Hulio

Iti amin nga imbaga ken inaramid ni Jesus agraman dagiti milagro nga inaramidna, perpekto a tinuladna ti panagpampanunot ken rikrikna ni Amana. (Juan 14:9) Ania dagiti masursurotayo kadagiti milagro ni Jesus? Ay-ayatendatayo unay ni Jesus ken ti Amana. Bayat nga adda ni Jesus ditoy daga, impakitana ti kinauneg ti panagayatna kadagiti tattao babaen ti panangusarna iti pannakabalinna nga agaramid iti milagro tapno tulonganna dagiti agsagsagaba. Iti maysa a gundaway, nagpukkaw ti dua a bulsek a lallaki tapno agpatulongda kenkuana. (Mat. 20:​30-34) Siputanyo ta ni Jesus ket “naasian” isu a pinaimbagna ida. Ti Griego a sao a nausar ditoy a naipatarus kas “naasian” tukoyenna ti kasta unay a pannakipagrikna a marikna iti kaunggan. Ti kasta unay nga asi, a pakakitaan iti ayat, ti nangtignay met ken Jesus a mangpakan kadagiti mabisin ken mangpaimbag iti maysa nga agkukutel. (Mat. 15:32; Mar. 1:41) Masiguradotayo nga ay-ayatennatayo unay ni Jehova, ti Dios ti ‘ayat ken asi,’ ken ay-ayatennatayo met unay ti Anakna. Masaksaktan ti riknada iti panagsagabatayo. (Luc. 1:78; 1 Ped. 5:7) Sigurado a magagaranda unayen a mangikkat iti amin a problema a mangparparigat iti amin a tattao! w23.04 3 ¶4-5

Adda dagiti praktikal a pamay-an tapno maliklikantayo dagiti dakes a panagpampanunot ken ideya ti kaaduan a tattao iti sistema ni Satanas. Punnuentayo ti isiptayo kadagiti nasayaat a banag. Kasano? Basaen ken adalentayo ti Biblia. Maprotektarantayo met ti isiptayo no umatendertayo kadagiti gimong ken makiramantayo iti ministerio. No aramidentayo dagita, pumudno kadatayo ti kari ni Jehova a saannatayo nga ipalubos a masulisog iti ditay kabaelan nga ibturan. (1 Cor. 10:​12, 13) Masapul nga ad-adda pay nga agkararag ti tunggal maysa kadatayo tapno agtalinaedtayo a matalek ken Jehova bayat dagitoy narigat a maudi nga al-aldaw. Kayat ni Jehova nga agkararagtayo tapno ‘iyebkastayo kenkuana dagiti linaon ti pusotayo.’ (Sal. 62:8) Idaydayawmo ni Jehova ken agyamanka gapu iti amin nga ar-aramidenna. Kiddawem a paturedennaka iti ministerio. Ipakaasim a tulongannaka a mangibtur iti aniaman a problema ken manglaban iti aniaman a sulisog a mabalin a pakaipasanguam. Dimo ipalubos nga adda aniaman wenno asinoman a mangpasardeng kenka a regular nga agkararag ken Jehova. w23.05 7 ¶17-18

Apay a makigimgimongtayo? Kangrunaan iti amin, tapno maidaydayawtayo ni Jehova. (Sal. 26:12; 111:1) Makigimgimongtayo met tapno makapagpipinnaregtatayo bayat dagitoy narigat a tiempo. (1 Tes. 5:11) No agitayag ken agkomentotayo, maaramidtayo dagita a dua a panggep. Ngem no agkomentotayo, baka marigatantayo ta mabalin nga agnerbiostayo, wenno baka kayattayo ti mamin-adu nga agkomento ngem manmanotayo a maawagan. Ania ti makatulong kadatayo? Imbaga ni apostol Pablo a masapul nga agpokustayo iti ‘panagpipinnaregta.’ No panunotentayo a maparegta dagiti immatender iti uray simple laeng nga ebkas ti pammatitayo, saantayo unay nga agnerbios nga agkomento. Ken no manmanotayo a maawagan, naragsaktayo latta ta adda gundaway ti dadduma nga agkomento.—1 Ped. 3:8. w23.04 20 ¶1-3

Nagwarasen ti damag! Dagiti Judio a nagbalin a balud idiay Babilonia iti agarup 70 a tawen ket nawayan nga agsubli iti dagada nga Israel. (Esd. 1:​2-4) Ni laeng Jehova ti nakaibanag iti dayta. Ngamin, saan a gagangay a wayawayaan dagiti Babilonio dagiti baludda. (Isa. 14:​4, 17) Ngem naabaken ti Babilonia, ken imbaga ti baro nga agturay a mabalinen a pumanaw dagiti Judio. Masapul nga agdesision ti amin a Judio, nangruna dagiti ulo ti pamilia: pumanawda iti Babilonia wenno saan. Mabalin a narigat idi ti agdesision. Adu a Judio ti lakay wenno baket idin isu a marigatanda nga agdaliasat. Ken gapu ta nayanak idiay Babilonia ti kaaduan a Judio, dayta laeng a lugar ti ammoda a pagnaedanda. Para kadakuada, ti Israel ket lugar dagiti apongda. Agparang nga immasenso unay idiay Babilonia ti dadduma a Judio. No kasta, baka marigatanda idi a mangpanaw kadagiti komportable a balay wenno negosioda ken agnaed iti lugar a saan a pamiliar kadakuada. w23.05 14 ¶1-2

