ANG ỌJẸ́JẸ 22
EJE 15 Praise Jehovah’s Firstborn!
Ang Odudu ká Ẹnyị nya IJihova Baba Ha IJisọsị
‘M chị ẹnyị nyang ehe mẹjaa lẹ. M tị ka juwa chọọ ehe mẹjaa kịlahị-ịlahị ịnyịnyị wẹẹ.’—JỌN. 17:26.
ẸHỊ NYA ẸLA
Abwọlẹ ká iJisọsị chị ẹnyị nya iJihova ehe bala abwọlẹ kọ chị ihi bala ịgọgọ jwoo.
1-2. (a) Ịyẹ iJisọsị à tị́ họ la obyi ohyẹẹkpẹ nyamwụ ene kịị nwọọ? (b) Ịtọ ẹla iyina ahị tị́ wẹẹ ka kụ ẹhị yẹ ẹ-ẹpwụ nya ang ọjẹ́jẹ ọlẹ?
ẸNỤ nya ịTọsdee lobyi la Nisan 14, 33 C.E., ị ja ka pyịrị iJisọsị ha, ị ka lọọ eje, ya eje woo kịrọrọ, nyoo enyiri, ene kị ka nwọọ. Ọwa bala alẹrụ nyamwụ ri ang oriri ọdatị ọhẹ ahyaahị wẹ u-ube oluhye ọhẹ. Nyọlẹ kị ri ang oriri ọọwa kpá, iJisọsị ya ẹla ohyẹẹkpẹ-ẹkpẹ je alẹrụ nyamwụ bwula o-jwaa ọhụ. Lụka okpii ene kị ka rụ bwu ube oluhye ọọwa, iJisọsị raabwọ ọkpọnchị ọhẹ. Ahị ka yẹ abwọ ọrịrị ọọwa ụ-ụpwụ nya ịJọn egbeju 17.
2 Ẹlịyẹ abwọ ọrịrị nya iJisọsị à tị́ mẹjẹ u-uhye nya ẹla ọlẹ kọ ji irya nyamwụ ụka ọwẹ? Ányị abwọ ọrịrị ọwẹ à tị́ họ kahị jẹ́ ẹla ọlẹ kọ ji irya nyamwụ ụka ọlẹ wuu kọ jam odehe ọlẹ? Ahị kụ ẹhị yẹ ọwẹwẹ nya ịtọ ẹla ịwẹ wẹẹ.
‘M CHỊ ẸNYỊ NYANG EHE MẸJAA LẸ’
3. Ẹlịyẹ iJisọsị à tị́ ya u-uhye nya ẹnyị nya iJihova? Etu nya ẹla ọọwa tị́ ri ányị? (ỊJọn 17:6, 26)
3 IJisọsị raabwọ yẹkẹẹ: ‘M chị ẹnyị nyang ehe mẹjaa lẹ.’ Ọ dọmwụ ya ụka imimiiye nyori ọwa nyị mẹ ẹnyị nya iJihova jẹ angịjụgbẹyị nya ọwa lẹ. (Wa ịJọn 17:6, 26.) Etu nya ẹla ọlẹ kọ ya wẹ tị́ ri ányị? Ẹnyị ọlẹ kị jẹ́ ẹnẹhẹ lẹka o bwuru ya jaa lẹ? Angịjụgbẹyị nya iJisọsị ri ala iJuu, lẹ ị jẹ́ ẹnyị nya Ohe, kọ ri iJihova ene-ene lẹ. Ẹnyị ọwẹ hyeehe ụka ụnọ ịmanyị tị́ ẹ-ẹpwụ nya ụpa nya ỊBayịbụụ Ọlẹ kị Da la Òja nya IHiburu. Lẹ, ẹ-ẹnyị nya iJihova kpangga iJisọsị à wẹẹ ya ẹla rụ ka, ma ụma nya ọngọlẹ ká Ohe ri ọ wẹẹ ya ẹla rụ lẹ. IJisọsị ya ụma nya Ọngọlẹ ká iJihova ri dodehe, tụ́ irya, akụrwọ bala abwẹla nyamwụ, ụ-ụgbẹyị ọlẹ ká ọngọngọhẹ ka jẹ́-ẹ họ ka.
