Panangmatmat iti Lubong

Managbutbuteng a Siruhano

Dagiti siruhano sangsanguenda ti makariro a parikut maipapan iti panangopera kadagiti pasiente nga adaan iti positibo a resulta iti panangsubok iti AIDS. “Iti daytoy a tiempo, ti paglinteganmi isut’ di mangopera,” kuna ni Dr. W. Dudley Johnson, maysa a nalatak a siruhano iti puso. “Tamtamingenmi ti maysa a pamay-an a nakaro ti pannakainaigna iti dara. Adda dara iti amin a lugar. Adda naan-anay a peggad manipud iti dagum.” Ti kumarkaro a bilang dagiti siruhano ti addaan iti kasta met laeng a panagamak. Iti maysa a surbey, nasurok a 90 porsiento kadagiti simmungbat a siruhano ti umanamong iti ar-aramiden ni Dr. Johnson a saan a mangawat kadagita a pasiente. “Kinapudnona,” kuna ti magasin a Newsweek, “awan uray iti kadaanan a sapata a Hippocratic wenno ti moderno a kodigo iti medikal a kababalin ti mangsapul iti maysa a doktor a mangagas iti maysa a pasiente no dina kayat nga aramiden ti kasta.” Ngem inamin ni Dr. Johnson nga awan pay ti naammuanna a doktor a nakaala iti AIDS manipud iti maysa a pasiente. “Tarigagayak a taginayonen a kasta,” kinunana.

Nabautisaran Manen a Klero

Dua a Protestante a klero, ti Luterano a ni Reinhart Weber ken Klaus Hoffmann iti United Church, ti “nabautisaran manen a ‘maitunos iti Biblia’” idiay Lensahn, Pederal a Republika ti Alemania, kuna ti Ecumenical Press Service. Ti panangbautisar iti maladaga, kuna ti retirado a pastor a ni Weber, ket “saan a maitunos iti Biblia.” Ni Hoffmann dinawatna pay kadagiti papangulo iti Evangelical Church a “sardengandan ti panangbautisar kadagiti ubbing unay,” kuna ti report. Ti tignay? Isut’ nasuspender manipud kadagiti ar-aramidna iti kinapastor.

Agmauyong a Polar Bears

Dagiti maikulong a polar bears agbalinda nga “agmauyong,” kuna ti The Sunday Times iti Londres. Nasurok a kagudua iti 15 a polar bears a maay-aywanan kadagiti zoo a Briton ti naapektaran, kunaenna. Ti panangaywan kadagita nga aktibo ken managusiuso nga an-animal kadagiti nakulong a kasasaad iti zoo ti kasla mamataud iti pannakariro ti isip kadagiti uso, isu a mapaneknekan kadagiti awan ti kapapay-anna a pannagnada ken panagibar-ibarda a mapakuyogan, no dadduma, iti panangpawad ti bagbagida met laeng.

Agpada nga Agsagaba ti Agasawa

Dagiti lallaki nga addaan iti parparikut iti panagasawa nalaklaka nga agsakitda ngem dagidiay a naragsak ti panagasawada, kuna dagiti managsirarak a da Janice Kiecolt-Glaser ken ti asawana, ni Ronald Glaser, iti Ohio State University. Nupay no dagiti napalabas a panagadal impakitana a pudno daytoy kadagiti di naragsak ti panagassawada a babbai, iti nabiit pay ti kasaknap ti panagkapuy ti sistema ti pananglaban ti bagi iti sakit kadagiti lallaki ket di pay naammuan. Nupay kasta, dagiti panangsukimat iti dara kadagiti lallaki nga addaan iti nariribuk a panagasawa impakitada a nakapkapuy ti pananglabanda kadagiti dua a gagangay nga impeksion ti virus iti herpes. Mainayon iti dayta, maysa a panagadal nga inaramid ti managsirarak a ni Christopher Coe, iti University of Wisconsin, insingasingna a ti “emosional nga impluensia iti pisikal a salun-at mabalin nga agtultuloy iti napaut a tiempo kalpasan a marisot ti emosional a parikut,” kuna ti New York Post.

Manangpapatay a Panagaburido

Idi 1987 idiay Japan, dagiti kellaat nga ipapatay dagiti kangangatuan nga ehekutibo iti negosio nga addan kadagiti edad a 40’s, 50’s, ken 60’s ti ngimmato iti mamitlo a daras ngem iti isu met laeng a kawatiwat ti tiempo iti napalabas a tawen. Ti ipapatayda ti maipabiang iti “di kabaelan a panunoten a panagaburido” a maipakuyog iti saad dagiti kangangatuan nga ehekutibo itatta, kuna ti pagiwarnak a Mainichi Shimbun iti Tokyo. Nupay no amin dagitoy ti makuna nga addaan iti nabileg a panagtalek iti salun-atda, ti narungsot a kasasaad iti negosio a pinakaro ti implasion ket nakatulong a nangipaay iti makapaaburido a panagbiagda. Tapno masumbra dayta a pagturongan, ti Japan’s Federation of Employers Association nangipaulog kadagiti walo a paglintegan a manglapped iti panagaburido. Dagiti paglintegan iramanna ti: Panangliklik kadagiti narigat nga eskediol, panagehersisio iti nasurok a 30 minutos iti inaldaw, ken panagkatawa.