Ị́ Kpọ Nanaye Biribein Inyenrinbụọ “Tolumọ Nimidẹ” A O?

1. Nanaye biribein inyenrinbụọmị teeki bẹmọ wẹrịemi a o?

Ị́ kpọ nanaye biribeinmịnị? Nanaye biribeinmịnị kịmịbị wo nana wẹrịemi ebi yebo kị kẹrị iroro wẹrị pọwẹị mọ dọọ mọ nanamịnị. Ómịnị ‘wo nanagha yeama duonị boloukọn bara mịẹgha. Bịsẹ bara gbaadẹ duonị bá kịmị mịẹ bọlọụmịnị yeama mịẹgha fa bara gbaagha. Gbaamaba Christtuuduo kịmị Jehovah ogbomị biin fịrịama wẹnị dọụmịnị yọmị seigha. (Rom. 12:1; 1Tim. 3:1) Anịa tịẹkirimị wó wẹnị dọumịnị fịrịbo naa bo wó bara laagha kị gbaa kpọ, ómịnị mọkpọ bolouịmbẹlẹ timimịnị.

2. Nanaye biribeingha inyenrinbụọmị te akpotu-ama kị mịẹpaamọmịnị a o?

² Nanaye biribeingha inyenrinbụọmị biin bụụdọọn yeama kị mịẹ paamọmịnị. Kịmị mịẹ biin hour-ama ka kị fịrị wẹnị kpọ paaemi. Sei dẹịn yemị, zụa Christtuudou-otuama bịsẹyọ duonị sịlịama mọ zịnị yeama mọ kpọ furudẹ. Ámịnị gbaa angọ pịrịmịnị, ‘ịmịnị bei yebo nana agbẹị-emi,’ ‘ịmịnị korutimi alabụọdẹ,’ anịghakpọ ‘ịmịnị tuu laadaba gbẹẹmịnị.’ Bịsẹ bara kị gbaa kpọ, Jehovah furu inyenrinbụọsẹ dịsẹgha. (Prov. 30:9) Zụa kịmịama ba Jehovah ogbomị, zụa fịrịama ánị bara laagha duonị, Jehovah karịmịnị yọ tịẹmọdẹ. (Gal. 6:9) Kọkọ angọdịẹ-paamọ Jehovah pịrịdẹ kịmị bịsẹ bara mịẹ agbẹị-emi? kaanghaba ụbọmị nanaye biribeingha kị duonị bịsẹ bara paamịnị.

3. Omịnị Philippians 4:​11, 12 duo te kịmị kụrọmọ gesii kị tolumọ ma o?

³ Wosẹ nanaye biribein inyenrinbụọ nana a paaemi. Fịrịmọpaa-owei Paul gbaa amọ “[ómịnị] emibara emibara nanaye biribein inyenrinbụọ nanamụ bara tolumọdẹ.” (Philippians 4:​11, 12 goo.) Ómịnị ikoli-warị ka timi mị egberibo gẹẹmị. Bịsẹ bara kị gbaa kpọ, ómịnị mọkpọ pọwẹịtimimị. Ómịnị kọkọ nanaye biribein inyenrinbụọ “nanamụ bara tolumọdẹ.” Nanaye biribein inyenrinbụọ nanamụ yọbị kụrọ wo pịrị kpọ paaemi, anịa Paul gbaa egberibo baratụa wo pịrịwẹrị bịsẹ inyenrinbụọ nanamịnị. Wo zii ifiemị omịnị yalịgha duonị nanaye biribein inyenrinbụọ nanagha. Anịduonị, omịnị tolumọ kị tolumọmịnị. Tebara a o? Wo wẹrị baratụa wo pịrịwẹrị nanaye biribein inyenrinbụọ nanamụ yeama tolumọ.

