Surotenyo ti Nadiosan a Debosion kas Dagiti Bautisado a Kristiano

“Ngem sika, O tao ti Dios, . . . sumurotka iti kinalinteg, ti nadiosan a debosion.”​—1 TIMOTEO 6:11.

1. Kasanoyo a sungbatan ti saludsod nga, Aniat’ kapapatgan nga aldaw iti panagbiagyo? Apay a kasta ti sungbatyo?

ANIAT’ kapapatgan nga aldaw iti biagyo? No maysakay a bautisadon a Saksi ni Jehova, awan duadua ti sungbatyo ket, ‘Siempre, ti aldaw a pannakabautisarko!’ Pudno, ti bautismo ket isut’ kapapatgan nga addang iti panagbiagyo. Daytat’ pammarang a simbolo a nangaramidkayo ti naan-anay ken awan inkedkedna a dedikasion ken Jehova a mangaramid ti pagayatanna. Ti bautismoyo tandaanna ti petsa ti pannakaordinyo kas ministro ti Kangatuan a Dios, nga isu ni Jehova.

2. (a) Kasano a maiyilustrar a ti bautismo saan nga isut’ maudi nga addang nga alaenyo iti Nakristianuan a kurso? (b) Ania dagiti nasken nga umuna nga addang ti innalayo sakbay ti pannakabautisaryo?

² Ngem, ti aya bautismo, ti maudi nga addang nga alaenyo iti Nakristianuan a kursoyo? Adayo iti dayta! Kas panangiyilustrar: Iti adu a daga ti seremonia ti kasar tandaanna ti panagpatingga ti panawen a panagplano ken panagsagana (ken masansan ti panaginnarem). Maigiddato iti dayta, daytat’ mangtanda ti pangrugian ti biag nga agkadua kas pagassawaan. Umas-asping, ti bautismoyo isut’ tampok ti panawen ti panagsagana a nangalaanyo ti sumagmamano a nasken nga antimano a panagaddang. Nakagun-odkayo ti pannakaammo iti Dios ken ni Kristo. (Juan 17:3) Nangrugikay a mangalagad ti pammatiyo ken Jehova kas ti pudno a Dios, ken ni Kristo kas Manangisalakanyo, ken iti Biblia kas Sao ti Dios. (Aramid 4:12; 1 Tesalonica 2:13; Hebreo 11:6) Indemostrayo dayta a pammati babaen ti panagbabawiyo iti dati a kurso ti panagtigtignayyo ken pannakakumberteyo iti nalinteg a kurso. (Aramid 3:19) Kalpasanna nangaramidkayo ti pangngeddeng nga idedikaryon ti bagiyo ken Jehova a mangaramid ti pagayatanna. (Mateo 16:24) Kamaudiananna, nabautisarankayon.​—Mateo 28:19, 20.

3. (a) Kasanotay a maidemostra a ti bautismotayo tandaanna ti pangrugian ti maysa a biag ti dedikado a serbisio iti Dios? (b) Ania a salsaludsod ti tumaud, ken apay a dagiti sungbatda makapainteresda unay kadatayo?

³ Ti bautismoyo, nupay kasta, ket saan nga isut’ pagpatinggaan no di ket pangrugian ti biag iti dedikado a sagrado a serbisio iti Dios, Kas kinuna ti maysa nga eskolar ti Biblia, ti biag ti Kristiano ket di rebbeng a ‘maysa a bigla a kinaregta a sarunuen ti awan inggana nga awan ar-aramidna.’ Kasano, ngarud, a maidemostrayo ita iti kasoyo, a ti bautismoyo ket saanna nga ireprepresentar ti ‘maysa a bigla a kinaregta’ laeng? Daytat’ babaen ti panangsurot ti maysa a kapaumpaut-biag a kurso ti nadiosan a debosion. Ania daytoy nadiosan a debosion? Apay a daytat’ nesesita a suroten? Kasano ti ad-adda a panangsukayyo a naan-anay iti dayta iti biagyo? Dagiti sungbat ket rebbeng a makapainteres kadatayo, ta rebbengtay ti agbalin a tattao a nainaig “kadagiti ar-aramid ti nadiosan a debosion” no kayattayo ti makalasat iti umadanin nga aldaw a panangukom ni Jehova.​—2 Pedro 3:11, 12.