4-5. (a) Ọ-chụ pwokwita oyina à tị́ mẹjẹ nyori ẹnyị nya ọngịnyị ka jẹ́-ẹ la etu ha ọngọkịla gụ́ olene myị́? (b) Ụgbẹyị oyina angịjụgbẹyị nya iJisọsị à tị́ bwu jẹ́ ẹnyị nya iJihova gụ́ olene?
4 Nyọka chụ pwokwita, kụ irya nyori ọngọgbahị nya ọjịra-jịra nyang ọhẹ juwa ká ẹnyị nyamwụ ri David, kọ tị ri ọngọ họ utoji ịnyịnyị wẹẹ. À jẹ́ ọọnahị ọwẹ ẹ-ẹpwụ nya ẹka lụmẹ-lụmẹ lẹ. Ma ọhẹka, ịngịhyẹ họng kpịraka ẹnẹhẹ du ká baba nya ụbwọ ọdada nya ọngọ họ utoji. Ị kpang la agaga ka ube-utoji ọlẹ ká ọọnahị ọwẹ ji, ọọwa ọ họng utoji du ká ọhịhị nyang chịda lẹlẹ. Ẹnyị nya ọọnahị ọwẹ á ka la etu ọkịla hang bwu ụka ọwẹ ka ịlahị ka? Ọ ka lịnyị! David á ka ri ọngọgbahị nya ọjịra-jịra ọlẹ ká jẹ́ kem kaka; ọ ka ri ọngọ họ utoji ọlẹ kọ chị ọhịhị nyang da ịnyịnyị lẹ.
5 Ụ-ụgbẹyị ọ-la ịnyịnyị, angịjụgbẹyị nya iJisọsị jé ẹnyị nya iJihova ene-ene lẹ. Ma iJisọsị daa ụbwọ du ká ẹnyị ọwẹ la etu haa gụ́ olene. Ịyẹ tị́ du kahị ka jẹ́-ẹ ya ịnyị? Chajị iJisọsị kaa gbịla Adamwụ kpẹẹkpẹẹ ẹ-ẹpwụ nya ẹla oyaya bala ọhọhọ nyamwụ. Lẹ, alẹrụ nyamwụ wẹ ka “jẹ́” iJihova gụ́ ọọwa bwula ọ-ke ụrụ wo la ang ọmẹjẹ nya iJisọsị bala ọ-yẹ jaabwọ kọ kaa kpa angịnyị.—Jọn. 14:9; 17:3.
CHAJỊ NYA “ẸNYỊ NYANG” ỌLẸ KÁ YA HAM
6. Ịyẹ tị́ ri etu nya ẹla ọlẹ ká iJisọsị ya nyori iJihova nyị ya ẹnyị nyamwụ ha ọwa? (ỊJọn 17:11, 12)
6 IJisọsị raabwọ chajị nya angịjụgbẹyị nyamwụ yẹkẹẹ: “Kpa ọngịrị nya ẹnyị nyang wu angịlẹ ká ya ham wẹ wuu kpa yẹẹyẹẹ.” (Wa ịJọn 17:11, 12.) Etu nya ẹla ọlẹ ká iJisọsị ya ẹ-ẹgẹwẹ ri ọ-ka kpa ẹhị rịraa chajị nya ẹnyị ọlẹ ká Ohe ya họọ. Ọọwa mẹjẹ nyori ị ka wụrụ iJisọsị nya iJihova ịnyịnyị lẹ? Ehe. Jẹ́ nyori ụka ká iJisọsị wẹẹ ya ẹla rụ ẹnyị nya iJihova, o ya nyị “ẹnyị nyang.” Lẹ ẹnyị nya iJihova á ri ịnya iJisọsị ka. Ịyẹ tị́ tịtị ri etu nya ẹla ọlẹ ká iJisọsị ya nyori nyị ya ẹnyị nya Ohe ha ọwa? Họhẹ-họhẹ, iJisọsị ku ọmwakpa nya iJihova bala ọ-kaa ya ẹla wọnụ nyamwụ ju. Ọ wẹ la ẹnyị nya Adamwụ bala ọ-họ akụrwọ ẹbyẹbyị la ẹnyị ọwẹ. (Jọn. 5:43; 10:25) Oheeye, etu nya ẹnyị nya iJisọsị ri “IJihova à Ri Ọchịda lẹ.” Lẹ, etu nya ẹnyị nya iJisọsị gu ẹnyị nya iJihova ịnyịnyị.