TỌRỤKẸRỊ INYENRINBỤỌ NANA

4. Ye a tọrụkẹrị inyenrinbụọ tebara ka kị baratụa wo pịrịwẹrị nanaye biribeinmịnị a o? (1Thessalonians 5:18)

⁴ Ye a tọrụkẹrị inyenrinbụọ wo mọ nanadaba baratụa wo pịrịwẹrị nanaye biribein inyenrinbụọ nanamịnị. (1Thessalonians 5:18 goo.) Gbaamaba, Jehovah gbẹsị wo dọụ wẹrịemi yebo kọn wo pịrịmịnị yọbị wo a tọrụkẹrị emiaba, omịnị wo nanagha yeama kẹrị iroro wẹrị kpeke-kpekegha fa. Bịsẹyọ bụọmọ kpọ, omịnị Jehovah ogbomị laa wẹnịmịnị fịrịbo wo tọrụkẹrị emiaba, wo laa wẹnịgha fịrịama duonị kpeke-kpekegha fa. Anịkịduonị Bible mị wo kụrọmọmị, omịnị tẹẹbịbị mịẹmịnị ifiesẹ Jehovah kulemụ yọmị barafa kụmọ! Ifiebosẹ omịnị ye a tọrụkerị inyenrinbụọ nanadaba, baratụa wo pịrịwẹrị “Ọkpọnanaowei duo bomịnị kịmịawọụ nimiyebosẹ dẹịn-emi dọọ mị nanamịnị.”—Phil. 4:​6, 7.

5. Tetuu kị duonị Israel otubo tọrụkẹrị inyenrinbụọ nana agbẹị-timi ma o? (Foto kpọ dii.)

⁵ Wo wẹrị Israel otubo paamọye ditụa. Ámịnị biin ifieama, Egypt bọọ fịtimi fịyaịbo kị fị dọụmịnị bara gbaa Jehovah pịrịmị. (Num. 11:​4-6) Kọkọ, ozubou (wilderness) ma inyenrin fịrịmị bọụbọụgha. Anịa teeki baratụa á pịrịwẹrị nanaye biribein inyenrinbụọ nana a paatimi ma o? Ámịnị Jehovah mịẹ á pịrịdẹ ebi yebo tọrụkẹrịyọ nana agbẹị-timimị. Ámịnị Egypt bọọ timi ụyafịtimi ifiemị, Jehovah oia ụyamọ yeama kọn Egypt otubo pịrịmị. Bá ámịnị Egypt duo seri timi ifie kpọ, Jehovah baratua á pịrịwẹrị Egypt otu nana wẹrịemi silver-ama, gold-ama, bá bịdẹ-ama “tan akịmị.” (Ex. 12:​35, 36) Israel otubo wẹnịbo Kwekwe Abadị laa ifie kpọ, Jehovah tamamaa bara benii dịẹmọ wẹrị á pịrị wẹnị bụọmị. Bịsẹyọ bụọmọ kpọ ámịnị ozubou (wilderness) bọọ timi wẹnịtimi ifiemị, Jehovah manna mịẹpaamọ wẹrị ereinbosẹ á pịrị fịtimimị. Tetuu kị duonị, Israel otubo ba fịyaị fa bara ụmbụbụrụ ma o? Ámịnị fịyaị nanagha bara kpọ fa, anịa ámịnị nanaye tọrụkẹrị inyenrinbụọ nanagha kị duonị bịsẹ bara mịẹmị.

6. Te yeama kị baratụa wo pịrịwẹrị tọrụkẹrị inyenrinbụọ nanamịnị a o?

⁶ Ị́mịnị tebara ka kị tọrụkẹrị inyenrinbụọ nanamịnị a o? Bọlọụ yemị, ereinbosẹ iné ụndụ ma paadẹ ebi yebo kẹrị iroro. Kaanghaba ị́mịnị maamụ anịghakpọ tarụ gẹẹ koromọ a paaemi. (Lam. 3:​22, 23) Maamụ karamu yemị, ifiebosẹ tọrụkẹrị inyenrinbụọ mịẹdịa. Zịnịotu mịẹ ị́ pịrịdẹ ebi yebo kọn á kule. Ebidẹịn yemị, ifiebosẹ Jehovah kule. (Ps. 75:1) Tarụ karamu yemị, tọrụkẹrị inyenrinbụọ kịmị bẹịnmịnị bara kị tọrụkẹrịgha inyenrinbụọ kpọ kịmị bẹịnmịnị. Anịduonị omịnị angọ kọn ye a tọrụḳerị inyenrinbụọ mịẹdịamịnị kịmịama mọ kị naịn. (Deut. 1:​26-28; 2Tim. 3:​1, 2, 5) Omịnị wo ịkịọụsẹ akị tọrụkẹrị inyenrinbụọ mịẹdịamụ yọ ka tụadaba, baratụa wo pịrịwẹrị tọrụkẹrịgha inyenrinbụọ dẹịnmọ mịnị.