Ti Kaipapanan ti Nadiosan a Debosion

4. Aniat’ impatigmaan ni Pablo ken Timoteo nga aramiden, ken aniat’ pudno ken Timoteo iti daytoy a panawen?

⁴ Agarup iti nagbaetan ti 61 ken 64 K.P., insurat ni apostol Pablo ti umuna a naipaltiing a suratna ken Kristiano nga adalan a Timoteo. Kalpasan ti panangisalaysayna kadagiti peggad a pangiturongan ti panagayat ti kuarta, insurat ni Pablo: “Ngem sika, O tao ti Dios, pagtalawam dagitoy a bambanag. Ket sumurotka . . . ti nadiosan a debosion.” (1 Timoteo 6:9-11) Makapainteres, ta iti daytoy a tiempo ni Timoteo nalabit addan iti karrugi ti 30 años. Naundayen dagiti dinaliasatna a kaduana ni apostol Pablo ken naikkan autoridad a mangdutok kadagiti manangaywan ken ministerial nga ad-adipen kadagiti kongregasion. (Aramid 16:3; 1 Timoteo 5:22) Kaskasdi, binagbagaan ni Pablo daytoy dedikado ken bautisado, natataengan a Kristiano a lalaki a sumurot iti nadiosan a debosion.

5. Aniat’ kaipapapan ti sasao a “nadiosan a debosion”?

⁵ Aniat’ kayat a sawen ni Pablo iti sasao a “nadiosan a debosion”? Ti orihinal a sao a Griego (eu·seʹbei·a) ket mabalin a maipatarus a literal kas “naimbag a panangidaydayaw.” Maipapan iti kaiyuloganna, intay mabasa: “Ti eusebeia agparang sagpaminsan iti kaipapanan a mangisingsingasing ti personal a narelihiusuan a debosion kadagiti agdama a sursurat . . . ngem ti ad-adda a pangkaaduan a kaipapananna iti popular a Griego iti periodo a Romano ket ‘kinasungdo.’ . . . Kadagiti Kristiano ti eusebeia ket isut’ kangatuan a kita ti debosion iti Dios.” (Christian Words, ni Nigel Turner) Gapuna kas nausar iti Kasuratan, ti sasao a “nadiosan a debosion” tuktukoyenna ti panangdayaw wenno debosion nga addaan kinasungdo ken Jehova a Dios a personal.

6. Kasanot’ panangted ti maysa a Kristiano ti pammaneknek ti nadiosan a debosionna?

⁶ Daytoy nadiosan a debosion, nupay kasta, ket saan a basta rikna a panagdayaw. Kas ti “pammati nga awan aramidna ket natay,” kasta met, ti nadiosan a debosion masapul a maaddaan ti pannakaiyebkas iti panagbiag ti maysa a tao. (Santiago 2:26) Idiay New Testament Words, insurat ni William Barclay: “Saan laeng a [ti eu·seʹbei·a ken dagiti nainaig a sasao] iyebkasna ti rikna ti panagsiddaaw ken panangdayaw, no di ket isingasing met dayta ti panagdayaw a maitutop iti panagsiddaaw, ken biag ti aktibo a panagtulnog a maitutop iti dayta a panangdayaw.” Ti eu·seʹbei·a ad-adda pay a nadepinir kas “ti praktikal unay a pannakaammo iti Dios iti tunggal aspeto ti panagbiag.” (The Second Epistle General of Peter and the General Epistle of Jude, ni Michael Green) Ngarud, ti Kristiano, ti masapul a mangted pammaneknek iti personal a pannakaisinggalutna ken Jehova babaen ti wagas a panangusarna ti biagna.​—1 Timoteo 2:2; 2 Pedro 3:11.

Kasapulan ti Nainget a Panagregget

7. Aniat’ kayat a sawen ni Pablo idi inggunamgunamna ken Timoteo, nupay isun ti nabautisaran, a “surotenna” ti nadiosan a debosion?

