IJihova Ka Wẹ Abwọ Ọrịrị Nyam?

1-2. Ịyẹ tị́ du kọ ka lahị lala o-ri iJihova nyị́ kaa wẹ abwọ ọrịrị nyahị ka myị́?

“ẸLA nya [iJihova] ā kpụng ịpyọ la ọhọhọ, aalẹ, ọ ka họ ang ọlẹ kọ bang ba ọ-ọkịlẹtụ hang.” (Eje. 37:4) Ọnụ ọmyịmyị ọwẹ kpịpyọ yẹẹyẹẹ! Ma ahị ka ya ahị guru nyori iJihova ka họ ang myị́ ang ọlẹ kahị bịlẹ hahị i-ijata? Ịyẹ tị́ du ká ịtọ ẹla ọwẹ baba? Kụ ẹhị yẹ iwe-ahụrụ ịlẹ wẹẹ. Ọọnahị ọnyang ọhẹ ọlẹ kọ rwọrụ lẹka raabwọ nyọka ka Ube Ụpwụ nya Angị Kpa Ẹrụ Ọnyịịla Pyẹ. Ma ẹka ịmanyị-ịmanyị kam lẹ, ị́ tị wụrọọ lẹka. Ọọnahị okolobya ọhẹ bịlẹ iJihova kọ ka hágụ bwu ẹdụrụ ọlẹ kọ kpọọ beji, chajị kọ ka jẹ́-ẹ da ụbwọ gụ́ ọọwa ẹ-ẹpwụ nya ọjịra-jịra. Ma ẹdụrụ nyamwụ á tị hágụ ka. Adịda bala ịnịna ịlẹ kị ri Angịnyị nya ịKịrayịsị raabwọ ká anyị nyaa ka ya ẹta yeji ẹ-ẹpwụ nya ẹlịlẹhị. Ma ọnyị nyaa tị chụ nyọka hwabwọ la ọ-gbịgba ha iJihova.

² Ọhẹka ahụ ịnyịnyị raabwọ ha iJihova chajị nya ịngịhyẹ, ma á tị ye ang ọọwa lẹka. À ka ja kụ irya myị́ nyori iJihova kaa wẹ abwọ ọrịrị nya angịkịla, ma ọ́ kaa wẹ ịnyang ahụ ka. Lee ọhẹka ọ ka lang myị́ lala o-ri ahụ nyị họ ẹlẹhẹ ọtịpyọ lẹ. Ọ la ọọnahị ọnyang ọhẹ ká ẹnyị nyamwụ ri Janiceb ịwẹ-ịwẹ. Ọwa bala ọrụmwụ raabwọ ha iJihova u-uhye nya irya ọlẹ kị la nyọka họ ụkụrwọ ị-ịBẹtẹlụ. Ọ yẹkẹẹ: “M̀ me nyori ọ́ ka tata ene kahị ka juwa ị-ịBẹtẹlụ kaka.” Ma ẹka ịmanyị-ịmanyị chịpwụrụ lẹ, ị́ tị wụraa lẹka. Janice yẹkẹẹ: “Ọ jụm kaka kpoye, ọ tị wam ahị wuu ịnyịnyị. Ḿ jẹ́ ẹla ọlẹ kam họ wụ iJihova ẹjẹ ka. M̀ raabwọ kpangga ká iJihova ka kpam ụgbẹyị. Ịyẹ tị́ du kọ ka wẹ abwọ ọrịrị nyam ka?”

3. Ẹlịyẹ ahị tị́ wẹẹ ka kụ ẹhị yẹ ẹ-ẹpwụ nya ang ọjẹ́jẹ?