Parparegtaennatayo ti Sao ti Dios nga itultuloytayo a kultibaren ti panagibtur, pannakipagrikna, ken ayat. Kuna ti Lucas 21:19: “Maisalakanyonto ti biagyo no agibturkayo.” Ibaga ti Colosas 3:12: “Ikawesyo ti . . . pannakipagrikna.” Kuna pay ti 1 Tesalonica 4:​9, 10: “Sinursuruannakayo ti Dios nga agiinnayat. . . . Ngem iparparegtami, kakabsat, nga itultuloyyo nga ad-adda pay nga aramiden dayta.” Naiturong amin dagita a bersikulo kadagiti adalan a nangipakitan iti panagibtur, pannakipagrikna, ken ayat. Ngem masapul nga itultuloyda idi a kultibaren dagita a kualidad. Kasta met ti masapul nga aramidentayo. Makatulong no usigem no kasano nga impakita dagiti nagkauna a Kristiano dagitoy a kualidad. Kalpasanna, kitaem no kasano a matuladmo dagidiay nga adalan. Iti kasta, mapaneknekam a nakasaganakan para iti dakkel a rigat. Ket inton mangrugi ti dakkel a rigat, nasursuromon no kasano ti agibtur ken determinadokanto nga agtultuloy nga agibtur. w23.07 2-3 ¶4, 8

Karamantayo man kadagiti dinutokan ti espiritu wenno ‘sabsabali a karnero,’ masapul nga agtalinaedtayo iti “Dalan ti Kinasanto.” Dayta ti makatulong tapno agtultuloytayo nga agdaydayaw ken Jehova ita ken iti masanguanan inton iyegen ti Pagarian dagiti bendision. (Juan 10:16) Manipud 1919 C.E., minilionen a lallaki, babbai, ken ubbing ti nangpanaw iti Babilonia a Dakkel, ti sangalubongan nga imperio ti ulbod a relihion, ken nangrugida a magna iti dayta a simboliko a dalan. Idi pinanawan dagiti Judio ti Babilonia, sinigurado ni Jehova a maikkat dagiti bangen. (Isa. 57:14) Ti ngay met “Dalan ti Kinasanto” iti kaaldawantayo? Ginasut a tawen sakbay ti 1919, inusar ni Jehova dagiti lallaki a managbuteng kenkuana tapno tumulongda a mangsimpa iti dalan para kadagiti rummuar iti Babilonia a Dakkel. (Idilig ti Isaias 40:3.) Inaramidda ti napateg a trabaho a panagsagana—ti naespirituan a panangisimpa iti dalan—tapno inton agangay, makaruar dagiti napudno a tattao iti Babilonia a Dakkel ken makastrekda iti naespirituan a paraiso a nakaisublian ti nadalus a panagdaydayaw ken Jehova. w23.05 15-16 ¶8-9

Kayat ni Jehova a naragsak ken situtuloktayo nga agserbi kenkuana. (2 Cor. 9:7) Masapul kadi ngarud nga itultuloytayo a ragpaten ti maysa a naespirituan a kalat uray no saantayo a determinado a mangragpat iti dayta? Kitaentayo ti ulidan ni apostol Pablo. Imbagana: “Siiistrikto a disdisiplinaek ti bagik ken ad-adipenek.” (1 Cor. 9:​25-27, ftn.) Pinilit ni Pablo ti bagina a mangaramid iti umiso uray no nariknana a sabali ti pagannayasanna. Naragsakan kadi ni Jehova iti panagserbi ni Pablo? Wen! Ken ginunggonaan ni Jehova gapu kadagiti panagreggetna. (2 Tim. 4:​7, 8) Kasta met, maragsakan ni Jehova no makitana nga ikagkagumaantayo a ragpaten ti kalattayo uray no saantayo a marikna a determinadotayo a mangaramid iti dayta. Naragsak ta ammona nga uray no saantayo a kanayon a magusgustuan nga aramiden ti maysa nga aktibidad, ar-aramidentayo dayta gapu ta ay-ayatentayo isuna. No kasano a binendisionan ni Jehova ni Pablo, bendisionanna met dagiti panagreggettayo. (Sal. 126:5) Ken no mariknatayo ti pamendision ni Jehova, mabalin a mangrugi pay ketdin a mariknatayo nga inspiradotayo. w23.05 28-29 ¶9-10

Impada ni apostol Pablo dagiti saan a maisalakan iti aldaw ni Jehova kadagiti tattao a matmaturog. Saanda nga ammo ti mapaspasamak iti aglawlawda wenno ti panaglabas ti oras. Dida maawatan dagiti napateg a mapaspasamak isu nga awan ti reaksionda. Kaaduan a tattao ita ket matmaturog iti naespirituan. (Roma 11:8) Saanda a makitkita dagiti ebidensia nga agbibiagtayon iti “maudi nga al-aldaw” ken asidegen ti dakkel a rigat. (2 Ped. 3:​3, 4) Nupay kasta, ammotayo a mas kasapulantayo ti agtalinaed a siririing bayat ti panaglabas ti tunggal aldaw. (1 Tes. 5:6) Masapul ngarud nga agtalinaedtayo a kalmado ken kanayon a nasimbeng ti panunottayo. Apay? Tapno saantayo a maimpluensiaan kadagiti isyu ita maipapan iti politika wenno kagimongan. Kumaronto ti pannakapilittayo a dumasig kadagita nga isyu bayat nga umas-asideg ti aldaw ni Jehova. Ngem masapul a ditay agdanag no anianto ti aramidentayo. Matulongannatayo ti espiritu ti Dios nga agbalin a kalmado ken nasimbeng tapno makaaramidtayo kadagiti nainsiriban a desision.—Luc. 12:​11, 12. w23.06 9-10 ¶6-7