⁷ Ania, ngarud, ti nairaman iti panangpatanor ken panangipamatmat iti nadiosan a debosion? Dayta kadit’ basta panagpabautisar laeng? Lagipenyo ta ni Timoteo, nupay nabautisaranen, nabalakadan a “surotenna [iti literal, sursurotenna koma] daytaa (1 Timoteo 6:11, Kingdom Interlinear) Nalawag, di ipampamatmat ni Pablo nga agkurang ni Timoteto iti nadiosan a debosion. Imbes ketdi, ipagpaganetgetna kenkuana ti pannakasapul iti agtultuloy a panangsursurot iti dayta a buyogen iti kinapasnek ken kinaregta. (Idiligyo ti Filipos 3:14.) Nalawag, daytat’ masapul nga inggat’ tungpal-biag a panangsurot. Ni Timoteo, kas kadagiti amin a nabautisaranen a Kristiano, masapul nga agtultuloy a rumang-ay iti panangiparangarang iti nadiosan a debosion.

8. Kasanot’ panangipakita ni Pedro a kasapulan ti nainget a panagregget para iti dedikado, bautisado a Kristiano tapno suroten ti nadiosan a debosion?

⁸ Kasapulan ti nainget a panagregget para iti maysa a dedikado, bautisado a Kristiano a suroten ti nadiosan a debosion. Idi nagsurat kadagiti bautisado a Kristiano nga addaan namnama a ‘mairaman iti nadiosan a kasasaad,’ kinuna ni apostol Pedro: “Wen, gapu itoy met, aramatenyo ti amin a kinaregtayo, ket iti pammatiyo inayonyo ti kinasingpet, iti kinasingpet ti pannakaammo, iti pannakaammo inayonyo ti panagteppel, iti panagteppelyo ti anus, iti anusyo ti nadiosan a debosion.” (2 Pedro 1:4-6) Kaawatan, kasapulan met ti pammati tapno maiparangtay ti bagitayo iti bautismo. Nupay kasta, kalpasan ti bautismo saantay a mabalin ti kasla agkalkallautang lattan, a kontentotay iti basta pammarang laeng a Kinakristiano. Imbes ketdi, bayat a rumang-aytayo iti Nakristianuan a panagbiag, kasapulan nga ituloytayo a patanoren dagiti dadduma pay a nasasayaat a kualidad, agraman nadiosan a debosion, a mainayon iti pammatitayo. Daytoy, kunan Pedro, ket kasapulan ti napasnek a panagregget iti biangtayo.

9. (a) Kasano a ti sao a Griego para iti “inayonyo” iyilustrarna ti kasapulan a rukod ti panagregget tapno patanoren ti nadiosan a debosion? (b) Aniat’ inggunamgunam ni Pedro nga aramidentayo?

⁹ Ti sao a Griego nga inusar ni Pedro para iti “inayonyo” (e·pi·kho·re·geʹo) ket addaan makapainteres a namunganayan ken iyilustrarna ti rukod ti kasapulan a panagregget. Daytat’ naggapu iti noun wenno nagan (kho·re·gosʹ) a literal a kaipapananna “ti manangidaulo ti koro.” Tuktukoyenna ti maysa a nangbayaden ti amin a gastos iti panagsanay ken panangtaginayon ti maysa a koro iti panangiparang ti maysa a pabuya. Dagita a tattao ti nangbaklay itoy a responsabilidad a siboboluntario gaput’ ayatda iti siudadda ken binayadanda ti gastos manipud mismo a bulsada. Pagpannakkel dagita a tattao ti aggasto a sibubuslon tapno maipaayda amin a kasapulan a maipaay iti nadaeg a panagipabuya. Ti sao nagbalin a kaipapananna “ti panangabasto, panangted nga aglaplapusanan.” (Idiligyo ti 2 Pedro 1:11) Gapuna inggunamgunam ni Pedro kadatayo nga abastuantay ti bagbagitayo iti, saan laeng a ti bassit a nadiosan a debosion, no di ket ti aglaplapusanan a posible a panangiyebkas iti daytoy nasudi a kualidad.

