Gesii Ikie Ụbọ A Paamọ Barabị

ỊMỊNỊ kpọ bụụdọọnye laawẹrị baratụa ị́ pịrịmụ kịmị fa bara irorodẹ wẹrị ma? Omịnị kunumọ ereinbo k’emi anịduonị “kụrọ inyenrinbụọama” wo paamọwẹrị wo mịẹ suusụọ bá bẹtịbị k’emi bara iroromịnị. (2Tim. 3:1) Anịa, omịnị bẹtịbị wo laamịnị bụụdọọnyebo kẹrị tịẹmọmụ bara iroro kụmọ. “Akpotu ifie laadaba” gesii ikie-ụbọ yelaaemi bara Bible mọ gbaa wo pịrị wẹrịemi.—Prov. 17:17.

GESII IKIE-OTU BARATỤA WO PỊRỊMỤ BARAMỊ

Fịrịmọpaaowei Paul ụ mọ mọ́ yọụpaatimi ikie-otubo duo biin arereama kị nanamị. (Col. 4:7-11) Paul Rome ikoliwarị a timi ifiemị, wó ikie-otubo ụ laa wẹnịgha fịrịbo wẹnịmị. Gbaamaba, Epaphroditus Philippi bịnaotubo Paul dọụ wẹrịemi yebo kọn saị ụ yarị timimị. (Phil. 4:18) Tychicus kị Paul gẹẹdẹ funbo akị itubo yarị timimị. (Col. 4:7; study note dii.) Wó ikie-otubo baratụa ụ pịrịtimi duonị, Paul ikoliwarị k’emi kpọ baratụa itubo pịrị timimị. Ị́mịnị kpọ tebara ka kị laa ebi ikie-ụbọ a paamịnị a o?

Wo ifie kpọ gesii ikie gbelemọ ebi mịẹdịayeama emi. Wo wẹrị kẹnị bịna-raụ ebi ikie a paa Elisabet, Spain ibe ma beinmọ beinmọ ụwọụpẹlẹ fịrị wẹnịmịnị bịnaraụ pịrị bara dii. Á yin cancer dọọn nana ifiemị, bịnaraụma kịmị kụrọmọ Bible yọama fịrịmọ Elisabet yarịmị. Elisabet gbaamị “Egberibo ịmọ ẹrẹ ifiemị” “ị kụrọmọ wẹrị bẹtịbị emi iroroye dẹịnmọ bá bolouịmbẹlẹ mị.”—Prov. 18:24.

Omịnị angọtụa yetolumọyọ bá egberigbaayọ á múmịnị yọmị, omịnịmụ kọn wo bịnaotubo mọ nana wẹrịemi ikie kị mịẹ kụrọmọmịnị. Gbaamaba, ị́mịnị laa baratụa okosudẹ bịna-ụbọ pịrịwẹrị yetolumọyọ anịghakpọ egberigbaayọ bo a paaemi a? Ị́ bịsẹbara mịẹdaba, ánị maa kịmị laa zọzọ kụrọmọ egberiama ẹrẹteimịnị. (Rom. 1:12) Anịa, zụa bịnaotuama laa warị kpọ duo paagha. Ị́mịnị tebara ka kị gesii ikie-ụbọ paa á pịrịmịnị a o?

GESII IKIE-ỤBỌ KA PAA NIMI WARỊ DUO PAAGHA OTU PỊRỊ

Zụa bịnaotuama angọ dọọnyọ duonị laa yetolumọyọ kpọ amúgha. Wo David paamọye dii, lymphoma tịịnmịnị dọọn kị ụ kẹrịmị. Sọndịa agọnọwei dẹịn bara David mọ kọn warị ka timi bịsẹ dọọn zụọ timimị. Dọọn zụọtimi ifiesẹ, David mọ ụ taa Lidia mọ, phone kị duo yetolumọye mịẹtimimị.

Itu bọọ emi bịnaotubo tebara ka kị baratụa á pịrị ma? Yetolumọ seridẹ ifiesẹ, Kingdom Hall emi otubo vidio duo David mọ Lidia mọ kẹrị ẹrẹteimịnị. Bá mọkpọ, David mọ Lidia mọ biibịbị parụ daba, bịnaotubo ánị parụbịbịbo kọn á kule bá kịmị kụrọmọmịnị egberiama gẹẹ á yarịtimimị. Bịsẹ yebo tebara ka kị baratụa David mọ Lidia mọ pịrị ma o? Ámịnị bẹtịbị fa bá ánị bịnaotubo á tarị kụrọmọ emi bara nimimị.

