Jẹ́ Myị̀myị̀ Nyori À Há IJihova

1. Ịyẹ tị́ du ka hu ịlọng ju iJihova ụ-ụbwọ? (Yẹ ifoto ịnyịnyị.)

À KPỊTỊYA nya ụka ọlẹ ka hu ịlọng ju iJihova ụ-ụbwọ? À cheje ọwẹ chajị nyori à wẹ ka jọ́ọ bala o-ri ọ háng ịnyịnyị. À myọnụ họọ nyori à ka hu irya nyamwụ ọhọhọ kụ́ ịlahị ẹ-ẹpwụ nya ọhịhị nyang bala ọ-kịnyaa juwa la ọháha ẹ-ẹga nyamwụ bwu ọkịlẹtụ nyang, ugbodu okpukpuru, irya omeme bala ọngịrị nyang wuu. (Mak. 12:30) Bwu ụka ọọwa gbee daalẹ, ọháha nyang ẹ-ẹga nyamwụ nwà ka la ọngịrị gụ olene-ene. Lẹ, kori ká ọngịnyị á tọng wo nyori, “IJihova háng ịnyịlẹhị?” ányị a tị́ ka ya? À ka wẹ ahyaahị nyori, “Ọ hám gụ́ ang myị́ ang bala ọng myị́ ọng wuu!”

2-3. Ẹlịyẹ iJihova à tị́ tịtọ kahị ka jẹ́ myị̀myị̀? Ẹlịyẹ ahị tị́ wẹẹ ka kụ ẹhị yẹ ẹ-ẹpwụ nya ang ọjẹ́jẹ ọlẹ? (IJeremaya 31:3)

² Ma, ányị a tị́ ka wẹ kori ká ọngịnyị-ị́ tọng wo nyori, “À jẹ́ myị̀myị̀ kori ká ahụ lịlọng á há iJihova ịnyịlẹhị?” À ka chị godayị pyịnyẹng ene á ka wẹ, ọọlajị nyori à yẹ ịlọng lala ọngọlẹ kọ chịla ká iJihova ka la ọháha ẹ-ẹga nyamwụ ka? Ọọnahị ọnyang ọhẹ kị kpọọ la ụbwọ ọngịrị ụka ko ri onjwo yẹkẹẹ: “M̀ jẹ́ nyori iJihova hám. Ḿ la ịwẹẹ ọdada u-uhye nyọọwa kpong-kpong ka. Ma ụka lụmẹ-lụmẹ, ḿ kaa jẹ́ myị̀myị̀ kori kam há iJihova ịnyịlẹhị ka.” Ma, ịyẹ à tị́ ka dang ahụ ụbwọ nyọka jẹ́ jaabwọ ká ẹla nyang la iJihova?

³ IJihova tịtọ á ka jẹ́ myị̀myị̀ nyori à họ́ọ. (Wa iJeremaya 31:3.) Ẹlịlẹhị ri iJihova tịtọ á ka ri oligu nyamwụ. Ụka ka tị hu ịlọng jwoo ụ-ụbwọ bala o-hu enyi Ohe, ọ kaa ya āhị ọnyịịla-ọnyịịla ọhẹ hang, ko ri ọháha o-gbu enyi-ka nyamwụ. Ọọwa mẹjẹ nyori à họ́ọ nyịlẹhị-ịlẹhị, ọ́ tị ka tụụbwọ hing ẹnẹnẹhẹ ka. Ọháha o-gbu enyi-ka nya iJihova du kọ kaa yẹ anchẹ nyamwụ ị-la ọmyịmyị lala ‘angịnyị nya ụbwọ nya ịlọmwụ.’ (Mal. 3:17) IJihova tịtọ á ka jẹ́ myị̀myị̀ nyori à họ́ọ jaabwọ ká ọlẹrụ ịPọlụ jẹ́ ịnyịnyị. ỊPọlụ da ụpwụ la ahị ọdahile yẹkẹẹ: ‘M jẹ́ myịmyị nya ịlẹhị-ịlẹhị yẹkẹẹ, ó-ri igu ogbugbu riri lee ọhịhị lee alegu-ẹrụ ilepwoohe lee ịngịrị ịtụka-ịtụka lee ang ilijata lee ang ịlịlahị ịlẹ kị juwa ka warị lee ọngịrị nya eji ogbegbe nya ịdịrịhụ wuu, lee, ang iluhye-ọgba ipyiipyii lee ang ikpori-kpori ilekpeleji nya ịpyị lee ịngịngịhyẹ ọkịla ọlẹ wuu ká Ohe Oluhye họhọ, á ka jẹ́-ẹ la ọngịrị chịhị ebwo hi ọháha nya Ohe Oluhye kaka.’ (Rom. 8:38, 39) Ẹ-ẹpwụ nya ang ọjẹ́jẹ ọlẹ, ahị ka ya ẹla u-uhye nya ang odudu kọ baba kahị ka ju ahị ọdahile nyahị ọngịrị nyori ahị há iJihova bala ang ọlẹ kọ ka dahị ụbwọ nyọka họ ịnyị.