10, 11. (a) Apay a kasapulan ti panagregget tapno masukay ken maiparangarang ti nadiosan a debosion? (b) Kasanotay nga agballigi iti pannakidangadang?

¹⁰ Nupay kasta, apay, a kasapulan ti kasta a panagregget a mangsukay ken mangiparangarang ti nadiosan a debosion? Umuna, adda daydiay pannakidangadang iti nagbasol a lasag. Gapu ta “ti darepdep ti puso ti tao dakes manipud iti kinaubingna,” saan a nalaka ti panangsurot ti biag iti aktibo a panagtulnog iti Dios. (Genesis 8:21; Roma 7:21-23) “Isuamin dagiti mayat nga agbiag iti nadiosan a debosion ken Kristo Jesus aglak-amdanto ti pannakaidadanes,” kuna ni apostol Pablo. (2 Timoteo 3:12) Wen, ti Kristiano a pagregreggetanna ti agbiag iti pamay-an a makaay-ayo iti Dios masapul a naiduma iti lubong. Isut’ addaan kadagiti naiduma a pagannurotan ken kadagiti naiduma a kalat. Kas impakdaar ni Jesus, daytoy ti mamataud ti pananggura ti lubong a nadangkes.​—Juan 15:19; 1 Pedro 4:4.

¹¹ Nupay kasta, mabalintay ti agballigi, ta “ni Jehova ammona nga isalakan dagiti tattao ti nadiosan a debosion iti pakasuotanda.” (2 Pedro 2:9) Ngem, kasapulantay nga aramiden ti biangtayo babaen ti panangitultuloy a panangsurot ti nadiosan a debosion.

Panangsukay ti Nadiosan a Debosion

12. Kasanot’ panangipamatmat ni Pedro no aniat’ kasapulan tapno mapatanor ti nadiosan a debosion iti naan-anay a rukodna?

¹² Kasano, ngarud, ti naan-anay a panangsukayyo itoy nadiosan a debosion? Mangted ni apostol Pedro ti pamalatpatan. Idiay 2 Pedro 1:5, 6, idi inlistana dagiti kualidad a masapul a mainayon iti pammatitayo, inlistana ti pannakaammo nga immun-una ngem ti nadiosan a debosion. Umun-una iti dayta met laeng a kapitulo, insuratna: “Idinto nga iti nadiosan a pannakabalinna intedna kadatayo dagiti isuamin a bambanag a maipaay iti biag ken nadiosan a debosion, gapu iti umiso a pannakaammo kenkuana a nangayab kadatayo.” (2 Pedro 1:3) Gapuna innaig ni Pedro ti nadiosan a debosion iti umiso a pannakaammo maipapan ken Jehova.

13. Apay a ti umiso a pannakaammo nasken iti panangpatanor ti nadiosan a debosion?

¹³ Kinapudnona, no awan ti umiso a pannakaammo imposible ti panangsukay ti nadiosan a debosion. Apay? Bueno, panunotenyo a ti nadiosan a debosion ket personal a maipaay ken Jehova ken mapaneknekan babaen ti wagas a panagbibiagtayo. Ti umiso a pannakaammo ken Jehova ngarud ket nasken, yantangay ramanen dayta ti panangammo kenkuana a personal, sisisinged, a panangammo a naan-anay kadagiti kualidadna ken aw-awidna. Nangruna pay ngem iti dayta, ramanen dayta ti panagregget a panangtulad kenkuana. (Efeso 5:1) No narangrang-ay ti pannakaammo ken Jehova ken panangisarming kadagiti aw-awidna ken kualidadna iti biagtayo, nasaysayaat met ti pannakaammotay kenkuana. (2 Corinto 3:18; idiligyo ti 1 Juan 2:3-6.) Daytoy, met, ti mangibunga ti naun-uneg a panangipateg kadagiti nasudi a kualidad ni Jehova, ti ad-adu a rukod ti nadiosan a debosion.

14. Tapno magun-odan ti umiso a pannakaammo, aniat’ rebbeng nga iraman ti programatayo ti personal a panagadal, ken apay?

