Mapapatiyo Aya ti Biblia?

“MAIKUNA a sitatalged a no adda nasabatmo nga agkuna a di mamati iti ebolusion, dayta a tao ket nanengneng, maag wenno agballa.” Kasanot’ panangapektar kadakayo dagitoy a sasao ni biologo a Richard Dawkins? No mamatikayo iti Biblia, nalabit a mamatikayo iti panamarsua imbes nga iti teoria ti ebolusion. Kayat kadi a sawen dayta, a kas manamati iti Biblia, nanengneng, maag, wenno agballakayo?

Usigenyo, met, daytoy a sasao: “Naipasdeken dagiti eskolar ti Baro a Tulag nga awan duadua a ti Jesus kadagiti immuna a Nakristianuan a dokumento ket iti kalalainganna maysa laeng a pinarparbo ti Nakristianuan nga ar-arapaap.” Dagitoy a sasao idiay The Weekend Australian ket inyebkas ni Dr. Robert W. Funk, maysa a propesor ti unibersidad kadagiti narelihiusuan a panagsirarak ken autor ti sumagmamano a libro kadagiti narelihiusuan nga interpretasion.

Inyusuat ni Dr. Funk ti proyekto a pagaammo kas Jesus Seminar, maysa a grupo ti nasurok ngem sangagasut nga eskolar ti Biblia a sangsangkamaysa a nangsukimat kadagiti sasao ni Jesus a naikor-it iti Biblia. Kadagiti nagduduma a bambanag, naipatoda a ti Kararag ti Apo ket di pinutar ni Jesus; a di kinuna ni Jesus a dagiti naemma tawidendanto ti daga wenno dagiti mannakikappia agbalindanto nga annak ti Dios; ken saanna a kinuna: “Siak ti panagungar ken ti biag. Ti mamati kaniak . . . saanto a matay a pulos.”​—Juan 11:25, 26; Mateo 5:5, 9; 6:9, 10.

Uray no dagiti konklusionda ti mangkellaat kadakayo, saandan a karkarna. Isudat’ resulta ti moderno a Biblikal a pammabalaw, ket dagiti umas-asping nga ideya ti naisursuron kadagiti narelihiusuan a seminario iti nawadwad a tiempon. Nalabit nasanaykayon a dumdumngeg iti panangkontra dagiti sientista iti Biblia. Ngem no pagduaduaan dagiti narelihiusuan a papangulo ti kinapudno ti rekord ti Biblia, mabalin a pampanunotenyo a panawen metten nga usigenyo manen ti bukodyo a takder. Lohikal kadi ti panamati iti Biblia idinto ta nagadu a de adal iti tay-ak ti relihion ti nalawag a saanen a mamati?