7. Ya ọ-chụ pwokwita nya abwọlẹ kọ du ká iJisọsị jẹ́ ya ẹla la ẹnyị nya iJihova wẹẹ.
7 Nyọka wo etu nya abwọlẹ kọ du ká iJisọsị jẹ́ ya ẹla la ẹnyị nya iJihova, kụ irya nya ọ-chụ pwokwita ọlẹ wẹẹ. Adịrahụ ka du ọngịnyị ẹrụ kaka ya ẹla ta angịnyị ku ọmwakpa nya ịlọmwụ myị́. Lẹ ụka ká ọngọọwa á ya ẹla, ẹla nyamwụ ka la ọngịrị lala ịnya adịrahụ ayịdang. Ụ-ụgbẹyị ọ-la ịnyịnyị, iJisọsị ku ọmwakpa nya iJihova bala o-ya ẹla ta angịnyị la ẹnyị nyamwụ.—Mat. 21:9; Luk. 13:35.
8. Ịyẹ tị́ du ká iJihova ya nyori iJisọsị nyị wẹ la ẹnyị nya ọwa ene kọ dọmwụ wẹẹ wẹ odehe? (Ehe Ọkpụkpụ 23:20, 21)
8 ỊBayịbụụ wụrụ iJisọsị nyị Omyi Ẹla, chajị iJihova kaa kpọọ ya ẹla je alegu-ẹrụ bala angịnyị ehe u-uhye nya ang ọlẹ kọ tịtọ kị ka jẹ́ bala ọ-ka họ. (Jọn. 1:1-3) Ọ chịkpẹẹ myị́ ká iJisọsị à ka ri olegu-ẹrụ ọlẹ ká iJihova du kaka kpẹhị rịrị ala Isirẹlụ ụka kị juwa u-ugbileji. Ụka ká iJihova wẹẹ byi ala Isirẹlụ nyị ju ihi nya olegu-ẹrụ ọọwa, ọ yẹkẹẹ: “Chajị am à wẹẹ doo ẹrụ lẹ,” lee ọ wẹ la ẹnyị nyam.a (Wa Ehe Ọkpụkpụ 23:20, 21.) IJisọsị wẹ la ẹnyị nya iJihova chajị ọ ku ọmwakpa nya iJihova, ọwa à tị ri ọngọlẹ kọ mẹjẹ gụ́ wuu nyori iJihova la ịgọgọ bala ọ-kaa họ ẹla myị́ ẹla kpakpa lẹ.
‘ADỊDA, CHỊ ẸNYỊ NYA ỊLỌNG EHE MẸ’
9. Ányị ẹnyị nya iJihova à tị́ ju apyobwuna ha iJisọsị kaka ba? Ịyẹ tị́ du kahị ya ịnyị?
9 Jaabwọ kahị ya wẹ, ene ká iJisọsị dọmwụ ka wẹ odehe ọlẹ, ẹnyị nya iJihova à ju apyobwuna họọ gụ́ ang ịkịla wuu lẹ. Ịnyị à du ká iJisọsị kaa họ ẹla ụgbẹyị ọlẹ kọ ka mẹjẹ nyori ẹnyị ọwẹ baba họọ ụka kọ jam odehe lẹ! Ụka ká ụkụrwọ nya iJisọsị ja ka cheju, ọ byi iJihova yẹkẹẹ: ‘Adịda, chị ẹnyị nya ịlọng ehe mẹ.’ Ahyaahị, Adamwụ wẹ la omyi ogboo bwu epwoohe yẹkẹẹ: “M dọmwụ chị ụmụmẹ nya ẹnyị nya ịlọm ehe ene-ene lẹ, m tị ka myịmyị-ị̀ juwa chọọ ehe kịlahị-ịlahị wẹẹ.”—Jọn. 12:28.
10-11. (a) Ányị iJisọsị à tị́ bwu ya ogbo ha ẹnyị nya iJihova? (Yẹ ifoto ịnyịnyị.) (b) Ịyẹ tị́ du ká ẹnyị nya iJihova baba nyọka chị ịgọgọ ju bala ọ-ka wụ ido hi?