ANG ODUDU KAHỊ BABA NYỌKA JẸ́ MYỊ̀MYỊ̀ NYORI AHỊ HÁ IJIHOVA

4. Ányị ahị tị́ ka bwu ma uya ta ijẹẹhị nya Ohe Onyobyi?

⁴ Ọ-jẹ́ myị̀myị̀ nyori ahị há iJihova ka dahị ụbwọ nyọka ma uya ta “ijẹẹhị” nya Ohe Onyobyi ọhẹ. (Efe. 6:11) Ohe Onyobyi ka họ ang myị́ ang ọlẹ kọ ka jụ́ họ myị́ nyọka huhi abwọ la ọ-gbịgba ha iJihova. Ijẹẹhị nyamwụ ọhẹ ri ọnọọkịla ọlẹ kọ kaa me nyori ahị nyị́ há iJihova ka. A deeri ẹnẹnẹhẹ nyori Ohe Onyobyi ri ọngọ kụ ịnya gbe angịnyi ka. Ọ kaa gba mịlahị ụka kọ yẹ nyori ahị nyị chị́ pyẹpyẹ, ọhẹka lala ụka ká ọkịletụ-ụ́ ja kpụhị enyi ọọlajị nya iwe-ahụrụ ịlẹ kahị chịpwụrụ bwu lụka ọkẹkpẹ, akama ịlẹ kahị la lẹẹlẹẹ, lee uko ọchịchị u-uhye nya abwọlẹ ká ijuju ka la. (Etu 24:10) Olegu Onyobyi lala ugẹbẹ ọlẹ kọ wẹẹ durwe nya angị dẹwụ-dẹwụ ịlẹ kọ ka yé wu ri. Lẹ, ọ kaa maga nyọka họ ká abwọ ka chịịhị pyẹpyẹ ụka kọ yẹ nyori ahị nyị la ọkịlẹtụ ọ-kpenyi. Ma, kori kahị kịnyaa la o-ju ahị ọdahile nyahị ọngịrị ẹ-ẹga nya iJihova nyori ahị họ́ọ, ọọwa ka dahị ụbwọ yẹẹyẹẹ nyọka “godayị rịrị giri-giri” jahị da Ohe Onyobyi bala ijẹẹhị nyamwụ ụma ọnyị myị́ ọnyị wuu.—1 Pit. 5:8, 9; Jem. 4:7.

5. Ịyẹ tị́ du kahị baba nyọka jẹ́ nyori ahị há iJihova yẹẹyẹẹ bala o-ju apyobwuna họọ?

