EGBERITỊBỊ 33
DUMA 4 “Jehovah Is My Shepherd”
Jehovah Ị́ Tarị Wẹrịemi Eti Nana
“Ịmịnị ine kpẹkpẹrẹẹ tarị kọn ị́ kpụn akịdẹ.”—JER. 31:3.
TOLUMỌ DỌỤMỊNỊ YEBO
Mị egberitịbịmị, Jehovah wo tarịemi eti wo mọ nana agbẹị-emi tuu mọ bá bịsẹ eti mịẹ kụrọmọmụ bara kị wo mọ tolumọmịnị.
1. Ị́mịnị tetuu kị duonị angọ-dịẹpaamọ Jehovah pịrị ma o? (Foto kpọ dii.)
Ị́MỊNỊ iné angọ-dịẹpaamọ Jehovah pịrị ifiemị ukie wẹrịemi? Ị́mịnị Jehovah nimi bá ụ tarị wẹrịemi kị duonị bịsẹ iroro tọn angọ pịrịmị. Bịsẹ ifiemị ị́mịnị iné ụndụsẹ kọn wó dọụyọ kị mịẹmụ bara gbaa ụ pịrị bá ifiebosẹ iné adụdụsẹ, angọsẹ, ịkịọụsẹ bá kụrọsẹ kọn ụ tarịmụ bara gbaamị. (Mark 12:30) Bịsẹ ifie duobosẹ, ị́mịnị akị Jehovah a nana wẹrịemi tarịbị dụba bọlọụ bọlọụ ka múmịnị. Anịduonị, mị ereinbị, kịmị “ị́mịnị kọkọ Jehovah tarịemi a?” bara kọn ị́ biidaba, ị́mịnị tamanaịyọ kpọ fa bara, gbaa ụbọ pịrịmịnị, “ịmịnị ụ tarị akị zịnị kịmị anịghakpọ zịnị yesẹ dẹịn-emi!”
Ị́mịnị angọ dịẹ-paamọ wẹrị benibile ifiemị, ị́mịnị mọkpọ Jehovah tarị wẹrị baramị ukie wẹrịemi? (Gooyo 1 dii))
2-3. Omịnị te eti kị nana kị Jehovah mọ dọụ wẹrịemi a, bá mị egberitịbịbị omịnị te yeama kị tolumọmịnị a o? (Jeremiah 31:3)
2 Anịa, omịnị Jehovah tarị kụrọmọ wẹrịemi kpọ, Jehovah wo tarịgha bara wo mọ iroro kpọ paaemi. Kaanghaba omịnị Jehovah tọrụyọbị yegha paagha bara iroro kpọ paaemi, kẹnị bịnaraụ ánị zaụtimi ifiemị a paamọ yebo duonị kịmịotu a tarịgha bara ámọ iroromị, amịnị gbaamị: “Ịmịnị ine adụdụsẹ kọn Jehovah tarị wẹrịemi. Bịsẹ yọmị ịmịnị tamanaịyọ kpọ fa. Jehovah ị tarịgha bara kị ịmịnị mọ iroromịnị.” Anịa Jehovah kọkọ tebara ka kị ị́ diimịnị a o?
3 Jehovah ómịnị ị́ tarị wẹrịemi eti ị́mịnị mọ nana kị dọụmịnị. (Jeremiah 31:3 goo.) Gesii gbaamaba, Jehovah kị ị́ kpụn bo wó angọ mọ naịnmị. Ị́mịnị iné angọdịẹ-paamọ bá benibile ifiemị, Jehovah kẹnị yelaa ye kọn ị́ pịrịmị, anị wo kpẹkpẹrẹẹ tarịmị. Mị tarịmị kụrọ bá olomu fa k’emi. Mị tarị kị Jehovah dịnẹmọ wẹrị ụ karịmịnị peibolou nana otubosẹ kọn “yelaa yeama” dimọmịnị, ị́ kpọ sụọemi (Mal. 3:17, ftn.) Fịrịmọpaa-owei Paul, Jehovah kọkọ ụ tarịemi eti nanamị, Jehovah ị́mịnị kpọ Paul nana eti nana kị dọụmịnị. Paul Jehovah ụ tarị wẹrịemi eti nana duonị, ómịnị gẹẹmị: “Ịmịnị nimi wẹrịemi fịị, ụndụ, angel-otu, daabụọ-ama, bei tịẹkiri a emi yeama, bọlọụ ma bomịnị yeama, kụrọama, owou yọama, iyeri yọama anịghakpọ zịnị tẹmẹ wẹrịemi yesẹ laa Jehovah akị ine a nana wẹrịemi tarị kọnsingha fa.” (Rom. 8:38, 39) Mị egberitịbịbị, omịnị tetuu kị duonị Jehovah wo tarịemi etimị mịẹ kụrọmọ agbẹị-emi a o, bá baratụa wo pịrịwẹrị bịsẹ eti mịẹ kụrọmọmụ yeama wo mọ tolumọmịnị.
