UKỌCHẸ 57
Ẹñwu Dukpẹ K’ẹ Che Ichẹñwu K’ẹ F’adure Inaina Ta?
Dagba k’ẹ fẹdọ Jihofa nyọnyọ k’ẹ la ch’alu du k’ẹ neke che k’ẹ we chẹñwu ki ajẹñwu ẹdọ Jihofa kpabiẹ, i che n’iko k’ẹ ch’amẹñwu ki ma jẹñwu ẹdọ-wñ bọ n. Ama, i n’amadure ki biẹnẹ nyọnyọ. (1 Abo Kọrint 6:9, 10) Ichẹñwu k’ẹ t’adure ki biẹnẹ nyọnyọ, rewa kaki Jihofa dọmọ afẹdọ wẹ ta, i chẹ mọla ki du ba ñwẹ ki la ch’atẹko wẹ.
1. Ẹñwu ch’otila k’a che ki Jihofa ki neke du ba ñwu wa?
Ẹdọ abo ki afẹdọ Jihofa akpabiẹ nyọnyọ ichẹñwu ku ma li kaki ma f’adure inaina ta. Ama, ma n’ugbẹdọ kwefu ugbalutanẹ ki Jihofa che ñwu abo-wñ: “Dagba k’adure-mẹ ki kpa chuaa, i afẹ dab isno.” (Aizaya 1:18) Ichẹñwu k’a ribeda kwef’ẹdọ wa gbaa, Jihofa adu ba ñwu wa. Abu a neke ribeda le? A neke ribeda ichẹñwu k’a jumama ẹñwu ẹbiẹnẹ k’a che kwobi, k’a la f’ọwọ no ẹñwu ẹbiẹnẹ lẹ, k’a la ñọ ch’ologwu bọ Jihofa ki du ba ñwu wa. Ubilẹ, a ch’alu du k’a neke che k’a we kpibe ẹbiẹnẹ abẹki echẹñwu du ki neke jẹñwu wa t’adure, k’a la na lebọ am’ukọ ki Jihofa du ñwu wa.—Gba Aizaya 55:6, 7.
2. Abu Jihofa ad’abogijo ch’atẹko wa ichẹñwu k’a f’adure ta?
Ichẹñwu k’a f’adure inaina ta, Jihofa ka ñwu wa k’a “f’abogijo ujeju abudọ Ondu dọ.” (Gba Jemis 5:14, 15.) Abogijo-i afẹdọ Jihofa kpai am’ala-wñ nyọnyọ. Ma che bọjọ ech’atẹko wa k’agbade wa kpai Jihofa ki dabi w’ẹgwu-wñ.—Abo Galatia 6:1.
Abu abogijo neke ch’atẹko wa ichẹñwu k’a f’adure inaina ta? Abogijo meji abẹki ẹta ad’ukọ ki defu Baibul hiu wa t’ọna. Ma ñọ dibe ñwu wa, ma la aka ñwu wa ẹñwu k’a neke che ka we dabi t’adure. Ma neke f’ọwọ no amẹñwu ka k’a che efu ujeju abudọ kwobi w’ẹgba k’agbade wa kpai Jihofa dabi lonyanẹ. Ichẹñwu k’ẹnẹ ka f’adure inaina ta ki ma la ribeda n, abogijo ad’ẹnẹ lẹ kwefu ujeju abudọ todu k’abomunẹ ki we ch’awọli ẹñwu ebiẹnẹ ki che.
N’UMA NYỌGBA
Kọchẹ lugbo ọna ki Jihofa ach’atẹko wa ichẹñwu k’a f’adure inaina ta kpai ọna k’a neke du ña kakini ẹdọ wa chẹ bọ ru alu ki Jihofa ach’atẹko wa le.
3. Egbalu adure wa ajẹñwu ẹdọ wa ki wanẹ
Adure du k’a ta awọ Jihofa, todulẹ i dukpẹ k’a gbalu adure wa ñwu. Gba Eli Ekọ D’Ọjọ 32:1-5, ubilẹ mẹ ch’oluka oji ene-i:
Ẹñwu chi ki dukpẹ k’a gbalu adure wa ñwu Jihofa k’a we d’adure wa maja ñwu?
Ichẹñwu k’a tene atẹko kwugbo abogijo ubi k’a gbalu adure wa ñwu Jihofa, e-lẹ ajẹñwu ẹdọ wa ki wanẹ. G’IFIDIO-i, ubilẹ mẹ ch’oluka oji ene-i.
Efu ifidio-i, abu abogijo ch’atẹko Canon ki neke dabi tẹmẹru Jihofa?
I dukpẹ k’a k’ọgẹcha ñwu abogijo, k’a we d’ẹñwu du maja ñwu ma todu ku ma neke ch’atẹko wa. Gba Jemis 5:16, ubilẹ mẹ ch’oluka oji ene-i:
Ichẹñwu k’a k’ọgẹcha ñwu abogijo, abu e-lẹ ajẹñwu ki lọla ñwu ma ku ma neke ch’atẹko wa?
