‘Anụ Chụ Ọngọlẹ Kanụ ka Myị Ẹrụ Ha Mẹ’

1. Ẹlịyẹ ahị tị́ ka họ pyii nyọka jẹ́-ẹ chị ọkẹkẹnị ọlam-ọlam? Ịyẹ à tị́ du? (Ayịsaya 48:17, 18)

AHỊ há Adahị olepwoohe yẹẹyẹẹ, ọ tịtọ kahị ka chị ọkẹkẹnị ẹ-ẹpwụ nya ọhịhị lẹẹlẹẹ bala ụ-ụwa ị-ịlahị. (Ọngọ. 3:12, 13) Ọ họhị la āhị nyọka jẹ́-ẹ họ ang lụmẹ-lụmẹ. Ma, ọ́ tị ya iwe nyọka kpeji u-uhye nya ịlọhị myị́ lee ọ-ka jẹ́-ẹ cheje nya ang ọlẹ kọ ri ọnyịịla bala ọtịpyọ datị hahị ka. (Ọngọ. 8:9; Jer. 10:23) Ọ jẹ́ nyori kori kahị ka jẹ́-ẹ chị ọkẹkẹnị ọlam-ọlam aalẹ, ahị ka gbịgba họọ bala o-jwoo ihi pyii.—Wa Ayịsaya 48:17, 18.

2. Ẹlịyẹ Olegu Onyobyi à tị́ tịtọ kahị ka myị la? Ányị iJihova à tị́ họ u-uhye nya ọọwa?

² Olegu Onyobyi tịtọ kahị ka myị nyori áhị baba nyọka gbịgba ha iJihova ene kahị ka chị ọkẹkẹnị ka, ahị nyị ka jẹ́-ẹ kpeji u-uhye nya ịlọhị myị́. (Ọmwụ. 3:4, 5) Nyọka mẹjẹ nyori Olegu Onyobyi me ọnọọkịla, iJihova ya iwe da ká angịnyị ehe ka kpeji lịlaa pwụ ụka ọhẹ. Áhị baba nyọka yọyị lụrụ ene kahị ka yẹ ocheju nya angịnyị ehe ọ-kpịlaa ụgbẹyị ka. Ma, Ụpwụ Ịgọgọ tị ya ẹla rụ iru nya alẹng bala anyang ịlẹ kị yé ọkẹkẹnị chajị nyọlẹ kị gbịgba ha iJihova. IJisọsị ịKịrayịsị à ri ọngọlẹ kọ chị ọkẹkẹnị gụ́ wuu ẹ-ẹpwụ nya angịịwa lẹ. Ahị jene kụ ẹhị yẹ ang odudu ká iJisọsị chụ nyọka gbịgba ha iJihova wẹẹ. Ba ọọwa ba, ahị ka kụ ẹhị yẹ ang odudu ká Adahị olepwoohe à chịla nyọka ye ịgba ọgbagba nyahị. Ohyẹẹkpẹ-ẹkpẹ, ahị ka wụla ang odudu kahị chụ nyọka gbịgba ha iJihova yẹ.

ANG ODUDU KÁ IJISỌSỊ CHỤ NYỌKA GBỊGBA HA IJIHOVA

3. Ịyẹ Olegu Onyobyi à tị́ ya kọ ka ya ha iJisọsị? Ẹlịyẹ iJisọsị à tị́ chụ nyọka họ?

³ Ụka ká iJisọsị jam odehe, ọ kaa mẹjẹ ụka wuu nyori ọ chụ nyọka gbịgba ha Ohe lẹ. Ọ-chụ pwokwita, nyọlẹ kọ hu enyi Ohe kpá kọ nọ pyịnyẹng, Olegu Onyobyi wẹ ka byi iJisọsị nyori ọwa nyị ka ya ịpyị-adịrahụ nya odehe ọlẹ wuu họọ kori kọ ka myị-ị̀ gbịgba họọ ụka ookpokpo kem. IJisọsị wọọ yẹkẹẹ: “Ahụ Ohe Onyobyi ọwẹ, tụ kele him pyii! Ụpwụ Ịgọgọ yẹkẹẹ, ‘[IJihova] Ohe Oluhye nyang ụbwọọmwụ kem a ri ọngọlẹ ká ka raabwọ ha, juwa myị ẹrụ họọ ẹ-ẹpwụ nya ịgba ọgbagba ha kem ịnyịnyị lẹ.’” (Mat. 4:8-10) Ịyẹ tị́ du ká iJisọsị chụ nyọka họ ịnyị? Kụ ẹhị yẹ ang ịhyẹ ịlẹ kị du lẹẹ wẹẹ.