10 IJisọsị tị ya ogbo ha ẹnyị nya Adamwụ ịnyịnyị. Ányị ọ tị́ bwu họ ịnyị? Ụgbẹyị ọhẹ ri ọlẹ kọ ya abwẹla ịnyịịla-ịnyịịla bala ọhọhọ nya Adamwụ je angịnyị. Ma, ẹla ọkịla tị juwa kọ họ nyọka ya ogbo ha ẹnyị ọwẹ wẹẹ. Ọ baba nyọka chị ịgọgọ ju ẹnyị nya iJihova bala ọ-ka wụ ido hyoo.b IJisọsị mẹjẹ jaabwọ ká ẹlẹwẹ baba ka ba ụka kọ mẹjẹ angịjụgbẹyị nyamwụ jaabwọ kị ka raabwọ. Ọ yẹkẹẹ: “Adahị ọlẹ ká juwa e-epwoohe, kahị chị ịgọgọ ju ẹnyị nyang.”—Mat. 6:9.
11 Ịyẹ tị́ du ká ẹnyị nya iJihova baba nyọka chị ịgọgọ ju bala ọ-ka wụ ido hi? Chajị Olegu Onyobyi me ọnọọkịla ba iJihova Ohe Oluhye ẹ-ẹpwụ nya iku nya Idẹn. Olegu Onyobyi ya nyori iJihova nyị ri ọla ọnọọkịla bala o-ri nyị wẹẹ wu ang ọnyịịla ọhẹ kpa hi Adam bala Iivu. (Ọmwụ. 3:1-5) Bwula ọwẹ, Olegu Onyobyi wẹẹ ya nyori ụgbẹyị ọlẹ ká iJihova wẹẹ bwu kpeji nyị́ la kpakpa ka. Nyọlẹ ká Olegu Onyobyi me ọnọọkịla ba iJihova wẹẹ, ọ bịrị ẹnyị nya Ohe chajị ká angịnyị ka yọọ lala ọngịnyị ọtịpyọ. Ụka ọkịla, la ahyẹẹnụ nya iJobu, Olegu Onyobyi ya nyori angịlẹ kị kaa gbịgba ha iJihova nyị kaa họ ịnyị ọọlajị nya ang ọlẹ kị kaa yé bwu ẹga nyamwụ ịnyị. Etu nya ẹla ọlẹ kọ ya wẹ ri, ọngọngọhẹ á la ọháha ẹ-ẹga nya iJihova kpụ ọ ka kịnyaa la ọ-gbịgba họọ ẹ-ẹpwụ nya ịmayẹ ka. (Job. 1:9-11; 2:4) Ẹlẹwẹ baba nya ụka ọ-ka chịpwụrụ nyọka jẹ́ ọngọ ri ọla ọnọọkịla, kori kọ ri iJihova lee Olegu Onyobyi.
IJisọsị mẹjẹ angịjụgbẹyị nyamwụ jaabwọ kọ baba nyọka chị ihi ju ẹnyị nya Ohe kaka ba (Yẹ ọgba 10)
M̀ “HU ỌHỊHỊ NYAM DEEJI GA HA IGU”
12. Ẹlịyẹ iJisọsị à tị́ myọnụ nyọka họ ọọlajị nyọlẹ ká ẹnyị nya iJihova họ́ọ?
