Agosto

Kitaentayo ti dua a nagpateg a punto iti salmo nga adda iti ngato: (1) Dagiti nalinteg ket maipasango kadagiti problema. (2) Ispalennatayo ni Jehova kadagiti pakasuotan. Kasanonatayo nga ispalen ni Jehova? Ti maysa a pamay-an ket tultulongannatayo a maaddaan iti realistiko a panangmatmat iti biag iti daytoy a sistema ti bambanag. Ikarkari ni Jehova nga agbalintayo a naragsak no agserbitayo kenkuana, ngem dina ibagbaga a ditay makapasar kadagiti problema ita. (Isa. 66:14) Parparegtaennatayo nga agpokus iti masanguanan—inton magun-odantayo ti biag a kayatna a tagiragsakentayo iti agnanayon. (2 Cor. 4:​16-18) Bayat nga ur-urayentayo dayta, tultulongannatayo tapno maitultuloytayo ti agserbi kenkuana iti inaldaw. (Un. 3:​22-24) Ania dagiti masursurotayo iti ulidan dagiti matalek nga agdaydayaw ken Jehova idi tiempo ti Biblia ken iti kaaldawantayo? Mabalin a maipasangotayo kadagiti di ninamnama a problema. Ngem no agtalektayo ken Jehova, sigurado a saranayennatayto.—Sal. 55:22. w23.04 14-15 ¶3-4

Makasursurotayo iti ulidan da Jose ken Maria a nakasagana nga agtulnog kadagiti nangatngato nga autoridad uray no saan a nalaka dayta. (Luc. 2:​1-6) Idi agarup siam a bulanen a masikog ni Maria, nasubok ti panagtulnogda ken Jose. Imbilin ni Augusto, nga agturay idi iti Imperio ti Roma, ti maysa a panagparehistro. Nagdaliasat da Jose ken Maria iti agarup 150 a kilometro (93 a milia) a sumang-at sumalog a mapan idiay Betlehem. Saan a nalaka dayta lalo ken Maria. Mabalin a pinampanunotda nga agassawa ti kinatalged ni Maria ken ti sikogna. Kasanon no aganak bayat nga addada iti dalan? Ngamin, ti sikogna ti agbalin a Mesias. Mabalinda kadi nga irason dayta tapno saanda nga agtulnog iti linteg ti gobierno? Uray no adda rason da Jose ken Maria a madanagan, nagtulnogda latta iti linteg. Binendisionan ni Jehova ti kinatulnogda. Natalged a nakadanon ni Maria idiay Betlehem, nasalun-at ti inyanakna a maladaga, ken nakatulong pay ketdi iti pannakatungpal ti padto ti Biblia!—Mik. 5:2. w23.10 8 ¶9; 9 ¶11-12

Kasanon no pampanunotem pay la ti agkomento ket agnernerbioskan? Mabalin a makatulong no agsaganaka a naimbag. (Prov. 21:5) No mas pamiliarka iti maad-adal, saanka unay nga agnerbios no agkomentoka. Agkomentoka met iti ababa. (Prov. 15:23; 17:27) No ababa ti isungbatmo, saanka unay nga agnerbios. No ababa ti komentom ken iti bukodmo a sasao, maipakitam a nagsaganaka a naimbag ken nalawag ti pannakaawatmo iti maad-adal. Kasanon no permi latta ti nerbiosmo nga agkomento iti maminsan wenno mamindua uray no pinadasmon ti dadduma kadagita a suhestion? Masiguradom nga ap-apresiaren ni Jehova ti napasnek a panagreggetmo a mangaramid iti kabaelam. (Luc. 21:​1-4) Saan a kidkiddawen ni Jehova ti nalablabes ngem iti kabaelantayo. (Fil. 4:5) Ammuem ti kayam nga aramiden, agporsegika a mangragpat iti dayta, ken ikararagmo nga agkalma ti pusom. Iti damo, baka umanayen ti maminsan a panagkomentom iti ababa. w23.04 21 ¶6-8

Impadanatayo ni apostol Pablo kadagiti soldado nga alerto ken nakarubuaten a makigubat. Manamnama a nakasagana a makigubat ti maysa a soldado iti aniaman nga oras. Kastatayo met. Kanayon a nakasaganatayo para iti aldaw ni Jehova babaen ti panangisuottayo iti pammati ken ayat a kas proteksion ti barukong ken iti namnama a kas iti helmet. Ti proteksion ti barukong salaknibanna ti puso ti maysa a soldado. Protektaran met ti pammati ken ayat ti simboliko a pusotayo. Tulongandatayo tapno maitultuloytayo ti agserbi iti Dios ken mangsurot ken Jesus. No adda pammatitayo, sigurado a gunggonaannatayo ni Jehova no sapulentayo isuna iti amin a pusotayo. (Heb. 11:6) Gapu iti pammati, napudnotayo latta iti Lidertayo a ni Jesus uray no masapul nga ibturantayo dagiti rigat. Mapatibkertayo ti pammatitayo a mangsango kadagiti problema iti biag no tuladentayo ti ulidan dagiti kakabsat ita a matalek latta uray no maidaddadanes wenno narigat ti panagbiagda. Maliklikantayo met ti agbalin a materialistiko no tuladentayo dagidiay pinasimpleda ti biagda tapno mayun-unada dagiti interes ti Pagarian. w23.06 10 ¶8-9