⁵ Ọ-jẹ́ myị̀myị̀ nyori ahị há iJihova ka dahị ụbwọ nyọka tụ́ jwoo chwẹẹ gụ ọwọwa. Ịyẹ tị́ du kahị ka jẹ́-ẹ ya ịnyị? IJihova họ angịnyị ehe la ọbaba nyọka mẹ ọháha jẹ ẹ-ẹga nya awụlẹ. Ụka ká ọngịnyị-ị́ mẹ ọháha jẹ ẹ-ẹga nyahị, ọọwa kaa guhi gbịla nyọka mẹ ọháha jẹ ẹ-ẹga nyaa ịnyịnyị. Lẹ, jaabwọ kahị wẹẹ yẹ nyori ahị há iJihova yẹẹyẹẹ bala o-ju apyobwuna họọ, ịnyịnyị ọháha nyahị ẹ-ẹga nyamwụ à ka nwà gụ ọwọwa lẹ. (1 Jọn. 4:19) Jaabwọ ká ọháha ọlẹ kahị la ẹ-ẹga nyamwụ tị wẹẹ la ọngịrị gụ olene-ene, ịnyịnyị ahị ka họ́ọ gụ ọọwa lẹ. ỊBayịbụụ byihi gbagbịla yẹkẹẹ: “Ó ri kanụ tụ ịlọnụ ju Ohe Oluhye chwẹẹ aalẹ, Ohe Oluhye tịtị ka tụ junu chwẹẹ ịnyịnyị.” (Jem. 4:8) Lẹ, ịyẹ ahị tị́ ka họ kahị ka la ọ-jẹ́ myị̀myị̀ gụ ọwọwa nyori ahị há iJihova?

ỊYẸ À TỊ́ KA DAHỊ ỤBWỌ NYỌKA JẸ́ MYỊ̀MYỊ̀ NYORI AHỊ HÁ IJIHOVA?

6. Nyọka jẹ́ myị̀myị̀ nyori ahị há iJihova, ịyẹ ahị tị́ ka raabwọ bịlẹ myị́?

⁶ Raabwọ ha iJihova ụka myị́ ụka nyọka dang ụbwọ jẹ́ ang odudu ka họ́ọ. (Luk. 18:1; Rom. 12:12) À ka raabwọ ha iJihova ụka lụmẹ-lụmẹ ẹ-ẹpwụ nya ahyẹẹnụ nyọka dang ụbwọ ká ka yẹ ịlọng jaabwọ ká ọwa kaa yẹng myị́. (1 Jọn. 3:19, 20) Ịlẹhị lẹ, ọ ka lang ujwo yẹẹyẹẹ ụka ọhẹ nyọka myị nyori à há iJihova. Ma, kpịtịya nyori iJihova lụmẹ gụ ọkịlẹtụ nyang. (1 Jọn. 3:19, 20) Ọ kaa yẹ abwẹla ịnyịịla nyang ịlẹ ká ahụ la ịlọng á dọmwụ ka jẹ́ nyori à la ka myị́. (1 Sam. 16:7; 2 Ego. 6:30) Lẹ ya joo jaabwọ kọ lang i-irya kpangga, ká bịlọọ kọ ka dang ụbwọ nyọka jẹ́ myị̀myị̀ nyori à họ́ọ. (Eje. 62:8) Ụka ká họ ịnyị kpá, ọ baba ká ka họ ẹla ileji ịlẹ ịnyịnyị.

7-8. Ányị omyi ẹla ịlụpwụ nya Eje Ọnyịịla à tị́ dahị ụbwọ nyọka jẹ́ myị̀myị̀ nyori ahị há iJihova?