³ Ụka ọhẹ, ahị ka ja tọ ịlọhị wo kori ká iJihova á kaa ke ụrụ wo abwọ ọrịrị nyahị myị́. Anchẹ nya iJihova ịla ọmyịmyị tọ ịtọ ọlịịwẹ lụka ọkẹkpẹ ịnyịnyị. (Job. 30:20; Eje. 22:2; Hab. 1:2) Ịyẹ tị́ ka ya ọ-jẹ́ myị̀myị̀ hang nyori iJihova ka wẹ abwọ ọrịrị nyang? (Eje. 65:2) Nyọka dahị ụbwọ wẹ ịtọ ẹla ọwẹ, ahị baba nyọka yé ọwẹwẹ nya ẹla ịlẹ jene: (1) Ịyẹ ahị tị́ ka ya ahị guru bwu ẹga nya iJihova? (2) Ịyẹ iJihova à tị́ ya ahị guru kahị ka họ? (3) Ịyẹ à tị́ ka du kahị ka baba nyọka yẹ ịngịhyẹ ịlẹ kahị kaa bịlẹ da?

ỊYẸ AHỊ TỊ́ KA YA AHỊ GURU BWU ẸGA NYA IJIHOVA?

4. Ịyẹ iJihova à tị́ myọnụ kọka họ, ká ụpwụ nya iJeremaya 29:12 ya?

⁴ IJihova myọnụ nyọka ke ụrụ wo la abwọ ọrịrị nyahị. (Wa iJeremaya 29:12.) Ohe nyahị la ọháha ẹ-ẹga nya angịlẹ kịị gbịgba họọ kpẹẹkpẹẹ, lẹ ọ́ ka nyẹẹkpẹ da abwọ ọrịrị nyaa ẹnẹnẹhẹ ka. (Eje. 10:17; 37:28) Ma, ọọwa á tị ri ọ ka họ ang myị́ ang ịlẹ kahị bịlẹ pyii ka. Ọhẹka ahị ka dayị gbe odehe onyeewe ene kahị ka yé ọwẹwẹ nya ang ịhyẹ ịlẹ kahị kaa bịlẹ.

5. Ịyẹ iJihova à tị́ kaa kpa i-irya ụka kọ ja ke ụrụ wo abwọ ọrịrị nyahị? Dọọ wụlẹ wẹẹ.

⁵ IJihova kaa kụ ẹhị yẹ abwọlẹ ká ang ịlẹ kahị bịlẹ gu irya ọlẹ ká ọwa la. (Ayị. 55:8, 9) Ọhẹ lẹpwụ nya ang ịlẹ kọ tịtọ ri odehe ọlẹ ọ-ka myị̀ la angịnyị ịlẹ kị kaa jwoo ihi lala Ọngọ chịla nyọka kpeji u-uhye nyaa. Ma Olegu Onyobyi tị ya nyori angịnyị ehe nyị ka chị ọkẹkẹnị gụ́ kori kị ja kpeji la ịlaa. (Ọmwụ. 3:1-5) Nyọka mẹjẹ nyori ẹla ọlẹ ká Olegu Onyobyi ya ri ọnọọkịla, iJihova ya iwe da ká angịnyị ehe ka kpeji u-uhye nya ịlaa. Ma, eji ọkpakpa nya angịnyị ehe à ju ọmwụ nya iru nya akama ịlẹ kahị lẹẹ yẹ alẹ lẹ. (Ọngọ. 8:9) Ahị jẹ́ nyori iJihova á ka myị́ akama ịwẹ lẹẹlẹẹ lẹka. Kori kọ họ ịnyị, angịhyẹ ka ya nyori eji ọkpakpa nya angịnyị ehe nyị há, bala o-ri nyị jẹ́ chị akama nya angịnyị ehe eju.

6. Ịyẹ tị́ du kahị baba nyọka jẹ́ myị̀myị̀ nyori iJihova ka wẹ abwọ ọrịrị nyahị la ọháha bala ọ-họ ịnyị ụ-ụgbẹyị ọkpakpa ụka myị́ ụka?

