ANG ỌJẸ́JẸ 23
EJE 2 IJihova À Ri Ẹnyị Nyang Lẹ
Ẹnyị nya IJihova Baba Hahị
“Anụ à ri alibeenu nyam lẹ.”—AYỊ. 43:10.
ẸHỊ NYA ẸLA
Ang ọlẹ kahị ka họ nyọka mẹjẹ nyori iJihova la ịgọgọ bala o-ri ẹla ịlẹ wuu ká Olegu Onyobyi ya bọọ ri ọnọọkịla.
1-2. Ahị tị họ ányị kahị jẹ́ nyori ẹnyị nya iJihova baba ha iJisọsị?
ẸNYỊ nya iJihova à ri ang ọlẹ kọ baba ha iJisọsị gụ́ wuu lẹ. Ọwa à ri ọngọlẹ kọ họ ká ẹnyị nya iJihova dodehe gụ́ wuu ẹẹ. Jaabwọ ká ang ọjẹ́jẹ ọlẹ kọ jene nya ọlẹ ya, iJisọsị myọnụ nyọka gbu chajị nyọka mẹjẹ nyori iJihova la ịgọgọ bala o-ri agbẹyị nyamwụ wuu la kpakpa. (Mak. 14:36; Hib. 10:7-9) Ụka ká Eji Ọkpakpa ọla Ẹka Ụnọ nya iJisọsị á tị chọnụ kpá, ọ ka pẹhi ọngịrị ju Adamwụ ụ-ụbwọ chajị nyọka chị ihi ju ẹnyị nya iJihova. (1 Kọr. 15:26-28) Ang ịlẹ wuu ká iJisọsị họ chajị nya ẹnyị nya iJihova mẹjẹ nyori ọ la ọháha ẹ-ẹga nya iJihova yẹẹyẹẹ.
2 IJisọsị wẹ odehe ọlẹ chajị nya ẹnyị nya Adamwụ. (Jọn. 5:43; 12:13) Ọ chị ẹnyị nya Adamwụ ehe mẹjẹ angịlẹ kị kaa bọọ jẹ. (Jọn. 17:6, 26) Ụka kọ mẹ ang jẹ bala ọ-họ akụrwọ ẹbyẹbyị, ọ kaa họ ọ ka la gede-gede nyori iJihova à ya ẹla ọjẹ́jẹ bala ọngịrị ọọwa họọ lẹ. (Jọn. 10:25) Ẹlịlẹhị ri, iJisọsị bịlẹ iJihova nyị kpẹhị rịrị angịjụgbẹyị nyamwụ ọọlajị nya “ẹnyị nyang.” (Jọn. 17:11) Ọ la gede-gede nyori ẹnyị nya iJihova ju apyobwuna ha iJisọsị gụ́ ang ịkịla wuu. Lẹ, ányị ọngịnyị à tị́ ka jẹ́-ẹ ya ọwa nyị wẹẹ dịrẹ ịKịrayịsị kọ tị ka jẹ́ ẹnyị nya iJihova bala ọ-kaa wụrwọọ ka?
3. Ẹlịyẹ ahị tị́ wẹẹ ka kụ ẹhị yẹ ẹ-ẹpwụ nya ang ọjẹ́jẹ ọlẹ?
3 Lala Angịnyị nya ịKịrayịsị ịlẹ kị kaa maga nyọka dịrẹ ọgụ-ẹpẹtẹ nya iJisọsị, ahị jẹ́ apyobwuna nya ẹnyị nya Adamwụ ịnyịnyị. (1 Pit. 2:21) Ẹ-ẹpwụ nya ang ọjẹ́jẹ ọlẹ, ahị ka yẹ ang odudu ká iJihova ya ẹnyị nyamwụ wụrụ angịlẹ kị kaa ya “ẹrụ ọnyịịla chajị nya ịpyị-adịrahụ.” (Mat. 24:14) Ahị ka myị́myị́-ị ya ẹla u-uhye nya ang odudu ká ọngọngọọng nyahị baba nyọka jẹ́ apyobwuna nya ẹnyị nya iJihova.