12 Ọháha ọlẹ ká iJisọsị la ẹ-ẹga nya iJihova du kọ kaa tịtọ nyọka họ ang myị́ ang ọlẹ kọ ka jụ họ myị́ nyọka chị ịgọgọ ju ẹnyị nya iJihova bala ọ-wụ ido hyoo. IJisọsị ya nyori m “hu ọhịhị nyam deeji ga ha igu.” (Jọn. 10:17, 18) Ee, ọ myọnụ nyọka gbu chajị nya ẹnyị nya iJihova.c Adam bala Iivu, kị ri angịnyị ịkpẹẹkpẹẹ nya ọgbanyẹ, ji ẹkpẹ nyaa da iJihova kaka ji oye nya Olegu Onyobyi. Ma iJisọsị ọwa tị myọnụ nyọka wẹ odehe ọlẹ kaka mẹjẹ nyori ọ la ọháha ẹ-ẹga nya iJihova. IJisọsị họ ịnyị bwula o-ju ihi nya iJihova ẹ-ẹpwụ nya ẹla myị́ ẹla ọlẹ kọ họ bala o-yaya. (Hib. 4:15; 5:7-10) Ọ godayị giri-giri ha iJihova ẹ-ẹpwụ nya ọhịhị nyamwụ wuu gbee ka pwụ ụka kọ gbu igu onyuujujwo u-uhye nya okoji ịnyịnyị. (Hib. 12:2) Bwula ọ-họ ịnyị, ọ mẹ ọháha ọlẹ kọ la ẹ-ẹga nya iJihova bala ẹnyị nyamwụ jẹ.
13. Ịyẹ tị́ du ká iJisọsị à ji iwe-ahụrụ ọlẹ kọ ka jẹ́-ẹ mẹjẹ gụ́ wuu nyori Olegu Onyobyi ri ọla ọnọọkịla? (Yẹ ifoto ịnyịnyị.)
13 Ụgbẹyị ọlẹ ká iJisọsị bwu hịhị mẹjẹ nyori Olegu Onyobyi à ri ọla ọnọọkịla lẹ, ma i-iJihova ka! (Jọn. 8:44) IJisọsị jẹ́ iJihova gụ́ ọngọngọhẹ ọlẹ kọ hịhị odehe ọlẹ. Kori ká ẹlẹlẹhẹ ọlẹ ká Olegu Onyobyi ya ba iJihova á ri ẹlịlẹhị, iJisọsị ka jẹ́ ẹla u-uhye nyamwụ. Ma iJisọsị cheje nyọka chẹkpẹ ju ẹnyị nya iJihova, mẹjẹ nyori ọ jẹ́ nyori ẹla ịlẹ ká Olegu Onyobyi ya wuu ri ịnịịkịla. Ụka ọlẹ kọ dọmwụ lala o-ri iJihova nyị nyẹẹkpẹ da iJisọsị lẹ, ọ nwụlanọ nyọka gbu ọkọkọ nyọka nyẹẹkpẹ da Adamwụ ọlẹ kọ la ọháha.—Mat. 27:46.d
Ọhịhị nya iJisọsị mẹjẹ gede-gede nyori Olegu Onyobyi à ri ọla ọnọọkịla lẹ, i-iJihova ka! (Yẹ ọgba 13)
‘M̀ HỌ ỤKỤRWỌ ỌLẸ KÁ YA JUM ỤBWỌ KPÁ CHỊ EJU LẸ’
14. Ányị iJihova à tị́ bwu nwụ iJisọsị uri chajị nya ọ-họ kpẹẹkpẹẹ nyamwụ?
14 Ẹ-ẹpwụ nya abwọ ọrịrị ọlẹ ká iJisọsị rị hyẹẹkpẹ ene kọọ gbu, ọ yẹkẹẹ: “Ụkụrwọ ọlẹ ká ya jum ụbwọ ya, am nyị họ lẹ, m tị họọ kpá chị eju ịnyịnyị lẹ.” Ọ dahịhile nyori iJihova ka nwọọ uri nyọlẹ kọ họ kpẹẹkpẹẹ. (Jọn. 17:4, 5) Ahị ọdahile nya iJisọsị ọọwa á tị ri ododu ka. IJihova á pehyoo juwa ẹ-ẹpwụ nya iworu pyịyọọ ka. (Ụkụr. 2:23, 24) O wule iJisọsị eji bwula igu kaka ya iwe-ahụrụ ọtụka-ọtụka họọ e-epwoohe. (Filip. 2:8, 9) Nyọlẹ kọ nọ chẹẹ lẹ, iJisọsị à dọmwụ nyọka kpeji lala Adịrahụ nya Ịpyị-Adịrahụ nya Ohe lẹlẹ. Ịyẹ Ịpyị-Adịrahụ ọọwa à tị́ ka họ? IJisọsị wẹ ẹlẹwẹ ụka kọ mẹjẹ angịjụgbẹyị nyamwụ nyị raabwọ yẹkẹẹ: “Ịpyị-adịrahụ nyang a wẹ odehe ọlẹ. [Ká] họ irya nyang odehe ọlẹ jaabwọ kọ la ụ-ụwa epwoohe.”—Mat. 6:10.