⁷ Dahịhile ẹla ọlẹ ká iJihova ya. Ọ ya olegu ịgọgọ nyamwụ ha angịlẹ kị da ịBayịbụụ nyọka chabwọ nya abwọlẹ kọ la ịnyịlẹhị jehi. Ẹ-ẹpwụ nya eje ọnyịịla ọhẹ ká iDevidi da, ọ chabwọ nya ụgbẹyị ọnyịịla-ọnyịịla ọlẹ ká iJihova kaa bwu kpahị juhi. Ọ yẹkẹẹ: “[IJihova] ju angị la ọkịlẹtụ o-kpụ enyi chwẹẹ, ọọ chị angịlẹ ká ahị ọdahile gwaa myị da.” (Eje. 34:18) Ụka ká ọkịlẹtụ-ụ́ ja kpụng enyi, ọ ka lang lala o-ri à la ụbwọọng-ụbwọọng myị́. Ma, iJihova myọnụ nyori ọ juwa balang ụka ọlịnyị nyọka dang ụbwọ chajị ọ yẹ jaabwọ ká baba nya ụbwọ ọdada nyamwụ kaka ba. Ụ-ụpwụ nya eje ọnyịịla ọkịla, iDevidi yẹkẹẹ: “Egbejida nyam wuu nyà ka ekpem nyang.” (Eje. 56:8) IJihova jẹ́ ụka ká juwa ẹ-ẹpwụ nya ọjụjụ. Ẹla nyang bala iwe-ahụrụ ọlẹ ká tị wẹẹ chịpwụrụ bwu kaa gwoo o-olegu yẹẹyẹẹ. Ọ lala o-ri ọ kaa go egbejida nyang ju ang, ị tịị jwoo apyobwuna jaabwọ ká enyi ọ-la ekpem nya ọngọ wẹẹ jẹdịyẹ ụ-ụgbẹyị ọlụrụ-lụrụ kaa ju apyobwuna họọ yẹẹyẹẹ ịnyịnyị. Ahị myị́myị́ wa ụ-ụpwụ nya Eje Ọnyịịla 139:3 yẹkẹẹ: “À jẹ ang myị ang ọlẹ kam kaa họ wuu.” IJihova kaa yẹ ang myị́ ang ịlẹ wuu ká kaa họ, ma irya nyamwụ kaa nọ u-uhye nya ang ịnyịịla ịlẹ á kaa họ ịnyị. (Hib. 6:10) Ịyẹ tị́ du? Chajị aga ọmama nyang ọnyị myị́ ọnyị nyọka họ ẹla kpọọ ịpyọ kaa myọọ lẹhị yẹẹyẹẹ.a

⁸ IJihova wẹẹ kpa omyi ẹla ịnyịịla ịlịịwẹ bwu ịBayịbụụ bying nyori ọ kpahị jung, à tị họ́ọ yẹẹyẹẹ ịnyịnyị. Jaabwọ kahị tị jẹ́ bwu ẹkpẹ lalẹ ene, Ohe Onyobyi tịtọ á ka myị nyori á há iJihova ka. Lẹ kori ká la ịwẹẹ ọdada u-uhye nya ọháha nya iJihova ụka ọhẹ, chị godayị ká tịlọng wo nyori, ‘Ohe Onyobyi ko ri “adịda nya ọnọọkịla omeme” m tị́ ka myị la lee iJihova ko ri “Ohe Oluhye ọ-họ ẹla ọnụ-ọnụ” tị́?’—Jọn. 8:44; Eje. 31:5.

9. Ẹlịyẹ iJihova à tị́ myọnụ ha angịlẹ kị la ọháha ẹ-ẹga nyamwụ? (Ehe Ọkpụkpụ 20:5, 6)

