FILEMON

[Managayat].

Maysa a Kristiano nga addaan iti adipen, naitimpuyog iti kongregasion idiay Colosas. Ti balayna iti daytoy a siudad iti makin-abagatan a laud a paset ti Asia Menor ket nagserbi kas paggigimongan ti kongregasion sadiay. Pinaneknekan ni Filemon nga isu ket gubuayan ti bang-ar kadagiti padana a Kristiano ken mapagulidanan iti pammati ken ayat. Imbilang ni apostol Pablo kas dungdungnguen a katrabahuan. (Flm 1, 2, 5-7; idiligyo ti Col 4:9 iti Flm 10-12.) Yantangay tartarigagayan ni Pablo ti makidagus ken Filemon, daytoy ti mangipakita a managpadagus daytoy a tao.​—Flm 22; idiligyo ti Ara 16:14, 15.

Agparang a da Apia ken Arquipo ket kameng ti sangakabbalayan ni Filemon, ta nainagananda met iti personal a surat ni Pablo ken Filemon. Nalabit ni Apia ket asawa ni Filemon, ket mabalin nga anakna ni Arquipo.​—Flm 2.

Agparang a nagbalin a Kristiano ni Filemon gapu kadagiti panagregget ni Pablo. (Flm 19) Nupay kasta, yantangay saan a nangasaba ni Pablo idiay Colosas a mismo (Col 2:1), mabalin a naammuan ni Filemon ti Nakristianuan a sursuro kas resulta ti dua-tawen a panangaskasaba ti apostol idiay Efeso, idi “amin dagidiay agnanaed iti distrito ti Asia [a makasakup iti Colosas] nangngegda ti sao ti Apo.”​—Ara 19:10.

Sumagmamano a tiempo sakbay nga immawat ni Filemon iti surat ni Pablo, pimmanawen kenkuana ti adipenna a ni Onesimo. Daytoy nagtalaw nga adipen ket mabalin a tinakawanna pay ni apona iti kuarta tapno adda gastuenna nga aglayag nga agturong idiay Roma, a sadiay naam-ammona ni Pablo idi agangay ket nagbalin a Kristiano.​—Flm 10, 11, 18, 19; kitaenyo ti ADIPEN.