4-5. Ẹlịyẹ à tị́ du ká iJisọsị chụ nyọka gbịgba ha iJihova?

⁴ Ẹla ọkpọnchị ọlẹ kọ du ká iJisọsị chụ nyọka gbịgba ha iJihova ri ọháha—iJisọsị la ọháha okpori-kpori ẹ-ẹga nya Adamwụ. (Jọn. 14:31) Da ọọwa u-uhye, iJisọsị gbịgba ha iJihova chajị ọọwa à ri ẹla ọlẹ kọ chịla nyọka họ lẹ. (Jọn. 8:28, 29; Ọwụ. 4:11) Ọ jẹ́ nyori iJihova à ya ọhịhị hahị lẹ, Ọ ju ọdahịhile, bala ọ-kaa ya ang ịnyịịla lụmẹ-lụmẹ hahị. (Eje. 33:4; 36:9; Jem. 1:17) IJihova kaa ya ẹlịlẹhị je iJisọsị ụka wuu, ọwa à tị ya ang myị́ ang ịlẹ ká iJisọsị la họọ ịnyịnyị lẹ. (Jọn. 1:14) Olegu Onyobyi tị datị, ọwa à kpa ọhọbịrị bala igu wa uhye nya angịnyị ehe lẹ. Ọ ri ọlọnọọkịla ọlẹ ká ang kaa nwọọ ka bala ọ-kaa tịtọ nya ang nya ụbwọ nya ịlọmwụ. (Jọn. 8:44) Nyọlẹ ká iJisọsị jẹ́ ẹlịlẹhị ịwẹ wẹẹ, ọ́ kaa tịtọ nyọka gbịla Olegu Onyobyi bwula ọ-la egbeju ọngịrị ta iJihova ẹnẹnẹhẹ ka.—Filip. 2:5-8.

⁵ Ang ọkịla ọlẹ kọ du ká iJisọsị chụ nyọka gbịgba ha iJihova ri ọ-chajị nya ang ịnyịịla lụmẹ-lụmẹ ịlẹ kị ka họ bwula ọ-họ ịnyị. (Hib. 12:2) Ọ jẹ́ nyori kori kọ godayị giri-giri, ọ ka jẹ́-ẹ chị ịgọgọ ju ẹnyị nya Adamwụ bala ọ-ka họ chịkpẹẹ ká ọhọbịrị bala igu á ka ji kaka.

ANG ODUDU KÁ IJIHOVA CHỊLA NYỌKA YE ỊGBA ỌGBAGBA NYAHỊ

6-7. Ịyẹ tị́ du ká iru nya angịnyị alẹ á kaa gbịgba ha iJihova ka? Ịyẹ tị́ du kọ chịla kahị ka gbịgba họọ?

⁶ Iru nya angịnyị alẹ á kaa gbịgba ha iJihova ka chajị nyori ị́ wẹ ka jẹ́ abwẹla ịnyịịla nyamwụ lẹka, ị́ tị jẹ́ ang ịnyịịla ịlẹ kọ họ haa ka ịnyịnyị. Ịnyị ọ la ẹ-ẹga nya ala Atẹnsị ịlẹ ká ọlẹrụ ịPọlụ ya ẹla nya Ohe je lẹ.—Ụkụr. 17:19, 20, 30, 34.

⁷ ỊPọlụ wụlẹ ya je ala Atẹnsị nyori Ohe nya ịlẹhị à “hu ọhịhị hahị ahị bala ang myị́ ang ịlẹ wuu kahị la lẹ.” Ọ myị́myị́ yẹkẹẹ: “Ọhịhị nyahị wuu bala ọngịrị ọ-kpa họ ụkụrwọ nyahị wuu bala irya nya ọngịnyị ehe ọlẹ kahị la wuu lẹ, ẹ-ẹpwụtụbwọ nya Ohe Oluhye, ọ bwu lẹ.” Ohe à ri Ọngọ họ ang wuu ọlẹ kọ “họ ọng myị́ ọng olepwoja myị́ epwoja nya odehe ọlẹ wuu lẹ,” lẹ ọwa à chịla kahị ka gbịgba ha kem lẹ.—Ụkụr. 17:25, 26, 28.