15. Ang ọkịla oyina iJisọsị à tị́ ka họ?
15 Ụ-ụwa ị-ịlahị, iJisọsị ka da ẹwụ ta aluji nya Ohe bala ọ-taa ayịreji lụka nya Amagẹdọn. (Ọwụ. 16:14, 16; 19:11-16) Ụka kọ họ ịnyị kpá bwaa, ọ ka wu Olegu Onyobyi ju ka “ụjẹ ọ-la ọbaba-ka,” kọ ri ẹga ọ-lala agba ọlẹ kọ ka jẹ́-ẹ họ ịngịngịhyẹ kaka. (Ọwụ. 20:1-3) IJisọsị ka họ angịnyị ehe ka la kpẹẹkpẹẹ bala ọ-la okpunyi lụka nya Eji Ọkpakpa Ọla Ẹka Ụnọ. Ọ ka wule egu eji. Ọ ka yẹ odehe lẹpwụ-lẹpwụ da kaka ri ịparadayịsị. Irya nya iJihova ka họ jịra!—Ọwụ. 21:1-4.
16. Ányị ọhịhị à tị́ ka la lụka nya ocheju nya Eji Ọkpakpa Ọla Ẹka Ụnọ?
16 Ányị ọhịhị à tị́ ka la ụka ká Eji Ọkpakpa Ọla Ẹka Ụnọ á cheju kpá? Ọhọbịrị bala ọkpẹẹkpẹẹ ọlala ka nya angịnyị ehe á ka ji kaka. Angịnyị ehe á ka baba nyọka bịlẹ ọ-hịnyọhi nya ịhọbịrị nyaa bwula iya ọkịlaa-kịla nya iJisọsị kaka; ị́ tị ka baba nya ọngọ ka ku ọmwakpa nyaa lee ọngọkịliya ọhẹ kaka ịnyịnyị. “Oluji ohyẹẹkpẹ-ẹkpẹ,” kọ ri igu ọlẹ kahị ri ugu bwu ẹga nya Adam, “ka ta ayịreji ụka ọọwa” lẹ. Iworu ka da uhuhwo, chajị ị ka tịrị angị gbugbu ẹkpẹ wẹ ọhịhị ụka ọwẹ lẹ. Ọng myị́ ọng odehe ka la kpẹẹkpẹẹ.—1 Kọr. 15:25, 26.
17-18. (a) Ẹlịyẹ à tị́ ka họ la ocheju nya Eji Ọkpakpa Ọla Ẹka Ụnọ? (b) Ányị iJisọsị à tị́ ka họ ụka ká eji ọkpakpa nyamwụ á cheju kpá? (1 Ala ịKọrịntị 15:24, 28) (Yẹ ifoto ịnyịnyị.)
17 Ẹla ọkịla oyina à tị́ ka họ la ocheju nya Eji Ọkpakpa Ọla Ẹka Ụnọ? Lụka ọọwa, ẹla ọkpọnchị ọhẹ ka họ. Ọngọngọhẹ á ka da ịwẹẹ nyori Ohe la ịgọgọ bala ọ-kaa họ ẹla kpakpa kaka. Ịyẹ tị́ du? I-iku nya Idẹn, Olegu Onyobyi ya nyori iJihova nyị ri ọla ọnọọkịla bala o-ri nyị́ kaa kpeji u-uhye nya angịnyị ehe la ọháha ka. Bwu ụka ọwẹ gbee daalẹ, angịlẹ kị kaa gbịgba ha iJihova mẹjẹ ụka lụmẹ-lụmẹ nyori agbẹyị nyamwụ à há gụ́gụ wuu lẹ. Lẹ, la ocheju nya Eji Ọkpakpa Ọla Ẹka Ụnọ, ị ka chị ihi ju ẹnyị nya iJihova lẹ. Ọ tị ka mẹjẹ gede-gede nyori o ri Adịda ọ-la ọháha ọlẹ kọ juwa e-epwoohe ịnyịnyị.
