Akpọ Bọọ Emi Ịmịnị Kị Yelaadẹịn Inyenrinbụọ Kịlẹ
Akpọ mị, biin kịmịama ịmịnị kị didụbamọ nana zịnịotu dẹịn agbẹị-emi inyenrinbụọ mịẹdịamịnị bara mị ị́ mọ dọụ ẹrịdẹ a? Bịsẹ kịmịpaabo biin yeama kị nana kpọ biribeingha. Bei inyenrinbụọmị, Bible kunumọ ereinbo gbelemọ yọ ma gbaa egberi kị mịẹ beinmọmịnị.—2Tim. 3:2.
Gbẹsị gbaamaba, bei inyenrinbụọmị Adam mọ Eve mọ kị duobo wosẹ laamị, aya inyenrinbụọgha. Jehovah sei mọ ebi mọ sẹlẹ angọ pịrịmụ fomuun kọn Adam mọ Eve mọ pịrịmị, anịa ámịnị sẹlẹ ebimọgha kị duonị dọọn mọ fịị mọ kịmịsẹ laamịnị. Bo Judah ibe pẹrẹowei Uzziah ifie laamị, ómịnị pẹrẹ duonị laa fụrụịmbẹlẹ incense kọn karịwarị ma yọụnmọmụ bara kị tọn wẹrịmị, yemị angọserimọ inyenrinbụọ kị mịẹdịa dụọnị, ebi paa ụ pịrịgha. (2Chron. 26:18, 19) Bịsẹ kpekẹnị baramị, Pharisee otubo mọ Sadducee otubo mọ Abraham zituu kị duobo-emi duonị kịmịama bẹbẹ bara ka kị á mọ mọ́ inyenrin kị ḍọụtimimị.—Matt. 3:9.
Omịnị angọserimọ bá mẹnịmọtu tụa kịmịama mọ kị inyenrinmịnị, omịnị angọ digha ifiesẹ ánị inyenrinbụọbo wo gbele kpọ paaemi (Gal. 5:26) Bịsẹ bara paadaba, omịnị kịmiotu diseimọ, angọserimọ bá kịmịotu pịrị didụbamọmụ fịrịama kị dọụ wẹnịmịnị. Mị iroroyebo wo gbele daba, teeki baratụa wo pịrịmịnị a? Bọlọụ Jehovah akị yebị dimọ wẹrịemi bara nimipẹlẹ. Maa Bible tolumọ yeama baratụa wo pịrịmịnị.
Jehovah kị wo nana agbẹị ye sẹlẹ wo pịrị agbẹị-emi. Zụa tọnmọdịa-yeama wo mọ ditụa.
Warị boloumị, yei ụbọ ụ taa ụ didụbamọ kị dọụ wẹrịemi, taa bá yei á tarị kị dọụ wẹrịemi. (Eph. 5:33) Zọzọ nanadẹ otubosẹ, ánị nanadẹ ụbọ bẹtịbị mọ kị zọzọ anga dịsẹnana agbẹị-emi. (1Cor. 7:3) Daụ mọ yin mọ otu ánị awọụbo didụbamọye kọn á pịrị kị dọụ wẹrịemi, awọụbo kpọ daụ mọ yin mọ á tarị bá baratụa á pịrị kị dọụ wẹrịemi.—2Cor. 12:14; Eph. 6:2.
Itu bolou ma angọtụa fịrị wẹnịmịnị itu-kosuotubo, didụbamọye akị pịrị agbẹị-emi. (1Thess. 5:12) Mọabikpọ, itu-kosuotubo ánị bịnaotubo penimọgha fa.—1Pet. 5:2, 3.
Ọkpọnanaowei tịbịsaa bii kụrọ kọn akpọ daabụọbo pịrịdẹ, anịkị-duonị kịmịotu tịbịsaa kọn á gbẹẹ bá á didụbamọmịnị.—Rom. 13:1, 6, 7.
Jehovah wo tarị wẹrịemi duonị wo nana agbẹịgha yeama kọn wo pịrịmịnị. Sei bolou kọọ wo zii wẹrịemi duonị, wosẹ fịị kị fịị agbẹị-emi. (Rom. 6:23) Anịa, Jehovah kpẹkpẹrẹẹ tarị kọn wo a nana wẹrịemi duonị, mọkpọ biin tarịama ka kị wo pịrịmịnị. (Ps. 103:10, 11) Bei tarịbo wo laa agbẹị-emi kị duonị Okpọnanaowei wo pịrịmịnị bara fa. Jehovah wo tarịemi kị duonị wo pịrịmịnị.—Rom. 12:6-8; Eph. 2:8.