Ania ti mapanunotmo no mangngegmo ti nagan a Samson? Mabalin a malagipmo ti maysa a lalaki a naisangsangayan ti pigsana. Hustoka. Ngem nakaaramid ni Samson iti kamali a desision a nagdakes dagiti resultana. Nupay kasta, nagpokus ni Jehova iti amin nga inaramid ni Samson a mangipakita iti kinamatalekna, ket impaisuratna dagita iti Biblia a pakagunggonaantayo. Inusar ni Jehova ni Samson a mangaramid kadagiti nakaskasdaaw a banag tapno matulonganna ti Israel, ti ili a pinilina. Adu a siglo kalpasan a natay ni Samson, inwanwan ni Jehova ni apostol Pablo a mangiraman iti nagan ni Samson iti listaan dagiti tattao a naisangsangayan ti pammatida. (Heb. 11:​32-34) Maparegtatayo iti ulidan ni Samson. Nagtalek ken Jehova, uray kadagiti narigat a situasion. Maparegta ken makasursurotayo iti ulidanna. w23.09 2 ¶1-2

Masursurotayo ti agibtur no masansan ken sipapasnek nga ibagatayo ken Jehova ti amin a pakaseknan ken pakadanagantayo. (1 Tes. 5:17) Baka awan ti nakaro a pakasuotam ita. Ngem no ngay masuronka, mariribukanka, wenno dimo ammo ti aramidem, agpatpatulongka kadi ken Jehova? No kanayon nga agpatulongka iti Diostayo kadagiti inaldaw ken babbabassit a problemam, dikanton agpangadua nga agpatulong no maipasangoka iti daddadakkel a problema. Masiguradom nga ammona ti eksakto a tiempo a tulongannaka ken ti eksakto a tulong a kasapulam. (Sal. 27:​1, 3) Ad-adda a makapagibturtayo inton dakkel a rigat no ibturantayo dagiti pakasuotantayo ita. (Roma 5:3) Apay a maibagatayo dayta? Napaneknekanen ti adu a kakabsat a tunggal pakasubokan ti pammati a naibturanda ket nakatulong tapno maibturanda ti sumaruno a suot. Gapu iti panagibturda, simmayaat ti personalidadda, ken bimmileg ti pammatida a sisasagana ken situtulok ni Jehova a tumulong kadakuada. Gapu iti dayta a pammatida, naibturanda ti sumaruno a suot.—Sant. 1:​2-4. w23.07 3 ¶7-8

Nainkalintegan ni Jehova ta napakumbaba ken naasi. Kas pagarigan, makita ti kinapakumbaba ni Jehova iti tiempo sakbay a dinadaelna dagiti dakes a tattao iti Sodoma. Babaen kadagiti anghelna, imbilin ni Jehova iti nalinteg a ni Lot a mapan agkamang iti kabambantayan. Mabuteng ni Lot a mapan sadiay. Isu a nagpakaasi nga agkamangda a sangapamiliaan iti Zoar, maysa a bassit nga ili a naikeddeng a madadael. Mabalin koma nga impapilit ni Jehova a suroten ni Lot ti eksakto nga imbilinna. Ngem pinatganna ti kiddaw ni Lot, uray pay kaipapanan dayta a saanen a madadael ti Zoar. (Gen. 19:​18-22) Ginasut a tawen kalpasanna, kinaasian ni Jehova dagiti taga-Nineve. Imbaonna ni propeta Jonas a mangipakaammo nga asidegen ti pannakadadaelda ken ti siudadda. Ngem idi nagbabawi dagiti taga-Nineve, naasian kadakuada ni Jehova isu a saanna nga intuloy ti panangdadaelna iti siudad.—Jon. 3:​1, 10; 4:​10, 11. w23.07 21 ¶5

Ania ti masursurotayo iti napasamak ken Jehoas? Kayariganna ti maysa a kayo a narabaw dagiti ramutna ken agdepdepende iti tukal, wenno tungkal, a mangsarapa iti dayta. Idi natayen ti tukal—ni Jehoiada—ken nagpalayupoy ti angin ti apostasia, natuang ni Jehoas. Nalawag nga ipakita dayta nga ilustrasion a ti panagbutengtayo iti Dios ket masapul a saan laeng a nakadepende iti nasayaat nga impluensia dagiti padatayo a Kristiano ken kapamiliatayo. Tapno agtalinaed a nabileg ti espiritualidadtayo, masapul a datayo a mismo ti mangpabileg iti debosion ken panagbutengtayo iti Dios babaen ti regular a panagadal, panagutob, ken panagkararag. (Jer. 17:​7, 8; Col. 2:​6, 7) Saan nga adu unay ti kayat ni Jehova nga aramidentayo. Mabasatayo iti Eclesiastes 12:13 ti kayatna nga aramidentayo: “Agbutengka iti pudno a Dios ken tungpalem dagiti bilinna, ta daytoy ti intero nga obligasion ti tao.” No adda panagbutengtayo iti Dios, makapagtalinaedtayo a matalek aniaman ti mapasamak iti masanguanan. Awan ti aniaman a makadadael iti pannakigayyemtayo ken Jehova. w23.06 18-19 ¶17-19

