“Ịmịnị Benebene Bẹtịbị Fa”

Ị DAỤ MỌ YIN MỌ MỊẸDỊAYE

Ị daụ mọ yin mọ Catholic church ka mú timimị. Ámịnị Bible duo Ọkpọnanaowei ẹrẹ mị Jehovah bara nimibị, ámịnị angọtụa Jehovah Iseriotuama ka paamị. Ị daụ tịn akị Jesus emibara karatimi fịrị kpọ tịẹmọmị. Ómịnị wó wẹnịtimi ye kaị fịrịmị akị wo agọnọ warịmị, kiri-anga mịẹ Kingdom Hall a paamị. Bịsẹ Kingdom Hall kị San Juan del Monte tịịnmịnị yọ, Philippines ibe tịbị yọbị Manila mọ naịn-emi ama bọọ bọlọụ Kịngdom Hall a paamị.

Kụraị 1952 ka ị ziimị. Í daụ mọ yin mọ ine bịnaotubo tolumọ timi tẹmẹanga yebo kọn ị kpọ tolumọmị. Ị sọụ dụbamịnịmị, ịmịnị ereinbosẹ Bible duo kẹnị chapter goosiin bara ị daụ mọ gbaamị, ómịnị Bible gbelemo zịnị fun-ama kpọ akị ị mọ mọ́ tolumọmị. Zụa ifieama, branch office tịbịtịẹmọ wẹrịemi otubo wo itu ma bodába ị daụ á tịịn bo wo warị ma timimịnị. Ámịnị bodába, á paamọmịnị yebo gbaa wo pịrịmịnị yọbị ebibara ka kị wo kụrọmọmị, bịsẹ egberibo wo dịnẹmọ wẹrị tẹmẹanga yebo kọn wo ụndụ bọọ bọlọụdaamị.

Ịmịnị ị daụ mọ yin mọ nana peibolou duo biin yeama kị tolumọ akị mị. Ị yin dọọntimi fịị bị, ị mọ ị daụ mọ 1971 kụraị bọọ koro ụwọụpẹlẹ fịrị wẹnịmị. Timi 1973 laamị ịmịnị sịa kụraị baịdẹ, Ị daụ kpọ fịịmị. Ịmịnị bẹtịbị kọọdẹ bara kị iroromị. Bible bolou bọọ emi ụkiemọ yebo baratụa ị pịrịwẹrị “tịẹkụrọ” bá Jehovah mọ kpẹkpẹrẹẹ timimị. (Heb. 6:19) Ị daụ fịị mị naá alaghatimi, Branch office ị fịrịmọ Palawan ete bọọ Coron tịịnmịnị tụwọ bọọ special pioneer fịrị wẹnịyọ a múmị.

BẸTỊBỊ EMI IFIE KỤRỌ WẸNỊFỊRỊ Ị LAAMỊ

Ịmịnị 21 kụraịama ka timi coron amúmị. Beke yọkị ị zii duonị bịsẹ ama mị tụkpa, ebi bou benii, bá motor kpọ fa yomị ị mịẹ tamamamị. Ama mị emị bịnaotubo biingha, Ụwọụpẹlẹ fịrịwẹnịmịnị kịmị kpọ fa anịduonị ịmịnị biin ifieama bẹtịbị kị egberigbaayọ amúmịnị. Bọlọụ agọnọwei bị, ine warịbolou otu mọ bá ikie-otubo mọ ịmọ ẹrịgha yọmị dọlọ ine a bụụdọọnmị. Dein korodaba, ịmịnị agọnọ ịkịkaịbo diidaba yọụbeniyaị ine tọrụbo duo kọrọtimịmị. Fịrị bọọ barasin wẹrị waị warị amú kpọ ị dịsẹmị.

Bịsẹbara paadaba, ịmịnị ine ikịọụ ma emi yebosẹ gbaa Jehovah pịrịmịnị. Ịmịnị mọkpọ Bible mo bá ogbo duo bọmịnị funbo duo nana kụrọmọ yebo ukie wẹrịemi. Ịmịnị ifiebosẹ Psalm 19:14 ukiemịnị. Ịmịnị Jehovah inyenrinbụọbọ tolumọ nimi bá akịtụa inyenrin daba “Ómịnị bo ine ogun bá ine zụọbụọmọ owei” a paamọ bara ịmọ nimimị. “Ịmịnị Bẹtịbị fa”a Lewarị fun egberitịbịmị baratụa ị pịrịmị. Ịmịnị barịị barịị ka kị ụ goomị. Bịsẹ ifiemị, Jehovah ị mọ mọ emi bara ị mọ nimimị, ómịnị tẹẹbịbị, Bible goo bá akị tụa iroromọ fomuun akị ị pịrịmị.