8. Ịyẹ iJihova à tị́ ka họ ẹnẹnẹhẹ ka? Ẹlịyẹ ọ tị́ họ?

⁸ Nyọlẹ ká iJihova à ri Ọngọ họhị bala Ọngọ chịla nyọka kpeji wẹẹ, ọ ka gbileehi kaka gbịgba họọ la agbụrụ kori kọ tịtọ nya ọọwa myị́. Ma, iJihova á ka myị-ị họ ịnyị ẹnẹnẹhẹ ka. Ọkọkọ nyọọwa, ọ tịtọ kahị ka cheje ọwẹ la ịlọhị bwu irya nyahị. Lẹ, ọ ya ang-ẹjẹẹ hahị ịlẹ kị mẹjẹ nyori o ji ịnyịlẹhị bala o-ri ọngọngọọng nyahị họ́ọ yẹẹyẹẹ nyọka dahị ụbwọ cheje ọwẹ. Ọ tịtọ ká angịnyị lụmẹ-lụmẹ ka wẹ ka ri aligu nyamwụ gboyi myị́ oyi. (1 Tim. 2:3, 4) Ọọwa du ká iJihova nwụlahị nọ chajị kahị ka jẹ́-ẹ mẹ ang jẹ angịkịla u-uhye nya ang ịlẹ kọ la i-irya nyọka họ ha angịnyị ehe ị-ịlahị, bala abwọlẹ kọ ka bwu haa. (Mat. 10:11-13; 28:19, 20) Ọ ya ọjịra-jịra yeji hahị kahị ka jẹ́-ẹ gbịgba họọ bala ọ-ka yé ụbwọ ọdada bwu ẹga nya angị kpịlahị ịlẹ kị la ọháha.—Ụkụr. 20:28.

9. Agbẹyị iyina iJihova à tị́ bwu mẹ ọháha nyamwụ jẹ ẹ-ẹga nyahị?

⁹ IJihova mẹ ọháha ọtụka jẹ bwula ọlẹ kọ kaa họ ang ịnyịịla ha angịlẹ kị dọmwụ tịtọ nyọka myị nyori o ji ka. Kụ irya ju ẹla ọlẹ wẹẹ: Ẹ-ẹpwụ nya ẹka ụnọ ịmanyị tị́, iru nya angịnyị kaa chụ nyọka hịhị ba ang ọlẹ kị chụ nya ang ọnyịịla lee ọtịpyọ la ịlaa, ọkọkọ nyọka ju ihi nya iJihova. Ọ tị lịnyị odu lẹ, iJihova ya ang ịlẹ kị baba ẹ-ẹpwụ nya ọhịhị bala ọ-ka jẹ́ ịpyọ ọkpụkpụ nya ọhịhị haa. (Mat. 5:44, 45; Ụkụr. 14:16, 17) Ọ họ ị jẹ́-ẹ la aligu ịnyịịla, la ugbiyegu nya ịlaa, bala o-yé apyobwuna nya ụkụrwọ ọlẹ kị kaa họ. (Eje. 127:3; Ọngọ. 2:24) Ọwẹ ri ang ẹjẹẹ nyori Adahị ọla epwoohe la ọháha ẹ-ẹga nya angịnyị ehe wuu. (Ehe. 34:6) Ahị kpụ ịlọhị ịtịya nya ang ịhyẹ ịlẹ kị du kahị chụ nyọka gbịgba ha iJihova bala abwọlẹ kọ kaa wahị kụrụ angịlẹ kị họ ịnyị wẹẹ.