TETUU KỊ DUONỊ JEHOVAH WO TARỊ WẸRỊEMI ETI WO MỌ NANA AGBẸỊ-EMI A O
4. Omịnị tebara ka kị Satan pidẹ yebo dẹịnmọmịnị a o?
4 Omịnị Jehovah wo tarị wẹrịemi eti nanadaba, ba Satan “pidẹ yebo” a koro sụọgha fa. (Eph. 6:11) Satan wó kụrọyọsẹ mịẹdá omịnị ba Jehovah karị kụmọ bara kị dọụmịnị. Satan Jehovah wo tarịgha bara kị gbaamịnị, anịa anị ekpedẹịn egberi, ómịnị bịsẹ ekpe egberi kị kọn wo pidẹmịnị. Ukie Satan ifiebosẹ wo mịẹ Jehovah a barasinmụ fomuun-ama kị dọụmịnị. Anịduonị kaanghaba omịnị paabụọdẹ yeama anịghakpọ tịẹkiri ma wo paamọmịnị yeama bá bọlọụ ma paa a paaemi yeama kẹrị iroro wẹrị dẹịnsụọmịnị ifie kị ọ́mịnị sụọ bomịnị. (Prov. 24:10) Adaka zụọ kịmị fa nama kẹrị akịmịnị bara kị Satan kpọ wo kẹrịakị dọụmịnị. Anịduonị, omịnị dẹịnsụọmịnị ifie kị ómịnị mọ dii wẹrị sụọ bomịnị. Anịa, omịnị Jehovah kọkọ wo tarị wẹrịemi eti mịẹ kụrọmọ dẹịndaba, bịsẹ yọmị baratụa wo pịrịwẹrị “tịẹ kụrọtimi” Satan pidẹ yebo a koro sụọgha fa.—1Pet. 5:8, 9; Jas. 4:7.
5. Jehovah wo tarị wẹrịemi yọ nimi angọ pịrịmụ yọbị tetuu kị duonị yelaa-emi a o?
5 Jehovah wo tarị wẹrịemi eti wo mọ nanadaba, baratụa wo pịrịwẹrị ụ mọ mọ́ naịn-dẹịnmịnị. Tetuu kị duonị omịnị bịsẹ bara gbaa a paaemi a o. Jehovah kọn wo tẹmẹ wẹrịemi baramị kịmịotu wo tarị kị wo mọ dọụmịnị bá omịnị kpọ kịmịotu tarị dịsẹ-emi. Anịduonị kịmị wo tarị daba omịnị kpọ ụbọ tarịmịnị. Bịsẹ bara kị duonị Jehovah wo tarị wẹrịemi bara wo mọ ẹrịdaba, bịsẹ yọmị wo mịẹwẹrị omịnị kpọ waị ụ tarịmịnị. (1John 4:19) Wo akị Jehovah a nana wẹrịemi tarịbị kụrọdẹịn-mịnịmị, ómịnị kpọ wo tarị kụrọmọ-dẹịnmịnị. Bible mị gaan kị gbaa wo pịrịmị: “Ị́mịnị Ọkpọnanaowei mọ naịndaba, ómịnị kpọ ị́mọ mọ́ naịnmịnị.” (Jas. 4:8) Anịa, omịnị tebara ka kị, Jehovah wo tarị wẹrịemi eti mịẹ kụrọmọ-dẹịnmịnị a o?
TEEKI BARATỤA WO PỊRỊWẸRỊ JEHOVAH WO TARỊ WẸRỊEMI ETI NANAMỊNỊ A O?