Ịmịnị Coron laabị alaghatimi, Itu-kosuowei a paamị. Ine bẹtịbị kị itu-kọsuowei duonị, ịmịnị kị Theocratic Ministry School, Service Meeting, itu Bible tolumọye bá Lewarị fun tolumọye kpọ mịẹ timimị. Inẹ bẹtịbị kị amabẹnịmọ egberi kpọ pịrị timimị. Bei yebo mịẹmịnị yọ duonị ịmịnị ba ifie nanawẹrị bẹtịbị k’emi iroroye nanagha!

Coron egberigbaa fịrịmị ị mịẹ pọwẹị nanamị, ine Bible kọn tolumọtimi otubo zụa benibilemị. Anịa bụụdọọn yeama paamị. Zụa ifieama, ịmịnị biin hour-ama ka kị wẹnị dẹkị egberigbaa ete laamịnị, mú laa daba bụnụmọyọ kpọ fa. Egberigbaa etemị zịnị kala tụwọ-ama kpọ emị. Ịmịnị okịdịgha bá abadị bọọ paamịnị adawaịnbo kpọ kịmị esisimọmịnị kị gbaa kpọ ịmịnị arụ ka leiwẹrị bịsẹ amabo amú timimị! Bịsẹ bụụdọọnyebo kị paa kị gbaa kpọ, Jehovah ị kekeremị. Bịsẹ ifie bụọdẹ kị, bọlọụ duo bomịnị dụba fịrịbo kị duonị Jehovah ị tolumọmịnị bara ịmọ nimimị.

PAPUA NEW GUINEA

Kụraị 1978, Branch office ị fịrịmọ Papua New Guinea ete ka múmị, Australia tọbụrụ anga ka emi ibe. Biin ogun-ama kị Papua New Guinea ibe ma emi, bịsẹ ibemị dụba Spain ibe laa kpọ paaemi. Bịsẹ ibe ma emi three million mọ naịn-emi kịmịbo 800 bẹẹlịama kị fiemịnị yọbị ị mịẹ tamamamị. Biin kịmịama Melanesian Pidgin fiemịnị, Tok Pisin ka kị bịsẹ bẹẹlị tịịnmịnị.

Ịmịnị Port Moresby ibe tịbị ama ka beke itu atimi wẹrịmị. Tuu laamị ịmịnị Tok Pisin fiemịnị itu sụọmọwẹrị bẹẹlị tolumọmịnị school amúmị. Ịmịnị school ma tolumọdẹ bẹẹlị ka kị egberigbaa kịmịotu pịrịmịnị. Bịsẹ yọmị baratụa ị pịrịwẹrị ifie famọgha bara bẹẹlị tolumọmị. Alaghatimi, Ịmịnị Tok Pisin bẹẹlịmị akị amabẹnịmọ ẹrẹbịbị kpọ pịrịmị. Ịmịnị Papua New Guinea atimi kụraị laghatimi Branch ine akị Tok Pisin bẹẹlị fiemịnị itu-diiowei atụa yomị, ị mịẹ tamamamị.

Itubo alaa yọama k’emi duonị, ịmịnị biin kala-ete bẹnịama kị mịẹpaamọmị bá biin ifieama kị yọụmị. Bọlọụ ifiemị ịmịnị naa biin yọama laagha timi duonị, yemị kụrọ ị pịrịmị. Gbaamaba aya ibe, aya bẹẹlị, bá aya inyenrinbụọ kị tolumọmịnị. Biin ogun-ama kị Ibe bọọ emi duonị ịmịnị laa ogbo duo yọụ mú zịnị ama laagha. Anịduonị ịmịnị weekbosẹ agọnọ arụ ka leimịnị. Zụa ifieama ine bẹtịbị kị yọụ yọma múmịnị bá zụa ifieama, ámịnị ebi kagha kala agọnọ arụ ka kị ị saịmịnị. Bịsẹ ye duonị ịmịnị abadị tọrụbo duo yọụtịmị ifiebị malafatimi bara ka kị mọkpọ malafami!