⁶ IJihova ka wẹ abwọ ọrịrị ụma ookpokpo bwu agbẹyị ịdatị-datị myị́. Ọ-chụ pwokwita, ụka ká Adịrahụ iHesekaya jụ ẹdụrụ la ọngịrị-ọngịrị, ọ bịlẹ ká iJihova ka họọ uda. IJihova tị họọ uda ịlẹhị. (2 Ịdị. 20:1-6) Ma, ụka ká ọlẹrụ ịPọlụ tị bịlẹ ká iJihova ka hu ‘ịngịhyẹ ọlẹ kọ kaa gu ugbinyịrọ nyamwụ chọọchọọ,’ kọ ka ri ẹdụrụ ọhẹ myị́, iJihova á gba akama ọọwa hyoo ka. (2 Kọr. 12:7-9) Kụ ẹhị yẹ ọ-chụ pwokwita nya ọlẹrụ iJemsi bala iPita ịnyịnyị wẹẹ. Adịrahụ iHerọdụ tịtọ nyọka nwaa ịwa angị imimiiye. Ala ọjịra-jịra raabwọ chajị nya iPita bala iJemsi ịnyịnyị. Ma, ị nwụ iJemsi, iPita ọwa tị chịda bwula ụkụrwọ ẹbyẹbyị. (Ụkụr. 12:1-11) Ahị ka tọ wo myị́ nyori, ‘Ịyẹ tị́ du ká iJihova chị iPita da kọ tị chị iJemsi da ka?’ ỊBayịbụụ á ya ang odudu jehi ka.c Ẹla ọlẹ kahị tị ka jẹ́ myị̀myị̀ ri agbẹyị nya iJihova wuu kaa “la kpẹẹkpẹẹ.” (Ehile. 32:4) Ahị tị jẹ́ nyori ẹla nya iPita bala iJemsi angị imimiiye kpụ iJihova ịpyọ. (Ọwụ. 21:14) Ụka ọhẹ, iJihova á ka wẹ abwọ ọrịrị nyahị la ụgbẹyị ọlẹ kahị ya ahị guru ka myị́. Ma chajị nyọlẹ kahị dahịhile nyori iJihova ka wẹ abwọ ọrịrị nyahị la ọháha bala ụgbẹyị ọkpakpa ụka myị́ ụka wẹẹ, áhị ka tọ wo nya ang odudu kọ chụ ụgbẹyị ọlẹ kọ kpa wẹẹhị ka.—Job. 33:13.

7. Ịyẹ ahị tị́ kaa maga nyọka hwabwọ hi? Ịyẹ à tị́ du?

⁷ Ahị kaa maga nyọka hwabwọ la ọ-chụ iwe-ahụrụ nyahị kaka pwoku ịnya angịkịla. Ọ-chụ pwokwita, ahị ka bịlẹ iJihova kọ ka dahị ụbwọ ụ-ụgbẹyị ọhẹ, ma ọ́ tị ka wẹẹhị ka myị́. Ụka ọkịla, ahị wẹ ka yẹ nyori ọngọkịla bịlẹ ẹla ọlịnyị-ịnyị, ọ tị lala o-ri iJihova nyị wẹ abwọ ọrịrị ọọwa. Ẹla ọlịnyị họ ta ọọnahị ọnyang ọhẹ ká ẹnyị nyamwụ ri Anna. Ọ raabwọ ká Matthew ọrụmwụ ka hágụ bwu ẹdụrụ nya ẹbẹ ọgọja ọlẹ kọ la. Lụka ọwọwa, aanahị anyang imiiye ịlẹ kị ri ịgbahị nya ọrụmwụ la ẹdụrụ nya ẹbẹ ọgọja ịnyịnyị. Anna kaa raabwọ yẹẹyẹẹ chajị nya Matthew ọrụmwụ bala aanahị ịịwa. Aanahị anyang ịịwa há gụ́ bwu ẹdụrụ ọọwa, ma ọ tị kpa Matthew ọwa ụ-ụbwọ. Ụka nya ọgbanyẹ, Anna kaa tọ ịlọmwụ wo kori kọ ri iJihova kọ ya ụbwọ ju du ká aanahị imiiye ịwẹ hágụ. Kori o ri ịnyị, ịyẹ tị́ du kọ wo abwọ ọrịrị nyamwụ kpụ ọrụmwụ hágụ ka? Ẹlịlẹhị ri, áhị ka jẹ́-ẹ ya ang odudu ká aanahị imiiye ịwẹ hágụ ka. Ẹla ọlẹ kahị jẹ́ ri iJihova ja ka myị́ akama nyahị wuu, ọ tị charịnya nyọka wule angịlẹ kị gbu eji bwula igu ịnyịnyị.—Job. 14:15.