6. Jehovah ị́ tarịgha bara ị́mọ iroromịnịaba, ị́mịnị teeki kọn Jehovah bara duo bii agbẹị-emi a o?
6 Pẹlẹgha bara tẹẹbịbị mịẹ bá gbẹsị iné dọụmịnị yebo gbaa. (Luke 18:1; Rom. 12:12) Barịị barịị tẹẹ Jehovah yarịdá, ómịnị baratụa ị́ pịrị ị́mịnị wó akị ị́ dimọ wẹrịemi bara kọn angọ dii. Anịa, wo adụdụmị ifiemọsẹ wo seimọmịnị, anịduonị Jehovah kọkọ wo tarị wẹrịemi yọ kẹrịakịmụ yọbị kụrọ wo pịrị kpọ paaemi. Bịsẹ bara kị paa kpọ, ukie Jehovah dụba iné adụdụ dẹịn-emi. (1John 3:19, 20) Ómịnị ị́ nimi akị ị́ kọn iné angọ nimi wẹrịemi bara dẹịn-emi; ómịnị ba ị́mịnị iné bẹtịbị angọ ma ẹrịgha yebo kpọ ẹrịmịnị. (1Sam. 16:7; 2Chron. 6:30) Anịduonị, iné adụdụ ma bụụdọọnmịnị yebo “gbaa” ụ pịrịmụ yọbị suusụọ kụmọ, Jehovah baratụa ị́ pịrịwẹrị, ómịnị kọkọ ị́ tarịemi eti nanamụ yọbị kọn tẹẹbịbị a tụa. (Ps. 62:8) Bịsẹ bara ị́mọ tẹẹ sindaba, ị́mịnị mọkpọ zụa yeama mịẹmịnị, wo wẹrị bịsẹ yebo kẹrị ẹrẹtei.
7-8. Psalm fun mị tebara ka kị Jehovah wo tarị wẹrịemi bara mịẹgaan ma o?
7 Eti akị Jehovah gbaadẹ egberibo atụa. Ómịnị kụrọ akị Bible gẹẹ otubo pịrịwẹrị, ámịnị gesii bara wó emi bara gẹẹmị. Wo wẹrị psalm fun gẹẹ-owei David, Jehovah gbelemọ egberi gbaa bara ditụa. “Jehovah pọwẹịgha otubo mọ naịn-emi; ómịnị suusụọdẹ otubo zụọmịnị” bara ụ mọ gbaamị (Ps. 34:18, ftn.) Anịduonị, ị́mịnị bolouịmbẹlẹgha ifiesẹ, iné bẹtịbị kị emi bara iroro kpọ paaemi. Anịa Jehovah bịsẹ ifiebo ị́mịnị wó baratụa-pịrịye dọụemi bara nimi wẹrịemi, anịduonị ómịnị ị́mọ mọ́ naịn-timimụ bara gbaa wẹrịemi. David mọkpọ zịnị Bible yọ gbaa Jehovah pịrịmị: “Ine youbeniyaịbo kọn iné nama apiran kọn mịẹ wẹrịemi ololo ma tụa.” (Ps. 56:8) Jehovah ị́mịnị bolouịmbẹlẹgha ifiebo ẹrịmịnị. Anịa ómịnị ị́ tarịemi bá iné bụụdọọn yebosẹ ẹrịmịnị. Ogbo abadị duo wẹnịmịnị kịmị sibe wẹrịemi beni ololobị yelaa ụ pịrịemi bara kị, iné youbeniyaịbo kpọ yelaa Jehovah pịrịemi, Jehovah iné youmịnị ifiebosẹ ẹrịmịnị. Psalm 139:3, gbaa amọ: “[Jehovah] ị́mịnị ine wẹnịmịnị ụwọụbosẹ nimi wẹrịemi.” Anịduonị Jehovah ị́ paamọmịnị yebosẹ ẹrị wẹrịemi, ómịnị tọrụtụa iné ebi inyenrinbụọbo kị diimịnị. (Heb. 6:10) Tetuu a o? Tuubị ómịnị kọkọ ị́mịnị angọtụa wẹrị wó dọụyọ mịẹ dọụmịnị yọbị ẹrịmịnị.a
8 Jehovah mị Bible yọbo duo gbaa wo pịrịmịnị egberisẹ: “Ịmịnị ị́ tarị wẹrịemi bá tọrụtụa ị́ diimịnị bara nimi.” Anịa wo tolumọ bụọmodẹ baramị, Satan Jehovah ị́ tarịgha bara kị gbaamịnị anị kọkọ eekpe egberi. Anịduonị zụa ifieama Jehovah ba ị́ tarịgha bara ị́mọ iroromịnịaba, angọ bii, ‘ịmịnị te ụbọ gbaa egberị kị peimịnị a o—“Satan ekpe daụ kị peimịnị a” anịghakpọ “Jehovah gesii Ọkpọnanaowei gbaa egberi kị peimịnị a o”?’—John 8:44; Ps. 31:5.
