Ti Faeroe Islands—Naisalsalumina ti Panagkokonektarda
TI Faeroe Islands ket bassit a grupo ti 18 nga isla iti nadawel a dandanum ti Amianan nga Atlantico. Agnanaed kadagita dagiti umili nga addaan iti bukod a lenguahe nga isu ti Faeroese. Dagitoy a nakapimpintas nga isla ket addaan kadagiti napasdok ken nabato a bantay a baybay a mismon ti sakaananda. Namaris ti pintura ti balbalay kadagiti purok iti asideg ti baybay. No kalgaw, narangrang ti tuktok dagiti turod gapu kadagiti nakaberberde a ruot.
Nupay kasla maymaysa a komunidad ti 48,000 nga umili kadagiti isla, saanda idi a kaskarina a makapagpupulapol. Dagiti magaudan a barangay ti maus-usar idi a mangiballasiw kadagiti tattao ken tagilako. No mapanda iti sabali a purok, pagpagnaenda ti napasdok a bambantay ken nauuneg a derraas. Nagrigat ti agpatakder iti balay ta amin a materiales ket maibiahe iti magaudan a barangay. Sakbay a marugian ti panagbangon, masapul a mabunag dagiti materiales manipud iti bassit a natural a sangladan iti igid ti baybay agingga iti pagpatakderan.
Dagiti Nagkauna nga Umili
Ti magun-odan a kaunaan a rekord maipapan iti Faeroe Islands ket insurat ti maysa a monghe a taga-Ireland idi agarup 825 K.P. Imbagana a nasurok a 100 a tawen kasakbayanna, addan dagiti naiputputong a monghe kadagiti isla. Ngem nangrugi kano a mapagnaedan dagiti isla idi simmangpet ni Grimur Kamban manipud Norway idi rugrugi ti maikasiam a siglo.
Panagkalap ti pagsapulan dagiti nagkauna nga umili, ngem agtartarakenda met kadagiti karnero. Iti lenguahe a Faeroese, ti nagan a Føroyar (Faeroe Islands) kaipapananna ti “Isla Dagiti Karnero,” ken uray ita, napateg pay laeng ti panagtaraken kadagiti karnero. Maus-usar ti delana a proteksion iti angin, tudo, ken lamiis. Kinapudnona, adda idi pagsasaoda a ti ‘delana ti balitok dagiti umili ti Faeroe Islands.’
Uray ita, ad-adu ti karnero ngem ti tattao kadagiti isla. Maparti dagiti karnero iti kadawyan a pamay-an, sa maibitin kadagiti kamarin tapno mapayangyangan iti angin a sumrek iti nagbabaetan dagiti diding. Daytoy ti gapuna a naidumdumanto ti nanam ti karne isu nga agbalinto a naimas a putahe.
Kas iti nalabit manamnama iti bassit ken naiputputong a komunidad, agsisinnakit dagiti umili a Faeroese. Uray ita, kasta pay laeng ti riknada iti maysa ken maysa nupay nalaklakan ti panagpupulapolda gapu kadagiti moderno a pamay-an ti panagdaliasat ken pannakikomunikar.
Pinagkokonektar Dagiti Usok
Idi 1963 a nalukatan ti immuna nga usok iti Faeroe Islands. Lumasat dayta iti bantay iti kaabagatanan nga isla, ti Suðuroy, a namagkonektar iti dua a purok. Ti panagaramid iti dayta nga usok ramanenna ti kasta unay a panagkali, panagbarena, ken panagpabettak iti dinamita. Kasta ti naggiddan a naaramid iti agsumbangir a sikigan ti bantay.
Ti kabarbaro nga usok ket pagdalanan dagiti lugan iti agarup 150 a metro iti baba ti patar ti baybay ken mamagkonektar iti dua kadagiti daddadakkel nga isla. Tapno maaramid dayta, nausar ti lima a metro ti kaatiddogna a barena a nangabut iti nagdakkel a gangal a bato. Kalpasanna, adda dinamita a naikabil iti ungto ti abut sa napabettak. Kalpasan ti panagbettak, naikkat dagiti babassit ken dadakkel a bato isu a nawadan ti 5 a metro a paset ti usok. Naulit-ulit dayta a pamay-an agingga a nagbalin nga 6.2 a kilometro ti kaatiddog ti usok. Nalukatan dayta para kadagiti lugan idi Abril 29, 2006.
Nupay bassit ti populasion ti Faeroe Islands, addaan dayta iti 18 nga usok. Dua kadagita ket adda iti uneg ti baybay a mamagkokonektar kadagiti isla. Adda pay 2 a madama a maipalplano a maaramid. Inkeddeng ti parliamento ti pannakaaramid dagita nga usok tapno mapagkokonektar ti dadakkel nga isla. Ti maysa kadagita nga usok ket manamnama a mairingpas inton 2012. Iti intero a lubong, daytanto ti maysa kadagiti kaatiddogan nga usok nga adda iti uneg ti baybay ta agarup 12 a kilometro ti kaatiddogna.
Maysa Pay a Naisalsalumina a Singgalut
Iti Faeroe Islands, adda grupo ti tattao a pinagkaykaysa ti naiduma a singgalut—ti nalagda a naespirituan a singgalut dagiti Saksi ni Jehova. Dua a naregta a babbai a naggapu idiay Denmark idi 1935 ti kaunaan a Saksi a simmarungkar iti isla. Bayat ti kalgaw, inkasabada iti binalaybalay ti mensahe ti Biblia maipapan iti Pagarian ti Dios. Idi agangay, impapuso ti dadduma a taga-isla ti makaparegta a mensahe ken nakiramanda metten iti panangikasaba iti dayta.—Mateo 24:14.
Ita, adda agarup 100 a Saksi nga aggigimong iti uppat a Kingdom Hall kadagiti isla. Dagiti agkakasayaat a kalsada ken usok a namagkokonektar kadagiti agkakapintas nga isla iti nadawel a dandanum iti Amianan nga Atlantico ket tumultulong kadakuada iti naregta a panangitungpalda iti trabaho a panangasaba ken panangisuro iti Biblia.
[Ladawan iti panid 17]
Daytoy nga usok ket pagdalanan dagiti lugan iti agarup 150 a metro iti baba ti patar ti baybay ken mamagkonektar iti dua kadagiti daddadakkel nga isla