“ANGỊ MYỊ LA ẸNYỊ NYAMWỤ”
4. (a) Ụkụrwọ oyina iJisọsị à tị́ ya ju angịjụgbẹyị nyamwụ ụ-ụbwọ ene kọọ rụ ka epwoohe? (b) Ịtọ ẹla oyina à tị́ ji u-uhye nya ụkụrwọ ọọwa?
4 Ene ká iJisọsị ka rụ tịrẹkpẹ ka epwoohe, o byi angịjụgbẹyị nyamwụ yẹkẹẹ: “Anụ ka ye ọngịrị nya Ohe Oluhye ụka ká Olegu Ịgọgọ á chị kụrụụnụ kpá. Ọọwa lẹ, anụ ka ri alibeenu nyam ụ-ụwa e-epweji nya iJerusalẹm bala ụ-ụwa ị-ịpyị nya iJudiya wuu bala ị-ịpyị nya ala ịSameriya wuu lalala ju kele ka ọbaba nya odehe ọlẹ wuu lẹlẹ.” (Ụkụr. 1:8) Lẹ angịjụgbẹyị nyamwụ ka kpa ẹrụ ọnyịịla pyẹ ka ẹga myị́ ẹga, ọ́ ka ba Isirẹlụ kem ka. Angịnyị ịla ụpa ọnyị myị́ ọnyị nya odehe ka la iwe nyọka jẹ́-ẹ wẹ ka ri angị ba iJisọsị jẹ. (Mat. 28:19, 20) Ma iJisọsị tị ya nyori: “Anụ ka ri alibeenu nyam.” Lẹ, angịlẹ kị ka ri angịjụgbẹyị ka ri alibeenu nya iJisọsị kem ịnyị lee ị tị́ ka baba nyọka jẹ́ iJihova bala o-ri ibeenu nyamwụ ịnyịnyị? Ẹla ọlẹ kị chabwọ ụ-ụpwụ nya Ụkụrwọ nya Alẹrụ egbeju 15 dahị ụbwọ nyọka jẹ́-ẹ wẹ ịtọ ẹla ọwẹ.
5. Ányị alẹrụ bala angịgbahị ịla iJerusalẹm à tị́ mẹjẹ nyori angịnyị wuu baba nyọka jẹ́ ẹnyị nya iJihova? (Yẹ ifoto ịnyịnyị.)
5 La ẹka nya 49 C.E., alẹrụ nya iJisọsị bala angịgbahị ịla iJerusalẹm tọ awụlẹ nyọka ya ẹla u-uhye nya ang ọlẹ ká ala iJentayịlị ịlẹ kị da ụhụhụ ka baba nyọka họ ene kị ka yaa myị lala angịnyị nya ịKịrayịsị. Ụka ká o-wo lawụlẹ nyaa ọọwa ja ka cheju, iJemsi ọlẹ kọ ri ọnyị adịda nya iJisọsị yẹkẹẹ: “IPita tịrọnụ ya jehi jaabwọ ká Ohe Oluhye la ịlọmwụ a jene-jene, chị ọnahị nyamwụ ehe ẹ-ẹga nya ala iJentayịlị bwula ọlẹ ká Ohe Oluhye chụ angịhyẹ bwu ẹpwarịrị nya ala iJentayịlị ịịwa kị ka ri angị myị la ẹnyị nyamwụ.” Ẹnyị oyina iJemsi à tị́ wẹẹ ya ẹla rụ? Ọ da ụbwọ ka omyi ẹla nya ọlọmwụ Emọsị bwula o-ya myị́myị́ yẹkẹẹ: “Chajị ká angịnyị ehe ihihi ịkịla wuu ka jẹ́-ẹ tịtọ nya Ọngọlahị nya ịlẹhị-ịlẹhị, tụ ala iJentayịlị ịlẹ wuu, kị ka juwa kpa ọmyịmyị ọlala nyaa be ẹkọ wụrụ ẹnyị nyam am [iJihova,]” lee angịlẹ kị wụrụ la ẹnyị nyamwụ. (Ụkụr. 15:14-18) Angịjụgbẹyị inyeewe ịwẹ á ka jẹ́ ẹnyị nya iJihova kem ka, ma ị ka ‘wụraa la ẹnyị nyamwụ ịnyịnyị.’ Ọọwa ri ị ka myị ẹnyị nya Ohe, angịnyị tị ka jáa bwula ẹnyị ọọwa ịnyịnyị.