7. Bịna-araụ Aci teeki mịe ma o, tuumị teeki paa ma o?

⁷ Wẹrị Indonesia emi bịna-araụ Aci paamọye ditụa. Á gbaamị: “COVID-19 dọọn timi ifiemị, ịmịnị ine angọ kọn zịnị bịna otuama emibara tọnmọmị. Bịsẹyọ duonị, ịmịnị ba nanaye biribein inyenrinbụọ nanagha.” (Gal. 6:4) Teeki baratụa pịrịwẹrị ánị iroroye dei ma o? Á gbaamị: “Ịmịnị ereinbosẹ ị laamịnị tarịbo mọ bá Jehovah ogbo duobo ị laamịnị ebi yebo kị kẹrị iroromịnị. Bá tọrụkerịyọ kpọ mịẹdịamị. Bịsẹyọ duonị, ị́mịnị nanaye biribein inyenrinbụọ nanadẹ.” Ị́ kpọ bịsẹ sei iroro yeama nanamịnị aba, ị́mịnị bịna-araụ Aci dimịẹ a paaemi?

ANGỌ-IYERIMỌ BÁ ADỤDỤSẸ KỌN Ị́ LAAEMI FỊRỊ WẸNỊ

8. Baruch te dadiye ka sụọ ma o?

⁸ Baruch kị bụrụowei Jeremiah fun gẹẹowei, ómịnị kẹnị ifie ye a biribeingha inyenrinbụọ nanamị. Ómịni baratụa Jeremiah pịrịwẹrị kụrọ ịsọmọ egberi gbaa akị ye a tọrụkẹrịgha Israel otubo pịrịtimimị. Anịa timi kẹnị ifie laabị, Baruch ba tọrụtụa wo wẹnịmịnị fịrị digha. Ómịnị tọrụtụa Jehovah kọn ụ pịrị wẹrịemi fịrị dimọyọ dii a, wo nanagha yebo kị kẹrị iroromị. Jehovah bụrụowei Jeremiah duo gbaa Baruch pịrịmị: “Ị́mịnị opu yeama kị dọụmịnị. Anịa bịsẹyọ tịẹmọ.” (Jer. 45:​3-5) Jehovah gbaa Baruch pịrịmịnị barasẹ: “Tịẹkirimị iné nana wẹrịemi yebo iné a biribein.” Baruch bịsẹ zezemọye kẹrịakị wẹrị pọwẹị pọwẹị Jehovah karị bọlọụ a múmị.

9. Wo 1Corinthians 4:​6, 7 gbaa bara didaba, angọ-iyerimọ inyenrinbụọ baratụa wo pịrịwẹrị teeki nimimịnị a o? (Fotobo kpọ dii.)

⁹ Zụa ifieama Christtuuduo-kimị, Jehovah ogbomị zụa fomuun-ama nana agbẹị-emi bara iroromịnị. Kaanghaba, ómịnị biin fịrịama wẹnịdị wẹrịemi, angọtụa fịrị kpọ wẹnịmịnị bá biin kụraịama akị Jehovah karịdẹ. Anịa, ụ dịsẹ-emi fịrịmị kọn zịnị kịmị kị pịrịdaba, ómịnị tebara kị mịẹ agbẹị-emi a o? Ómịnị fịrịmọpaa-owei Paul akị 1Corinthians 4:​6, 7. (goo.) bọọ gbaa wẹrịemi egberimị kẹrị iroro agbẹị-emi. Jehovah ogbo ma wo laamịnị fomuun bosẹ anịghakpọ wo wẹnịdị wẹrịemi fịrịbosẹ Jehovah bara kị duo boemi dịẹpịrị-yeama. Wo laamụ agbẹịgha ebiama.—Rom. 12:​3, 6; Eph. 2:​8, 9.