Ti garantia nga inaramid ti Dios ket mangrugi kadagitoy a sasao: “Imbaga Daydiay nakatugaw iti trono.” (Apoc. 21:5a) Espesial dagitoy a sasao ta maysa daytoy iti tallo laeng a gundaway iti libro nga Apocalipsis a ni Jehova a mismo ti nagsao kadagiti sirmata. Isu a daytoy a garantia ket saan nga impaay ti maysa a nabileg nga anghel, wenno uray ti napagungar a ni Jesus, no di ket ni Jehova a mismo! Ipakita daytoy a kinapudno a mapagtalkan ti sumaruno a sasao. Apay a kasta? Gapu ta “saan a mabalin nga agulbod” ni Jehova. (Tito 1:2) Isu a sigurado a pumayso dagiti sasao a mabasatayo iti Apocalipsis 21:​5, 6. Usigentayo ti sao a “Kitaem!” Ti Griego a sao a naipatarus kas “kitaem!” ket maulit-ulit a nausar iti libro nga Apocalipsis. Ania ti sumaruno kalpasan ti eksklamasion? Kinuna ti Dios: “Pabpabaruek ti amin a bambanag.” Wen, ni Jehova ti agsasao maipapan kadagiti panagbalbaliw iti masanguanan. Ngem para kenkuana, dayta a kari ket sigurado a matungpal ta ibagbagana dagitoy a panagbalbaliw a kas man la mapaspasamaken dagita.—Isa. 46:10. w23.11 3-4 ¶7-8

Adda dagiti pagkapuyan ni apostol Pedro. Kitaentayo ti sumagmamano a pagarigan. Idi imbaga ni Jesus a mapasaranna ti rigat ken matay kas kaitungpalan ti padto ti Biblia, tinubngar ni Pedro. (Mar. 8:​31-33) Maulit-ulit met a nagsusupiat da Pedro ken ti dadduma nga apostol no asino kadakuada ti katan-okan. (Mar. 9:​33, 34) Iti maudi a rabii sakbay a matay ni Jesus, bigla a piningas ni Pedro ti lapayag ti maysa a lalaki. (Juan 18:10) Iti daydi met la a rabii, nagbuteng ni Pedro isu a namitlo nga inlibakna nga am-ammona ti gayyemna a ni Jesus. (Mar. 14:​66-72) Kas resultana, nagsangit ni Pedro gapu iti napalalo a ladingitna. Saan a binaybay-an ni Jesus ti maup-upay nga apostolna. Idi napagungaren ni Jesus, inikkanna ni Pedro iti gundaway a mangpaneknek nga ay-ayatenna latta isuna. Inawis ni Jesus ni Pedro a sipapakumbaba nga agserbi kas pastor dagiti karnerona. (Juan 21:​15-17) Situtulok nga inawat dayta ni Pedro. Adda isuna idiay Jerusalem idi aldaw ti Pentecostes ken karaman kadagiti immuna a dinutokan ti nasantuan nga espiritu. w23.09 22 ¶6-7

“Ipastoranyo ti arban ti Dios,” imparegta ni apostol Pedro kadagiti padana a panglakayen. (1 Ped. 5:​1-4) No panglakayenka, ammomi nga ay-ayatem dagiti kakabsat ken kayatmo nga ipastoran ida. Ngem no dadduma, mabalin a mariknam a nakaad-adu ti ar-aramidem wenno nabambannogka isu a saanmo a maitungpal dayta nga annongem. Ania ti mabalinmo nga aramiden? Ibagam ken Jehova ti amin a marikriknam. Insurat ni Pedro: “No adda asinoman nga agserbi, aramidenna koma dayta sigun iti bileg nga ipapaay ti Dios.” (1 Ped. 4:11) Mabalin nga adda dagiti problema dagiti kakabsat a saan a naan-anay a masolbar iti daytoy a sistema ti bambanag. Ngem laglagipem a mas kabaelan ida a tulongan “ti panguluen a pastor” a ni Jesu-Kristo ngem sika. Maaramidna dayta ita ken iti baro a lubong. Ti laeng kidkiddawen ti Dios nga aramiden dagiti panglakayen ket ayaten ken ipastoranda dagiti kakabsat, ken agbalinda nga “ulidan iti arban.” w23.09 29-30 ¶13-14