⁹ Kụ irya u-uhye nya abwọlẹ ká ẹla nya angị la ọháha ẹ-ẹga nyamwụ kaa lọọ. Kụ ẹhị yẹ ẹla ọlẹ ká iJihova byi iMosisi bala ala Isirẹlụ wẹẹ. (Wa Ehe Ọkpụkpụ 20:5, 6.) IJihova myọnụ nyori ọ ka kịnyaa la ọ-mẹ ọháha o-gbu enyi-ka jẹ ẹ-ẹga nya angịlẹ kị la ọháha họọ. Nyọlẹ ká iJihova ri ọngọ họ kpẹẹkpẹẹ wẹẹ, ahị ka jẹ́-ẹ dahịhile nyori ọ́ ka myị-ị̀ hwabwọ la ọ-mẹ ọháha jẹ ẹ-ẹga nya ọngịnyị ọlẹ kọ la ọháha họọ ẹnẹnẹhẹ ka. (Neh. 1:5) Lẹ kori ka ja la ịwẹẹ ọdada ụka ọhẹ nyori à há iJihova, chị godayị ká tịlọng wo nyori, ‘M̀ la ọháha ẹ-ẹga nya iJihova?’ Myị́myị́ kụ irya ju ẹla ọlẹ: Kori ká iJihova-á háng du ká wẹẹ maga dá ịlọng nyọka họ ẹla kpọọ ịpyọ aalẹ, à ka jẹ́-ẹ dahịhilọọ nyori à họ́ọ yẹẹyẹẹ ịnyịnyị. (Dan. 9:4; 1 Kọr. 8:3) Ọọwa mẹjẹ nyori kori ká jẹ́ myị̀myị̀ nyori iJihova háng, á baba nyọka da ịwẹẹ kori ká ahụ-ụ́ họ́ọ ka. À ka jẹ́-ẹ la ahị ọdahile ọlam-ọlam nyori à họ́ọ ụka wuu, ọ́ tị ka tụụbwọ hing ẹnẹnẹhẹ ka.

10-11. Ányị iJihova à tị́ tịtọ ká ka yẹ iya ọkịlaakịla nya iJisọsị? (Ala ịGaletiya 2:20)

¹⁰ Kụ irya u-uhye nya iya ọkịlaakịla nya iJisọsị. IJihova ya āhị ọtụka-ọtụka ha angịnyị ehe ụka ọlẹ kọ du iJisọsị ịKịrayịsị ọnyị nyamwụ kaka gbu chajị nyahị. (Jọn. 3:16) Ma, āhị ọwẹ ri ịnyang ahụ kpangga ịnyịnyị? Ee! Kụ ẹhị yẹ ẹla nya ọlẹrụ ịPọlụ wẹẹ. Ọ họ ang ịtịpyọ nyịlẹhị-ịlẹhị ene kọọ wẹ ka ri Ọngịnyị nya ịKịrayịsị, ọ tị myị́myị́ kịnyaa la ọ-ma uya ta ọdẹwụ-dẹwụ nyịlọmwụ ị-ịlahị nyọọwa wẹẹ. (Rom. 7:24, 25; 1 Tim. 1:12-14) Ma, ọ tị wẹ ka yẹ iya ọkịlaakịla nya iJisọsị lala āhị ọlẹ ká iJihova ya họọ ọwa ịnyịnyị. (Wa Ala ịGaletiya 2:20.) Kpịtịya nyori iJihova à ya olegu ịgọgọ nyamwụ ha ịPọlụ nyọka da omyi ẹla ịwẹ ju ịBayịbụụ lẹ. Lẹ, iJihova tịtọ kahị ka jẹ́ ang bwu ẹla ọlẹ ká ịPọlụ da. (Rom. 15:4) Ọ tịtọ á ka jẹ́ myị̀myị̀ nyori iya ọkịlaakịla nya iJisọsị ri āhị nyang ahụ ịnyịnyị. Ụka ká dọmwụ nyọka yẹ iya ọkịlaa-kịlaa nya iJisọsị ụ-ụgbẹyị ọlịịwẹ, ọọwa ka jung ọngịrị nyọka jẹ́ myị̀myị̀ nyori à há iJihova yẹẹyẹẹ ịnyịlẹhị.

¹¹ Ahị ji iJihova obe ọhọhọ nyọlẹ ko du iJisọsị ẹrụ wẹ odehe ka gbu chajị nyahị. Ma ang ọkịla ọlẹ kọ du ká iJisọsị warị wẹ odehe ri ọchajị nyọka mẹ ẹlịlẹhị u-uhye nya Ohe Oluhye jẹ angịkịla. (Jọn. 18:37) Abwọlẹ ká ẹla nya anyị nya iJihova kaa lọọ juwa ẹ-ẹpwụ nya ẹlịlẹhị ọọwa ịnyịnyị.