ANG ODUDU KAHỊ CHỤ NYỌKA GBỊGBA HA IJIHOVA

10. (a) Ịyẹ à tị́ ri ang ọkpọnchị ọlẹ kọ du kahị kaa gbịgba ha iJihova? (ỊMatiyu 22:37) (b) Ányị ọ tị́ lang nyọlẹ ka jẹ́ nyori iJihova kpịtịya nya abwọlẹ ka la bala ọ-kaa hịnyọhi hang? (Eje Ọnyịịla 103:13, 14)

¹⁰ Jaabwọ kọ la ẹ-ẹga nya iJisọsị, ang ọkpọnchị ọlẹ kọ du kahị kaa gbịgba ha iJihova ri ọháha okpori-kpori ọlẹ kahị la ẹ-ẹga nyamwụ. (Wa ịMatiyu 22:37.) Ahị kaa tụ ju iJihova chwẹẹ ụka kahị jẹ́ ang u-uhye nya abwẹla nyamwụ. Ọ-chụ pwokwita, kụ ẹhị yẹ abwọlẹ ká iJihova kaa ju ugbodu balahị. Nanana nyori ala Isirẹlụ kaa bịrị ehile nyamwụ ụka lụmẹ-lụmẹ, ọ bịlaa yẹkẹẹ: ‘Ahụ Isirẹlụ ọ-la kpẹẹkpẹẹ ka ee, nyà tịrẹkpẹ chịm ọgụ mẹ. Ọkẹnẹ-kẹnẹ ri, myị abyị nyang mẹ.’ (Jer. 3:12, 13) Ịlẹhị lẹ ahị kaa họ pyị ụka lụmẹ-lụmẹ, ma iJihova kaa hịnyọhi hahị chajị ọ kpịtịya nyori áhị la kpẹẹkpẹẹ ka, ọpyị-ọpyị ahị ri lẹ. (Wa Eje Ọnyịịla 103:13, 14.) Ụka ká kụ irya u-uhye nya ugbodu ojuju nya iJihova bala abwẹla ịnyịịla nyamwụ ịkịla, ọọwa á kaa gung gbịla nyọka gbịgba họọ gboyi myị́ oyi ka?

11. Ang ịkịla iyina à tị́ du kahị kaa gbịgba ha Adahị ọla epwoohe?

¹¹ Ahị kaa tịtọ nyọka gbịgba ha iJihova ịnyịnyị chajị nyori ọọwa à ri ẹla ọlẹ kahị chịla nyọka họ lẹ. (Mat. 4:10) Ahị tị jẹ́ ịnyịnyị nyori kori kahị godayị giri-giri ha iJihova, ahị kaa yé apyobwuna lụmẹ-lụmẹ. Ahị ọ-gbịgba ha iJihova la ọmyịmyị kaa da ụbwọ nyọka chị ịgọgọ ju ẹnyị nyamwụ, mẹjẹ nyori Ohe Onyobyi ri ọlọnọọkịla, bala ọ-họ ká Adahị ka chị ọkẹkẹnị. Kori kahị tị chụ nyọka gbịgba ha iJihova lẹẹlẹẹ, ahị ka la iwe nyọka jẹ́-ẹ gbịgba họọ gboyi myị́ oyi!—Jọn. 17:3.

12-13. Ẹlịyẹ ahị tị́ jẹ́ bwu oja nya Jane bala Pam?

¹² Ụka kahị ri onjwo wẹẹ, ahị ka jẹ́-ẹ maga nyọka la ọháha ẹ-ẹga nya iJihova, ọháha ọọwa tị ka la ọngịrị gụ olene jaabwọ kahị wẹẹ ri ọngọgbahị gụ ọọwa. Ịnyị ọ la ẹ-ẹga nya aanịna anyang imiiye ịhyẹ ká ẹnyị nyaa ri Jane bala Pama lẹ. Jane gu ẹka 11, Pam ọwa gu ẹka 10 ụka kị dọmwụ nyọka jẹ́ ịBayịbụụ. Ịlẹhị lẹ adaa bala ịnaa ịwa á tịtọ nyọka jẹ́ ịBayịbụụ ka, ma ị tị ya iwe ha Jane bala Pam nyọka jẹ́ ịBayịbụụ bala Alibeenu nya iJihova, kori kị ja ba adaa anyị ka ịchọọchị nyaa ịnyịnyị. Jane yẹkẹẹ: “Ang ọlẹ ká Alibeenu nya iJihova wẹẹ mẹjẹ́m bwu ịBayịbụụ dam ụbwọ du kam mile etiji ịnyịịngịrị bala ọ-họ ụya lala aliko nyam ịkịla ka.”