Zụa kịmịama kị phone nana wẹrịemi duonị, ịmịnị letter kị duo bịnaotubo mọ ẹrẹtimimị. Biin ifieama, ịmịnị mú itu laa dẹkị letterbo kpọ mú itu laamịnị, bá ịmịnị bịnaotubo emiyọbo nimigha duonị, ánị warịbo kpọ dọụtimi. Bịnaotubo ine ẹrịdẹ ifiesẹ ị kẹrịakị bolouịmbẹlẹ bá tọrụkẹrịyọ mịẹdịamịnị yọmị, ine wẹnịmịnị fịrịmị afengha bara ịmọ nimimị. Jehovah biin ụwọụ kọn baratụa ị pịrịmịnị bara ịmọ nimimị, bá ịmọ Jehovah mọ ikie kpọ kụrọ bọlọụdẹịnmị.

Ịmịnị bọlọụ Bougainville tịịnmịnị tụwọ ma yetolumọyọ amú ifiemị, kẹnị taa mọ yei mọ wẹnịbo ị laawẹrị ị biimị, “Ị́mịnị wo ukie wẹrịemi a?” Ịmịnị Port Moresby atimi ifiemị egberigbaa á pịrị bara ịmọ ụkịẹmị. Ịmịnị bọlọụ á mọ mọ́ Bible tolumọ dẹkị á bụọmọ zịnị bịnaowei pịrịwẹrị á mo mọ́ tolumọ bọlọụ amúmị. Wo bịsẹ zọzọ ẹrị ifiemị, ánị maa kịmịbosẹ benibiledẹ! Ịmịnị tara kụraị akị Papua New Guinea bọọ egberigbaa bị, bei kpọ kẹnị arere.

ANGỌTỤA FỊRỊWẸNỊMỊNỊ WARỊBOLOU

Ịmịnị 1978Coron duo serii dọụtimi ifiemị, kẹnị ebi, angọtụa fịrị wẹnịmịnị bịnaraụ ị mọ ẹrẹmị, ánị ẹrẹmị Adel. Amịnị beinmọ beinmọ ụwọụpẹlẹ fịrị kị wẹnịmịnị bá maá awọụ ziidẹ, ánị ẹrẹbọ Samuel mọ Shirley. Amịnị mọkpọ baratụa anị okosudẹ yin kpọ pịrịmịnị. May 1981, Ịmịnị waị Philippine amúwẹrị Adel nanamị. Omịnị zọzọ nanabị, beinmọ beinmọ ụwọụpẹlẹ fịrịwẹnị bá baratụa wo warị otubo kpọ pịrịmị.

Baratụa warị otubo pịrịmịni kị gbaa kpọ, kụraị 1983 mị, branch office ị fịrịmọ Linapacan tụwọ, Palawan ete k’emi ama ka mú special pioneer fịrị wẹnịmị. Omịnị kpe bịsẹ Jehovah Iseriotu kpọ fa kala ama kọọ múmị. Bịsẹ yọ ma timi kụraị bụọdẹbị Adel yin fịịmị. Mọabịkpọ, wo angọtụa egberigbaa fịrị wẹnịmịnị yọbị baratụa wo pịrịwẹrị eneni kẹrịmịnịyọ dẹịnmọmị. Linapacan bị, omịnị biin kịmịama mọ Bible tolumọmị, kịmịbo bọlọụ bụọmịnị yọ duonị, kala Kingdom Hall nanamụyọ wo mọ dọụmị, anịduonị omịnị bẹtịbị kẹnị kalaye kẹrịmị. Omịnị bịsẹ yọ bọọ egberigbaa timi tara kụraị kụmọ baịmị, 110 kịmịama bo Memorial ma paamị, bịsẹ kịmịbo biin yaị Bible tolumọ timi benibelemị.