JAABWỌ KÁ IJISỌSỊ DAHỊ ỤBWỌ NYỌKA JẸ́ MYỊ̀MYỊ̀ NYORI AHỊ HÁ IJIHOVA

12. Ịyẹ tị́ du kahị ka jẹ́-ẹ dahịhile ẹla ọlẹ ká iJisọsị ya u-uhye nya iJihova?

¹² Ụka ọlẹ ká iJisọsị jam odehe, ọ kaa kpọọ ịpyọ nyọka ya ụma nya ọngọlẹ ká iJihova ri je angịnyị. (Luk. 10:22) Ahị ka jẹ́-ẹ dahịhile ẹla ọlẹ ká iJisọsị ya u-uhye nya iJihova. Ịyẹ tị́ du? Chajị iJisọsị hịhị e-epwoohe bala iJihova adamwụ lụka ọtata yẹẹyẹẹ ene kọọ wẹ odehe ọlẹ. (Kol. 1:15) IJisọsị jẹ́ jaabwọ ká ọwa la ịlọmwụ há Adamwụ kaka ba. Ọ tị myị́myị́ yẹ jaabwọ ká adamwụ mẹ ọháha jẹ ẹ-ẹga nya alegu-ẹrụ bala anyị nyamwụ ilodehe wuu ịlẹ kị la ọmyịmyị ịnyịnyị. Lẹ, ányị iJisọsị à tị́ bwu da angịkịla ụbwọ nyọka jẹ́ myị̀myị̀ nyori ị há iJihova?

13. Ẹlịyẹ iJisọsị à tị́ tịtọ kahị ka jẹ́ u-uhye nya iJihova?

¹³ IJisọsị tịtọ kahị ka jẹ́ jaabwọ ká ẹla nyahị kaa la iJihova ịnyịlẹhị. Ọ wụrụ iJihova nya “Adịda” gụ ụka 160 myị́ ẹ-ẹpwụ nya Apwụ nya Ẹrụ Ọnyịịla. Ụka ọlẹ kọ tị wẹẹ ya ẹla bala angịjụgbẹyị nyamwụ, ọ wụrụ iJihova nya “Adanụ” lee “Adanụ olepwoohe” ịnyịnyị. (Mat. 5:16; 6:26) Ẹla ọdawụlẹ u-uhye nya ịMatiyu 5:16 ya nyori: “Anchẹ nya iJihova ịlụka onyogo kaa chị́ iJihova ẹnyị ịtụka-ịtụka bala ọ-kpa ẹnyị ịlịnyị chabwọ nyamwụ. Ịhyẹ nyaa ri ‘Agụgụ,’ ‘Ohe Oluhye ọgụgụ wuu,’ bala ‘Ọngọ họ ang ọtụka.’ Ma ụka lụmẹ-lụmẹ, iJisọsị kaa wụrụ iJihova nya ‘Adịda,’ kọ ri omyi ẹla o-hukee bala ọ-chịkpẹẹ. Omyi ẹla ọwẹ myị́myị́ mẹjẹ nyori iJihova tịtọ ká angị gbịgba họọ ka tụ́ jwoo chwẹẹ jaabwọ ká ọnyị kaa tụ́ ju adịda ọ-la ọháha chwẹẹ ịnyịnyị.” Lẹ, iJisọsị wẹẹ mẹjẹ́ẹhị nyori ahị há iJihova jaabwọ ká adịda ọnyịịla kaa la ọháha ẹ-ẹga nya anyị ịlịkẹjẹ nyamwụ. Ahị kụ ẹhị yẹ ụka imiiye ịhyẹ ká iJisọsị kpa omyi ẹla nya “Adịda” chabwọ nya iJihova wẹẹ.

14. Ányị iJisọsị à tị́ bwu mẹjẹ nyori ọngọngọọng nyahị kpịnya a-ahị́ nya iJihova Adahị? (ỊMatiyu 10:29-31) (Yẹ ifoto ịnyịnyị.)