Omịnị laa warị duopaagha bịnaotubo akị tụa egberigbaayọ amú a paaemi a? Omịnị zụa deiyọama mịẹwẹri, á mọ mọ́ egberigbaa a paaemi, bịsẹ yọbị omịnị á tarị wẹrịemi bara kị mịẹdịamịnị. (Prov. 3:27) Omịnị laa fun gẹẹ anịghakpọ telephone egberigbaaye akị á mọ mọ́ mịẹ a paaemi a? Benịwẹrị egberigbaayọ paamọ ukiemọ-yeama akịmịnị ifiebị, ámịnị kpọ laa phone duo wo sụọmọ a paaemi. David mọ Lidia mọ bei baratụa pịrị yebị tọrụkẹrịmị. David gbaamị, “Omịnị phone duo egberigbaa ikpudu mọ egberigbaa ukiemọyebo naá bá á sụọmọ tẹẹmịnị yọbị wo kụrọmọmị.” Mọkpọ, mịẹ ka paaemi aba, ị́mịnị ifiebosẹ ị́mọ mọ́ Bible tolumọmịnị ụbọ kọn warị duopaagha bịna-ụbọ yọ amú wẹrị tolumọ a paaemi a?

Omịnị wo bịnaotubo sụọmọ egberigbaayo amúmịnị ifiesẹ, ánị ebi inyenrinbụọbo ẹrẹmịnị yọmị wo mịẹ á mọ mó naịn dẹịnmịnị. Gbaamaba, mị bịnaotubo ebibara Bible duo Ọkpọnanaowei egberigbaa wẹrị kịmịotu adụdụ gbelemịnị bara ị́mọ ẹrịdaba, ị́ mịẹ á mọ mọ́ naịn dẹịnmịnị. Ị́mịnị tẹmẹanga mịẹmụ yeama gbelemọ yọmị baratụa bịnaotu pịrịmịnị ifiesẹ, ị́mịnị aya ikie-otuama kpọ nana a paaemi.—2Cor. 6:13.

Paul wó ikie-owei Titus duo kụrọmọye nanamị. (2Cor. 7:5-7) Bei egberimị wo ukiemọ amọ bẹbẹ bẹtịbị ka kị kịmị kụrọmọ kụmọ, anịa ụbọ warị a mú bá baratụa ụbọ pịrịmụ yeama mịẹ á pịrị.—1John 3:18.

AKPOTU IFIE KPỌ GESII IKIE-ỤBỌ A PAA

Wo Russia bịnaotubo baratụa zọzọ pịrịmịnị yọbị ebi mịẹdịa ka paa wo pịrịemi. Sergey mọ ụ taa Tatyana mọ paamọye dii. Police-otu ánị warị gagala, bá á kẹrị police station amúmị. Ámịnị Tatyana kị bụọmọ warị amúmị. Sergey gbaamị: “[Tatyana] warị laa ifiemị, kẹnị ye-siingha bịnaraụ wo warị ma bomị. Zịnị bịnaotuama kpọ bo baratụa ị taa pịrịwẹrị waị wo warị tọlọmọmị.”

Sergey mọkpọ gbaamị: “Proverbs 17:17 ifiebosẹ ị dịsẹ kụrọmọmịnị, yọ gbaamị: ‘Gesii ikie-ụbọ ifiebosẹ tarị mịẹdịamịnị bá akpotu ifie kpọ eti akị tụa paaemi kịmị ka paaemi.’ Ịmịnị bụụdọọnye bolou a timi ifiebị, bẹtịbị k’emi bara kị iroro timimị, anịa mị Bible egberimị kọkọ gesii emi bara ịmọ nimi dẹịnmị. Jehovah ye-siingha bịnaotuama akị baratụa ị pịrịmị.”a

Ereinbo kụrọ bọlọụ dẹịnmịnị mị, omịnị eti akị tụa agbẹị-emi ikie-otu dọụ wẹrịemi. Opu akpotu laadaba omịnị ánị baratụa-pịrịye dọụ kụrọmọmịnị. Anịduonị omịnị wẹrị bei tịẹkirimị angọtụa dá gesii ebi ikie-otu a paa!—1Pet. 4:7, 8.