¹³ Nyọlẹ kọ la ẹka ịmanyị-ịmanyị, aanịna anyang imiiye ịwẹ wẹ ka ri angị kpa ẹrụ ọnyịịla pyẹ. Ọ ka nọ pyịnyẹng, ị dọmwụ nyọka ye ịlahị nya ụgbẹyị. Ụka ká adaa bala ịnaa dọmwụ ri angịgbahị kị wẹẹ kpẹhị rịraa, ị kịnyaa la ọ-ye ịlahị nya ụgbẹyị wẹẹ. Ụka ká Jane chẹhị kẹkpẹ ka yẹ ang ịlẹ wuu ká iJihova họ haa, ọ yẹkẹẹ: “M̀ yẹ la ịlọm nyori iJihova kaa kpahị ju aligu nyamwụ yẹẹyẹẹ, ọ tị ‘jẹ́ angịlẹ kị ri nyamwụ’ ịnyịnyị, jaabwọ ká ụpwụ nya 2 iTimoti 2:19 ya.” Ọ la gede-gede nyori iJihova kaa kpahị ju angịlẹ kị chụ nyọka gbịgba họọ ọọlajị nya ọháha!

14. Ányị ẹla oyaya bala ọhọhọ nyahị à tị́ ka jẹ́-ẹ wụ ido hi ẹnyị nya iJihova? (Yẹ ifoto ịnyịnyị.)

¹⁴ Ahị tịtọ kahị ka da ụbwọ wụ ido hi ẹnyị nya iJihova. Kụ irya nya iwe-ahụrụ ọlẹ wẹẹ: À la oligu o-chii ọhẹ ọlẹ kọ kaa họ ọnahị, ọ kaa hu ha, bala ọ-kaa hịnyọhi. Ẹnẹhẹ lẹ, a wo ká ọngọhẹ ja chị ala bọọ nyori nyị ri ọlọkwọ bala ọ-kaa họ ẹla ọnụ-ọnụ ka, lẹlẹ. Ányị a tị́ ka họ u-uhye nya ọọwa? À ka ya ẹla chẹkpẹ jwoo. Ụ-ụgbẹyị ọ-la ịnyịnyị, ụka ká Olegu Onyobyi bala angịlẹ kị ji ekpeleji nyamwụ á maga nyọka bịrị ẹnyị nya iJihova bwula ọ-me ịnịịkịla bọọ, ahị ka wẹ bwula o-ya ẹlịlẹhị u-uhye nyamwụ la ila ọchịchị. (Eje. 34:1; Ayị. 43:10) Ahị kaa mẹjẹ nyori ahị tịtọ nyọka gbịgba ha iJihova la ọkịlẹtụ nyahị wuu bwula ọ-chẹkpẹ jwoo la ẹla ọyaya bala ọhọhọ nyahị.

15. Apyobwuna iyina ọlẹrụ ịPọlụ à tị́ yé nyọlẹ kọ nwụ ọhịhị nyamwụ họ? (Ala iFilipayị 3:7, 8)

¹⁵ Ahị kaa mwụlanọ nyọka nwụ ọhịhị nyahị họ nyọka jẹ́-ẹ họ ẹla kpụ iJihova ịpyọ lee ọ-ka jẹ́-ẹ họ ụkụrwọ nyamwụ gụ́ ọọwa. Ọ-chụ pwokwita, ọlẹrụ ịPọlụ chụ nyọka nyẹẹkpẹ da ehe ọlala e-epweji nyamwụ chajị kọ ka jẹ́-ẹ ba ịKịrayịsị jẹ bala ọ-gbịgba ha iJihova. (Gal. 1:14) Chajị nyọọwa, ọ la iwe ịnyịịla-ịnyịịla ẹ-ẹpwụ nya ịgba ọgbagba nya iJihova, ọ tị ka kpeji ta ịKịrayịsị e-epwoohe ịnyịnyị. Ọ́ chị ijẹma nyọlẹ kọ chụ nyọka gbịgba ha iJihova kpong-kpong ka, áhị tị ka chị ijẹma chajị nyọọwa ka ịnyịnyị.—Wa Ala iFilipayị 3:7, 8.

16. Ẹlịyẹ ahị tị́ jẹ́ bwu oja nya Julia? (Yẹ ifoto ịnyịnyị.)