9. Jehovah te kụrọmọye ka kị ụ tarị wẹrịemi otubo pịrị wẹrịemi a o? (Exodus 20:5, 6)
9 Jehovah kịmị ụ tarịdaba, wó mịẹmịnị bara kẹrị iroro. Wẹrị Jehovah gbaa akị Moses mọ Isreal otubo mọ pịrị yebị ditụa. (Exodus 20:5, 6 goo.) Jehovah gbaa amọ, kịmị ụ tarịdaba ómịnị kpọ pẹlẹgha bara kpẹkpẹrẹẹ tarị mịẹ bịsẹ ụbọ dịamịnị. Bei gbaa egberibo kọkọ kụrọmọye ka paa wo pịrịemi, Jehovah karịmịnị otubo ụ tarịdaba ómịnị kpọ waị á tarịmịnị. (Neh. 1:5) Anịduonị zụa ifieama Jehovah ị́ tarị wẹrịemi yọmị ị́ ma tamanaịyọ nanamịnịaba, iné angọ bii, ‘Ịmịnị Jehovah tarị wẹrịemi a?’ Mị ye kẹrị iroro dii: Ị́mịnị kọkọ Jehovah tarị wẹrị angọtụa wó dọụyọ mịẹmịnị ifiesẹ, ómịnị kpọ ị́ tarịemi eti nana. (Dan. 9:4; 1Cor. 8:3) Gbaamịnị barasẹ, ị́mịnị Jehovah tarị wẹrịemi yọmị tamanaịyọ nanaghaba, Jehovah kpọ ị́ tarị wẹrịemi yọmị tamanaịyọ nana kụmọ. Jehovah ị́ tarị wẹrịemi bá benebene iné a barasingha fa bara nimi.
10-11. Jehovah ị́mịnị tebara ka kị parụbụọmọ ịkịan dimọ kị dọụ wẹrịemi a o? (Galatians 2:20)
10 Parụ ịkịanbị kẹrị iroro. Jehovah akị kịmịawọụ pịrịdẹ dịẹpịrị-yebosẹ Jesus Christ kụn ịkịan kị yelaa-dẹịn emi. (John 3:16) Anịa Jehovah mị dịẹpịrịyemị kọn iné angọzii kpọ pịrịmị. Wẹrị fịrịmọpaa-owei Paul paamọ yebị wo mọ dịtụa. Paul kụrọ sei-ama kị mịẹ dẹkị bo Christtuuduo-owei a paamị, bịsẹyọ kị bụọmọ kpọ sei bolou ka ụ kpọ ziimị. (Rom. 7:24, 25; 1Tim. 1:12-14) Anịa bịsẹ bara kị gbaa kpọ, Paul, Jesus kụn ịkịanbị akị Jehovah duo bo ụ laaemi dịẹpịrịye kị dimọmị. (Galatians 2:20 goo.) Ukie, Jehovah kị Paul dịnẹmọ wẹrị mị egberibo gẹẹmị. Bá Bible ma emi yebosẹ kọn wo tolumọmụ kị duonị gẹẹ wẹrịemi. (Rom. 15:4) Ị́mịnị parụbụọmọ ịkịanmị wó bara kị duo bo wo laaemi dịẹpịrịye dimọ kị Jehovah mọ dọụmịnị, Paul gbaa egberibo kpọ bịsẹyọ kị mịẹdịa wẹrịemi. Ị́mịnị kọkọ bịsẹ bara kọn parụ ịkịan dimọdaba, Jehovah kọkọ ị́ tarị wẹrịemi eti mịẹ kụrọmọ dẹịnmịnị.
11 Jehovah, Jesus fịrịmọ mị kiri ma bo fịị wo pịrị yọmị wo ụ kule kamị. Anịa Jesus mị kiri ma bo zịnị tuu mọkpọ emi, anị bo Ọkpọnanaowei gesii emi bara gbaa kịmịotu pịrịmụ yọbị. (John 18:37) Jehovah kọn wó awọụbo dimọ wẹrịemi bara kpọ bịsẹ gesii bolou ma sụọemi.
