Manipud iti Managbasatayo

Pannakapukaw iti Maysa nga Ubing

Kalpasan ti pannakabasak kadagiti artikulo maipapan iti pannakapukaw iti maysa nga ubing, kayatko ti mangkomendar kadakayo kadagiti kasta a napudno unay nga artikulo. (Agosto 8, 1987) Ti asawak ken siak makipagriknakami ti isuamin nga imbagayo gapu ta di pay nabayag nagsagabakami iti pannakapukaw iti lima ket kagudua ti tawenna nga anakmi a lalaki gapu iti atake ti puso. Mariknami ti pannakabasol, pungtot, ken dadduma pay, nga inlistayo iti artikuloyo. Kasta met, napasaranmi dagiti amin nga “Ebkas a Saan a Kanayon a Mangliwliwa” ken ad-adu pay malaksid iti dayta. Inanamaenmi unay ti baro a lubong. Intono laeng maarakupkon ti bassit nga anakko a lalaki a pudno a mapukawton ti panagladingit. Maminsan manen, agyamanak iti kasta a naayat ken mannakaawat a serie dagiti artikulo, a siguradokami nga adunto, kas kadatayo, ti makabael a manginaig iti kasasaadda ken matulongan.

K. I., England

Diak masarita no kasano ti panangapresiarko kadagiti artikuloyo maipapan iti panangsango iti pannakapukaw iti maysa nga anak. Ti anakmi a lalaki nagbekkel idi napalabas nga Agosto. Ti impormasionyo ti nangiparikna kaniak a gagangay laeng ti riknak. Diak ammo nga adu a tattao ti nakarikna met iti riknak. Ngem no kasano a kasapulak dayta nga impormasion iti nadumaduma a tukad iti sagsagabaen ti maysa a tao kalpasan iti ipupusay iti maysa nga anak, diak maawatan no apay a ti panagbekkel ket mainaig iti gagangay nga ipapatay, kas iti adda iti panid 15. Awan ti ipapatay a gagangay, ammok dayta, ngem ti panagbekkel nakalkaldaang unay ta awan ti namnama iti panagungar sadiay. Diak ammo no makitakto pay ti anakko a lalaki.

J. D., United States

Ti salaysay maipapan ken ni George, isu a nagbekkel, ket nairaman, saan a tapno maipamatmat a ti panagbekkel ket gagangay nga ipapatay, ngem tapno ipakitana no kasano a ti ama ni George nabaelanna ti nagballigi iti didigra babaen iti panangliwliwa ti dadduma a kasuratan. Wen, ti panagbekkel serioso unay ken nakalkaldaang, ngem iti tunggal kaso ti panangipanamnama a ni Jehova ken ti Anakna, ni Jesu-Kristo aramidennanto ti umiso, ket kanayon nga adda. Ammo ni Jehova dagiti amin a kasasaad a nairaman, ti kadagsen ti rebbengen, ken ti posibilidad iti panagbabawi. Makapagtalektayo a naan-anay kenkuana nga ipaayna ti kinamanangngaasina a naan-anay a maitunos iti pagayatanna.​—ED.

Panangpapatay iti Sabali

Agsuratak kadakayo maipapan iti nasao iti artikulo a “Sangalubongan a Talna​—Kasano ken Kaano?” (Hunio 8, 1987) Ti sao ket maipapan kadagiti Saksi ni Jehova: “Nagbalindan a natalna a tattao, ket iti aniaman a kasasaad saandanto a papatayen ti padada a tao.” Daytoy kadi kaipapananna a ditay mabalin nga usaren ti makapapatay a puersa a mangsalaknib iti bagbagitayo wenno iti pamiliatayo?

H. N., United States

Ti ebkas a ‘papatayen ti padada a tao’ ipamatmatna ti sipapakinakem a panangikagumaan a mangpapatay iti sabali. Ti pudno a Kristiano dina aramiden daytoy. No maatake ket dina malisian ti mangatake kenkuana a determinado a mangdangran wenno mangpapatay kenkuana, ti maysa a Kristiano mabalin a pagtalawenna dayta babaen iti panangsanggana iti panangdangran wenno mabalin pay a tiruenna iti panangsalaknibna, a nalabit usarenna ti aniaman nga adda kenkuana a mangsalaknib kenkuana ken kadagiti dadduma. Ngem dagiti tigtignayna ket maipaay laeng a pangsalaknib. Saanna a padasen a papatayen wenno dusaen ti manangatakena, padasenna laeng a lapdan ti nakaro a pannakaatakena. No ti nangatake nakagun-od iti makapapatay a tiro, dayta ket aksidente, saan nga inggagara.​—ED.