¹⁶ Kori kahị hu ịgba ọgbagba nya iJihova kụ ịlahị ẹ-ẹpwụ nya ọhịhị nyahị, ọ ka wahị kụrụụhị lẹẹlẹẹ bala ụ-ụwa ị-ịlahị. Kụ ẹhị yẹ oja nya ọọnahị ọnyang ọhẹ ká ẹnyị nyamwụ ri Julia wẹẹ. Ene ká Julia wẹ ka jẹ́ ẹlịlẹhị, ọ ri ọngọhẹ nya angị mwu eje ị-ịchọọchị bwu ụka ọlẹ kọ ri onjwo ọyẹẹnọ. Ọngọhẹ ọlẹ kọ jẹ́ ang chajị nya eje omwumwu yẹẹyẹẹ yẹ nyori Julia la āhị nya eje omwumwu du kọ dọmwụ nyọka mẹjọọ gụ ọọwa. Lụka o-kpii, angịnyị jẹ́ Julia yẹẹyẹẹ kpụ ọ kaa mwu eje ẹ-ẹga ịtụka-ịtụka ịnyịnyị. Ụka kọ juwa ube-ụpwụ nya eje ọgbẹgbịlẹ ọhẹ, ọngọhẹ uube-ụpwụ ọọwa dọmwụ nyọka ya ẹla nya Ohe joo kpụ ọ wụlẹ ya joo nyori ẹnyị nya Ohe nya-à ri iJihova lẹ. Lụka o-kpii, Julia dọmwụ nyọka jẹ́ ịBayịbụụ ụka imiiye ẹ-ẹpwụ nya epwihi. Ụka ohyẹẹkpẹ, ọ chụ nyọka kpa ụka bala ọngịrị nyamwụ wuu gbịgba ha iJihova ọkọkọ nyọka ku eje omwumwu. Eje ọchịchị ọwẹ á chịkpẹẹ lụmẹ ka. Ọ yẹkẹẹ: “Angịnyị lụmẹ-lụmẹ byim nyori am nyị wẹẹ kpa āhị nyam kaka da hụrụ ododu, ma m̀ tị tịtọ nyọka kpa ọhịhị nyam wuu gbịgba ha iJihova.” Ányị ẹla ọlẹ kọ chụ nyọka họ lala ẹka 30 kẹkpẹ à tị́ lọọ lẹẹlẹẹ? Ọ yẹkẹẹ: “M̀ chị ọkẹkẹnị nyọlẹ kam chụ nyọka gbịgba ha iJihova, m̀ tị dahịhile nyori ọ ka họ ang ịlẹ kị bam ba ọ-ọkịlẹtụ wuu ham ị-ịlahị.”—Eje. 37:4.

KỊNYAA LA Ọ-GBỊGBA HA IJIHOVA

17. (a) Ẹlịyẹ angịlẹ kị gbịgba ha iJihova lẹka à tị́ ka họ? Ịyẹ tị́ du? (b) Ẹlịyẹ angịlẹ kị kaa gbịgba ha Ohe lẹ à tị́ ka jẹ́?

¹⁷ Ahị jam hịhị ju ocheju nya odehe chwẹẹ lụmẹ lẹ. Ọlẹrụ ịPọlụ da ụpwụ yẹkẹẹ: “Ụka o-kpii ọlẹ ká Ohe Oluhye hunọ-ọ wẹ lẹ, ahyaahị ụka ká ụka ọọwa á pwụ bwaaa lẹ, aalẹ, Ọngọlahị ọlẹ kọ juwa ka warị, a ka pwụ eji ahyaahị la ọbịrị ụka kaka lẹlẹ.” (Hib. 10:37) Etu nya ẹlẹwẹ tị́ ri ányị? Ụ-ụgbẹyị ọhẹ, ọ mẹjẹ nyori ụka á hi lụmẹ ha angịlẹ kị gbịgba ha iJihova lẹka nyọka chụ kị ka họ ịnyị kaka. Lẹ, angị ịlịnyị baba nyọka hu ẹta-ẹdịyẹ nyọọwa ahyaahị la ọ-bịrị ụka ka. (1 Kọr. 7:29) Ọ́ tị ri kahị cheje nyọka gbịgba ha Ohe lẹ aalẹ, ahị jẹ́ nyori kori kahị dọmwụ la akama ịhyẹ lẹẹlẹẹ wẹwẹ, “ụka o-kpii” kem ọ ka ba lẹ.