JESUS TEBARA KA BARATỤA WO PỊRỊWẸRỊ JEHOVAH WO TARỊ WẸRỊEMI ETI NANA MA O
12. Jesus akị Jehovah emi bara gbaa bara didaba, tetuu kị duonị omịnị eti akị Jesus gbaa egberi ma tụa agbẹị-emi a o?
12 Jesus mị kiriogbo ma timi ifiemị, Jehovah emi bara mịẹgaan wo pịrịmị. (Luke 10:22) Jesus agọnọ a timi Jehovah mọ inyenrintimi alaadẹ kị kiriogbo ma bo duonị, ómịnị akị Jehovah tọnmọ wẹrịemi bara kị kịrịị dẹịn-emi. Ómịnị agọnọ a timi Jehovah kọn ye mịẹmịnị barabo ẹrịdẹ. (Col. 1:15) Jehovah akị wó peibolou nana wẹrịemi odubo-otubo tarị kụrọmọ wẹrịemi bara kpọ Jesus mọ nimi wẹrịemi. Jesus tebara ka kị baratụa zịnịotu pịrịwẹrị Jehovah á tarị wẹrịemi eti nana ma o?
13. Jesus omịnị tebara ka kị Jehovah dimọ kị dọụ wẹrịemi a o?
13 Jesus, Jehovah kọn wo dimọ wẹrịemi baramị, omịnị mọ nimi kị dọụmịnị. Anịduonị Matthew, Mark, Luke bá John funbo, Jesus, Jehovah akị 160 dẹịn-emi ifie “Daụ” kị tịịn wẹrịemi. Bá ómịnị wó tuuduo-otubo mọ ẹrẹtimi ifiemị, ómịnị Jehovah akị “á Daụ” anịghakpọ “ánị agọnọ Daụ” kị tịịnmị (Matt. 5:16; 6:26) Matthew 5:16 bọọ emi study note gbaa amọ: “Bọlọụ ifiemị Ọkpọnanaowei karịtimi otubo opu kile-ama ka kị Jehovah tịịn timimị, gbaamaba ‘Kụrọ nanadẹịn owei,’ ‘Seridẹịn owei,’ bá ‘Dụbadẹịn ye tẹmẹowei,’ anịa Jesus’ biin ifieama, ‘Daụ’ ka kị Ọkpọnanaowei tịịnmị.” Bịsẹ yọmị Ọkpọnanaowei akị ụ karịmịnị otubo mọ naịn-emi yọkị mịẹdịamịnị—Daụ ụbọ akị wó awọụbo tarị wẹrịemi bara kị, Jehovah kpọ wo tarị kụrọmọ wẹrịemi bara kị Jesus mọ kọn wo tolumọmịnị. Wo wẹrị Jesus maa ifie Jehovah kọn “Daụ” tịịn ifieama ditụa
14. Jesus tebara ka kị wosẹ Jehovah tọrụyọ ma yelaa-emi bara mịẹgaan ma o? (Matthew 10:29-31) (Foto kpọ dii.)
14 Wo wẹrị bọlọụ, Jesus Matthew 10:29-31 gbaa egberi dii. (goo.) Sparrow tịịnmịnị ofonimị zaụ-emi bá Jehovah kpọ karịgha. Mọabịkpọ, wo agọnọ Daụ kẹnị sparrow kị kiri a koro kpọ nimi wẹrịemi. Anịa bịsẹ bara kị paaemiaba omịnị peibolou nana bara kọn ụ karịmịnị otubo ómịnị mọ tarịgha fa! Bịsẹyọ bụọmọ kpọ, Bible gbaa amọ ómịnị “wo tịbị ma emi dumubo kienbịrị kpọ nimi wẹrịemi,” bịsẹyọ gbelemọ study notebị verse 30 gbaa amọ: “Jehovah mị kala yebo kọn wo angọ ma nimi wẹrịemiaba, ómịnị kọkọ ụ karịmịnị otubosẹ a dịsẹ nana wẹrịemi.” Gbẹsịmị, Jesus wosẹ wo agọnọ Daụ tọrụyọ ma yelaa-emi bara nimi kị dọụmịnị.