10. Omịnị tebara ka kị angọ-iyerimọ inyenrinbụọ nana a paaemi a o?

¹⁰ Omịnị ebibara Jesus mịẹdịaye kẹrị irorodaba, baratụa wo pịrịwẹrị angọ-iyerimọ inyenrinbụọ nanamịnị. Wó fịịmụ dein laabị, Jesus wó fịrịmọpaa-otubo bụọbo sụrụmị. Fịrịmọpaa-owei John bịsẹ ifiemị paaye gẹẹtimi ifiemị ụ gbaamị: “Jesus, Daụbị [1] yebosẹ kọn wó pịrịdẹ bara nimimị [2] bá ómịnị Daụ kị duo boemi bara mọ [3] waị Daụ kị dọụ múmụ bara mọ nimimị, . . . anịa ómịnị koro wó tuuduo-otubo bụọbo sụrụmị.” (John 13:​3-5) Wó fịrịmọpaa-otubo kị wó bụọbo sụrụ agbẹịtimi bara Jesus mọ iroro kpọ paatimimị. Anịa, ómịnị mị kiriogbo ma inyenrintimi ifiemị, ómịnị dọụdẹ yesẹ nana agbẹị-emi, bá opu kịmị bara kị inyerin agbẹị-emi bara kpọ irorogha. (Luke 9:58) Jesus angọ-iyerimọ; nanaye biribein bara kị inyenrinmị. Bịsẹ yọmị kọkọ ebi mịẹdịaye ka paa wo pịrịemi.—John 13:15.

11. Angọ-iyerimọ inyenrinbụọ tebara ka kị baratụa Dennis pịrị ma o?

¹¹ Dennis, Netherland emi bịnaowei, ómịnị Jesus angọ-iyerimọ inyenrinbụọ dimịẹmị, anịa bọụbọụ ụ pịrịgha. Ụ gbaamị: “Zụa ifieama ịmịnị angọserimọ anịghakpọ nanaye biribeingha iroroye ine adụdụ duo sụọmịnị, gbaamaba, kịmị itumị fịrị wẹnị fomuun nanadaba bịsẹ iroro yebo ine ịkịọụ duo sụọmịnị. Bịsẹ bara paadaba, ịmịnị angọ-iyerimọ inyenrinbụọ gbelemọ egberitịbịama tolumọ ango pịrịmịnị. JW Library^® app bị, ịmịnị angọ-iyerimọ gbelemọ Bible yọama akị tag anga ma tụạ wẹrịemi, anịkị ịmịnị kpa anị ẹrịwẹrị goo a paadẹ. Bịsẹyọ bụọmo kpọ ịmịnị angọ-iyerimọ gbelemọ ẹrẹbịbịama kọn ine phone ma tụawẹrị peimịnị. Ịmịnị bo dọụ ẹrịdẹ wo mịẹmịnị yebosẹ akị angọ tokonimụ kị duonị mịẹmịnị bara fa, akị Jehovah kị tokoni dọụmịnị. Wosẹ Jehovah tokonimụ yọbị wẹnị tụamọ fịrị nana wẹrịemi.” Ị́ dịsẹ-emi fịrị wẹnị fomuun naa Jehovah ogbo duobo ị́ laagha duonị ị́mịnị bolou-ịmbẹlẹghaba, baratụa ị́ pịrịwẹrị angọ-iyerimọ inyenrinbụọ nanamụ yeama mịẹ. Bịsẹ yọmị ị́mọ Jehovah mọ nana wẹrịemi ikie mịẹ kụrọmọ dẹịnmịnị bá baratụa ị́ pịrịwẹrị nanaye biribeinmịnị.—Jas. 4:​6, 8.

