LEKSION 29
Ania ti Mapasamak Kadatayo no Mataytayo?
Adda kadin natay nga ipatpategmo iti biag? Iti kasta a nagrigat a tiempo, baka mapanunotmo: ‘Ania ti mapasamak kadatayo no mataytayo? Adda kadi namnama a makitatayto manen dagiti natayen nga ipatpategtayo iti biag?’ Iti daytoy a leksion ken iti sumaruno, kitaem ti makaliwliwa a sungbat ti Biblia.
1. Ania ti mapasamak kadatayo no mataytayo?
Impada ni Jesus ti ipapatay iti naimas a turog. No naimas ti turog ti maysa, saanna nga ammo ti mapaspasamak iti aglawlawna. Ania ti pagpadaan ti ipapatay ken pannaturog? No matay ti maysa, awanen a pulos ti mariknana. Saan a malidayan, uray no ay-ayatenna unay dagiti gagayyemna ken kapamiliana. Kuna ti Biblia nga “awan a pulos ti ammo dagiti natay.”—Basaen ti Eclesiastes 9:5.
2. Ania ti pagsayaatanna no ammotayo ti kinapudno maipapan iti ipapatay?
Adu ti mabuteng a matay—ken uray kadagiti natay! Ngem maliwliwaka iti ibagbaga ti Biblia maipapan iti ipapatay. Kuna ni Jesus: “Ti kinapudno wayawayaannakayto.” (Juan 8:32) Isursuro ti dadduma a relihion a no matay ti maysa, agtultuloy nga agbiag ti kararuana. Ngem saan a kasta ti isursuro ti Biblia. Saanen nga agrigat ti maysa no natayen. Ken gapu ta awanen a pulos ti ammo dagiti natay, saandatayo a kaya a saktan. Isu a saantayo a kasapulan nga ay-aywen wenno pagdayawan dagiti natay, ken saantayo met a kasapulan nga ikararagan ida.
Ibagbaga ti dadduma a kayada ti makisarita kadagiti natay. Ngem imposible dayta. Kas iti naammuanta, “awan a pulos ti ammo dagiti natay.” Adda dagiti mangipagarup a makasarsaritada dagiti natayen nga ay-ayatenda. Ngem ti agpayso, ti kasarsaritada ket dagiti demonio nga agpampammarang nga isuda dagiti tattao a natay. Isu a no ammotayo ti kinapudno maipapan iti ipapatay, maprotektarantayo manipud kadagiti demonio. Saan a kayat ni Jehova a makisaritatayo kadagiti natay gapu ta ammona a pagdaksantayo no makikomunikartayo kadagiti demonio.—Basaen ti Deuteronomio 18:10-12.
AMMUEM TI AD-ADU PAY
Adalem ti ad-adu pay nga isursuro ti Biblia maipapan iti ipapatay, ken pabilgem ti pammatim iti naayat a Dios a saan a mangdusdusa kadagiti natay.
3. Ammuem ti agpayso a kasasaad dagiti natay
Iti intero a lubong, agduduma ti patpatien dagiti tattao maipapan iti mapasamak kadatayo no mataytayo. Siempre, saan a mabalin nga amin dagita ket pudno.
Iti lugaryo, ania ti patpatien dagiti tattao a kasasaad dagiti natay?
Tapno maammuam ti isursuro ti Biblia, i-play ti VIDEO.
Basaen ti Eclesiastes 3:20, sa pagsaritaan dagitoy a saludsod:
Sigun iti daytoy a teksto, ania ti mapasamak iti maysa a tao no matay?
Adda kadi sumina a kararuana nga agtultuloy nga agbiag?
Iyestoria ti Biblia ti maipapan iti ipapatay ni Lazaro, a nadekket a gayyem ni Jesus. Bayat a basbasaem ti Juan 11:11-14, kitaem no ania ti imbaga ni Jesus a kasasaad ni Lazaro. Kalpasanna, pagsaritaan dagitoy a saludsod:
Ania ti nangipadaan ni Jesus iti ipapatay?
Ania ti ipakita dayta maipapan iti kasasaad dagiti natay?
Panagkunam, nakappapati kadi ti ibagbaga ti Biblia maipapan iti ipapatay?
4. Pagimbagantayo ti kinapudno maipapan iti ipapatay
No ammotayo ti kinapudno maipapan iti ipapatay, saantayo a mabuteng kadagiti natay. Basaen ti Eclesiastes 9:10, sa pagsaritaan daytoy a saludsod:
Kaya kadi dagiti natay a saktan dagiti tattao?
No ammotayo ti kinapudno nga ibagbaga ti Biblia maipapan kadagiti natay, saantayo a patien ti kinaulbod a masapul nga ay-aywen wenno pagdayawan dagiti natay. Basaen ti Isaias 8:19 ken Apocalipsis 4:11, sa pagsaritaan daytoy a saludsod:
Panagkunam, ania ti marikna ni Jehova no agdayaw wenno agpatulong ti maysa kadagiti natay?
Ti kinapudno maipapan iti ipapatay wayawayaannatayo kadagiti kaugalian a kagura ni Jehova
5. Makapabang-ar ti kinapudno maipapan iti ipapatay
Naisuro iti adu a tattao a no matayda, madusada gapu kadagiti dakes nga inar-aramidda iti napalabas. Ngem makapabang-ar a maammuan a no matay ti maysa, saanen nga agrigat uray pay nagdakes dagiti inar-aramidna idi sibibiag pay. Basaen ti Roma 6:7, sa pagsaritaan daytoy a saludsod:
Nabasata iti Biblia a no matay ti maysa, naabsuelton ti basolna. Isu a panagkunam, agrigat kadi ti maysa gapu kadagiti basol nga inaramidna iti napalabas?
No mas maam-ammotayo ni Jehova, mas makombinsirtayo a saanna a dusaen dagiti natay. Basaen ti Deuteronomio 32:4 ken 1 Juan 4:8, sa pagsaritaan dagitoy a saludsod:
Gapu ta ti Dios ket addaan kadagiti kualidad a kas iti nabasa kadagiti teksto, panagkunam, dusaenna ngata dagiti natay?
Para kenka, makapabang-ar kadi ti kinapudno maipapan iti ipapatay? Apay?
KUNA TI DADDUMA: “Mabutengak a matay ta diak ammo no ania ti mapasamak kaniak no matayak.”
Ania dagiti makaliwliwa a teksto a mabalinmo nga ibasa?
SUMARIO
No matay ti maysa, agpatinggan ti biagna, saanen nga agrigat, ken saanna a kaya a saktan dagiti sibibiag.
Rebiu
Ania ti mapasamak kadatayo no mataytayo?
Kasano a pagsayaatantayo ti kinapudno maipapan iti ipapatay?
Kasano a makapabang-ar kadatayo ti kinapudno maipapan iti ipapatay?
AGDISKOBREKA PAY
Kitaem ti talaga a kaipapanan ti sao a “kararua” iti Biblia.
Ammuem no us-usaren ti Dios ti impierno a mangdusa kadagiti dakes a tattao.
Rumbeng kadi a kabutengtayo dagiti natay?
Espiritu dagiti Natay—Matulongandakay Aya wenno Dangrandakayo? Talaga Kadi nga Addada? (broshur)
Ammuem no kasano a naliwliwa ti maysa a lalaki idi naammuanna ti kinapudno maipapan iti no ania ti mapasamak no mataytayo.
“Nagustuak Dagiti Nalawag ken Lohikal a Sungbat ti Biblia” (Ti Pagwanawanan, Pebrero 1, 2015)