Manipud Managbasatayo
Panagginnayyem Agtawenak iti 16, ket kayatko ti agyaman kadakayo iti artikulo maipapan ken ni Auntie Louie a napauluan, “Ti Patpatgek a Gayyem.” (Pebrero 22, 1996) Ti retrato ti nakaawisak ket dagus a binasak ti artikulo. Medio maup-upayak ta saan met gayam a gagayyem ti kaaduan a gagayyemko. Ti artikulo talaga a pinaregtanak a makigayyem iti tattao a natataengan ngem siak.
L. N., Italia
Isports iti Eskuelaan Pagyamanan iti artikulo nga “Agimtuod Dagiti Agtutubo . . . Team Sports—Pagimbagak Aya Ida?” (Pebrero 22, 1996) Kasla naisurat a para kaniak. Impaamirisna kaniak a nalabit agdaydayawak pay laeng kadagiti atleta agingga ita. Ti artikulo timmulong met kaniak a mangapresiar a “ti panagsanay iti bagi bassit ti maigunggonana.”—1 Timoteo 4:8.
Y. T., Japan
Cobra Pagarupko idi no nakadakdakes a reptilia dagiti cobra isu a rumbeng a matalipuposda. Ngem kalpasan a nabasak ti artikulo a “Kayatyo Kadi ti Makakita iti Cobra?” (Marso 22, 1996), sabali itan ti panirigak kadakuada. Pagyamanan iti panangruk-atyo iti tattao a kas kaniak kadagiti di umiso a pagarup kadagitoy a makapainteres a parsua.
P. E., Nigeria
Nupay dimmakkelak iti away a pakasarakan iti nagadu nga uleg, talaga a bassit la ti ammok maipapan kadakuada. Ti panangbasa iti kinaannad ti cobra a liklikanna ti pannakadlaw ti timmulong kaniak a tarusan a nalawlawag ti sasao ni Jesus idiay Mateo 10:16: “Paneknekanyo ti bagbagiyo a naannad a kas kadagiti serpiente.”
J. F. S., Brazil
Panangpeke Pagyamanan iti serye a “Panangpeke—Sangalubongan a Saplit.” (Marso 22, 1996) Agtartrabahoak iti maysa a banko ket nabiit pay a naturposko ti maysa a seminar maipapan iti pananglapped iti panangpeke. Kabaruan unay ti impormasion nga intedyo. Pagyamanan iti amin a mapagtalkan ken makaisuro nga artikuloyo.
B. P., Estados Unidos
Tangay agtartrabahoak kas kahera ti maysa a banko, apresiarek ti artikulo. No igidiat iti dadduma a pagiwarnak a mangipabpablaak kadagiti palso nga impormasion tapno mangawis iti interes, nangipablaakkayo iti natimbeng unay a panirigan. Balakadan ti banko [a pagtartrabahuak] dagiti makinkua iti tiendaan: ‘Mangidulinkayo iti kabaruan a kopia ti kada papel de banko. No agduaduakayo, idiligyo ti mapagduaduaan a papel de banko (papel, prenta, ken watermark) kadagiti umiso.’
L. G., Francia
Kinatimbeng Pagyamanan iti artikuloyo a “Ti Regalo ti Dios a Pangtimbeng.” (Marso 22, 1996) Tallo a tawenen ti napalabas, nagsakitak iti vertigo iti walo a lawas. Idi damo, pagarupko no sisiak ti agsaksakit iti kastoy, tangay diak pay nadamdamag dayta. Liniwliwanak ti artikuloyo, nga impakitana a mapaspasaran met ti sabsabali daytoy a sakit ket nadaeranda dayta.
D. P., Jamaica
Ngilaw Pagyamanan iti makapainteres unay nga artikulo a “Dagidiay Makapasimron a Ngilaw—Ad-adu ti Pakausaranda Ngem ti Pagarupyo?” (Marso 22, 1996) Itay napan a kalgaw, nangbusbosak iti sumagmamano a tiempo nga agsirarak maipapan kadagiti ngilaw, ngem awan nasarakak nga aniaman a makapnek nga impormasion. Pagarupko no makasinga ken narugitda, a kas kuna ti artikulo. Ngem ita, ammokon a makatulongda—ta no saan, ti Namarsua kadatayo saanna koma ida nga inaramid. Apresiarek unay dagiti artikulo nga ipabpablaakyo.
T. G., Italia
Kabasbasak ti artikulo maipapan kadagiti ngilaw, ket rumbeng nga agsuratak. Namin-adun nga inyangawko iti tattao a kayatko a maammuan ti pampanunoten ni Jehova idi pinarsuana daytoy makapasimron a parsua. Ita ammokon a saan a naikabil ti ngilaw ditoy daga tapno simronennatayo!
P. P., Estados Unidos