Masapul a liklikantayo ti panagrasrason ti tao. No kitaentayo dagiti bambanag sigun iti panangmatmat ti tao, baka saantayton nga ikankano ni Jehova ken dagiti pagalagadanna. (1 Cor. 3:19) “Ti sirib daytoy a lubong” ket masansan a makaay-ayo kadagiti tarigagay ti tao. Tinulad ti sumagmamano a Kristiano idiay Pergamo ken Tiatira dagiti gagangay a kapanunotan dagiti immoral ken agdaydayaw iti idolo kadagita a siudad. Nangted ni Jesus iti nadagsen a balakad kadagita a kongregasion gapu ta pampanuynoyanda ti seksual nga immoralidad. (Apoc. 2:​14, 20) Ita, im-impluensiaandatayo dagiti tattao iti aglawlawtayo a mangtulad kadagiti di umiso a kapanunotanda. Baka kombinsirendatayo dagiti kapamilia ken am-ammotayo nga istriktotayo unay ken durogandatayo nga agkompromiso. Kas pagarigan, baka ibagbagada a saan a dakes a pagustuantayo dagiti tarigagaytayo ken daanen dagiti pagalagadan ti Biblia maipapan iti moral. No dadduma, mabalin nga irasontayo a saan unay a nalawag dagiti instruksion ni Jehova. Baka kayattayo pay ketdi ti “lumbes iti bambanag a naisurat.”—1 Cor. 4:6. w23.07 16 ¶10-11

Ni Maria nga ina ni Jesus kasapulanna ti bileg. Permi la ketdi ti danagna idi imbaga ni anghel Gabriel nga agsikogto uray awan asawana. Dina pay met napadasan ti mangpadakkel kadagiti annak, ngem masapul nga aywananna ti ubing nga agbalinto a Mesias. Ken gapu ta saan pay a nakidendenna ni Maria iti asinoman, kasanona nga ilawlawag amin dagita iti nobiona a ni Jose? (Luc. 1:​26-33) Kasano a napabileg ni Maria? Nagpatulong iti sabsabali. Kas pagarigan, nagkiddaw ken Gabriel iti kanayonan nga impormasion maipapan iti annongenna. (Luc. 1:34) Di nagbayag, napan “iti kabambantayan” ti Juda tapno bisitaenna ti kabagianna a ni Elisabet. Kinomendaran ni Elisabet ni Maria ken inwanwan ni Jehova tapno ibagana ti makaparegta a padto maipapan iti sikog ni Maria. (Luc. 1:​39-45.) Imbaga ni Maria a nagtignay ni Jehova “babaen ti nabileg nga imana.” (Luc. 1:​46-51) Inusar ni Jehova da Gabriel ken Elisabet a mangpabileg ken Maria. w23.10 14-15 ¶10-12

Limitado ti bilang dagiti pasurot ni Kristo a dinutokan ti nasantuan nga espiritu, ken addaanda iti espesial a relasion ken Jehova. Dagitoy a 144,000 ket agserbidanto kas papadi idiay langit a kadua ni Jesus. (Apoc. 14:1) Bayat ti kaaddada ditoy daga, dinutokan ida ti Dios babaen ti espirituna ken inamponna ida kas annakna. Ti Nasantuan a paset ti tabernakulo iladawanna daytoy nga espesial a relasionda iti Dios. (Roma 8:​15-17) Ti Kasasantuan a paset ti tabernakulo iladawanna ti langit a pagnanaedan ni Jehova. “Ti kortina” nga adda iti nagbaetan ti Nasantuan ken Kasasantuan iladawanna ti nainlasagan a bagi ni Jesus. Agingga a tao pay la idi ni Jesus, saan a makastrek iti langit tapno agbalin kas naindaklan a Nangato a Padi ti naespirituan a templo. Idi natayen ni Jesus kas tao, kas pangsubbot a daton para iti sangatauan, linuktanna ti gundaway tapno ti amin a Kristiano a dinutokan ti espiritu ket agbiagda idiay langit. Masapul met a matayda kas tao tapno maawatda ti nailangitan a gunggonada.—Heb. 10:​19, 20; 1 Cor. 15:50. w23.10 28 ¶13

Naalumamay ni Gideon idi krinitikar dagiti Efraimita. (Uk. 8:​1-3) Saan nga agung-unget idi simmungbat. Impakitana ti kinapakumbaba idi dimngeg kadagiti reklamoda, ken sitataktika a nakisarita isu a napagkalmana ti nabara a situasion. Ni Gideon ket matulad dagiti masirib a panglakayen no dumngegda a naimbag ken naalumamayda no makritikarda. (Sant. 3:13) Iti kasta, makatulongda iti panagtalinaed ti talna iti kongregasion. Idi napadayawan ni Gideon gapu iti panangabakna iti Midian, inturongna ti atension ken Jehova. (Uk. 8:​22, 23) Kasano a ni Gideon ket matulad dagiti naapointaran a lallaki? Masapul nga iturongda ti pammadayaw ken Jehova iti amin a maaramidanda. (1 Cor. 4:​6, 7) Kas pagarigan, no mapadayawan ti maysa a panglakayen gapu iti abilidadna a mangisuro, mabalin nga iti Sao ti Dios a naggapuan ti isursurona ti pangituronganna iti atension wenno iti naawatna a pannakasanay manipud iti organisasion ni Jehova. Baka masapul a panunoten no dadduma dagiti panglakayen no ti pamay-anda a mangisuro ket pakaidayawan ni Jehova wenno ti bagida. w23.06 4 ¶7-8