Ti panagteppel ket abilidad ti maysa a tao a mangkontrol iti rikna ken aramidna. Kasapulan met dayta tapno maragpattayo dagiti kalattayo, nangruna no narigat a maragpat ti maysa a kalat wenno saantayo a determinado a mangragpat iti dayta. Laglagipem, ti panagteppel ket paset ti bunga ti espiritu. Kiddawem ngarud ken Jehova ti nasantuan nga espirituna tapno ad-adda ken kanayon a makapagteppelka. (Luc. 11:13; Gal. 5:​22, 23) Dimo urayen dagiti perpekto a kasasaad. Iti daytoy a lubong, awan a pulos dagiti perpekto a kasasaad ita. No urayentayo dagita, baka ditay pulos maragpat ti kalattayo. Mabalin a saantayo a determinado ta kasla narigat a ragpaten ti kalattayo. No kasta ti situasionmo, mabalin kadi a rugiam a ragpaten ti kalatmo iti babassit a pamay-an? No kalatmo a pasayaaten ti maysa a kualidad, rugiam nga ipakita dayta iti babassit a pamay-an. No met kalatmo a basaen ti intero a Biblia, mabalin nga irugim nga iyeskediul iti ab-ababa a tiempo ti panagbasam. w23.05 29 ¶11-13

Bayat ti maudi nga al-aldaw, us-usaren ni Jehova ti organisasionna tapno agtultuloy a mangipaay iti naespirituan a taraon a tumulong kadatayo amin nga agtultuloy a magna iti “Dalan ti Kinasanto.” (Isa. 35:8; 48:17; 60:17) Nalabit maibagatayo a no adda agpayadal iti Biblia, adda gundawayna a magna iti “Dalan ti Kinasanto.” Ababa laeng a distansia ti daliasaten ti dadduma ket kalpasanna, suminadan iti kalsada. Determinado met ti dadduma nga agtultuloy nga agdaliasat iti dayta agingga a makadanonda iti destinasionda. Ania dayta a destinasion? Para kadagidiay addaan namnama nga agbiag idiay langit, ti “Dalan ti Kinasanto” ti mangiturong kadakuada iti “paraiso ti Dios” idiay langit. (Apoc. 2:7) Para kadagidiay addaan namnama nga agbiag ditoy daga, dayta a kalsada ti mangiturong kadakuada iti kinaperpekto iti ngudo ti 1,000 a tawen. No agdaldaliasatka iti dayta a kalsada ita, dika tumaltaliaw ken dimo pampanawan dayta agingga a mairingpasmo ti panagdaliasatmo nga agturong idiay baro a lubong! w23.05 17 ¶15; 19 ¶16-18

No panunotem ti amin nga inaramid ni Jehova para kenka, matignayka nga agyaman ken mangidedikar iti biagmo kenkuana. (Sal. 116:​12-14) Umiso laeng ti ibagbaga ti Biblia a ni Jehova ti Manangted iti “tunggal nasayaat ken perpekto a sagut.” (Sant. 1:17) Ti kadakkelan kadagidiay a sagut ket ti panangisakripisiona iti Anakna a ni Jesus. Panunotem laengen! Gapu iti subbot, posible a maaddaanka iti nadekket a relasion ken Jehova! Ken inikkannaka iti namnama nga agbiag nga agnanayon. (1 Juan 4:​9, 10) Ti panangidedikarmo iti biagmo ken Jehova ti maysa kadagiti kasayaatan a pamay-an a maipakitam nga agyamyamanka iti kadakkelan nga ebkas ti ayat nga impakitana kenka, kasta met kadagiti dadduma pay a bendision nga impaay ni Jehova kenka.—Deut. 16:17; 2 Cor. 5:15. w24.03 5 ¶8

No makitkitatayo ti nagdakes a moralidad dagiti tattao iti lubong ita, mariknatayo ti kas iti narikna ti nalinteg a tao a ni Lot. “Nariribukan unay iti nakaal-alas a kababalin dagiti dakes a tattao,” ta ammona a kagura ti nailangitan nga Amatayo ti dakes nga aramid. (2 Ped. 2:​7, 8) Gapu iti panagbuteng ken ayatna iti Dios, ginurana ti immoral a kababalin dagiti tattao iti aglawlawna. Napalawlawantayo met kadagiti tattao a bassit wenno awan ti respetoda kadagiti pagalagadan ni Jehova iti moral. Uray no kasta, kabaelantayo ti agtalinaed a nadalus iti moral no itultuloytayo nga ayaten ti Diostayo ken patanoren ti umiso a panagbuteng kenkuana. Tultulongannatayo ni Jehova a mangaramid iti dayta babaen ti panangipaayna iti pammaregta a masarakan iti libro a Proverbio. Talaga a nasayaat ti pagbanagan ti amin a Kristiano, lallaki ken babbai, ubbing ken nataengan, no surotenda dagiti nainsiriban a balakad iti dayta a libro. No agbutengtayo ken Jehova, agannadtayo a ditay ipambar a saan met a dakes ti ar-aramidentayo. w23.06 20 ¶1-2; 21 ¶5