8. (a) Ányị iJihova à tị́ kaa dahị ụbwọ ká Ayịsaya 43:2 ya? (b) Ányị abwọ ọrịrị à tị́ ka jẹ́-ẹ dahị ụbwọ ụka kahị ji ẹpwụ nya ịmayẹ? (Yẹ ifim ọlẹ kọ ri Abwọ Ọrịrị Kaa Dahị Ụbwọ nyọka Bọhụ.)

⁸ IJihova ka dahị ụbwọ ụka myị́ ụka. Nyọlẹ ká iJihova ri Adahị ọ-la ọháha wẹẹ, ọ́ tịtọ kahị ka yẹ akama ka. (Ayị. 63:9) Ma, ọ́ tị kaa wu akama ọnyị myị́ ọnyị kpa la ọ-wẹ uhye nyahị ka. Ahị ka jẹ́-ẹ chụ akama kaka pwoku ihu lee ila. (Wa Ayịsaya 43:2.) Ma, ọ tị chịhị ehe nyọka dahị ụbwọ “chịpwụrụ bwu” ẹpwụ nyaa. Ọ́ tị ka ya iwe da akama nyahị ka bịrị igu oriri nyahị balọọ gbang-gbang ẹnẹnẹhẹ ka. IJihova tị ya olegu ịgọgọ nyamwụ hahị kọ ka dahị ụbwọ bọhụ ịnyịnyị. (Luk. 11:13; Filip. 4:13) Ọọwa du kahị jẹ́ myị̀myị̀ nyori ahị ka la ang ịlẹ kahị baba kpangga nyọka jẹ́-ẹ bọhụ bala ọ-ka kpa ọmyịmyị nyahị kpọọ.d

ỊYẸ IJIHOVA À TỊ́ YA AHỊ GURU KAHỊ KA HỌ?

9. Jaabwọ ká iJemsi 1:6, 7 ya, ịyẹ tị́ du kahị baba nyọka dahịhile nyori iJihova ka dahị ụbwọ?

⁹ IJihova ya ahị guru kahị ka dahịhilọọ. (Hib. 11:6) Ụka ọhẹ, ọ kaa lahị lala o-ri akama nyahị nyị kịlahị kịla nyọka bọhụ myị́. Ahị dọmwụ ka da ịwẹẹ myị́ kori ká iJihova á ka dahị ụbwọ. Ma ịBayịbụụ tị họ kahị jẹ́ myị̀myị̀ nyori bwụla ọngịrị nya Ohe, ahị ka “kụrụ” myị́. (Eje. 18:29) Lẹ ọkọkọ kahị ka ya iwe da ká ịwẹẹ ọlịnyị ka nwà, ahị raabwọ la ọmyịmyị, kahị dahịhile nyori iJihova ka wẹ abwọ ọrịrị nyahị.—Wa iJemsi 1:6, 7.

10. Ya ọ-chụ pwokwita nya abwọlẹ kahị ka bwu họ ụkụrwọ ba abwọ ọrịrị nyahị jẹ wẹẹ.

¹⁰ IJihova ya ahị guru kahị ka họ ẹla ba abwọ ọrịrị nyahị jẹ. Ọ-chụ pwokwita, ọọnahị ọlẹng ọhẹ bịlẹ iJihova kọ ka dọọ ụbwọ nyọka ye ụka bwu ọlụkụrwọ kọ ka jẹ́-ẹ ka ọjịra-jịra ọtụka. Ányị iJihova à tị́ ka bwu wẹ abwọ ọrịrị ọwẹ myị́? Ọ ka ya ugbodu ojuju ha ọọnahị ọwẹ nyọka jẹ ta olegbeju nyamwụ myị́. Ma ọọnahị ọwẹ tị ka baba nyọka ka ẹga nya olegbeju nyamwụ kaka bịlẹ. Ọhẹka ọ ka baba nyọka bịlẹ mwụba-mwụba, lee ọ-dọmwụ ka họ ụkụrwọ ku ọngọkịla chajị kị ka họ kwọọ ọọwa ịnyịnyị myị́. Kori kọ kpụ ọọwa, ọ dọmwụ ka myọnụ kị ka gbọọ uri hi chajị nya ahyẹẹnụ ọlẹ kọ wẹẹ ka ye myị́.