Gbalu adure wẹ, ẹ ki d’ẹñwu duu maja ñwu abogijo n, k’ẹ la gba abunẹ ki Jihofa adu ñwẹ lef’ufẹdọ
4. Ile ẹñwu defu ed’ẹnẹ adure tanẹ kwefu ujeju abudọ?
Ichẹñwu k’ẹnẹ ki t’adure inaina ma jẹ ki lebọ am’ukọ ọla Jihofa n, i neke defu ujeju abudọ gẹ n. Ma adu kwefu ujeju abudọ, a la an’ẹñwu du eche kp’owñ abẹki ekọla kp’owñ n. Gba 1 Abo Kọrint 5:6, 11 kpai 2 Jọn 9-11, ubilẹ mẹ ch’oluka oji ene-i:
Dabalu k’ọjọwu ree ajẹñwu burẹdi wu, ẹñwu neke kẹrẹbọ abo ki d’ujeju abudọ ichẹñwu ku ma tuta kp’ẹnẹ ku ma du kwefu ujeju abudọ?
Amonẹ wewe ku ma du tanẹ kwefu ujeju abudọ dabi wa todu ọla ku ma kọ ma, dagba ki awọ. I jẹñwu ma dabi w’efu ibe ma. (Eli Ekọ D’Ọjọ 141:5) G’IFIDIO-i, ubilẹ mẹ ch’oluka oji ene-i.
IFIDIO: D’ọgbọ Ẹdọ Wẹ Gbaa T’ẹñwu Ki Jihofa Ka Ubi (9:28)
Efu ifidio-i, abu ed’onẹ tanẹ kwefu ujeju abudọ ch’atẹko Sonja?
Abu ed’onẹ tanẹ kwefu ujeju abudọ . . .
ad’ojima ñwu odu Jihofa?
adu ña kaki Jihofa ch’anibe kpai ẹn’ufẹdọ?
5. Jihofa adu ba ñwu wa ichẹñwu k’a ribeda
Jisọs d’ujiwe ka ki jẹñwu wa m’ọna ki dẹ ọla Jihofa ichẹñwu k’onẹ ribeda. Gba Luku 15:1-7, ubilẹ mẹ ch’oluka oji ene-i:
Ẹñwu e-i kọ wẹ lugbo Jihofa?
Gba Izikiẹl 33:11, ubilẹ mẹ ch’oluka oji ene-i:
Ẹñwu chẹñwu ogbogaga ki dukpẹ k’a che ki adu ña kaki a ribeda?
Jihofa dabu adide ala ki adejutẹ amala-wñ gbiti gbiti.
ABO KA KAKINI: “Na ch’okpo kaki ichẹñwu ku ka ñwu abogijo lugbo adure mi, ma adu mi tanẹ kwefu ujeju abudọ.”
Ẹñwu ẹ ka ñwu ẹnẹ ki akpibe abalẹ?
ẸY’ỌLA UKỌ-I
Ichẹñwu k’a f’adure inaina ta, ama k’a muda jumama ẹñwu ẹbiẹnẹ k’a che, k’a la f’ọwọ no ẹñwu ẹbiẹnẹ lẹ, Jihofa adu ba ñwu wa.
Ẹñwu ẹ kọchẹ?
Ẹñwu chi ki nyọ k’a gbalu adure wa ñwu Jihofa?
Ẹñwu dukpẹ k’a che ichẹñwu k’a tene ki Jihofa ki d’adure wa ba ñwu wa?
Ichẹñwu k’a f’adure inaina ta, ẹñwu chi ki dukpe k’a tene atẹko kwugbo abogijo?
KỌCHẸ MANYU
Ọtakada Aizaya 1:18 du ña kakini Jihofa ch’ẹnẹ ejumomi i che. G’ifidio-i k’ẹ li alu ki Jihofa d’ejumomi lẹ ñ’ẹnẹkẹlẹ ka.
Ichẹñwu ku ma m’onẹ du tanẹ kwefu ujeju abudọ, abu i ach’atẹko ẹnẹ lẹ kpai ujeju abudọ, ki la añọ d’ojima ñw’odu Jihofa?
“Ẹñwu Ki Jẹñwu Edonẹ Tanẹ Kwefu Ujeju Chẹñwu Ufẹdọ I Che” (Ọdọgọ Ide, April 15, 2015)
Kọchẹ alu k’ẹ neke kanẹreju ñwu ẹnẹ ki ma ch’Ẹnibenu Jihofa n, ẹñwu ki chi k’Amẹnibenu Jihofa ad’onẹ tanẹ kwefu ma.
“Amẹnibenu Jihofa Ara B’abo Ku Ma Ma Gw’Ọjọ Kp’ama Gẹ Ni Tẹ?” (I dẹ jw.org)
Efu ọhiala k’oji-ọla-wñ che “U Li Kaki U Dukpẹ Edabi Abọ Jihofa,” kọchẹ ẹñwu ki chi k’ẹnẹkẹlẹ ka ki kwefu ujọ Jihofa wa n’ẹdẹbọ alu ki Jihofa fu dọ dabi.