Introduksion a Mangawis iti Bumalay a Dumngeg
1 Ania ti kangrunaan a paset iti panagbalaybalay a presentasionyo? Gistay amintayo ti umanamong nga isu daydiay introduksiontayo. No saankayo nga agballigi a mangallukoy iti interes ti bumalay iti umuna a 30 a segundo wenno nasursurok, nalabit a putdenna ti saritaan.
2 Ania dagiti bambanag a masapul nga usigenyo no agsaganakayo iti epektibo nga introduksion? Tingitingenyo ti kababalin dagiti tattao a nalabit a masabetyo. Gagangay nga adda panaginnistoria, wenno kasapulan kadi a mapankayo a sidadaras iti punto? Dagiti aya tattao a kaarubayo ket sipupuotda kadagiti problema a sansanguen ti sangatauan?
Mabalin a maallukoyyo ida a dumngeg babaen ti panagkunayo a kaasping daytoy:
◼ “Naimbag a bigatyo. Ti naganko ket ______. Maseknanak no mabasak a dagiti tattao ket agbisin ken matayda kadagiti gubatan. Dakayo ngay?” Dagiti dadduma a saludsod a nalabit a makatulong a pangirugi ti saritaan isuda dagitoy: “Adda kadi siasinoman nga ammoyo a makasolbar kadagiti problema ditoy daga ita?” “Ania ngata no ti agturay ket addaan iti kualipikasion a kas iti nadakamat iti Isaias 9:6, 7? [Basaen ken komentuan iti kasuratan.]”
3 Iti dadduma a teritoria, ipakita dagiti tattao a lalo a maseknanda a maipaay iti pagtaengan ken pamiliada ngem iti sangalubongan a talna.
Mabalinyo a riingen ti interes babaen iti panangisaludsod:
◼ “Ania a kita iti biag ti masirmatayo nga agpaay ti pamiliayo iti umay a sangapulo a tawen? Ti panangmatmat iti Biblia maipapan ti masanguanan ket makaparegta unay agsipud ta impadtona iti iyaay ti maysa nga agturay nga aggobierno babaen ti perpekto a pagalagadan. Siputanyo no ania ti kuna iti Isaias 9:6, 7 maipapan kenkuana.”
4 Agnanaedkayo aya iti maysa a lugar a ti krimen ken kinatalged isudat’ topiko iti kada aldaw?
Mabalinyo a kunaen:
◼ “Hello. Makisaritakami kadagiti lumugar a tattao maipapan iti personal a kinatalged. Adu a krimen iti aglawlawtayo, ket apektado ti biagtayo.” Kalpasanna ti saludsod nga “Ania ti solusion?” wenno “Kasano ngata no ti agturay ket addaan iti kualipikasion a kas kadagitoy?” ti mabalin a makatulong a pangirugi iti saritaan. Mabalinyon a basaen iti Isaias 9:6, 7.
5 Amintayo, agraman dagiti agtutubo, ti mabalin a mangusar kadagitoy a naglaka a maysa a kasuratan a panangiparang. Masiguromi nga adu ti maragsakan a mangusar kadagitoy a presentasion bayat ti Pebrero, agpadpada iti maitukon a magasina ken panangipresenta ti regular a tukon.
6 No aramidenyo nga epektibo ti panangusar iti umuna a 30 a segundo ti sarungkaryo, agpada babaen iti langa ken introduksionyo, manamnama a maragpatyo ti kangrunaan a kalat a maawisyo iti bumalay a dumngeg.