11. Ịyẹ tị́ du kahị ka raabwọ u-uhye nya ẹla ọ-baahị ba mwụba-mwụba?

¹¹ IJihova ya ahị guru kahị ka raabwọ mwụba-mwụba u-uhye nya ang ị-baahị ba. (1 Tẹs. 5:17) Ẹlẹhẹ ọlẹ ká iJisọsị ya mẹjẹ nyori a-ang myị́ ang ọlẹ kahị bịlẹ iJihova à kaa wẹ i-ijata ka. (Luk. 11:9) Lẹ abwọ a chịng pwẹ-pwẹ ka! Raabwọ bwu ọkịlẹtụ nyang, ká họ ịnyị mwụba-mwụba. (Luk. 18:1-7) Kori kahị kịnyaa la ọ-raabwọ u-uhye nya ẹla, ọ kaa mẹjẹ iJihova nyori ẹla ọọwa bahị ba ịnyịlẹhị. Ọọwa kaa mẹjẹ ịnyịnyị nyori ahị la ọmyịmyị nyori ọ ka jẹ́-ẹ dahị ụbwọ myị́.

ỊYẸ À TỊ́ KA DU KAHỊ KA BABA NYỌKA YẸ ỊNGỊHYẸ ỊLẸ KAHỊ KAA BỊLẸ?

12. (a) Ịtọ ẹla oyina ahị tị́ ka tọ ịlọhị u-uhye nya ang ọlẹ kahị kaa bịlẹ? Ịyẹ à tị́ du? (b) Ányị ahị tị́ ka họ ká abwọ ọrịrị nyahị ka chị ihi ju iJihova? (Yẹ akpa ọlẹ kọ ri “Ang Ịlẹ Kam kaa Bịlẹ kaa Chị Ihi Ju IJihova?”)

¹² Kori kahị ye ang ịlẹ kahị bịlẹ ẹ-ẹpwụ nya abwọ ọrịrị ka aalẹ, ahị ka tọ ịlọhị ịtọ ẹla ịta ịlẹ myị́. Ọhọhẹ ri, ‘Ang ọlẹ kam wẹẹ raabwọ chajị nyamwụ pwoku?’ Ụka lụmẹ-lụmẹ, ahị kaa me nyori ahị jẹ́ ang ọlẹ kọ há hahị lẹ. Ma ang ịlẹ kahị wẹẹ bịlẹ á ka dahị ụbwọ ị-ịlahị ka myị́. Kori kahị ja raabwọ chajị nya akama ọhẹ, ụgbẹyị ọlẹ kọ há gụ́ nyọka myị́ akama ọọwa ka datị hi ọlẹ kahị wẹẹ tịtọ myị́. Ang ịhyẹ ịlẹ kahị tị kaa bịlẹ á ka pwoku irya nya Ohe ka myị́. (1 Jọn. 5:14) Ọ-chụ pwokwita, kụ ẹhị yẹ oja nya adịda bala ịnịna ịlẹ kahị ya ẹla rụ lalẹ ene wẹẹ. Ị bịlẹ iJihova kọ ka da ọnyị nyaa ụbwọ nyọka gbịgba họọ kịnyaa. Ẹla ọnyịịla à wẹ kị bịlẹ lẹ. Ma, iJihova á tị kaa gbịle ọngịnyị kaka gbịgba họọ la agbụrụ ka. Ọ tịtọ ká ọng myị́ ọng nyahị wuu, tụ́ anjwọ nyahị, à ka chụ nyọka gbịgba họọ. (Ehile. 10:12, 13; 30:19, 20) Lẹ ọ ka há ká adịda bala ịnịna ka raabwọ nyọka jẹ́-ẹ mẹ ang jẹ wu ọnyị nyaa ọyị ọ-ọkịlẹtụ, chajị kọ ka la ọháha ẹ-ẹga nya iJihova bala ọ-ka ri oligu nyamwụ.—Etu 22:6; Efe. 6:4.