No saan a masungbatan ti ikarkararagtayo, mabalin nga isaludsodtayo iti bagitayo, ‘Umiso kadi ti ikarkararagko?’ Kaaduanna a pampanunotentayo nga ammotayo ti kasayaatan para kadatayo. Ngem dagiti banag a kidkiddawentayo ket mabalin a saan met gayam a ti kasayaatan para kadatayo. No ikarkararagtayo ti maysa a problema, mabalin nga adda nasaysayaat a solusion ngem iti kidkiddawentayo. Ken dadduma nga ikarkararagtayo ket mabalin a saan a maitunos iti pagayatan ni Jehova. (1 Juan 5:14) Kas pagarigan, usigentayo ti kiddaw dagiti nagannak a mangikarkararag ken Jehova nga agtalinaed koma ti anakda iti kinapudno. Umiso dayta a kiddaw. Ngem saan a piliten ni Jehova ti asinoman nga agserbi kenkuana. Kayatna nga amintayo, karaman dagiti annaktayo, ket pilientayo ti agdaydayaw kenkuana. (Deut. 10:​12, 13; 30:​19, 20) Isu a ti ikararag koma dagiti nagannak ken Jehova ket tulonganna ida a mangdanon iti puso ti anakda tapno matignay a mangayat ken Jehova ken agbalin a gayyemna.—Prov. 22:6; Efe. 6:4. w23.11 21 ¶5; 23 ¶12

Apay a ti panangliwliwa iti sabsabali ket napateg a pamay-an a maipakitatayo nga ay-ayatentayo ida? Sigun iti maysa a reperensia ti Biblia, ti sao nga inusar ni Pablo para iti “liwliwaen” kaipapananna “ti panagtakder iti sibay ti maysa a tao a mangparegta kenkuana no isut’ naipasidong [wenno makapaspasar] iti nakaro a pannakasuot.” No ngarud liwliwaentayo ti kapammatiantayo nga adda problemana, matulongantayo isuna nga agtultuloy a magna iti dalan ti biag. Kada liwliwaentayo ti kapammatiantayo, ipakpakitatayo nga ay-ayatentayo isuna. (2 Cor. 7:​6, 7, 13) Ti pannakipagrikna ket konektado unay iti panangliwliwa. Kasano? Ti mannakipagrikna a tao ket matignay a mangliwliwa iti sabsabali ken ikagumaanna a bang-aran ti panagsagabada. Umuna, makipagriknatayo; kalpasanna, mangliwliwatayo. Inkonektar ni Pablo ti pannakipagrikna ni Jehova iti panangliwliwa nga ipapaayna. Dineskribir ni Pablo ni Jehova kas “ti Ama a napnuan iti asi ken Dios ti amin a liwliwa.”—2 Cor. 1:3. w23.11 9-10 ¶8-10

Ekspektaren ti amin a pasurot ni Kristo nga agpasarda iti rigat. Napadasan dayta ni apostol Pablo. Imbagana kadagiti taga-Tesalonica: “Idi agkakaduatayo, kanayon nga impakpakaunami nga aglak-amtayo iti rigat. Ket . . . kasta ti napasamak.” (1 Tes. 3:4) Insuratna met kadagiti taga-Corinto: “Ta kayatmi a maammuanyo, kakabsat, ti rigat a napasaranmi . . . Dimi idi masigurado no malasatanmi wenno saan.” (2 Cor. 1:8; 11:​23-27) Ekspektaren met dagiti Kristiano ita nga adda dagiti rigat a mapasaranda. (2 Tim. 3:12) Bayat nga itultuloymo ti mamati ken agtulnog ken Jesus, mabalin a saan a nasayaat ti panangtrato kenka dagiti gagayyem wenno kakabagiam. Adda kadi dagiti timmaud a problemam iti pagtrabahuan gapu ta ikagkagumaam ti agbalin a mapagtalkan iti amin a banag? (Heb. 13:18) Busbusorendaka kadi dagiti autoridad gapu iti panangasabam? Ngem aniaman a rigat ti mabalin a mapasarantayo, imbaga ni Pablo a masapul nga agragsaktayo. w23.12 10-11 ¶9-10

Inibturan ni Jacob ti adu a problema. Adda inaramid ti dua nga annak ni Jacob a da Simeon ken Levi a nakaibabainan ti pamiliada ken ti nagan ni Jehova. Kasta met, natay ti dungdungnguenna nga asawa a ni Raquel bayat nga ipaspasngayna ti maikadua nga anakda. Ken gapu iti nakaro a bisin, napilitan ni Jacob nga umakar iti daga ti Egipto uray no lakayen. (Gen. 35:​16-19; 37:28; 45:​9-11, 28) Iti laksid ti amin a problema ni Jacob, saan a napukaw ti pammatina ken Jehova ken kadagiti karina. Isu nga impakita ni Jehova nga an-anamonganna ni Jacob. Kas pagarigan, binendisionan ni Jehova ni Jacob iti adu a sanikua. Ken panunotenyo laengen ti panagyaman unay ni Jacob ken Jehova idi nakitana manen ti anakna a ni Jose nga impagarupna a nabayagen a natay! Gapu iti nasinged a pannakigayyem ni Jacob ken Jehova, napagballigianna dagiti problemana. (Gen. 30:43; 32:​9, 10; 46:​28-30) No taginayonentayo ti nasinged a pannakigayyemtayo ken Jehova, mapagballigiantayo met dagiti di ninamnama a problema. w23.04 15 ¶6-7