Ụka ká angị kpẹhị rịrị ogu la oyi ọhọhẹ wẹẹ la ọjịra-jịra, ị yẹ gede-gede nyori Angịnyị nya ịKịrayịsị ka myị ẹnyị nya Ohe pyii (Yẹ ọgba 5)
6-7. (a) Ịyẹ iJisọsị à tị́ wẹ odehe ọlẹ kaka họ? (b) Ẹla ịkpọnchị ịkịla iyina à tị́ bọọ ẹ-ẹgọ?
6 Etu nya ẹnyị nya iJisọsị ayịdang ri “IJihova à Ri Ọchịda Lẹ,” ọ tị mẹjẹ nyori o ri ụgbẹyị ọlẹ ká iJihova kpa chị angịlẹ kị la ọmyịmyị da ịlẹhị. IJisọsị wẹ odehe kaka hu ịlọmwụ ha chajị nya angịnyị ehe. (Mat. 20:28) Bwula ọ-ya ọhịhị nyamwụ kịliya, ọ họ ọ chịkpẹẹ ká angịnyị ehe ka la ọchịda bala ọhịhị ọmyịmyị ka.—Jọn. 3:16.
7 Ma, ịyẹ tị́ du ká angịnyị ehe baba nya iya ọkịlaa-kịla nya iJisọsị ene? Chajị nya ẹla ọlẹ kọ họ i-iku nya Idẹn. Jaabwọ kahị jẹ́ ẹ-ẹpwụ nya ang ọjẹ́jẹ ọlẹ kọ jene nya ọlẹ, Adahị bala ịnahị nya ọgbanyẹ, kị ri Adam bala Iivu, la egbeju ọngịrị ta iJihova du ká iwe nyọka hịhị gboyi myị́ oyi gwaa byi. (Ọmwụ. 3:6, 24) Ma, ẹlẹhẹ ọlẹ kọ tị dọmwụ ju apyobwuna gụ́ ọchịda nya angịnyị ehe ịlẹ kị ri alịhọbịrị tị juwa wẹẹ. Olegu Onyobyi me ọnọọkịla ọtụka ba iJihova. (Ọmwụ. 3:4, 5) Lẹ, ọchịda nya anyị ịtụma nya Adam bala Iivu da ori wu ẹla ọkịla ọlẹ kọ dọmwụ baba gụ́gụ wẹẹ. Ẹla ọọwa ri ọ-ka chị ịgọgọ ju ẹnyị nya iJihova. Nyọlẹ ká iJisọsị ku ọmwakpa nya iJihova bala ọ-myị ẹnyị nyamwụ wẹẹ, ọ họ ụkụrwọ ọkpọnchị ẹ-ẹpwụ nya ihi ọ-chị ju ẹnyị nya iJihova.
Ányị ọngịnyị à tị́ ka jẹ́-ẹ ya ọwa nyị wẹẹ dịrẹ ịKịrayịsị kọ tị ka jẹ́ ẹnyị nya iJihova bala ọ-kaa wụrwọọ ka?
8. Ẹlịyẹ angịlẹ wuu kị kaa ba iJisọsị jẹ à tị́ baba nyọka jẹ́?