Baka binusordakan dagiti kapamiliam wenno baka insakripisiom ti maaddaan iti ad-adu a kuarta wenno dadduma pay a bambanag tapno mayun-unam ti Pagarian ti Dios iti biagmo. (Mat. 6:33) No kasta, masiguradom nga ammo ni Jehova ti amin nga inaramidmo para kenkuana. (Heb. 6:10) Mabalin a napaneknekam nga agpayso daytoy nga imbaga ni Jesus: “Asinoman a nangpanaw iti balay wenno kakabsat a lallaki wenno kakabsat a babbai wenno ina wenno ama wenno annak wenno taltalon maigapu kaniak ken iti naimbag a damag, ket mamin-100 iti daytoy a tiempo ti awatenna a balay, kakabsat a lallaki, kakabsat a babbai, inna, annak, ken taltalon, agraman pannakaidadanes, ken iti masanguanan a sistema ti bambanag, biag nga agnanayon.” (Mar. 10:​29, 30) Talaga nga ad-adu a bendision ti maawatmo ngem iti aniaman nga insakripisiom.—Sal. 37:4. w24.03 9 ¶5

Idi naapektaran dagiti Kristiano idiay Judea iti nakaro a bisin, dagiti kakabsat iti kongregasion idiay Antioquia “inkeddeng[da], sigun iti kabaelan ti tunggal maysa, a mangipatulodda iti tulong kadagiti kakabsat nga agnanaed idiay Judea.” (Ara. 11:​27-30) Uray nakaad-adayo ti paggigianan dagiti kakabsat a naapektaran iti bisin, determinado dagiti Kristiano idiay Antioquia a tumulong kadakuada. (1 Juan 3:​17, 18) Mabalintayo met ti makipagrikna ita no maammuantayo a nadidigra dagiti kapammatiantayo. Dagus a tumulongtayo—nalabit damagentayo kadagiti panglakayen no mabalintayo ti tumulong iti maysa a proyekto, agdonar para iti sangalubongan a trabaho, wenno ikararagantayo dagidiay nadidigra. Mabalin a kasapulan met dagiti kakabsat ti tulong tapno maaddaanda kadagiti kasapulanda iti inaldaw. Inton umay mangukom ti Aritayo a ni Kristo Jesus, sapay koma ta makitana a madama nga ipakpakitatayo ti pannakipagrikna ket awisennatayo a ‘mangtawid iti Pagarian.’—Mat. 25:​34-40. w23.07 4 ¶9-10; 6 ¶12

Tinulad ni Jesus ti kinanainkalintegan ni Jehova. Naibaon ditoy daga tapno kasabaanna dagiti “umili ti Israel a nayarig iti napukaw a karnero.” Ngem nainkalintegan bayat nga ar-aramidenna ti asaynmentna. Naminsan, impakaasi ti maysa a saan nga Israelita a babai a paimbagenna ti marigrigatan a balasangna ta “linuganan ti demonio.” Naasian ni Jesus isu a pinatganna ti kiddaw ti babai ket pinaimbagna ti balasangna. (Mat. 15:​21-28) Kitaentayo ti sabali pay a pagarigan. Idi rugrugi ti ministerio ni Jesus, imbagana: “Ti mangilibak kaniak . . . , ilibakkonto met.” (Mat. 10:33) Ngem inlibakna kadi ni Pedro, a namitlo a nangibaga a dina am-ammo isuna? Saan. Inkabilangan ni Jesus ti kinamatalek ken panagbabawi ni Pedro. Kalpasan a napagungar ni Jesus, nagpakita ken Pedro ken sigurado nga impanamnamana kenkuana a pinakawannan ken ay-ayatenna latta. (Luc. 24:​33, 34) Agpada a nainkalintegan ni Jehova a Dios ken ni Jesu-Kristo. Datayo ngay? Ekspektaren ni Jehova a nainkalintegantayo koma. w23.07 21 ¶6-7

Ania ti ibagatayo kadagiti agduadua a pumaysonto ti Paraiso nga inkari ti Dios? Umuna, ni Jehova a mismo ti nagkari. Kuna ti libro nga Apocalipsis: “Imbaga Daydiay nakatugaw iti trono: ‘Kitaem! Pabpabaruek ti amin a bambanag.’” Addaan isuna iti sirib, pannakabalin, ken kayatna a matungpal ti karina. Maikadua, sigurado unay a matungpal ti karina ta para ken Jehova, napasamaken dayta. Dayta ti rason nga imbagana: “Mapagtalkan ken pudno dagitoy a sasao. . . . Natungpal dagitan!” Maikatlo, no adda irugi ni Jehova, sibaballigi nga ileppasna dayta, kas patalgedan ti sasao a: “Siak ti Alfa ken ti Omega.” (Apoc. 21:6) Paneknekanto ni Jehova a ni Satanas ti ulbod ken napaay. Isu nga no adda mangibaga, “Imposible dayta,” ania ti mabalinmo nga aramiden? Ibasam ken ilawlawagmo ti Apocalipsis 21:​5, 6. Ipakitam no kasano a nangted ni Jehova iti garantia a matungpal ti karina, babaen ti arigna panangpirmana iti dayta.—Isa. 65:16. w23.11 7 ¶18-19