13. Jaabwọ ká ala iHiburu 4:16 ya, ụka oyina iJihova à tị́ ka dahị ụbwọ? Dọọ wụlẹ wẹẹ.

¹³ Ịtọ oheeye ri, ‘Ụka nya iJihova họ kọ ka wẹ abwọ ọrịrị nyam lẹ’ Ọ ka lahị myị́ lala o-ri ahị nyị baba nya ọwẹwẹ nya abwọ ọrịrị nyahị i-ijata. Ma, ẹlịlẹhị ri, iJihova jẹ́ ụka ọlẹ kọ há gụ́ nyọka dahị ụbwọ. (Wa Ala iHiburu 4:16.) Kori kahị ye ọwẹwẹ nya abwọ ọrịrị nyahị i-ijata ka, ọhẹka ọ ka lahị lala o-ri ọwẹwẹ nya iJihova nyị ri ‘Ehe’ lẹ. Ma ọ chịkpẹẹ myị́ ká ọwẹwẹ nyamwụ ka ri ‘Ọọ lẹẹlẹẹ lẹka.’ Ọ-chụ pwokwita, kpịtịya nya ọọnahị okolobya ọlẹ kọ raabwọ nyọka hágụ́ bwu ẹdụrụ ọlẹ jwọọ wẹẹ. Kori ká iJihova á họọ uda bwula ụkụrwọ ẹbyẹbyị, Olegu Onyobyi ka ya nyori ọlẹ ká iJihova nyị họọ uda à du kị nyị wẹẹ gbigba ha iJihova kịnyaa lẹ. (Job. 1:9-11; 2:4) Da ọọwa u-uhye, iJihova hu ụka nọ ọlẹ kọ ka họ uda nya ẹdụrụ ọnyị myị́ ọnyị ene-ene lẹ. (Ayị. 33:24; Ọwụ. 21:3, 4) Gbee kọ ka pwụ ụka ọọwa, ahị-ị́ ka jẹ́-ẹ ya ahị guru uda ọhọgọ la ụkụrwọ ẹbyẹbyị ka. Lẹ ọọnahị ọwẹ ka jẹ́-ẹ bịlẹ iJihova kọ ka ya ọngịrị bala okpunyi nya ọkịlẹtụ họọ chajị kọ ka bọhụ ẹ-ẹpwụ nya ẹdụrụ ọọwa myị́ bala ọ-ka gbịgba họọ kịnyaa.—Eje. 29:11.

14. Ẹlịyẹ a tị́ jẹ́ bwu oja nya Janice?

¹⁴ Kpịtịya nya oja nya Janice, ọlẹ kọ raabwọ nyọka họ ụkụrwọ ị-ịBẹtẹlụ. Ẹka ịrụ chịpwụrụ ene kọọ jẹ́ nyori iJihova nyị wẹ abwọ ọrịrị nyọwa ụ-ụgbẹyị ọkịla. Ọ yẹkẹẹ: “IJihova kpa ụka ọwẹ mẹ ang jẹm bala ọ-nwụm rịrị. M̀ baba nyọka dahịhilọọ gụ́ abwọlẹ kọ la. M̀ baba nyọka jẹ́ ịBayịbụụ la ịlọm ọgwọgwụ wẹẹ. M̀ wẹ ka yẹ nyori m̀ ka jẹ́-ẹ chị ọkẹkẹnị ẹ-ẹga myị́ ẹga kam ja gbịgba ha iJihova.” Nyọlẹ kọ nọ chẹẹ, ị wụrụ Janice bala ọrụmwụ nyọka kpẹhị rịrị isekut. Nyọlẹ ká Janice chẹhị kẹkpẹ, ọ yẹkẹẹ: “IJihova wẹ abwọ ọrịrị nyam, nanana nyori ọ́ kpa bwu ụgbẹyị ọlẹ kam yẹ ahị me ka. Ọ nọ chẹẹ ene kamm̀ yẹ nyori ụgbẹyị ọlẹ ká iJihova wẹ há yẹẹyẹẹ. Ọ myịm lẹhị nyọlẹ kam la iwe nyọka yẹ jaabwọ kọ mẹ ọháha bala ọnahị jẹ ẹ-ẹga nyam.”