8 Angịlẹ wuu kị ka la ọmyịmyị ẹ-ẹga nya iJisọsị, tụ ala iJuu bala ala iJentayịlị, ka baba nyọka jẹ́ bala ọ-myị nyori ẹga nya iJihova Ohe Oluhye, kọ ri Adịda nya iJisọsị, ọchịda nyaa à bwu lẹ. (Jọn. 17:3) Da ọọwa u-uhye, lala iJisọsị, angịnyị ka jáa bwula ẹnyị nya iJihova. Ị tị ka jẹ́ ọbaba nyọka chị ịgọgọ ju ẹnyị ọwẹ ịnyịnyị. Ọchịda nyaa kpụnịrọ ịwa ọ-ka họ ịnyị. (Ụkụr. 2:21, 22) Lẹ angịlẹ kị ba iJisọsị jẹ yẹẹyẹẹ wuu baba nyọka jẹ́ ang u-uhye nya iJihova bala iJisọsị. Ịnyị à du lẹ ká iJisọsị chị abwọ ọrịrị nyamwụ ọlẹ kị da ju ụ-ụpwụ nya ịJọn 17 eju yẹkẹẹ: “M warị kaka chị ọngịrị nya ẹnyị nyang ehe mẹjaa lẹ. M tị ka juwa chọọ ehe mẹjaa kịlahị-ịlahị ịnyịnyị wẹẹ. Chajị ká ọháha nyang ọlẹ ká la ẹ-ẹga nyam ka jẹ́-ẹ juwa ẹ-ẹpwụ nyaa bala am ayịdang ọ-ka jẹ́-ẹ juwa ẹ-ẹpwụ nyaa ịnyịnyị mẹ.”—Jọn. 17:26.
“ANỤ À RI ALIBEENU NYAM LẸ”
9. Kori kahị tịtọ nyọka ba iJisọsị jẹ aalẹ, ẹlịyẹ ahị tị́ ka họ pyii?
9 Lẹ, angịlẹ wuu kị tịtọ nyọka ba iJisọsị jẹ ọlam-ọlam baba nyọka chị ịgọgọ ju ẹnyị nya iJihova. (Mat. 6:9, 10) Ị ka jẹ́ pyii nyori ẹnyị nya iJihova à gụ́ ẹnyị ịkịla wuu lẹ. Ọ tị baba ká abwẹla nyahị ka mẹjẹ nyori ahị jẹ́ ẹlẹwẹ ịnyịnyị. Ma, ányị ahị tị́ ka bwu la ụpa ẹ-ẹpwụ nyọka chị ịgọgọ ju ẹnyị nya iJihova, lee ọ-ka wụ ido nya Olegu Onyobyi hyoo?
10. Ụpwụ nya Ayịsaya egbeju 42 ka 44 tị́ ya ẹla u-uhye nya ẹlịyẹ? (Ayịsaya 43:9; 44:7-9) (Yẹ ifoto ịnyịnyị.)
10 Ayịsaya egbeju 42 ka 44 ya ẹla u-uhye nya ụkụrwọ ọkpọnchị ọlẹ kahị la ka họ nyọka chị ịgọgọ ju ẹnyị nya iJihova. Ụwa chabwọ nya ẹla ọọwa lala o-ri nyị juwa la eje u-uhye nya ọngọlẹ kọ chịla nyọka ri Ohe nyịlẹhị ẹ-ẹga oleje. IJihova chị angịlẹ wuu kị byi ịlaa ịwa nyị ri ohe ọnụ nyọka mẹjẹ kori kị ri ohe ịnyịlẹhị. Ọ myị́myị́ wụrụ alibeenu nyaa kpehe kị ka họ ibeenu ha ihye ịịwa ịnyịnyị. Ma ọngọngọhẹ-ẹ́ tị họ ịnyị myị́ ka!—Wa Ayịsaya 43:9; 44:7-9.
Ahị kaa mẹjẹ nyori ahị ri Alibeenu nya iJihova ẹ-ẹpwụ nya ẹla myị́ ẹla ọlẹ kahị kaa ya bala ọ-họhọ (Yẹ ọgba 10-11)
11. Ẹlịyẹ iJihova à tị́ ya dodehe u-uhye nya anchẹ nyamwụ ụ-ụpwụ nya Ayịsaya 43:10-12?
