọ-họ ká angịnyị ka yẹda, nanana nyori ọ-yẹda nyaa ọọwa á kaa chehe ahyaahị ka. Lẹ, iJisọsị họ ká angịjụgbẹyị nyamwụ ka jẹ́ myị̀myị̀ nyori ẹrụ ọnyịịla ọlẹ kị wẹẹ kpa pyẹ ka da angịnyị lụmẹ-lụmẹ ụbwọ.

17. Ẹlịyẹ à tị́ du kahị ka la irya ọnyịịla ẹ-ẹga nya ẹla Ohe oyaya?

¹⁷ Kori kahị kụ irya nya abwọlẹ ká ẹrụ ọnyịịla wẹẹ da angịnyị lụmẹ-lụmẹ ụbwọ chị odehe wuu ọnụ, ọ ka guhị gbịla nyọka kịnyaa la o-ya ẹla nya Ohe. Ẹka ọnyị myị́ ọnyị, uku ịmanyị tị́ nya angịnyị ịlẹ ká ẹla ọla ịBayịbụụ kpaa ịpyọ kaa wẹ ọ-Họ Kpa Kpịtịya bala ọ-kaa jẹ́ ịBayịbụụ balahị. Ụnọ ịmanyị tị́ nya angịnyị tị kaa hu enyi Ohe wẹ ka yẹ julahị ẹ-ẹpwụ nya ụkụrwọ nya ẹrụ ọnyịịla ọ-kpa pyẹ ọlẹ ịnyịnyị. Áhị jẹ́ angị ịmanyị tị́ ịlẹ kị ka myị́-ị ke ụrụ wo ẹla nyahị wẹẹ ka, ma ahị tị jẹ́ nyori iJihova wẹẹ tụ angịnyị lụmẹ-lụmẹ guru, ịlẹ kị ka chịda lụka nya akama ọtụka okpelego ọlẹ kọ wẹẹ warị. (Ọwụ. 7:9, 14) IJihova à ri ayịdọlẹrụ lẹ, ọ tị jẹ́ myị̀myị̀ nyori iru nya angịnyị nyị ka ye ẹrụ ọnyịịla myị wẹẹ, lẹ ahị kịnyaa la ọ-kpa pyẹ mẹ.

18. Ẹlịyẹ ahị tị́ tịtọ ká angịnyị ka jẹ́ u-uhye nyahị?

¹⁸ Ẹrụ ọnyịịla ọ-kpa pyẹ la ila ọchịchị du kị kaa jẹ́ angịjụgbẹyị nya iJisọsị datị ụka wuu. Ụka ká angịnyị yẹ jaabwọ ká alẹrụ nya iJisọsị ya ẹla la ugbodu ojuju, o du kị jẹ́ nyori nyị “ri angị hụ ta iJisọsị ẹnẹhẹ lẹ ịnyịlẹhị.” (Ụkụr. 4:13) Ahị ịnyịnyị tịtọ kahị ka kpa ẹrụ ọnyịịla pyẹ la ugbodu ojuju bala ila ọchịchị. Kori kahị họ ịnyị, angịnyị ka jẹ́ nyori ahị ịnyịnyị nyị wẹẹ gbịla iJisọsị.