INÉ NANA WẸRỊEMI UKIEMỌYE KẸRỊ IRORO

12. Te ukiemọye kị baratụa wo pịrịwẹrị nanaye biribein inyenrinbụọ nanamịnị a o? (Isaiah 65:​21-25)

¹² Omịnị mị bọlọụ ma timi wo korumịnị ebi ukiemọyẹ kẹrị irorodaba, baratụa wo pịrịwẹrị mị tịẹkirimị nanaye biribein inyenrinbụọ nanamịnị. Bible bolou diidaba bụrụowei Isaiah gbaa wo pịrị amọ, alaghatimi Jehovah mị tịẹkirimị wo a bụụdọọnmịnị yebosẹ serisinmịnị. (Isaiah 65:​21-25 goo.) Omịnị ebi warịama ka timi inyenrinmịnị, ebi fịrịama kpọ nanamịnị, bá ebi fịyaị-ama kpọ fịmịnị. Wo mọ wo awọụbo mọ akpotu a sụọmụ mala kpọ fagha fa. (Isa. 32:​17, 18; Ezek. 34:25) Bei kikoromọ wẹrịemi yebosẹ mị bọlọuma paabeinmụ eti omịnị mọ nana wẹrịemị.

13. Omịnị te ifieama kị wo nana wẹrịemi ukiemọye kẹrị iroro agbẹị-emi a o?

¹³ Omịnị mị tịẹkiri kị wo nana wẹrịemi ukiemọye kẹrị iroro dẹịn agbẹị-emi. Tetuu a o? Tuubị omịnị “kunumọ ereinbo k’emi” anịduonị wosẹ bụụdọọn yeama nana wẹrịemi. (2Tim. 3:1) Jehovah ereinbosẹ baratụa wo pịrịmịnị, wo kekeremịnị, bá wo dọụ wẹrịemi yebo kpọ kọn wo pịrịmịnị. (Ps. 145:14) Bịsẹyọ bụọmọ kpọ, wo nana wẹrịemi ukiemọ yebị baratụa wo pịrịwẹrị kụrọ ifieama inemịnị. kaanghaba iné warị-bolou gbalịmụ fịrịmị, mị tịẹkirimị kụrọ ị́ pịrị kpọ paaemi. Anịa bịsẹ bara kị timi famịnị a? Benebene bịsẹ baragha! Jehovah iné dọụ wẹrịemi yebo kọn ị́ pịrịmụ bara gbaa wẹrịemi bá ayakpọ laadaba biin ebi yeama kọn ị́ pịrịmịnị. (Ps. 9:18; 72:​12-14) Kaanghaba, mị tịẹkirimị, dọọn iné angọ ma emi duonị ị́mịnị bolouịmbẹlegha. Ị́mịnị kọkọ bịsẹ bara kị timi famịnị a? Benebene bịsẹ baragha. Ayakpọ laadaba dọọn mọ fịị mọ ba timigha fa. (Rev. 21:​3, 4) Mị tịẹkiri kpọ mị ukiemọ yebị baratụa wo pịrịwẹrị, boloukọnmụ yọ dii a pọwẹị nanamịnị. Kịrịịgha ụgụlaa-pẹlẹ inyenrinbụọ, dọọn, anịghakpọ zịnị bụụdọọn yeama wo gbelemịnị kpọ omịnị laa pọwẹịtimi a paaemi. Tetuu a o? Tuubị mị tịẹkiri ma wo laamịnị “bụụdọọn yebosẹ timi alagha fa” anịa ayakpọ laadaba Jehovah mị bụụdọọn yebosẹ kọnsinmịnị.—2Cor. 4:​17, 18.

14. Omịnị tebara ka kị wo nana wẹrịemi ukiemọye mịẹ kụrọmọmịnị a o?

¹⁴ Ukiemọye baratụa wo pịrịwẹrị nanaye biribein inyenrinbụọ nanamịnị, anịa omịnị tebara ka kị wo nana wẹrịemi ukiemọye kụrọmọmịnị a o? Kịmị ebibara yọ ẹrịghaba eyeglass tụawẹrị bọlọụ ẹrịmịnị bara kị, omịnị kpọ ayakpọ ma timi wo korumịnị yebo ẹrị dọụmịnịsẹ yeama mịẹwẹrị wo ukiemọye mịẹ kụrọmọ agbẹị-emi. Sịlị bụụdọọnye wo laadaba, ayakpọ mị sịlị nana kịmị anịghakpọ nanagha kịmị ba timigha fa bara kẹrị iroro. Jehovah ogbomị iné wẹnị dọụmịnị fịrị naa iné bara laaghaba, ayakpọ ma timi wo korumịnị ịmbẹlẹ yebo ebi akị mị tịẹkiri ma emi fịribo dẹịn-emi bara kẹrị iroro, omịnị sei kpọ angọ a fa bara ka kị Jehovah karịtimi bẹseri bẹseri laamịnị. (1Tim. 6:19) Bei ebi yebo kẹrị iroromụ yọbị kụrọ wo pịrị kpọ paaemi, anịa omịnị angọtụa a kẹrị irorodaba, ifie bụọmịnịmị a kẹrị iroromụ yọbị bọụbọụ wo pịrịmịnị.