11 Wa Ayịsaya 43:10-12. IJihova byi angịnyị nyamwụ yẹkẹẹ: “Anụ à ri alibeenu nyam lẹ, . . . am à ri Ohe Oluhye lẹ.” IJihova wẹẹ byaa kị ka wẹ ịtọ ẹla ọlẹ: “Ohe Oluhye ọhẹ ji ẹgẹhẹ kam wo jẹ ka-á?” (Ayị. 44:8) Lẹ, o ri ihi ọtụka hahị nyọka wẹ ịtọ ẹla ọwẹ. Bwula ẹla oyaya bala abwẹla nyahị, ahị ka mẹjẹ nyori iJihova kem à ri Ohe nya ịlẹhị lẹ, bala o-ri enyị nyamwụ gụ́ ẹnyị ịkịla wuu. Ahị kaa mẹjẹ bwula ụgbẹyị ọlẹ kahị kaa bwu hịhị nyori iJihova háahị ịnyịlẹhị bala ọ-kaa godayị giri-giri họọ, jaabwọ myị́ abwọ ká Olegu Onyobyi á ja kpa akama wẹ uhye nyahị kaka ba. Bwula ọ-họ ịnyị, ahị jẹ́-ẹ la iwe nyọka chị ịgọgọ ju ẹnyị nya iJihova.
12. Ányị ọmwụ ọyẹyẹ ọla ụpwụ nya Ayịsaya 40:3, 5 à tị́ họ jịra?
12 Ụka kahị chị ịgọgọ ju ẹnyị nya iJihova, ahị wẹẹ gbịla iJisọsị ịKịrayịsị. Ayịsaya myị́myị́ ya neeji nyori ọngọhẹ nyị ka ‘nwụla ụgbẹyị nọ gbe iJihova.’ (Ayị. 40:3) Ányị ẹlẹwẹ à tị́ bwu họ jịra? ỊJọn Ọngọ Hu Enyi Ohe nwụla ụgbẹyị nọ gbe iJisọsị, ma ahị ka jẹ́-ẹ ya nyori iJihova ọ “nwụla ụgbẹyị nọ gbe” lẹ, chajị iJisọsị wẹ la ẹnyị nya iJihova bala ọ-mẹ ang jẹ la ẹnyị nya iJihova. (Mat. 3:3; Mak. 1:2-4; Luk. 3:3-6) Ọmwụ ọyẹyẹ ọwọwa yẹkẹẹ: ‘Ogbo nya iJihova ka chehe.’ (Ayị. 40:5) Ányị ọọwa à tị́ bwu lịnyị? Ụka ká iJisọsị wẹ odehe ọlẹ, ọ họ ẹla gbịla iJihova kpẹẹkpẹẹ du kọ lala o-ri iJihova la ịlọmwụ nyị wẹ odehe ọlẹ lẹ.—Jọn. 12:45.
13. Ányị ahị tị́ ka bwu gbịla iJisọsị?
13 Lala iJisọsị, ahị ri alibeenu nya iJihova. Ahị kaa myị ẹnyị nya iJihova bala o-ya akụrwọ ịnyịịla-ịnyịịla ịlẹ kọ kaa họ je ọng myị́ ọng ọlẹ kahị tọ. Ma nyọka jẹ́-ẹ họ ịnyị jaabwọ kọ chịla, ahị baba nyọka ya ụkụrwọ ọkpọnchị ọlẹ ká iJisọsị họ nyọka chị ịgọgọ ju ẹnyị nya iJihova je angịnyị ịnyịnyị. (Ụkụr. 1:8) IJisọsị à ri ọngọlẹ kọ họ ibeenu nya iJihova gụ́ wuu ẹẹ, ahị tị kaa dịrẹ ọgụ-ẹpẹtẹ nyamwụ. (Ọwụ. 1:5) Ma ányị ọngọngọọng nyahị à tị́ ka mẹjẹ nyori ẹnyị nya iJihova baba hahị?