Kẹnị sparrow ofoni kị kiri a koro kpọ Jehovah nimi wẹrịemi. Anịduonị Jehovah peibolou nana wẹrị ụ karịmịnị otubo tarịgha fa bara kị ị́mọ tọnmị! (Gooyọ 14 dii))
15. Jesus John 6:44 ma gbaa egberimị, wo agọnọ Daụ gbelemọ yọbị te ka kị wo tolumọmịnị a o?
15 Wo wẹrị Jesus, Jehovah akị “Daụ” tịịn mamụ karamọ mịẹdịaye ditụa (John 6:44 goo.) Ị́mịnị ụ karị dọụmịnị bara ụ mọ ẹrị kị duonị, iné agọnọ Daụ mị ị́ kpụn gesii ma bomị. (Acts 13:48) John 6:44 study note didaba, Jesus, Jeremiah gbaa egberibo kị diwẹrị gbaa bara kị paaemi, bịsẹ ye kị wo egberitịbị Bible yọ ma emi: “Ịmịnị ine kpẹkpẹrẹẹ tarị kọn ị́ kpụn akịdẹ [anịghakpọ, ịmịnị ifiebosẹ kpẹkperẹẹ tarị mịe ị́ dịamịnị].” (Jer. 31:3; ftn.; compare Hosea 11:4.) Gbaamịnị barasẹ, wo tarị nana agọnọ Daụmị ifiebosẹ iné angọ ma emi ebi inyenrinbụọ kị ditụamịnị, ị́mịnị ẹrịgha yaịbo kpọ ómịnị mọ ẹrị wẹrịemi.
16. (a) Jesus, te ka kị wo tolumọdẹ a, bá omịnị tetuu kị duonị ụ pei agbẹị-emi a o? (b) Teeki baratụa ị́ pịrịwẹrị Jehovah kị ebidẹịn Daụ bara nimi ma o? (“Wosẹ Dọụ Wẹrịemi Daụmị.”) Ekpedi dii
16 Jesus, Jehovah kọn wo Daụ tịịn yọmị, wó gbaamịnị barasẹ: “Jehovah ị Daụ bẹtịbịgha; Jehovah á kpọ Daụ. Anịa ịmịnị gbaa á pịrịmịnị, ómịnị olomu bara ka kị á tarịemi bá tọrụtụa ánị kẹnị ụbọ kẹnị ụbọ diimịnị.” Anịduonị zụa ifieama Jehovah ị́ tarịgha bara ị́mọ irorodaba, angọ bii, ‘Jesus kị Daụ nimi dẹịn-emi bá ifiebosẹ gesii gbaamịnị owei anịduonị, ịmịnị eti akị wó atụa agbẹịgha a?’—1Pet. 2:22.
INÉ ETI MỊẸ KỤRỌMỌ BỌLỌỤ AMÚ
17. Tetuu kị duonị omịnị Jehovah wo tarị wẹrịemi eti mị mịẹ kụrọmọ dẹịn agbẹị-emi a o?
17 Omịnị ifiebosẹ Jehovah wo tarị wẹrịemi eti mịẹ kụrọmọ agbẹị-emi. Wo tolumọ naadẹ baramị, wo egiren owei Satan, wó kụrọyọsẹ mịẹwẹrị wo Jehovah karịmịnị yọ tịẹmọ dọụmịnị. Ómịnị wo mịẹwẹrị Jehovah ba wo tarịgha bara iroro kị dọụmịnị. Anịa omịnị Satan bụọmọ wẹrị wo dẹịnmọ kụmọ!—Job 27:5.
18. Ị́mịnị tebara ka kị Jehovah ị́ tarị wẹrịemi eti mị mịẹkụrọmọ a paaemi a o?
18 Jehovah kọkọ ị́ tarị wẹrịemi eti mị ị́mọ mịẹ kụrọmọ dẹịn dọụmịnịsẹ, ifiebosẹ ómịnị baratụa ị́ pịrịwẹrị wó akị ị́ diwẹrịemi bara kọn iné angọ dimọ bara tẹẹ. Bible gẹẹ otubo akị Jehovah olomu tarị gbaa wẹrịemi bara kẹrị iroro. Jehovah kịmị ụ tarịdaba wó mịẹmịnị bara kpọ kẹrị iroro; ómịnị benebene ụ tarị wẹrịemi kịmị golugha. Bịsẹyọ bụọmọ kpọ Jehovah parụbụọmọ ịkịan kọn iné angọzii kpọ pịrị wẹrịemi bara kẹrị iroro. Bá eti akị Jesus, Jehovah kị iné agọnọ Daụ gbaayọ ma tụa. Bịsẹ bara ị́mọ mịẹdaba, kịmị “Jehovah kọkọ ị́ tarị wẹrịemi bara?” kọn ị́ biidaba, ị́mịnị tamanaịyọ fa bara ụbọ parụ a paaemi: “Jehovah ị tarị wẹrịemi! Ịmịnị kpọ ereinbosẹ ine kụrọyọ mịẹwẹrị ụ tarị wẹrịemi bara mịẹdịamịnị!”
DUMA 154 Unfailing Love