18. Ẹlịyẹ iJihova bala iJisọsị à tị́ tịtọ kahị ka họ?

¹⁸ IJisọsị ju angịnyị ọhụ nyoka wẹ ka ri angịjụgbẹyị nyamwụ bala ọ-ka bọọ jẹ kịnyaa. (Mat. 16:24) Lẹ kori kahị ja gbịgba ha iJihova ẹ-ẹpwụ nya ẹka lụmẹ-lụmẹ lẹ, ahị cheje nyọka tịrẹkpẹ kaka. IJihova tị tịtọ kahị ka họ ụkụrwọ kịnyaa nyọka ba eje ọchịchị nyahị nyọka gbịgba họọ jẹ ịnyịnyị. Ọ́ ka chịkpẹẹ lụmẹ ka myị́, ma ahị tị ka jẹ́-ẹ chị ọkẹkẹnị bala o-yé ahị ọwawa lụmẹ-lụmẹ dọmwụ lẹẹlẹẹ bwula ọ-gbịgba họọ!—Eje. 35:27.

19. Ẹlịyẹ ahị tị́ jẹ́ bwu oja nya Gene?

¹⁹ Angịhyẹ kaa me nyori ịgba ọgbagba nya iJihova nyị du ká ọngịnyị nyị́ kaa yé ịpyọ ọkpụkpụ nya ọhịhị ka. Kori ká ri onjwo wẹẹ, ọ kaa lang lala o-ri ịgba ọgbagba nya iJihova nyị lujwo lụmẹ? Ọọnahị okolobya ọhẹ ká ẹnyị nyamwụ ri Gene yẹkẹẹ: “Ọ lam lala o-ri am nyị́ jẹ́-ẹ ya ụya nwà ka ọọlajị nyọlẹ kam ri ọngọhẹ nya Alibeenu nya iJihova. Ọ lala o-ri iru nya aliko nyam ịlẹ kahị nwà lawụlẹ kaa yé ịpyọ ọkpụkpụ nya ụya ọyaya lala ipati ọ-kaka, aha nya awụlẹ ọ-tụtụ, lee ayịlọ nya igem ọ-dada ịlẹ kị tịpyọ, ma am kaa kpa ụka nyam ka ọjịra-jịra bala ẹrụ ọnyịịla ọ-kpa pyẹ kem.” Ányị ọ-kụ irya ụ-ụgbẹyị ọlịịwẹ à tị́ chị wu Gene? Ọ yẹkẹẹ: “M̀ dọmwụ nyọka họ ang ịtịpyọ lala aliko nyam kpịbaa-kpịbaba, ọ tị lala o-ri nyị kpịpyọ ụka nya ọgbanyẹ. Ma ọọwa á tị kpa ọkẹkẹnị ọlam-ọlam wam ka. M̀ dọmwụ nyọka kụ irya u-uhye nya apyobwuna ịlẹ ká ọngịnyị kaa yé bwula o-ju ihi nya iJihova. Ọọwa m cheje nyọka gbịgba ha iJihova la ọkịlẹtụ nyam wuu lẹlẹ. Mwiiji nyọlẹ kam họ ịnyị, ọ lala o-ri iJihova wẹ abwọ ọrịrị nyam ọnyị myị́ ọnyị.”

20. Ẹlịyẹ ahị tị́ ka cheje nyọka họ?

²⁰ Ọngọ da eje ọnyịịla ọhẹ mwu eje rụ iJihova yẹkẹẹ: “Angịlẹ wuu ká chụ, ká kpaa kaka kụ ta ịlọng ẹ-ẹpwa ịgọgọ nyang-ǹg wẹẹ, ịnya angịịwa há haa lẹ!” (Eje. 65:4) Lẹ, ahị wuu a cheje nyọka gbịgba ha iJihova kịnyaa jaabwọ ká iJochuwa họ mẹ. Ọ yẹkẹẹ: “Am bala alẹpwa nyam lẹ, ahị ka myị ẹrụ ha [iJihova.]”—Joch. 24:15.