18 Ọng myị́ ọng wuu ka jẹ́ nyori ẹla ịlẹ ká Olegu Onyobyi ya ba ẹnyị nya iJihova ri ịnịịkịla. Ányị iJisọsị à tị́ ka họ ụka ká eji ọkpakpa nyamwụ á cheju? Ọ ka la egbeju ọngịrị ta iJihova jaabwọ ká Olegu Onyobyi họ? Ehe! (Wa 1 Ala ịKọrịntị 15:24, 28.) IJisọsị ka tịrị Ịpyị-Adịrahụ ẹkpẹ ju Adamwụ ụ-ụbwọ. Ọ ka kpa ịlọmwụ keji ha eji ọkpakpa nya Adamwụ. IJisọsị datị hi Olegu Onyobyi ịnyịlẹhị, ọ nwụlanọ nyọka tụụbwọ hi ọngịrị ọnyị myị́ ọnyị ọlẹ kọ la ju iJihova ụ-ụbwọ chajị iJihova họ́ọ.
IJisọsị wẹẹ tịrị Ịpyị-Adịrahụ ẹkpẹ ju iJihova ụ-ụbwọ la ocheju nya Eji Ọkpakpa Ọla Ẹka Ụnọ (Yẹ ọgba 18)
19. Ányị ẹnyị nya iJihova à tị́ baba ha iJisọsị kaka ba?
19 Ọ́ la ẹbyẹbyị nyori iJihova myọnụ nyọka ya ẹnyị nyamwụ ha iJisọsị ka! IJisọsị mẹjẹ kpẹẹkpẹẹ jaabwọ ká Adamwụ la lẹ. Lẹ, ányị ẹnyị nya iJihova à tị́ baba ha iJisọsị kaka ba? Ọ baba họọ gụ́ ang ọkịla ọhẹ-lọhẹ wuu. Ọ myọnụ nyọka gbu chajị nya ẹnyị ọwẹ, ọ tị nwụlanọ nyọka tụụbwọ hi ang myị́ ang wuu ju iJihova ụ-ụbwọ la ocheju nya Eji Ọkpakpa Ọla Ẹka Ụnọ ịnyịnyị. Ányị ahị tị́ ka bwu gbịla iJisọsị? Ahị ka wẹ ịtọ ẹla ọwẹ ẹ-ẹpwụ nya ang ọjẹ́jẹ ọkịla.
EJE 16 Praise Jah for His Son, the Anointed
a Ụka ọhẹ, alegu-ẹrụ kaa ku ọmwakpa nya iJihova ụka kị myị ẹrụ la ẹnyị nyamwụ ịnyịnyị. Ịnyị à du ká ịBayịbụụ kaa ya ụka ọhẹ nyori iJihova nyị ya ẹla, nanana nyori olegu-ẹrụ à wẹẹ ya ẹla ku ọmwakpa nyamwụ ụka ọwẹ kpangga lẹ. (Ọmwụ. 18:1-33) Ịlẹhị lẹ Ụpwụ Ịgọgọ ya nyori iJihova nyị ya Ehile ha iMosisi, ịgba ịkịla mẹjẹ nyori alegu-ẹrụ nya-à myị ẹrụ ọọwa ha iJihova lẹ.—Liv. 27:34; Ụkụr. 7:38, 53; Gal. 3:19; Hib. 2:2-4.
b ỌDAWỤLẸ NYA OMYI ẸLA: Etu nyọka “chị ịgọgọ ju” ri ọ-ka chị ihi ju ang, lee ọ-ka yẹ ang nyori ọ la cheri-cheri. Ọ-ka “wụ ido hi” ri ọ-ka mẹjẹ nyori ẹla ọtịpyọ ọlẹ kị ya rụ ọngịnyị nyị ri ọnọọkịla.
c Igu nya iJisọsị wụrụ ụgbẹyị da ha angịnyị ehe nyọka jẹ́-ẹ yé ọhịhị ọmyịmyị-ka ịnyịnyị.
d Kụ ẹhị yẹ “Ịtọ Ẹla Bwu Ẹga nya Angị Wa Apwụ Nyahị” ẹ-ẹpwụ nya Ẹpwang ọ-Kụ Gbeji, Ọya Ohene 2021, ẹbẹ 30-31.