Maysa a Naragsak nga Ili—Apay?
DAGITI pudno a Kristiano itatta naragsakda nga ili. Ngamin ta, agserserbitayo “iti naragsak a Dios,” ni Jehova. (1 Timoteo 1:11) Ipapaayna kadatayo ti espirituna, ket maysa a bunga dayta nga espiritu isu ti rag-o.—Galacia 5:22.
Ti kasta a nauneg a rag-o ti natangken ken maibturanna ti rigat. Kas pangarigan, naikabil ni Jesu-Kristo iti ut-ot ti pannakailansa ken ti pannakaibabain babaen ti pannakapapatayna kas maysa a manangtabbaaw. Kaskasdi, “gapu iti rag-o a naikabil iti sanguananna inibturanna ti kayo a pagtutuokan.” (Hebreo 12:2) Ammo ni Jesus nga iti masakbayanna adda dagiti dadakkel a gundaway ken pribilehio a nainaig iti serbisiona ken ni Jehova. Ti panangipamaysana iti panangmatmatna kadagitoy masanguanan a pribilehio ti nakatulong kenkuana a nangsalimetmet iti rag-ona iti tengnga ti panagsagsagaba.
Kayat ni Jesus a dagiti adalanna agbalinda met a narag-o. Kunana: “Dagitoy sinaok kadakayo, tapno ti rag-ok agtaeng koma kadakayo ket ti rag-oyo agdanonan koma.” (Juan 15:11) Daytoy ti pimmudno kadagiti Saksi ni Jehova itatta. Adu dagiti rason a maysatayo nga ili a narag-o. Ammotayo ti kinapudno, nga isut’ nangwayawaya kadatayo manipud ti panangpetpet ti an-anito ken dagiti ulbod a narelihiusuan a pampammati. (Juan 8:32) Kasta met, ammotayo no sadino ti ayantayon iti agos ti panniempo ket pagragsakantayo ti dandanin a matungpal a namnama ti pannakaisalakan. (Lucas 21:28) Nasalaknibantayo met manipud adu a parparikut—maysa kadakuada isu dagiti saksakit a maiyakar gapu iti seksual a pannakidenna—a naipasango kadagidiay di mangal-alagad kadagiti naibatay-Biblia a moralidad. Tagtagiragsakentayo ti kasasayaatan la unay a pannakilangenlangen kadagiti tattao nga interesado nga agaramid iti pagayatan ni Jehova. Ken, wen, addaantayo iti naindaklan a pribilehio a makiramraman iti panangikaskasaba ti naimbag a damag ti Pagarian ken panagaramid ti ad-adalan kadagiti tattao a kimmarnero.—Mateo 24:14; 28:19, 20.
Ngem nupay pudno daytoy kadagiti isuamin a Saksi ni Jehova, dakayo met ngay kas indibidual? Apay met a maikuna nga addaankay ti rason nga agrag-o a kadua dagiti dadduma iti ili ni Jehova?
Panangsapul iti Rag-o iti Trabaho a Panagebanghelio
Dadduma makitada a narigat ti pannakiramanda iti panangaskasaba a trabaho iti binalaybalay. Nalabit saanda a nairuam iti iyaasideg kadagiti estranghero ken ti pannakipatpatang kadakuada. Wenno mariknada nga agkurangda no maipapan iti panangisuro kadagiti dadduma. Kasta met aya ti panagrikriknayo no maminsan? No kasta, kasano a maaddaankayo ti rag-o iti trabaho a panagebanghelio?
Umuna, maaddaan koma iti positibo a kababalin. Adu a tattao ti maragsakan nga agtrabaho iti sidong dagiti tattao a nalalatak wenno kadagiti nalatak a politiko. Ngem anian a dakdakkel a rag-o ti rebbeng a makitatayo no datayo ti us-usaren “ti Ari ti kinaagnanayon,” ni Jehova a Dios a mismo!—1 Timoteo 1:17.
Laglagipenyo met, a daytoy isut’ maysa a trabaho a nikaanoman dinto mauliten. Panunotenyo laengen! Dagiti anghel mismo ti mangiturturong ken mangiwanwanwan kadagiti Kristiano ditoy daga iti panagreggetda nga agsapul kadagiti tattao a kimmarnero. (Apocalipsis 14:6) Di aya mangyeg daytoy ti rag-o iti pusoyo?
Panangsapul Rag-o iti Irarang-ay ti Pagarian
Ti sabali pay a rason tapno maaddaan iti positibo a panangmatmat iti panangaskasaba isu ti nagsayaat nga epekto dayta. Impadto ti Biblia: “Ti bassit agbalinto a sangaribo, ket ti kabassitan maysa a napigsa a nasion. Siak, ni Jehova, aramidekto a nadaras iti panawenna.” (Isaias 60:22) Daytoy a kari ni Jehova ti pimmudno kadagiti nabiit pay. Kas pangarigan, bayat ti 1986 a tawen ti serbisio, 225,868 ti nabautisaran kas simbolo ti amin-kararua a dedikasionda ken ni Jehova a Dios. Adda met ti 6.9 porsiento nga irarang-ay iti promedio a bilang dagiti makiramraman iti panangisaknap kadagiti kinapudno iti Biblia kadagiti dadduma.
