Manipud Managbasatayo

Haiku Agyamanak iti artikulo nga “Iyebkas Dayta iti 17 a Selaba.” (Enero 8, 1989) Siam ti tawenko, ket ad-adalenmi iti eskuelaan ti haiku [maysa a porma ti Hapones a berso]. Intugotko ti artikulo, ket daytat’ binasa ti mannursurok iti klase ken impasana dayta. Tinagiragsak ti tunggal maysa dayta, ket kalpasanna kinitada ti intero nga Agriingkayo! Nagyaman ti mannursurok kaniak iti panangitugotko iti dayta.

R. K., Estados Unidos

Interesadoak unay iti panagsurat kadagiti kankanta ken berso. Kayatko a nakaalaak koma iti karera iti musika ngem inkeddengko nga idedikar ti bagik iti Nakristianuan a ministerio. Nabiit pay nariribuk ti isipko maipapan iti karera iti komposision a nagun-odak koma. Nupay kasta, nabasak ti artikulo maipapan iti haiku. Nabigbigko a matagiragsakko ti panagsurat iti berso a maipaay laeng a pagragsakan!

D. M., Scotland

Panagladingit Natignayak a naimbag kadagiti artikulo maipapan iti ‘Panangsaranget ti Ipupusay.’ (Agosto 8, 1987) Idi agngudo ti 1988, ti kagayyemak unay naaksidente iti trapiko ket natay. Mariknak ti kasta unay a pukaw, ket dagitoy nga artikulo ti nangipaay kaniak iti nagdakkelan a namnama. Nakitak a diak medmedan ti panaglidayko no di ket iyebkasko ket dagidiay agladladingit agtitinnulongda iti maysa ken maysa. Saan kadi a nakaskasdaaw no dumtengto ti aldaw nga awanton daytoy a kita ti panagladingit?

H. O., Japan

Ikari ti Biblia ti kasta nga aldaw idiay Apocalipsis 21:3, 4, a sadiay saritaenna ti tiempo inton “awanton ni patay, awanton ti sangsangit wenno sasaibbek wenno rigrigat.” Daytoy a namnama dina pukawen nga interamente ti panagladingit, ngem pudno a palag-anenna ken mangliwliwa kadagiti agladladingit.​—ED.

Geodes Anian a nagsayaatan nga artikulo! (Enero 22, 1989) Agur-urnongak kadagiti mineral, ta naalak dayta a kapanunotan iti Agriingkayo! a Disiembre 8, 1963. Ita addaanakon iti koleksion a 2,000 nga especimen. Nupay kasta, naammuak manipud iti artikulo a dagiti geodes tumaudda laeng kadagiti timmangken nga arinsaed. Umiso kadi dayta?

P. K., Pederal a Republika iti Alemania

Wen. Kinapudnona, ti “The New Encyclopædia Britannica” (maika-15 nga edision, 1987) depinarenna ti geode a kas “naglungog a mineral a masarakan kadagiti “limestones” ken dadduma a “shales”​—dua a porma iti timmangken nga arinsaed.​—ED.

Trabaho Agimonak no dadduma gaput’ awan trabaho dagiti kakabsatko a babbai iti balay, ngem addaanak ti trabaho. Ngem idi nabasak ti artikuloyo iti “Agimtuod dagiti Agtutubo . . .” maipapan kadagiti trabaho (Enero 8, 1989), nasaysayaaten ti riknak. Iti maysa a parapo, kunaenna: “Ti pannakitinnulongyo bang-aranna met ti rigat dagiti dadakkelyo.” Ammoyo? Mabalin nga i-vacuum-ko itan ti kotse! Ket pudno dayta.

J. W., Estados Unidos

“Agimtuod dagiti Agtutubo . . .” Simmiasiak iti pamay-an ti pannakapadakkelko, ta pagarupek a naistrikto unay ni nanang no dinak palubosan a rummuar ken mangtagiragsak iti bagik kas kadagiti dadduma nga agtutubo. Gaput’ inaramidko ti kaykayatko, nakabasolak iti [seksual] nga imoralidad; ket masapulen nga ibturak ti konsiensiak ken dagiti panagbabawi. No nagimdengak koma ken nanangko idi ken impangagko ti balakad dagiti artikulo iti “Agimtuod dagiti Agtutubo . . . ”, awan koma dagitoy a parikutko ita. Kayatko nga ipaganetget kadagiti dadduma nga agtutubo a ti balakad kadagiti artikulo ket pudno a pakagunggonaanda ket nasayaat no ipangagda dayta.

L. J., Inglatera