Inkari dayta ni Jehova ken Abraham idi 75 ti tawenna ken awan pay anakna. Saan a nakita ni Abraham ti intero a kaitungpalan dayta a kari. Kalpasan a bimmallasiw iti Karayan Eufrates ken naguray iti 25 a tawen, nakita ni Abraham ti namilagruan a pannakaipasngay ti anakna a ni Isaac. Ket kalpasan ti 60 pay a tawen, nayanak dagiti appokona a da Esau ken Jacob. (Heb. 6:15) Ngem saan a pulos a nakita ni Abraham a nagbalin a dakkel a nasion dagiti kaputotanna ken tawidenda ti Naikari a Daga. Nupay kasta, nagbalin a nasinged a gayyem dayta a matalek a lalaki ti Namarsua kenkuana. (Sant. 2:23) Ket inton mapagungar ni Abraham, perminto la ketdi ti ragsakna inton maammuanna a nabendisionan ti amin a nasion gapu iti pammati ken panaganusna! (Gen. 22:18) Ania ti masursurotayo? Baka saantayo a dagus a makita ita ti amin a kaitungpalan dagiti kari ni Jehova. Ngem no naanustayo a kas ken Abraham, makapagtalektayo a gunggonaannatayo ita ni Jehova ken nangnangruna inton addan ti inkarina a baro a lubong.—Mar. 10:​29, 30. w23.08 24 ¶14

Napakumbaba ni Ari Uzias idi agtutubo. Nasursurona ti “agbuteng iti pudno a Dios.” Ket binendisionan ni Jehova ti dandani intero nga 68 a tawen ti panagbiagna. (2 Cron. 26:​1-4) Inabak ni Uzias ti adu a kabusor ti nasion ken siniguradona a natalged ti Jerusalem. (2 Cron. 26:​6-15) Naragsakan la ketdi ni Uzias iti amin a naaramidanna iti tulong ti Dios. (Ecl. 3:​12, 13) Nakairuaman ni Ari Uzias ti agmandar. Impagarupna ngata a mabalinna nga aramiden ti amin a kaykayatna? Naminsan, simrek ni Uzias iti templo ni Jehova ket sidadarasudos a pinadasna ti agpuor iti insienso iti altar, idinto ta saan a maipalubos nga aramiden dayta dagiti ari. (2 Cron. 26:​16-18) Kas Nangato a Padi, pinadas ni Azarias a tubngaren ni Uzias. Ngem nakapungtot unay. Makapaladingit ta dinadael ni Uzias ti rekord ti matalek a panagserbina ket nadusa iti kukutel. (2 Cron. 26:​19-21) Saan koma a kasta ti nagbalinan ti biagna no nagtalinaed a napakumbaba! w23.09 10 ¶9-10

Ni apostol Pedro ket maysan a Kristiano a dinutokan ti espiritu. Ngem uray kalpasan dayta, adda latta dagiti pagkapuyanna. Idi 36 C.E., imbaon ti Dios ni Pedro a mapan ken Cornelio a maysa a Gentil. Iti dayta a tiempo, ni Cornelio ket dinutokan ti nasantuan nga espiritu, a nalawag nga ebidensia a “saan a mangidumduma ti Dios.” Dagiti Gentil ket agbalinen a paset ti kongregasion Kristiano. (Ara. 10:​34, 44, 45) Kalpasanna, makikadkaduan ni Pedro kadagiti Gentil iti pannangan, a dina pay pulos inar-aramid idi. Ngem para iti dadduma a Judio a Kristiano, saan a rumbeng nga agkakadua a mangan dagiti Judio ken Gentil. Idi simmangpet idiay Antioquia ti dadduma a kasta ti opinionda, insardeng ni Pedro ti makikadua kadagiti kakabsat a Gentil iti pannangan. Mabalin a mabuteng di la ket ta masairna ti rikna dagiti Judio a Kristiano. Idi nakita ni apostol Pablo dayta a panaginsisingpet ni Pedro, tinubngarna iti sanguananda amin. (Gal. 2:​13, 14) Uray nagkamali ni Pedro, intultuloyna ti nagporsegi. w23.09 22 ¶8

No sipupudno a sukimatem ti bagim, baka adda dagiti makitam a masapul a parang-ayem. Ngem saanka koma a maupay. ‘Naasi ti Apo,’ ken tulongannaka a rumang-ay. (1 Ped. 2:3) Ipasigurado kadatayo ni apostol Pedro: “Ti Dios . . . turposennanto a mismo ti panagsanayyo. Patibkerennakayto.” Idi damo, narikna ni Pedro a saan a maikari a makikadua iti Anak ti Dios. (Luc. 5:8) Ngem iti naayat a tulong da Jehova ken Jesus, naitultuloy ni Pedro ti agporsegi kas pasurot ni Kristo. Napalubosan ngarud ni Pedro a “[makastrek] iti agnanayon a Pagarian ti Apo ken Manangisalakan kadatayo a ni Jesu-Kristo.” (2 Ped. 1:11) Nagsayaat a gunggona! Kas ken Pedro, no itultuloymo ti agporsegi ken agpasanay ken Jehova, maawatmonto met ti gunggona a biag nga agnanayon. ‘Maisalakanka gapu iti pammatim.’—1 Ped. 1:9. w23.09 31 ¶16-17