Awan duadua a daytoy nga irarang-ay ti makita met iti mismo a kongregasion wenno sirkitoyo. Um-umayen dagiti kabbaro kadagiti panaggigimong ket agar-aramidda metten kadagiti nesesita a panagbalbaliw ti panagbiagda tapno makapagserbida iti Dios. Di aya nga itudtudo daytoy a kinapudno a ti trabaho a panangaskasaba ti addaan ti pammendision ni Jehova? Ti pannakiraman iti daytoy nga irarang-ay ngarud ti gubuayan ti dakkel a rag-o kadakayo. Pudno, mabalin nga iti personal dikay nakaiyadal iti maysa nga indibidual agingga iti punto ti pannakabautisarna. Ngem iti kinapudnona ditay met mabalin nga alaen ti dayaw iti panangiyeg iti maysa iti kinapudno. ‘Ti Dios ti mangpadakkel iti dayta,’ kuna ni Pablo. (1 Corinto 3:6-9) Amin a miembro ti kongregasion ti addaan pannakiraman iti panangtulong ti maysa a kabbaro. Kasano? Babaen iti kaaddatayo kadagiti panaggigimong, panagkomento, ti nadayaw a panangkablaaw kadagiti kabbaro, ken ti panagtigtignayda iti pamay-an a mamagbalin a makaallukoy ti kinapudno.
Nupay kasta, dakdakkel a rag-o ti magun-odan no addaankayo ti ad-adda a direkta a pannakiraman iti trabaho a panangaskasaba kadagiti panagbalaybalay ken ti panangyadal iti Biblia iti pagtaengan. Idi napan a tawen, ti promedio a, 2,726,252 a linawas a panangyadal ti Biblia ti maikonkondukta. Apay a dikay mangaramid ti dakdakkel a panagregget a makiraman iti daytoy naragsak a trabaho? Itukonyo ti panagadal ti Biblia iti maysa nga am-ammoyo, nalabit maysa a kaarruba wenno maysa nga indibidual a nakaipaimaan ti literatura. Dumawatkayo iti tulong ni Jehova iti panangsapul iti kasta a kimmarnero a tao.
Panangparmek kadagiti Lapped nga Agturong iti Rag-o
Siempre, no marikna ti maysa a tao a dina kabaelan ti panangisuro kadagiti dadduma, agbalin daytoy a pudno a lapped iti panangsapulna iti rag-o iti ministerio iti tay-ak. Ngem, laglagipenyo, a “ti pannakaan-anaytayo nga agbalin a kualipikado ti agtaud iti Dios.” (2 Corinto 3:5) Ket babaen iti organisasionna nangipaay ni Jehova kadagiti adu a nagsayaat a katulongan tapno mabadangantay nga agbalin a makakualipikar kas epektibo a ministro.
Umuna, nagadu kadatayo ti agserserbin iti Dios iti nakabaybayagen ken adun ti kapkapadasanna iti ministerio ti tay-ak. Mabalintayo ti makikadua kadagitoy aduan kapadasanen a ministro iti panagtrabahoda ket agadal wenno agsurotayo kadakuada. Mainayon pay, kada bulan agparang dagiti nagsasayaat a suhestion idiay Ti Ministeriotayo iti Pagarian. Sa adda met ti publikasion a Reasoning From the Scriptures, a naglaon kadagiti adu a nababaknang nga impormasion a mangpatadem iti kinasigotayo a mangasaba. Aramatenyo dagitoy a kagawaan ket agsagana a naan-anay pay maipaay iti ministerio iti tay-ak. Agpanunot kadagiti baro ken makapainteres a pamay-an a pangyam-ammo iti bagiyo idiay ruangan. Wenno usigen dagiti nadumaduma a pamay-an a pangallukoy kadagiti bumalay a makipatpatang. Bayat ti panagbalinyo nga ad-adda nga epektibo iti tay-ak, ti entusiasmo ken rag-oyo iti panangasaba awan duadua rumang-ay met.
Ti ministerio naragragsak no mabalinantay ti makisao kadagiti tattao. Kadagiti dadduma a teritorio aminentayo nga adda ti problema. Mabalinyo kadi ti mangiyurnos iti pannakiramanyo iti tay-ak ti serbisio iti panawen nga ad-adu dagiti tattao ti adda kadagiti pagtaenganda, kas iti nasapa a paset ti rabii? Nasarakan dagiti adu ti panangaramid iti dayta ti ad-adda nga epektibo. Mabalinyo met a pagreggetan ti panangirugi ken pannakisao kadagiti tattao sadinoman a pakasarakan kadakuada—kadagiti lansangan, no agtutugawda idiay parke, no agdaldalusda iti kotseda. Laglagipenyo a dagiti tattao kasapulanda ti kinapudno ken dagiti biag ti nairaman. Daytoy ti makatulong a mangtignay kadakayo a mangparmek kadagiti pagannayasan iti kinamanagbabain. Nupay pudno a ti kadakkelan a bilang dagiti tattao ket saandanto a paborable nga umawat, dagidiay umawat ti mangyeg kadatay ti dakkel a rag-o.