AGBẸYỊ ỊKỊLA ỊLẸ KAHỊ KAA MẸJẸ NYORI ẸNYỊ NYA IJIHOVA BABA HAHỊ
14. Jaabwọ ká 1 Ala ịKọrịntị 1:31 mẹjẹ, ányị ẹnyị nya iJihova à tị́ ka lahị?
14 Ahị kaa kpa ẹnyị nya iJihova chị ogu. (Wa 1 Ala ịKọrịntị 1:31.) IJihova kaa chị ọkẹkẹnị kori kahị kpa ẹnyị nyamwụ chị ogu. (Jer. 9:23, 24; 1 Kọr. 1:31; 2 Kọr. 10:17) O ri ihi ọtụka hahị nyọka ya je angịkịla nyori iJihova la ịgọgọ bala o-ri ẹla myị́ ẹla nyamwụ kaa la kpakpa. Áhị ka ju oyi nyọka ya je alụkụrwọ nyahị, ala ịkịlasị nyahị, aloye ẹpwa nyahị, bala angịkịla nyori ahị ri Alibeenu nya iJihova ka! Ohe Onyobyi tịtọ kahị ka ba la o-ya ẹla u-uhye nya ẹnyị nya iJihova je angịkịla. (Jer. 11:21; Ọwụ. 12:17) Ẹlịlẹhị ri, Olegu Onyobyi bala alọmwụ ịnịịkịla nyamwụ tịtọ ká angịnyị ka deeri hi ẹnyị nya iJihova. (Jer. 23:26, 27) Ma, ọháha ọlẹ kahị la ẹ-ẹga nya ẹnyị nya iJihova du kahị kaa chị ọkẹkẹnị jwoo “ụka wuu.”—Eje. 5:11; 89:16.
15. Ịyẹ à tị́ ri etu nyọka wụrụ ẹnyị nya iJihova?
15 Ahị ka kịnyaa la ọ-wụrụ ẹnyị nya iJihova. (Juw. 2:32; Rom. 10:13, 14) Ọ-ka wụrụ ẹnyị nya iJihova á ba ọ-ọka jẹ́ ẹnyị nya Ohe bala ọ-kpa wụrụ ị-ịwẹ kem ka. Ahị ka jẹ́ abwụma nya Ohe kpangga, ahị ka dahịhilọọ, bala ọ-yẹhị rịrị ka ẹga nyamwụ kọ ka dahị ụbwọ bala ọ-kpahị ụgbẹyị. (Eje. 20:7; 99:6; 116:4; 145:18) Ahị ka ya ẹnyị bala abwẹla nyamwụ je angịkịla ịnyịnyị. Ahị ka daa ụbwọ kị ka yẹ irya da bala ọ-ka họ ẹla ọlẹ kọ kpụ Ohe ịpyọ.—Ayị. 12:4; Ụkụr. 2:21, 38.
16. Ányị ahị tị́ ka mẹjẹ nyori Olegu Onyobyi ri ọla ọnọọkịla?
16 Ahị kaa nwụlanọ nyọka yẹ akama chajị nya ẹnyị nya iJihova. (Jem. 5:10, 11) Ụka kahị godayị giri-giri ha iJihova, kori kahị dọmwụ yẹ akama chajị nya ọọwa wẹwẹ, ahị kaa mẹjẹ nyori Olegu Onyobyi ri ọla ọnọọkịla. La ahyẹẹnụ nya iJobu, Olegu Onyobyi ya ẹla ọlẹ u-uhye nya angịlẹ kị kaa gbịgba ha iJihova: “Ọngịnyị ehe ka tụụbwọ hi ang myị ang kọ la nyọka chị ịlọmwụ da myị.” (Job. 2:4) Olegu Onyobyi ya nyori ụka ká ọhịhị nyị́ há, ọngịnyị nya-à ka myị gbịgba ha iJihova kem lẹ. Kori ká ọhịhị nyị́ tị lujwo, ọngịnyị nyị ka nyẹẹkpẹ da iJihova. IJobu ọwa mẹjẹ nyori ẹlẹwẹ ri ọnọọkịla. Alẹ, ahị ka jẹ́-ẹ mẹjẹ ịnyịnyị nyori jaabwọ myị́ abwọ ká Olegu Onyobyi á kpa akama wẹ uhye nyahị kaka ba, áhị ka nyẹẹkpẹ da iJihova ka. Ahị ka jẹ́-ẹ jẹ́ myị̀myị̀ nyori iJihova ka kịnyaa la ọ-kpẹhị rịrịịhị ọọlajị nya ẹnyị nyamwụ.—Jọn. 17:11.
17. Ụgbẹyị ọkịla oyina ahị tị́ ka jẹ́-ẹ ya ogbo ha iJihova, jaabwọ ká 1 iPita 2:12 ya?
