Apocalipsis
16 Ket nangngegko ti maysa a natbag a timek+ manipud iti santuario a kunana iti pito nga anghel: “Mapankayo ket ibuyatyo iti daga ti pito a malukong ti unget+ ti Dios.”
2 Ket ti umuna+ napan ket imbuyatna ti malukongna iti daga.+ Ket ti nasakit ken makapapatay a derder+ dimteng kadagidi tattao nga addaan iti marka ti atap nga animal+ ken nagdaydayaw iti ladawanna.+
3 Ket ti maikadua+ imbuyatna ti malukongna iti baybay.+ Ket nagbalin dayta a dara+ a kas iti dara ti natay a tao, ket tunggal sibibiag a kararua natay, wen, ti bambanag nga adda iti baybay.+
4 Ket ti maikatlo+ imbuyatna ti malukongna kadagiti karayan+ ken kadagiti ubbog ti dandanum. Ket nagbalinda a dara.+ 5 Ket nangngegko ti anghel nga adda iti rabaw dagiti danum a kunana: “Sika, Daydiay adda ita ken adda idi,+ Daydiay nasungdo,+ nalintegka, agsipud ta impaaymo dagitoy a pangngeddeng,+ 6 agsipud ta imbuyatda ti dara dagiti sasanto ken dagiti mammadto,+ ket nangtedka kadakuada iti dara+ nga inumen. Maikarida iti dayta.”+ 7 Ket nangngegko ti altar a kunana: “Wen, Jehova a Dios, ti Mannakabalin-amin,+ napudno ken nalinteg dagiti hudisial a pangngeddengmo.”+
8 Ket ti maikapat+ imbuyatna ti malukongna iti init; ket iti init naipalubos a kessetenna+ dagiti tattao babaen iti apuy. 9 Ket nakset dagiti tattao babaen iti nakaro a pudot, ngem tinabbaawanda ti nagan+ ti Dios, nga addaan iti autoridad+ kadagitoy a pannaplit, ket saanda a nagbabawi tapno isu idayawda.+
10 Ket ti maikalima imbuyatna ti malukongna iti trono ti atap nga animal.+ Ket nagsipnget ti pagarianna,+ ket rinugianda a ngaretngeten dagiti dilada gapu iti rigatda, 11 ngem tinabbaawanda+ ti Dios ti langit gapu kadagiti rigatda ken gapu kadagiti derderda, ket saanda a nagbabawyan dagiti aramidda.
12 Ket ti maikanem+ imbuyatna ti malukongna iti dakkel a karayan ti Eufrates,+ ket nagmaga ti danumna,+ tapno ti dalan maisagana koma nga agpaay iti ar-ari+ manipud iti leleggakan ti init.
13 Ket nakakitaak iti tallo a narugit a naipaltiing nga ebkas+ nga aglanglanga a kas tuktukak+ a rumrummuar iti ngiwat ti dragon+ ken iti ngiwat ti atap nga animal+ ken iti ngiwat ti ulbod a mammadto.+ 14 Dagita ket, iti kinapudnona, ebkas nga impaltiing+ dagiti sairo ket agaramidda kadagiti pagilasinan,+ ket mapanda iti ar-ari+ iti intero a mapagnaedan a daga,+ tapno urnongenda ida a sangsangkamaysa iti gubat+ ti naindaklan nga aldaw+ ti Dios a Mannakabalin-amin.+
15 “Adtoy! Umayak a kas maysa a mannanakaw.+ Naragsak daydiay agtalinaed a siririing+ ket aywananna dagiti makinruar a kawesna, tapno saan koma a magna a lamolamo ket dagiti tattao makitada ti ibainna.”+
16 Ket inurnongda ida a sangsangkamaysa iti disso nga iti Hebreo maaw-awagan iti Har–Magedon.+
17 Ket ti maikapito imbuyatna ti malukongna iti angin.+ Gapu iti daytoy maysa a natbag a timek+ ti rimmuar iti santuario manipud iti trono, a kunkunana: “Napasamaken!” 18 Ket nagadda dagiti kimat ken dagiti timek ken dagiti gurruod, ket napasamak ti dakkel a ginggined+ a ti kasta ket saan pay a napasamak nanipud idi adda dagiti tattao iti daga,+ nakasaksaknap unay a ginggined,+ dakkel unay. 19 Ket ti dakkel a siudad+ nasinasina iti tallo a paset, ket narba dagiti siudad ti nasnasion; ket ti Babilonia a Dakkel+ nalagip iti imatang ti Dios, tapno ited kenkuana ti kopa ti arak ti kinaunget ti pungtotna.+ 20 Kasta met, nagtalaw ti tunggal isla, ket saan a nasarakan dagiti bantay.+ 21 Ket ti dakkel nga uraro+ a ti tunggal bato agarup kadagsen ti maysa a talento nagtinnag kadagiti tattao manipud langit, ket dagiti tattao tinabbaawanda+ ti Dios gapu iti pannaplit ti uraro,+ agsipud ta ti pannaplitna di gagangay ti kadakkelna.