Nupay kasta, maysa kadagiti kadadakkelan a katulongan iti panangsalimetmettay iti rag-otayo isu ti kararag. Idawatyo ken ni Jehova ti espirituna a mangpablieg ken mangparegta kadakayo. Kuna ni Pablo: “Mabalinak dagiti amin a bambanag gapu iti daydiay mamapigsa kaniak.” (Filipos 4:13) Mabalin met a kasta ti panagriknatayo, bayat a maad-adaltayo ti agpannuray a naan-anay ken ni Jehova.
Panagibtur Kas Ili a Naragsak
Adu a tattao ti di mangapresiar iti trabahotayo. Pagaammo ni Jesus dayta. Gapuna idi imbaonna dagiti paspasurotna a mangasaba, binalakadanna ida: “Ket uray siasino a saan nga umawatto kadakayo ken saan a dumngeg kadagiti saoyo, no pumampanawkayon iti balay wenno ili pampagenyo ti tapuk dagiti saksakayo. . . . Adtoy! Siak ibaonkayo a kasla karnero iti tengnga dagiti lobo; naannadkayo ngarud a kasla dagiti uleg ken nasingpetkayo a kasla kadagiti kalapati.” Kinuna pay met ni Jesus: “Ket uray dagiti buokyo nabilangda amin. Gapuna dikay agbuteng.”—Mateo 10:11-16, 30, 31.
Dagitoy a sasao ti makatulong kadatayo nga agibtur a sirarag-o. Matulongannatayo a mangammo a no masarakantayo dagiti tattao a di mangapresiar kadagiti panagreggettayo a maipaay kadakuada, kaskasdi nga ipakpakaammotayo ti nagan ni Jehova; kaskasdi nga isu ti idaydayawtayo. (Salmo 100:4, 5) Makapainteres, no maminsan dagiti bumalay a di mangilukat iti ruanganda ti nangngegan a mangikunkuna kadagiti dadduma: “Isuda dagiti Saksi ni Jehova.” Wen, uray pay awan ti ibagbagatayo, naitandudo ti nagan ni Jehova, ket dagiti tattao immawatda ti gundaway a mangawat wenno mangilaksid iti kinapudno. (Mateo 25:31, 32) Gapuna uray pay dagiti di umawat a teritoria ti mabalin a maibturan a sirarag-o.
Malaksid pay, ditayo ammo no dagita a tattao ket maaddaandanto ti panagbalbaliw iti kababalinda. Maysa nga aldaw, maysa a babai a nangpapanaw iti maysa a Kristiano a kabsat a babai manipud iti ruanganda iti namin-anon nga okasion ti nagimtuod iti kabsat no isut’ addaan ti aniaman a baro a pagbasaan. Nakellaat ti kabsat a babai ket kinunana a daydiay babai ti di pulos nangaw-awat idi ti literatura ti Biblia. Inlawlawag ti babai a ni lakayna ti addaan katrabahuan a makipagad-adal ti Biblia kadagiti Saksi ni Jehova. Intedna ken ni lakayna ti maysa kadagiti pagbasaan ti Watch Tower Society. Gaput’ panagusiusona, binasa ti babai dayta ket nailasinna ti mensahe a kas ti kinapudno. Gapuna naikeddengna idiay a mismo nga inton sumaganad nga umawag manen ti Saksi isunto ti pastrekenna. Maysa a panagadal ti Biblia iti pagtaengan ti narugian, ket kamaudiananna ti babai nagbalinen a dedikado a saksi ni Jehova!
Addaantay ngarud ti engrande a pribilehio—maysa a naragsak a pribilehio—a panangiwaragawag iti kakaisuna a mensahe ti namnama iti lubong. Ket ti trabaho a panangaskasaba isu ti trabaho nga inted ti Dios kadatayo bayat dagiti maudi nga al-aldaw. Masapul a dayta ti maaramid sakbay nga umay ti panungpalan. (Mateo 24:14) Kasano pay kabayag sakbay ti idadateng ti panungpalan ti dakes a sistema ni Satanas? Ammotayo a ti panungpalan ket saanto a maladaw. (Idiligyo ti Habacuc 2:3.) Kabayatanna, adda pay tiempo para kadagiti dadduma a mangammo ti kinapudno. Gundawayantay daytoy natda pay a panawen ket sireregtatay koma iti trabaho a panangaskasaba. Ket maaddaantay koma iti positibo a kababalin, nga agtrabaho a sigagaget tapno ‘maisalakantayo ti bagitayo ken dagidiay met dumngeg kadatayo.’ (1 Timoteo 4:16) Iti panangaramid iti dayta, agtalinaedtayo a naragsak nga ili a makiramraman iti irarang-ay ti Pagarian.
[Ladawan iti panid 23]
Ti trabahotayo a panagebanghelio ket maysa a gubuayan ti baro a rag-o—uray pay no di umawat dagiti tattao iti mensahe ti Pagarian