Ti tabernakulo ket maymaysa ti paraanganna. Dayta ket naaladan ken nalawa a lugar a pangar-aramidan dagiti papadi kadagiti annongenda. Adda sadiay ti dakkel a gambang nga altar ti daton a mapuoran ken ti gambang a palanggana a napno iti danum nga usaren idi dagiti papadi a pangdalus iti bagida sakbay nga aramidenda dagiti sagrado a serbisioda. (Ex. 30:​17-20; 40:​6-8) Ita, ti natda kadagiti dinutokan ti espiritu a kakabsat ni Kristo ket simamatalek nga agserserbi ditoy daga iti makin-uneg a paraangan ti naespirituan a templo. Ti kaadda ti dakkel a palanggana a napno iti danum ket napateg a palagip kadakuada ken iti amin a Kristiano a masapul nga agtalinaedda a nadalus iti moral ken naespirituan. Sadino ngay met ti pagdaydayawan ti “dakkel a bunggoy”? Nakita ida ni apostol Juan “nga agtaktakder iti sanguanan ti trono . . . ken mangipapaayda [iti Dios] iti sagrado a panagserbi iti aldaw ken rabii idiay templona.” Ar-aramiden dayta ti dakkel a bunggoy ditoy daga iti makinruar a paraangan ti naespirituan a templo. (Apoc. 7:​9, 13-15) Ipatpategtayo ti lugartayo iti urnos ni Jehova para iti nadalus a panagdaydayaw! w23.10 28 ¶15-16

Ti maysa a pamay-an a mapabilegnatayo ni Jehova ket babaen kadagiti panglakayen. (Isa. 32:​1, 2) Isu a no madanaganka, ipakaammom kadagiti panglakayen dagiti marikriknam. Awatem ti tulong nga ipaayda ket agyamanka kadakuada. Us-usaren ida ni Jehova tapno mapapigsanaka. Mapabilegnatayo met ti naibatay iti Biblia a namnamatayo nga agbiag nga agnanayon—iti man maisublinto a Paraiso a daga wenno iti nailangitan a Pagarian. (Roma 4:​3, 18,19) Mapabilegnatayo ti namnamatayo a mangibtur kadagiti suot, mangikasaba iti naimbag a damag, ken mangitungpal iti nadumaduma nga asaynmenttayo iti kongregasion. (1 Tes. 1:3) Dayta met la a namnama ti nangpabileg idi ken apostol Pablo. ‘Naparigat,’ “nariribukan,” ‘naidadanes,’ ken ‘natuang.’ Nagpeggad pay ketdi ti biagna. (2 Cor. 4:​8-10) Bimmileg ni Pablo nga agibtur ta nagpokus iti namnamana. (2 Cor. 4:​16-18) Nagpokus ni Pablo iti namnamana nga agbiag nga agnanayon idiay langit. Kanayon a pinampanunot ni Pablo dayta a namnamana. Kas resultana, nariknana nga “inaldaw a mapabpabaro.” w23.10 15-16 ¶14-17

No agkararagka, panunotem no tiempo kadin tapno patgan ni Jehova ti kiddawmo. Mabalin a mariknatayo a masapul a masungbatan a dagus dagiti kararagtayo. Ngem kinaagpaysuanna, ammo ni Jehova ti kasayaatan a tiempo a tumulong. (Heb. 4:16) No saantayo a maawat a dagus ti kidkiddawentayo, mabalin a mapanunottayo a ti sungbat ni Jehova ket ‘Saan.’ Ngem baka ti talaga a sungbatna ket ‘Saan pay nga ita.’ Kas pagarigan, ikarkararag ti agtutubo a brother a maagasan koma ti sakitna. Ngem saan a simmayaat ti salun-atna. No simimilagro a pinaimbag ni Jehova, baka irason ni Satanas nga agtultuloy laeng nga agserserbi ti brother ken Jehova gapu ta immimbag. (Job 1:​9-11; 2:4) Kasta met, addan ti tiempo nga inkeddeng ni Jehova tapno paimbagenna ti amin a sakit. (Isa. 33:24; Apoc. 21:​3, 4) Bayat a saan pay a dimteng dayta, saantayo a namnamaen a simimilagro nga umimbag dagiti sakittayo. Isu a mabalin a kiddawen ti brother ken Jehova a pabilgenna ken ikkanna iti talna ti panunot tapno maibturanna ti sakitna ken maitultuloyna ti simamatalek a panagserbi iti Dios. w23.11 23 ¶13