Ti Salmo 23 ket maysa a kanta a mangyebkas iti panagtalek iti ayat ken nadungngo a panangaywan ni Jehova. Ni David ti nangisurat iti dayta a salmo a mangdeskribir iti nasinged a relasionna iti Pastorna a ni Jehova. Natalged ti rikna ni David ta ipalpalubosna a ni Jehova ti mangiturong kenkuana, ken naan-anay nga agpampannuray iti Diosna. Ammo ni David nga inaldaw nga ipakpakita ni Jehova ti ayatna kenkuana. Apay a kombinsido unay ni David? Narikna ni David a nagsayaat ti pannakaaywanna ta kanayon nga ipapaay ni Jehova ti amin a kasapulanna. Ammo met ni David a gayyemna ni Jehova ken an-anamonganna. Isu nga aniaman ti mapasamak kenkuana, masiguradona a kanayon nga ipaay ni Jehova ti amin a kasapulanna. Naan-anay a nagtalek ni David iti nadungngo a panagayat ni Jehova isu a saan a nadanagan. Gapu iti dayta, nakaragragsak isuna ken kontento.—Sal. 16:11. w24.01 29 ¶12-13

Manipud idi Gubat Sangalubongan II, siwayawaya ti ili ni Jehova a nangasaba iti adu a pagilian. Talaga a rimmang-ay ti trabaho. Ita, dagiti miembro ti Bagi a Manarawidwid ket agtultuloy nga agpapaiwanwan ken Kristo. Kayatda a dagiti instruksion nga ipapaayda kadagiti kakabsat iyanninawda ti panangmatmat da Jehova ken Jesus iti bambanag. Ken us-usarenda dagiti manangaywan iti sirkito ken panglakayen a mangipaay iti instruksion kadagiti kongregasion. Dagiti panglakayen a dinutokan ti espiritu ket adda iti “kannawan nga ima [ni Kristo].” (Apoc. 2:1) Siempre, imperpekto ken makaaramid iti kamali dagitoy a panglakayen. Nagkamali met idi da Moises ken Josue ken uray dagiti apostol. (Num. 20:12; Jos. 9:​14, 15; Roma 3:23) Ngem nalawag a makitatayo nga iwanwanwan ni Kristo ti matalek nga adipenna ken dagiti naapointaran a panglakayen. Ken itultuloyna nga aramiden dayta. Naan-anay ngarud a makapagtalektayo iti panangiwanwanna babaen kadagita a naapointaran a mangidaulo kadatayo. w24.02 23 ¶13-14

Ita, maparagsaktayo ni Jehova no ibagatayo iti dadduma nga ay-ayatentayo unay isuna ken agyamyamantayo kenkuana. No addatayo iti ministerio, laglagipentayo a ti kangrunaan a kalattayo ket iyasidegtayo dagiti tattao ken Jehova tapno mariknada met ti marikriknatayo iti ay-ayatentayo nga Ama. (Sant. 4:8) Maragsakantayo a mangipakita kadagiti tattao iti ibagbaga ti Biblia maipapan ken Jehova, kas iti ayatna, hustisia, sirib, pannakabalinna, ken ti dadduma pay a makaay-ayo a kualidadna. Maidaydayawtayo ken maparagsaktayo met ni Jehova no ikagumaantayo a tuladen isuna. No aramidentayo dayta, agbalintayo a naiduma iti daytoy dakes a lubong. Mabalin a madlaw dayta dagiti tattao ken aginteresda no apay. (Mat. 5:​14-16) Bayat ti pannakilangentayo kadakuada iti kada aldaw, baka mabalintayo nga ilawlawag no apay a naidumatayo. Kas resultana, mayasideg iti Diostayo dagiti napasnek a tattao. No idaydayawtayo ni Jehova kadagita a pamay-an, maparagsaktayo ti pusona.—1 Tim. 2:​3, 4. w24.02 10 ¶7

Tapno agbalinka a nataengan iti naespirituan, masapul a sursuruem dagiti praktikal a paglaingan. Makatulongto kenka dagita a mangibaklay kadagiti responsabilidad iti kongregasion, makastrek iti trabaho tapno masuportaram ti bagim wenno pamiliam, ken nasayaat ken naragsak ti relasionmo iti dadduma. Kas pagarigan, sursuruem ti agbalin a nalaing nga agbasa ken agsurat. Ibaga ti Biblia a ti naragsak ken naballigi a tao ket daydiay inaldaw a mangbasbasa iti Sao ti Dios ken pampanunotenna a naimbag dayta. (Sal. 1:​1-3) No inaldaw a basaenna ti Biblia, maammuanna ti pampanunot ni Jehova ket dayta ti tumulong kenkuana tapno makapagpanunot ken makapagrason a naimbag. (Prov. 1:​3, 4) Kasapulan dagiti kakabsat dagiti responsable a brother a mangisuro ken mangbalakad kadakuada manipud iti Biblia. No nalaingka nga agbasa ken agsurat, makaisuro ken makapabileg iti pammati dagiti maaramidmo a palawag ken komento. Makaisuratka met kadagiti nabagas a punto a mangpabileg iti pammatim ken mangparegta iti dadduma. w23.12 26-27 ¶9-11