15. Christa paamọ yebị te ka kị ị́ tolumọ ma o?

¹⁵ Wo wẹrị Dennis taa Christa paamọye ditụa. Á gbaamị: “Ine nana wẹrịemi dọọnmị ifiebosẹ ị mịẹ angọ dẹịnmịnị, anịduonị ịmịnị biin ifeama wheelchair anịghakpọ bed ka timimịnị. Ereinbosẹ ịmịnị dọọn naamịnị. Ine dọọnzụọ oweibị gbaa ị pịrị amọ ine dọọn mị ebigha fa sei kị sei dẹịnmịnị. ‘Wó akị ye dimọ wẹrịemi bara mọ ịmịnị akị ye dimọ wẹrịemi bara mọ bẹbẹ paaemi.’ Ịmịnị ine nana wẹrịemi ukiemọye kị kẹrị iroromịnị, bịsẹ yọbị ine ịkịọụ mịẹ dọọ nanamịnị. Mị tịẹkirimị ịmịnị akpọ ma emi yebo inemịnị, anịa ayakpọ laadaba ịmịnị pọwẹị pọwẹị kị timi inyenrinmịnị!”

“WÓ ESIINMỊNỊ KỊMỊBO KẸNỊYE KPỌ ỤYAGHA FA”

16. Tetuu kị duonị David, “Jehovah esiinmịnị kịmịsẹ kẹnịye kpọ ụyagha fa” bara gbaa ma o?

¹⁶ Jehovah karịmịnị kịmị nanaye biribein inyenrinbụọ kị nana wẹrịemi kpọ, mọkpọ bụụdọọnye bolou a suomịnị. Ibe-daaowei David awọụbo zụayaị fịịmị. Yeama kpọ ámọ kọn wó tịbị gbaịnmọ, wó tarị wẹrịemi otu kpọ wo yẹrịpaamọ bá, ómịnị wó warị duo baịn seritimi biin kụraị-ama kị baịmị. Bụụdọọnyebo inemịni ifie kị ómịnị gbaa amọ: “Jehovah esiinmịnị kịmịsẹ kẹnịye kpọ ụyagha fa.” (Ps. 34:​9, 10) Tetuu kị duonị ómịnị bịsẹ bara gbaa a paaemi a o? Tuubị, Jehovah karịmịnị otubo bụụdọọnye a sụọ a fa bara gbaagha, anịa Jehovah bịsẹ tịẹkirimị ánị dọụ wẹrịemi yebo kọn á pịrịmịnị. (Ps. 145:16) Omịnị kpọ bụụdọọnye bolou emi ifie Jehovah wo kekeremụ eti omịnị mọ nana a paaemi. Bịsẹ yọmị baratụa wo pịrịwẹrị pọwẹị nanamịnị.

17. Tetuu kị duonị ị́mịnị nanaye biribein inyenrinbụọ nana dọụmịnị a o?

¹⁷ Ị́mịnị nanaye biribein inyenrinbụọ nana kị Jehovah mọ dọụmịnị. (Ps. 131:​1, 2) Anịduonị baratụa ị́ pịrịwẹrị bịsẹ inyenrinbụọ nanamụ yebo mịẹ. Tọrụkẹrị inyenrinbụọ nana, angọ-iyerimọ bá adụdụsẹ kọn ị́ laaemi fịrị wẹnị, bá wo nana wẹrịemi ukiemọye kpọ kẹrị iroro. Bịsẹ bara ị́mọ mịẹdaba, ị́mịnị kpọ laa gbaa a paaemi: “Ine nanadẹ yebo, ine a biribein-emi.”—Ps. 16:​5, 6.