17 Ahị kaa chị ihi ju ẹnyị nya iJihova. (Etu 30:9; Jer. 7:8-11) Nyọlẹ kahị ku ọmwakpa nya iJihova bala ọ-kaa myị ẹnyị nyamwụ wẹẹ, abwẹla nyahị ka jẹ́-ẹ chị ihi jwoo lee o-hu ẹpẹpẹ jwoo myị́. (Wa 1 iPita 2:12.) Lẹ, ahị tịtọ nyọka họ ang myị́ ang ọlẹ kahị ka jụ họ nyọka ya ihi ha iJihova bwula ẹla oyaya bala abwẹla nyahị. Bwula ụgbẹyị ọwẹ, ahị ka jẹ́-ẹ kpa ogbo kịla ẹnyị nyamwụ, nanana nyori áhị la kpẹẹkpẹẹ ka.
18. Ụgbẹyị ọkịla oyina ahị tị́ ka jẹ́-ẹ mẹjẹ nyori ẹnyị nya iJihova baba hahị? (Yẹ ọdawụlẹ oleji ịnyịnyị.)
18 Ẹnyị nya iJihova kaa ri ẹla nyahị gụ́ ịnya ịlọhị. (Eje. 138:2) Ịyẹ tị́ du ká ẹlẹwẹ baba ịnyị? Chajị ọháha ọlẹ kahị la ẹ-ẹga nya ẹnyị nya iJihova ka du ká angịnyị ka kpa ẹhị ọtịpyọ yẹhị myị́.a IJisọsị myọnụ nyọka gbu igu ọ-la oyoyi lala ọngọ họ ang onyobyi chajị nyọka chị ihi ju ẹnyị nya iJihova. Ọ ‘ya ẹhị da oyoyi nya igu ọwẹ bwee’ nyọlẹ kọ myị ká abwọlẹ ká angịnyị yọọ ri ẹla nyamwụ ka. (Hib. 12:2-4) Ọ hu irya nya Ohe ọ-ka họhọ kụ ịlahị.—Mat. 26:39.
19. Ányị ẹnyị nya iJihova à tị́ lang? Ịyẹ tị́ du?
19 Ahị kaa chị ọgọm ju ẹnyị nya iJihova bala ọ-yọọ nya ihi ọtụka nyọlẹ kahị ri Alibeenu nya iJihova. Chajị nya ọọwa, ahị kaa nwụlanọ nyọka chị ihi ju ẹnyị nya iJihova kịnyaa kori kị ja chị oyoyi juhi wẹwẹ. Ẹnyị nya iJihova dọmwụ baba hahị gụ́ abwọlẹ ká angịnyị kaa yẹhị wẹẹ. Lẹ, ahị cheje nyọka kịnyaa la o-gwogbo ha ẹnyị nya iJihova nanana nyori Olegu Onyobyi ka maga nyọka huhi abwọ mẹ. Bwula ọ-họ ịnyị, ahị ka mẹjẹ nyori ẹnyị nya iJihova baba hahị, jaabwọ kọ baba ha iJisọsị ịKịrayịsị.
EJE 10 Praise Jehovah Our God!
a Ọ ri olo nya iJobu kọ dọmwụ ri ọngọ la ọmyịmyị, ụka ká aligu nyamwụ angị ịta ya ẹla ọtịpyọ ba ẹnyị nyamwụ. Ụka nya ọgbanyẹ, ká anyị bala ang-abwọ nya iJobu ta ayịreji, “ọ́ họ ang ọtịpyọ ọhẹ bwula ọ-kpụ Ohe Oluhye abyị kpong-kpong ka.” (Job. 1:22; 2:10) Ma, ụka kị ya nyori iJobu nyị họ ang ọtịpyọ, ọ dọmwụ nyọka wụ abyị hi ịlọmwụ du ká “ẹla ọlọnụ [nyamwụ] la pwáàpwaa.” Ẹhị ọlẹ ká angịnyị kpa yọọ ri ẹla nyamwụ gụ́ ọ-ka chị ihi ju ẹnyị nya iJihova.—Job. 6:3; 13:4, 5; 32:2; 34:5.