No mabutengka, utobem dagiti aramidento ni Jehova iti masanguanan inton awanen ni Satanas. Iti maysa a demostrasion iti 2014 a rehional a kombension, naipakita ti maysa nga ama a mangilawlawag iti pamiliana no kasano ti nalabit pannakaibagan ti 2 Timoteo 3:​1-5 no kas pagarigan ta mausar dagitoy a naipakpakauna a bersikulo a tumukoy kadagiti mapasamakto iti Paraiso: “Iti baro a lubong, dumtengto dagiti kararagsakan a tiempo. Ta dagiti tattao managayatdanto iti sabsabali, managayat iti naespirituan a kinabaknang, naemma, napakumbaba, managdaydayaw iti Dios, natulnog kadagiti nagannak, managyaman, napudno, addaan iti dakkel a panagayat kadagiti pamiliada, sidadaan iti tulagan, kanayon a nasayaat ti ibagbagada maipapan iti sabsabali, managteppel, naalumamay, managayat iti kinaimbag, mapagtalkan, managpabus-oy, napakumbaba, managayat iti Dios imbes a managayat iti ragragsak, nga addaanda iti pudpudno a nadiosan a debosion; ket agtalinaedka a nasinged kadagitoy a tattao.” Pagiinnestoriaanyo kadi a sangapamiliaan wenno kadagiti kakabsat no kasanonto ti biag iti baro a lubong? w24.01 6 ¶13-14

Masiguradotayo a maragragsakan ni Jehova iti ilina! Kuna ti Biblia: “Maragsakan ni Jehova kadagiti tattaona.” (Sal. 149:4) Ngem no dadduma, adda dagiti maup-upay unay ket baka mapanunotda, ‘Maragragsakan met la kadi ni Jehova kaniak?’ Kasta ti napanunot ti adu a matalek nga agdaydayaw ken Jehova idi panawen ti Biblia. (1 Sam. 1:​6-10; Job 29:​2, 4; Sal. 51:11) Nalawag nga ipakita ti Biblia a mabalin a maragsakan wenno anamongan ni Jehova dagiti imperpekto a tattao. Kasano? Masapul nga ipakitatayo ti pammatitayo ken Jesu-Kristo ken agpabautisartayo. (Juan 3:16) Iti kasta, ipakpakitatayo iti publiko a nagbabawyantayon dagiti basoltayo ken inkaritayon iti Dios nga aramidentayo ti pagayatanna. (Ara. 2:38; 3:19) Maragsakan ni Jehova no aramidentayo dagita tapno agbalintayo a nasinged a gayyemna. No itultuloytayo nga aramiden ti kabaelantayo a tungpalen ti inkaritayo idi nagdedikartayo, maragsakan ni Jehova kadatayo ken ibilangnatayo a nasinged a gagayyemna.—Sal. 25:14. w24.03 26 ¶1-2

Matuladtayo dagiti adalan no itultuloytayo ti mangasaba uray no paritandatayo dagiti autoridad. Makapagtalektayo met a tulongannatayo ni Jehova a mangitungpal iti ministeriotayo. Ikararagmo ngarud nga agbalinka a natured ken masirib. Kiddawem met ken Jehova a tulongannaka a mangibtur kadagiti problemam. Adu kadatayo ti makapaspasar kadagiti pisikal wenno emosional a problema. Adda met dagiti natayan iti ipatpateg iti biag, narigat ti situasion ti pamiliada, maidaddadanes, wenno dadduma pay. Rimmigat pay ketdi nga ibturan dagita gapu kadagiti problema a kas iti pandemia ken gubat. Ibukbokmo ken Jehova ti amin a linaon ti pusom. Ibagam kenkuana ti situasionmo a kas iti panangibagam iti nasinged a gayyem. Agtalekka a “tulongannakanto” ni Jehova. (Sal. 37:​3, 5) Ti agtultuloy a panagkararag ti tumulong kadatayo nga ‘agibtur iti rigat.’ (Roma 12:12) Ammo ni Jehova ti ib-ibturan dagiti agdaydayaw kenkuana—“dengdenggenna ti panagpatulongda.”—Sal. 145:​18, 19. w23.05 5-6 ¶12-15

No agaramidtayo kadagiti importante a desision, masapul a tarusantayo “ti pagayatan ni Jehova” ken surotentayo dayta. (Efe. 5:17) No birokentayo dagiti prinsipio ti Biblia nga agaplikar iti situasiontayo, kayatna a sawen nga ikabkabilangantayo ti panangmatmat ni Jehova iti situasiontayo. No iyaplikartayo dagiti prinsipiona, lallalo a makaaramidtayo kadagiti nasayaat a desision. Kayat ti “managdakdakes,” ti kabusortayo a ni Satanas, nga agbalintayo nga okupado unay iti bambanag daytoy a lubong tapno awanen ti tiempotayo nga agserbi iti Dios. (1 Juan 5:19) Mabalin a ti maysa a Kristiano ket mangrugin nga agpokus iti material, edukasion, wenno trabaho imbes a kadagiti gundaway a makapagserbi ken Jehova. No mapasamak dayta, ipakpakitana a maim-impluensiaanen ti panunotna iti panagpampanunot daytoy a lubong. Siempre, saan met ketdi a dakes dagita, ngem masapul a saan koma a dagita ti numero uno iti biagtayo. w24.03 24 ¶16-17