Nakaaramid ni Samson iti nakaro a kamali. Ngem intultuloyna ti nagserbi ken Jehova. Nangpanunot iti gundaway tapno maitungpalna ti inted ti Dios nga annongenna kontra kadagiti Filisteo. (Uk. 16:​28-30) Impakpakaasi ni Samson ken Jehova: “Palubosannak a mangibales kadagiti Filisteo.” Sinungbatan ti pudno a Dios dayta a pakaasi ni Samson ken insublina ti naisangsangayan a pigsana. Kas resultana, ad-adu a Filisteo ti napapatay ni Samson iti dayta a gundaway no ikompara kadagiti napapatayna idin. Uray napadasan ni Samson dagiti nasaem a resulta ti kamalina, saan a nagsardeng a mangaramid iti pagayatan ni Jehova. Mabalin met nga agkamalitayo ken masapul a matubngar wenno maikkat kadatayo ti maysa a pribilehio. Ngem masapul a saantayo nga agsardeng nga agserbi ken Jehova. Laglagipentayo a nakasagana ni Jehova a mangpakawan kadatayo. (Sal. 103:​8, 9) Uray no nakaaramidtayo kadagiti kamali, mabalinnatayo latta nga usaren ni Jehova, kas iti inaramidna idi ken Samson. w23.09 6 ¶15-16

No agib-ibturka, magun-odmo ti anamong ni Jehova. Ngem dina kayat a sawen dayta a maragragsakan ni Jehova no makapaspasarka kadagiti suot wenno problema. Imbes ketdi, maragragsakan ti Dios iti matalek a panagibturmo. Makaparegta a maammuan a no agib-ibturtayo, maparparagsaktayo ni Jehova! (Sal. 5:12) Laglagipem a naibturan ni Abraham dagiti pakasuotan ket nagun-odna ti anamong ti Dios. Inawagan ni Jehova ni Abraham kas gayyemna ken imbilangna kas nalinteg. (Gen. 15:6; Roma 4:​13, 22) Magun-odtayo met ti anamong ti Dios. Saan nga ibatay ti Dios ti anamongna kadatayo iti kaadu ti trabaho wenno pribilehiotayo iti panagserbitayo kenkuana. Ibatayna ti anamongna iti matalek a panagibturtayo. Ken aniaman ti edad, situasion, wenno abilidadtayo, kayatayo amin ti agibtur. Adda kadi suot a simamatalek nga ib-ibturam ita? No wen, sapay koma ta maliwliwaka iti kinapudno nga an-anamongannaka ti Dios. No nalawag kadatayo nga an-anamongannatayo ti Dios, sigurado a dakkel ti epektona kadatayo. Dayta ti mangpabileg iti namnamatayo. w23.12 11 ¶13-14

Masapul a nalaing a makikomunikar ti maysa a brother. Ti tao a nalaing a makikomunikar ket dumngeg ken maawatanna ti pampanunoten ken rikrikna ti dadduma. (Prov. 20:5) Masursurona a tarusan ti kaipapanan ti tono ti boses, ekspresion ti rupa, ken tigtignay ti kasarsaritana. Saanmo a masursuro dayta no saanka a makilangen kadagiti tattao. Ngem no kanayon a dagiti gadyetmo ti us-usarem a makikomunikar, kas iti email ken text, mabalin a kumapuy ti abilidadmo a makikomunikar kadagiti tattao iti personal. Isu a mangaramidka iti pamay-an a makisarita iti dadduma iti personal. (2 Juan 12) Ti maysa a lalaki a nataengan iti naespirituan ket masapul met a kayana a suportaran ti bagina ken ti pamiliana. (1 Tim. 5:8) Nasayaat no sursuruem ti maysa a paglaingan a makatulong tapno makastrekka iti trabaho. (Ara. 18:​2, 3; 20:34; Efe. 4:28) Aggaggagetka ken ileppasmo ti aniaman a rinugiam a trabaho. No aramidem dayta, posible a makastrekkanto iti trabaho ken makapagtalinaedka iti dayta. w23.12 27 ¶12-13

No dakamaten ti Biblia ti maipapan iti “aldaw ni Jehova,” tukoyenna ti tiempo nga ukomen ni Jehova dagiti kabusorna ken isalakanna ti ilina. Iti napalabas, adda dagiti nasion a dinusa ni Jehova. (Isa. 13:​1, 6; Ezek. 13:5; Sof. 1:8) Iti kaaldawantayo, mangrugi ti “aldaw ni Jehova” inton maraut ti Babilonia a Dakkel ken agngudo iti gubat ti Armagedon. Tapno maisalakantayo iti dayta nga “aldaw,” masapul nga agsaganatayo itan. Insuro ni Jesus a masapul a ditay laeng saganaan ti “dakkel a rigat” no di ket “kanayon a nakasagana[tayo] met” para iti dayta. (Mat. 24:21; Luc. 12:40) Iti umuna a surat ni apostol Pablo kadagiti taga-Tesalonica, nagusar kadagiti ilustrasion a tumulong kadagiti Kristiano tapno kanayonda a nakasagana para iti dakkel nga aldaw ti panangukom ni Jehova. Ammo ni Pablo a saan a dumteng ti aldaw ni Jehova iti daydi a tiempo. (2 Tes. 2:​1-3) Ngem pinaregtana latta dagiti kakabsat a saganaanda dayta nga aldaw a kas man la dumteng dayta kabigatanna. Adda met masursurotayo iti balakadna. w23.06 8 ¶1-2