¹⁴ Họhẹ-họhẹ, ahị ka kụ ẹhị yẹ ẹla ọlẹ ká iJisọsị ya ụ-ụpwụ nya ịMatiyu 10:29-31. (Wọọ.) Egwe ri ịchịnụ ichiche-ichiche ịlẹ kị ka jẹ́-ẹ la ọháha ẹ-ẹga nya iJihova lee ọ-gbịgba họọ myị́ ẹnẹnẹhẹ ka. Tị wẹẹ, ịchịnụ ịwẹ ju Adahị apyobwuna kpụ ọ kaa jẹ́ ụka ká ọhẹ-lọhẹ nyaa á chabwọ bwu uhye ka mileji. Lẹ, ọngọngọọng nya anchẹ nyamwụ ịlẹ kị wẹẹ gbịgba họọ ẹ-ẹpwụ nya ọháha jwoo apyobwuna bala ọ-kpịnya a-ahị́ nyamwụ gụ́ ịchịnụ ịwẹ wẹẹ! Ọgba 30 ya nyori “Ohe Oluhye dọmwụ jẹ́ ịnọmba nya uke-inyi olegbeju nyanụ wuu jịra.” Ọdawụlẹ nya omyi ẹla u-uhye nya ọgba ọwẹ yẹkẹẹ: “IJihova ọ-jẹ́ ẹla ichiche-ichiche ịlịịwẹ u-uhye nyahị ya ahị ọdahile hahị nyori ọ kpahị ju ọngọngọọng nyahị yẹẹyẹẹ.” Ọ la gbagbịla nyori iJisọsị tịtọ kahị ka jẹ́ myị̀myị̀ nyori ọng myị́ ọng nyahị kpịnya nyịlẹhị-ịlẹhị a-ahị́ nya Adahị olepwoohe.

15. Omyi ẹla nya iJisọsị ọlụpwụ nya ịJọn 6:44 tị́ mẹ ẹlịyẹ jẹ́ng u-uhye nya Adahị olepwoohe?

¹⁵ Kụ ẹhị yẹ ọ-chụ pwokwita oheeye nya ụka ọlẹ ká iJisọsị wụrụ iJihova nya “Adịda” wẹẹ. (Wa ịJọn 6:44.) Adang olepwoohe dang ụbwọ wẹ ka jọ́ọ bala ọ-la ọháha ẹ-ẹga nyamwụ. Ịyẹ tị́ du kọ họ ịnyị? Chajị ọ yẹ nyori ahụ nyị la ọkịlẹtụ ọnyịịla. (Ụkụr. 13:48) Ọ chịkpẹẹ myí nyori omyi ẹla nya iJihova ọlụpwụ nya iJeremaya 31:3, iJisọsị à kpa i-irya ụka kọ wẹẹ ya ẹla ọlụpwụ nya ịJọn 6:44 lẹ. IJihova byi angịnyị nyamwụ ẹ-ẹga ọọwa yẹkẹẹ: “Anụ ham gbe oyi myị oyi ịnyị a du kam kaa kịnyaa juwa la ọhaha ọkpẹẹkpẹẹ ẹ-ẹga nyanụ pyịyọọ lẹ.” (Jer. 31:3; kụ ẹhị yẹ iHoseya 11:4.) Kụ irya u-uhye nya etu nya ẹlẹwẹ wẹẹ. Adahị ọ-la ọháha olepwoohe kịnyaa la ọ-yẹ ang ọnyịịla u-uhye nyang, ọlẹ ká ahụ lịlọng á dọmwụ ka yẹ ka myị́.

16. (a) Ẹlịyẹ iJisọsị à tị́ mẹjẹ́ẹhị? Ịyẹ tị́ du kahị ka dahịhilọọ? (b) Ẹlịyẹ à tị́ ka dang ụbwọ nyọka jẹ́ myị̀myị̀ nyori iJihova à ri Adịda ọlẹ kọ há gụgụ wuu lẹ? (Yẹ akpa ọlẹ kọ ri “Adịda Ọlẹ Kaahị Wuu Baba Nyọka La.”)