Kụraị 1986 laabị, branch office mị ị fịrịmọ Culion tịịnmịnị tụwọ ka egberigbaayọ amúmị, bei ama bị pịnaki (leprosy) dọọn nana wẹrịemi kịmịama kị inyenrinmịnị. Bịsẹ ifie bụọdẹbị, Adel kpọ special pioneer ghọ paamị. Bọlọụ ifiebị, egberigbaa pịnaki (leprosy) dọọn nana werịemi otu pịrịmịnị yọbị wo mịẹ malafamị. Bịsẹ dọọn nana wẹrịemi otubo angọ zụọmịnị duonị dọọnmị wo angọ gbelegha fa bara bịnaotubo mọ gbaamị. Dọọn nana wẹrịemi otubo zụayaị kẹnị bịnaraụ warị kị yetolumọye mịẹtimimị. Omịnị alaghatimi bịsẹ kịmịbo mọ inyenrin bá egberigbaa á pịrịmọ bara nimimị. Bei kịmịbọ Ọkpọnanaowei mọ kịmịawọụ mọ á gbeinmọ-koromodẹ bara kị iroromịnị, anịa omịnị Bible bọọ emị ukiemọye kọn á kụrọmọ yọmị arere mịẹpaamọmị. Bei dọọn nana wẹrịemi otubo kẹnị erein Ọkpọnanaowei ánị dọọnbosẹ kọnsinmịnị ebiegberi pei yọbị wo mịẹ pọwẹị nanamị.—Luke 5:12, 13.

Wo awọubo Culion abo yomị, opu deiyọ kị ánị ụndụma paamị, anịa omịnị baratụa á pịrịmụ yọ duonị Ịmọ ị taa mọ Coron duo zịnị maá bịna ere-ama tịịn bọ á sụọmọmị. Samuel, Shirley, bá maá bịna erebọ mọ pọwẹị bara angọtụa egberigbaa fịrị wẹnịmị, ámịnị awọụbo mọ Bible tolumọ daba omịnị daụ mọ yin otubo mọ tolumọdẹ. Kẹnị ifie laami, omịnị 11 ziitu-ama mọ Bible tolumọmị. Omịnị biin kịmịama mọ Bible tolumọmịnị duonị alaghatimi aya itu mịẹpaamọmị!

Bọlọụ ifiemị, inẹ bẹtịbị kị itu-kosuowei ghọ timimị. Branch office ịmịnị weekbosẹ Culion bọọ emi ningina egberigbaa otubo mọ bá Marily tịịnmịnị gbene bọọ emi isena egberigbaa otubo mọ yetolumọye mịẹ bara gbaamị. Tara hour ka kị yọụ mú bịsẹyọ laamịnị. Yetolumọsịịn daba, wo warị otubo, biin hour-ama ka kị wẹnị Halsey tịịnmịnị ama bọọ mú kịmịotu mọ Bible tolumọmịnị.

Kịmịotu, Marily mọ Halsey mọ gesii kẹrịakị duonị ogbomị alaghatimi bịsẹ maá yọbo Kingdom Hall-ama kẹrịmị. Linapacan amamị, bịnaotubo mọ bá gesii bọọ dịsẹnana wẹrịemi otubo mọ warị kẹrị yeama paamọ bo ḅa angọtụa fịrị wẹnịmị. Marily Kingdom Hall mị 200 bịnaotu sụọ a paaemi bá tuu ifiemị ụ mịẹ dụbamọ wẹrị, omịnị laa bẹnịị-ama kpọ mịẹmị.

ENENI-KẸRỊ, BẸTỊBỊ EMI IFIE, BÁ WAỊ BOLOUỊMBẸLẸ IFIE

Kụraị 1993 bị awọụbo dụbadẹ ifiebị, Adel mọ ịmọ mọ́ Philippine ghọ itu dii fịrị wẹnịmị. Kụraị 2000 laa ifiemị, ịmịnị zịnị bịna-oweiama tolumọmụ yọ duonị, Ministerial Training School amú fomuun nanamị. Ịmịnị laa bịsẹ fịrị wẹnịgha fa bara iroromị, anịa Adel ị kụrọmọmị. Jehovah baratụa ị pịrịmịnị bara ámọ gbaamị. (Phil. 4:13) Adel dọọnmịnị kpọ Jehovah baratụa á pịrịwẹrị special pioneer fịrị wẹnịmịnị yọbị iroromịnị kị duonị bịsẹ kụrọmoye kọn ị pịrịmị.