Idi 1978, naibangon ti 60 ti kadsaaranna a nangato a pasdek idiay Tokyo, Japan. Ngem masansan nga agginggined iti dayta a siudad isu a pampanunoten idi dagiti tattao a baka nalaka a marba dayta. Nupay kasta, inaramid dagiti inheniero dayta a pasdek a nalagda ken saan a maan-ano uray no dayyegen ti adu a ginggined. Dagiti Kristiano ket kas iti nangato a pasdek. Iti ania a pamay-an? Masapul nga agtalinaed a balanse ti maysa a Kristiano no iti kinatibker ken pannakibagay. Rumbeng nga agbalin a natibker ken di magaraw no maipapan iti panangsurot kadagiti linteg ken pagalagadan ni Jehova. “Nakasagana nga agtulnog” ken saan nga agkompromiso. Ngem masapul nga agbalin a “nainkalintegan,” wenno mannakibagay, no posible wenno no kasapulan. (Sant. 3:17) No nasursuron ti maysa a Kristiano ti agbalin a balanse, saan nga istrikto unay wenno napanuynoy unay. w23.07 14 ¶1-2

Masapul a labanan ni Jesus dagiti sulisog ken direkta a panangatakar ni Satanas a Diablo a mangdadael iti kinamatalekna iti Dios. (Mat. 4:​1-11) Determinado ni Satanas a mangaramid iti amin tapno agbasol ni Jesus ket saanna a maipaay ti subbot. Bayat ti ministerio ni Jesus ditoy daga, inibturanna ti dadduma pay a pannubok. Binusbusorda ken pinadasda a patayen. (Luc. 4:​28, 29; 13:31) Masapul met nga anusanna ti kinaimperpekto dagiti pasurotna. (Mar. 9:​33, 34) Idi nabista, pinarparigat ken inuy-uyawda. Kalpasanna, pinatayda iti nakaut-ut-ot ken nakababain a pamay-an. (Heb. 12:​1-3) Dayta a nakaro a panagsagabana iti kayo a pagtutuokan ket masapul nga ibturanna a bukbukodna, nga awan ti proteksion ni Jehova. (Mat. 27:46) Talaga a nagdakkel ti insakripisio ni Jesus tapno maipaayna ti subbot. No panunotentayo ti amin a sakripisio a situtulok nga inaramid ni Jesus para kadatayo, lallalo nga umuneg ti panagayattayo kenkuana! w24.01 10-11 ¶7-9

Napateg ti kinaanus iti pannakilangentayo iti sabsabali. Makatulong dayta tapno dumngegtayo a naimbag no adda agsasao. (Sant. 1:19) No naanustayo, natalna ti relasiontayo iti sabsabali. Makatulong met dayta tapno ditay makaaramid ken makapagsao a dagus iti saan a nasayaat no mais-stress-tayo. Ken no naanustayo, saantayo a makapungtot a dagus no adda nangsair kadatayo. Imbes nga agibalestayo, “itultuloy[tayo] ti agiinnanus ken situtulok nga agpipinnakawan.” (Col. 3:​12, 13) Makatulong met ti kinaanus tapno makaaramidtayo kadagiti nasaysayaat a desision. Imbes nga agdarasudos wenno dagus nga agdesisiontayo, iwayaantayo nga ammuen ken tingitingen dagiti pagpiliantayo. Kas pagarigan, no agbirbiroktayo iti trabaho, baka kayattayo nga awaten a dagus ti umuna a trabaho a mai-offer kadatayo. Ngem no naanustayo, iwayaantayo a panunoten ti mabalin nga epekto ti trabaho iti pamilia ken espiritualidadtayo. No naanustayo, maliklikantayo ti makaaramid iti kamali a desision. w23.08 22 ¶8-9

Gapu iti tendensiam nga agbasol, mabalin a maupayka. No panunotem ti inkarim idi nagdedikarka ken Jehova, mapabileg ti determinasionmo a manglaban iti sulisog. Kasano? Idi nagdedikarka ken Jehova, tinallikudamon ti bagim. Kaipapanan dayta a nagsaankan kadagiti personal a tarigagay ken kalat a kagura ni Jehova. (Mat. 16:24) Isu a no maipasangoka iti pakasuotan, saanmonton a masapul a pagduaduaan no ania ti aramidem. Desididokan no ania ti aramidem—ti agtalinaed a matalek ken Jehova. Agtalinaedka a determinado a mangparagsak ken Jehova. No aramidem dayta, tultuladem ni Job. Uray no naipasango iti nakarigrigat a pannubok, sikokompiansa nga imbagana: “Agtalinaedak nga awan pagkuranganna!”—Job 27:5. w24.03 9 ¶6-7