15. Ịyẹ tị́ du kọ há nyọka raabwọ nyori ị-ịlẹ Ohe à ka họ ham pyii lẹ ka? (Yẹ ifoto ịnyịnyị.)

¹⁵ Ịtọ ẹla ọhata ri, ‘M raabwọ chajị nya ang ọkịla mẹ?’ Ịlẹhị lẹ ọ há nyọka jẹ́ ang ọlẹ kahị wẹẹ raabwọ chajị nyamwụ kpangga, ma ọ ka há ụka ọhẹ kahị ka gu ẹnyị nya ang kpangga ka chajị kahị ka jẹ́ ang ọlẹ kọ ri irya nya iJihova ẹ-ẹga nyahị. Kụ ẹhị yẹ ọ-chụ pwokwita nya ọọnahị ọyẹẹnọ ọlẹ kọ raabwọ u-uhye nyọka ka Ube-ụpwụ nya Angị Kpa Ẹrụ Ọnyịịla Pyẹ wẹẹ. Ọ tịtọ nyọka ka ube-ụpwụ ọwẹ chajị kọ ka jẹ́-ẹ da ụbwọ ẹ-ẹga ká ọbaba nya angị kpa ẹrụ ọnyịịla pyẹ ji gụ́. Lẹ ụka kọ wẹẹ raabwọ kị ka wụrọọ ka ube-ụpwụ ọwẹ, ọ ka jẹ́-ẹ bịlẹ iJihova kọ ka dọọ ụbwọ nyọka yẹ iwe ọkịla ọlẹ kọ ka jẹ́-ẹ kpa ẹrụ ọnyịịla pyẹ gụ́ ọọwa. (Ụkụr. 16:9, 10) Ịnyịnyị, ọ ka họ ẹla ba abwọ ọrịrị nyamwụ jẹ bwula ọ-tọ ọngọ kpẹhị rịrị isekut nyamwụ wo kori ká ọjịra-jịra ọhẹ-ẹ́ ji ọnaabwọ kọ baba nya angị ye ịlahị nya ụgbẹyị. Lee ọ ka da ụpwụ ka egbeju ẹpwa nyọka tọ wo u-uhye nya ẹga ọlẹ ká ọbaba nya angị kpa ẹrụ ọnyịịla nya Ịpyị-Adịrahụ pyẹ ji gụ́ myị́.e

16. Ẹlịyẹ ahị tị́ ka jẹ́ myị̀myị̀?

¹⁶ Jaabwọ kahị jẹ́ wẹ, ahị ka jẹ́-ẹ jẹ́ myị̀myị̀ nyori iJihova ka wẹ abwọ ọrịrị nyahị la ọháha bala ọ-họ ịnyị ụ-ụgbẹyị ọkpakpa. (Eje. 4:3; Ayị. 30:18) Ohe-é ka wẹẹhị bwu ụgbẹyị ọlẹ kahị ya ahị guru ụka myị́ ụka myị́. Ma iJihova á ka ya arụ kpẹla hi abwọ ọrịrị nyahị ka. Ahị họ́ọ yẹẹyẹẹ. Ọ́ ka nyẹẹkpẹ dahị ẹnẹnẹhẹ. (Eje. 9:10) Lẹ kịnyaa la ọ-ka “dahịhilọọ ụka wuu,” ká ya ẹla ọla ọkịlẹtụ nyang jọọ ẹ-ẹpwụ nya abwọ ọrịrị mẹ.—Eje. 62:8.