Kụraị 2006 ịmịnị school ghọ bịnaotubo tolumịnị ifie kị, Adel kẹnị kụrọ dọọn, Parkinson tịịnmịnị dọọn nanadẹ bara naamị. Yemị wo mịẹ tamamamị! Ịmịnị special pioneer fịrị ma barasin wẹrị baratụa á pịrị dọụmị, anịa amịnị gbaamị, “baratụa ị pịrịmu dọọnzụọ kịmị dọụ ị pịrị, Jehovah baratụa wo pịrịwẹrị fịrịwẹnị bọlọụ amúmịnị.” Bịsẹ ifie bụọ kpọ Adel dọọn bolou k’emi kpọ sọndịa kụraị akị mọkpọ special pioneer fịrịwẹnịmị. Amịnị ba nimi wẹnịgha ifiemị, wheelchair ka timi egberigbaa fịrị wẹnịmị. Ẹrẹmọ yọbị kụrọ á pịrị ifie kpọ, amịnị yetolumọ yọbị biibịbị parụ timimị. Adel ye-ine ebi inyenrinbụọ duonị bịnaotubo tọrụkẹrị fun-ama gẹẹ á pịrịtimi kụraị 2013 kọọ fịịmị. Ịmịnị 30 dẹịn-emi kụraịama ka kị bei peibolou nana erema mọ inyenrinmị, anịa bei tịẹkirimị ịmịnị waị eneni-kẹrị bá bẹtịbị k’emi iroro yeama nanamịnị.

Adel ifiebosẹ ịmịnị special pioneer fịrịwẹnị kị dọụmị, ịmịnị bịsẹ bara kị mịẹmịnị. Ịmịnị ifiebosẹ fịrị wẹnịmịnị yọmị, baratụa ị pịrịwẹrị bẹtịbị emi iroroye dẹịnmọmị. Kụraị 2014 duobo 2017 mị, branch office ị fịrịmọ Tagalog ituama dii yọ amúmị, bịsẹ yọmị egberigbaa fịrị tịẹmọ wẹrịemi. Bịsẹ ifie bụọmị, ịmịnị Taiwan, United State bá Canada bọọ Tagalog fiemịnị ituama kpọ dii yọ amúmị. Kụraị 2019 laamị, ịmịnị India mọ Thailand mọ School for Kingdom Evangelizers beke fiemịnị ikpudu tolumọ yọ amúmị. Bei fịrịbosẹ bolouịmbẹlẹ akị ị pịrịmị. Ịmịnị beinmọ beinmọ bara kọn Jehovah fịrị wẹnịmịnị yọmị ị mịẹ dụbadẹịn pọwẹị nanamịnị.

OMỊNỊ IFIEBOSẸ BARATỤAPỊRỊYE NANAMỊNỊ

Ịmịnị aya itu amú daba, ịmịnị bịnaotubo tarị kụrọmọ wẹrịemi duonị, serii zịnịyọ amúmịnị yọbị bọụbọụgha. Bịsẹ bara paadẹ ifiesẹ, Ịmịnị eti akị Jehovah tụamọ yọbị yelaaemi bara tolumọmị. Jehovah ifiebosẹ baratụa ị pịrịmịnị yọ duonị, aya fịrịwẹnịmụ fomuun kị ị laa kpọ ịmịnị ine adụdụsẹ kọn fịrị wẹnịmịnị. Ịmịnị bei tịẹkiri kpọ, Philippine atimi special pioneer fịrị wẹnịmịnị. Ine emi aya itumị bịnaotubo ine warịbolou otuama bara ka kị baratụa ị pịrịmịnị. Samuel mọ Shirley mọ á yin peibolou nana bara damịẹmịnị yọmị ị mịẹ pọwẹị nanamịnị.—3John 4.

Gbẹsị mị, biin dadiyeama kị ine ụndụ gbeledẹ, ine tarị wẹrịemi erema kpọ ụyafịtimi fịị, bá zịnị aya bụụdọọnyeama kọn tụa inyenrinmịnị yọ kpọ bọụbọụ ị pịrịgha. Mọabịkpọ, Jehovah “wo mọ mọ́ naịn k’emi bara ịmọ nimimị.” (Acts 17:27) Bịnaotu fa yọ kpọ Jehovah barabo kẹsịgha duonị laa baratụa wo pịrịmịnị. (Isa. 59:1) Jehovah kị ine Oputa Okuta, ómịnị baratụa ị pịrịtimi bei ifie laa yọmị, ịmịnị tọrụkẹrịmị. Ịmịnị benebene bẹtịbị fa.