Kaduatayo ni Jehova, “ti Dios ti ayat”! (2 Cor. 13:11) Interesado iti tunggal maysa kadatayo. Kombinsidotayo a “tagiragsaken[tayo] ti napudno nga ayatna.” (Sal. 32:10) No kanayon nga utobentayo no kasano nga ipakpakitana nga ay-ayatennatayo, lallalo a napaypayso isuna kadatayo ken nasingsingedtayo kenkuana. Saantayto a bumdeng nga agkararag kenkuana ken ibaga a kasapulantayo unay ti ayatna. Mabalintay met nga ibaga kenkuana ti amin a pagdandanagantayo, ta agtalektayo a maawatannatayo ken magagaran a tumulong kadatayo. (Sal. 145:19) No kasano a kayattayo ti aginudo no nalam-ek, kayattayo met ti umasideg ken Jehova ta nabara ti ayatna. Nakadungdungngo ni Jehova ken nakabilbileg ti ayatna. Isu nga agragsakka ta ay-ayatennaka unay ni Jehova. Ket sapay koma ta subadantayo ti ayatna babaen ti panangibagatayo: “Ay-ayatek ni Jehova”!—Sal. 116:1. w24.01 31 ¶19-20

Saan la nga impakaammo ni Jesus kadagiti tattao a Jehova ti nagan ti Dios. Ammon dagiti Judio a sinuruan ni Jesus ti nagan ti Dios. Ngem indauluan ni Jesus ti ‘panangilawlawag iti maipapan ken Amana.’ (Juan 1:​17, 18) Kas pagarigan, ipakaammo ti Hebreo a Kasuratan a ni Jehova ket naasi ken mannakipagrikna. (Ex. 34:​5-7) Lallalo nga inlawlawag ni Jesus dayta a kinapudno idi insalaysayna ti ilustrasion maipapan iti barayuboy nga anak ken ti amana. Mabasatayo nga idi nakita ti ama ti agbabbabawi nga anakna “uray adayo pay laeng,” napanen nagtaray tapno sabtenna ken arakupenna. Naimpusuan a pinakawanna ti anakna. Nakalawlawag nga ipakita dayta ti kasta la unay nga asi ken pannakipagrikna ni Jehova. (Luc. 15:​11-32) Tinulongan ni Jesus dagiti tattao a mangammo iti talaga a kinasiasino ti Amana. w24.02 10 ¶8-9

Makarepresko ti panangliwliwa ken tulong nga ipapaay ni Jehova kadagiti addaan iti problema. Kasanotayo a matulad ni Jehova iti pannakipagrikna ken panangliwliwa? Ti maysa ket parang-ayentayo dagiti kualidad a makatulong tapno agbalintayo a mannakipagrikna ken manangliwliwa. Ania ti dadduma kadagita a kualidad? Ania ti makatulong kadatayo a mangtaginayon iti ayat a kasapulantayo tapno inaldaw nga “itultuloy[tayo] a liwliwaen ti maysa ken maysa”? (1 Tes. 4:18) Masapul a parang-ayentayo dagiti nagsasayaat a kualidad a kas iti simpatia, nainkabsatan nga ayat, ken kinaimbag. (Col. 3:12; 1 Ped. 3:8) Kasano a makatulong kadatayo dagita a kualidad? No iyugalitayo ti pannakipagrikna ken ti dadduma a kualidad a konektado iti dayta, sigurado a matignaytayo a mangliwliwa kadagiti makapaspasar iti rigat. Kas imbaga ni Jesus, “sawen ti ngiwat ti linaon ti puso. Ti naimbag a tao agsao iti naimbag, gapu ta napno ti pusona iti naimbag a bambanag.” (Mat. 12:​34, 35) Ti panangliwliwa kadagiti kakabsat nga agkasapulan ket talaga a napateg a pamay-an tapno maipakitatayo nga ay-ayatentayo ida. w23.11 10 ¶10-11

Tapno maawatantayo dagiti padto ti Biblia, masapul nga agpatulongtayo. Usigentayo daytoy nga ilustrasion: Damom ti agpasiar iti maysa a lugar a kaduam ti maysa a gayyemmo. Kabesadona dayta a lugar, ammona ti eksakto nga ayanyo, ken ti pagturongan ti tunggal dalan. Sigurado a maragsakanka ta kinuyognaka ti gayyemmo! Iti umasping a pamay-an, ammo ni Jehova no anian a paset ti maudi nga al-aldaw ti pagbibiagantayo ken no ania ti pagtungpalan ti dalan nga ayantayo. Tapno ngarud maawatantayo dagiti padto ti Biblia, masapul a sipapakumbaba nga agpatulongtayo ken Jehova. (Dan. 2:28; 2 Ped. 1:​19, 20) Kas iti asinoman a nasayaat a nagannak, kayat ni Jehova a naragsak ti masakbayan dagiti annakna. (Jer. 29:11) Ngem saan a kas iti asinoman a tao a nagannak, maibaga ni Jehova ti eksakto ken umiso a mapasamak iti masanguanan. Dagiti padto ket impaisuratna iti Saona tapno maammuantayo dagiti napapateg a pasamak sakbay a dumteng dagita.—Isa. 46:10. w23.08 8 ¶3-4