¹⁶ Bwula ọ-wụrụ iJihova nya Adahị, iJisọsị wẹẹ mẹjẹ́ẹhị nyori: “IJihova á ri adam am kem ka, o ri adang ahụ ịnyịnyị. M̀ tịtọ á ka jẹ́ myị̀myị̀ nyori à họ́ọ yẹẹyẹẹ, ọ tị kaa kpahị jung ahụ kpangga ịnyịnyị.” Lẹ, kori á kaa la ịwẹẹ ọdada ụka ọhẹ u-uhye nya ọháha nya iJihova aalẹ, chị godayị ká tọ ịlọng wo nyori, ‘Ọ́ chịla kam ka dahịhile omyi ẹla nya Onyi ọlẹ kọ jẹ́ Adahị yẹẹyẹẹ, kọ tị kaa ya ẹlịlẹhị ụka wuu ka?’—1 Pit. 2:22.

JU Ọ-JẸ́ MYỊ̀MYỊ̀ NYANG ỌNGỊRỊ KỊNYAA

17. Ịyẹ tị́ du kahị baba nyọka kịnyaa la ọ-jẹ́ myị̀myị̀ nyori ahị há iJihova?

¹⁷ Ahị baba nyọka họ ang myị́ ang ọlẹ kahị ka jụ́ họ myị́ nyọka dahị ụbwọ kịnyaa la ọ-jẹ́ myị̀myị̀ nyori ahị há iJihova. Kpịtịya nyori Ohe Onyobyi wẹẹ maga nyịlẹhị-ịlẹhị nyọka huhi abwọ la ọ-gbịgba ha iJihova. Ọ tịtọ ká abwọ ka chịịhị pyẹpyẹ. Lẹ, ọ ka kịnyaa la ọ-maga nyọka họ kahị ka myị nyori áhị há iJihova ka. Áhị ka myọnụ ju ọnọọkịla nya Olegu Onyobyi ọwẹ ẹnẹnẹhẹ ka!—Job. 27:5.

18. Ányị a tị́ ka bwu ju ọ-jẹ́ myị̀myị̀ nyang ọngịrị ẹ-ẹga nya ọháha nya iJihova?

¹⁸ Nyọka ju ọ-jẹ́ myị̀myị̀ nyang ọngịrị ẹ-ẹga nya ọháha nya iJihova, kịnyaa la ọ-raabwọ bịlọọ nyọka dang ụbwọ ká ka yẹ ịlọng jaabwọ ká ọwa kaa yẹng. Kụ irya kpori-kpori ju omyi ẹla ịla ịBayịbụụ ịlẹ kị chabwọ nya ụgbẹyị ọnyịịla ọlẹ ká iJihova kaa bwu kpahị ju angịlẹ kị la ọháha ẹ-ẹga nyamwụ. Kpịtịya nyori angịlẹ kị la ọháha ẹ-ẹga nya iJihova kaa họ́ọ ụka wuu. A tị deeri ẹnẹnẹhẹ nyori iJihova ya Ọnyị nyamwụ kiliya chajị nyang ahụ kpangga ka ịnyịnyị. Myị́myị́ dahịhile ẹla ọlẹ ká iJisọsị ya nyori iJihova nyị ri adang ọlẹ kọ juwa e-epwoohe. Ọọwa kori ká ọngọngọhẹ á tọng wo nyori, “À jẹ́ myị̀myị̀ kori ka há iJihova ịnyịlẹhị?” à ka jẹ́-ẹ wẹ la ahị ọdahile yẹkẹẹ, “Ee, m̀ họ́ọ yẹẹyẹẹ! M̀ tị wẹẹ maga dá ịlọm ẹnụ myị́ ẹnụ nyọka mẹjẹ nyori ọwa hám ịnyịnyị!”