ỊMỊNỊ KỊ YELAADẸỊN BÁ MẸNỊMỌTU TỤA INYENRINBỤỌ, DAATỊẸMỌMỤ BARA
Akpọ otu ye-iroromịnị bara irorokụmọ. Omịnị zụa ifieama akpọ ye-iroromịnị bara iroro kpọ paaemi, kaanghaba, Ị́mịnị iroro kpọ paaemi, ịmịnị ye nana baradẹịn agbẹị-emi. Jesus bei iroro yebị wo gbele a paaemi bara nimi kị duonị kiribou fịrịwẹnị timi otu akị tọnmọdịaye gbaamị. Zụa otu pekei duo wẹnịtimi bụbụrụ ifie laa; zụa ba biingha hour-ama ka kị fịrị bị wẹnịmị. Bọlọụ fịrịwẹnị kịmịbọ ánị wẹnị bara duonị, dụbadẹịn sịlị ka kị á gbẹẹmụ bara kị tọn wẹrịmị. (Matt. 20:1-16) Jesus bei tọnmọdịaye ma tuugbaa yọmị mịẹdịa amọ, Okpọnanaowei mịẹ wó tuuduo-otubo pịrịdẹ yesẹ ámịnị tọrụkẹrị yọ mịẹdịa bara kị gbaamịnị.
Pekei duo wẹnịtimi bụbụrụ laa otubo dụbadẹịn sịlị ka kị á gbẹẹmụ bara kị tọnmị
Tọrụkẹrịyọ mịẹdịa, ifiebosẹ biribeingha kịmị bara mịẹkụmọ. (1Thess. 5:18) Fịrịmọpaaowei Paul mịẹ bara dimịẹ, Paul Corinth ibe ma timi ifiebị, ómịnị bịnaotu otuo paamọ yeama kị dii wo ụndụ inyenrin agbẹịwẹrịmị, anịa Paul benebene bịsẹ bara mịẹgha (1Cor. 9:11-14) Kịmịotu yemịẹ wo pịrịdaba tọrụkẹrịyọ mịẹdịa, ifiebosẹ kịmịotu bara duo ye bii inyenrinbụọ nanakụmọ.
Fịrịmọpaa-owei Paul kịmị bara sịlị anịghakpọ nanaye biigha
Angọ-iyerimọ. Kịmị ómịnị kị yelaadẹịn-emi bara irorodaba, ifiebosẹ wó nana wẹrịemi yebo kị biin zịnịotu yai dẹịn bara kị iroromịnị. Angọ-iyerimọ inyenrinbụọ kị baratụa wo pịrịwẹrị mị inyenrinbụọ daatịẹmọmịnị.
Bụrụowei Daniel angọ-iyerimọ duonị ómịnị Jehovah tọrụyọ ma yelaa kịmị ka paamị
Angọ-iyerimọ gbelemọ yọmị, bụrụowei Daniel ebi mịẹdịaye ka paaemi. Ómịnị ebiwarị bolou, dii-ebi, fun-nimi, bá kụrọ nana wẹrịemi duonị, kịmịama ụ didụbamọ bá ebi fịrị kị wẹnịmụ bara ómịnị mọ iroro kpọ paatimimị. (Dan. 1:3, 4, 19, 20) Daniel bịsẹ bara mịẹgha, ómịnị angọ-iyerimọ inyenrinbụọ kị mịẹdịamị, Anịduonị ómịnị Jehovah tọrụyọ bọọ yelaa kịmị ka paamị.—Dan. 2:30; 10:11, 12.
Akpọsẹ, ịmịnị kị yelaadẹịn bá mẹnịmọtu tụa inyenrinbụọ kị mịẹdịamịnị, omịnị benebene bịsẹ bara inyenrin kụmọ, wosẹ angọtụa akpọ inyenrinbụọ daatịẹmọ daba, Jehovah duobomịnị wo laa agbẹịgha tarịbo wo laatimi bẹseri bẹseri laamịnị.