¹⁴ Kasanoyo a magun-odan ti kasta nga umiso a pannakaammo? Awan dagiti pangdarasan. Tapno magun-odan ti umiso a pannakaammo, masapul a nagagettayo iti panagad-adal ti Sao ti Dios ken dagiti publikasion a naibatay iti Biblia. Ti kasta a personal a panagadal rebbeng a ramanenna ti regular a programa ti panagbasbasa ti Biblia, kas ti naiyeskediol iti Teokratiko nga Eskuelaan ti Panagministro. (Salmo 1:2) Yantangay ti Biblia ket sagut a naggapu ken Jehova, ti ar-aramidentayo iti personal a panagadal ti Biblia ket panangisarming no kasanot’ panangipatpategtayo iti dayta a sagut. Aniat’ ipalpalgak ti ugaliyo a personal a panagadal maipapan iti kauneg ti panangapresiaryo kadagiti naespirituan a sagana ni Jehova?​—Salmo 119:97.

15, 16. (a) Aniat’ makatulong kadatayo a mangpatanor ti naespirituan a gana a maipaay iti personal a panagadal ti Biblia? (b) Tapno ti personal a panagadaltay ti Biblia agbunga iti panangpatanortay ti nadiosan a debosion, aniat’ rebbeng a maaramidan no agbasbasa ti maysa a paset ti Sao ti Dios?

¹⁵ Aminentayon, ti panagbasbasa ken panagadal ket saan a nalaka kadagiti dadduma. Ngem babaen iti panawen ken panagregget, mabalinyo a patanoren ti naespirituan a ganas a maipaay iti personal a panagadal ti Biblia. (1 Pedro 2:2) No pampanunotenyo nga addaan panangipateg amin a naaramidanen ni Jehova a Dios, ti ar-aramidenna, ken aramidennanto pay a maipaay kadakayo, ti pusoyo ti mangtignay kadakayo a mangammo amin a kabaelanyo maipapan kenkuana.​—Salmo 25:4.

¹⁶ Ngem tapno dayta a personal a panagadal ti Biblia ket mangibunga ti panangpatanoryo ti nadiosan a debosion, ti kalatyo ket saan a basta panangsaklaw laeng kadagiti pinanid a materiales wenno panangpunno ti isipyo kadagiti impormasion. Imbes ketdi, no mangbasakayo ti paset ti Sao ti Dios, masapul nga iwayaanyo ti tiempo a mangmennamenna iti material, a salsaludsodanyo ti bagiyo kadagitoy: ‘Aniat’ isursuro dayta kaniak maipapan kadagiti naayat a kualidad ken aw-awid ni Jehova? Kasanoak nga ad-adda nga agbalin a kas ken Jehova kadagitoy a bambanag?’

17. (a) Aniat’ maadaltayo maipapan ti kinamanangaasi ni Jehova manipud ti libro ni Oseas? (b) Kasanot’ rebbeng a panangapektar kadatayo ti panangmennamenna iti asi ni Jehova?

¹⁷ Usigenyo ti maysa a pangarigan. Iti di pay nabayag ti naituding a panagbasatayo ti Biblia iti Teokratiko nga Eskuelaan ti Panagministro impannatayo iti libro ni Oseas. Kalpasan ti panangbasa iti daytoy a libro ti Biblia, mabalinyo nga isaludsod iti bagiyo: ‘Aniat’ naadalko maipapan ken Jehova kas maysa a Persona​—dagiti kualidad ken aw-awidna​—manipud itoy a libro?’ Ti wagas a panangusar dagiti naud-udi a mannurat ti Biblia ipamatmatna nga adut’ maadaltayo maipapan iti kinamanangaasi ni Jehova manipud libro ni Oseas. (Idiligyo ti Mateo 9:13 iti Oseas 6:6; Roma 9:22-26 iti Oseas 1:10 ken Os 2:21-23.) Ti nabulos a nakem ni Jehova a nangipakitat’ asi iti Israel ket inyilustrar ti pannakilangen ni Oseas ken Gomer nga asawana. (Oseas 1:2; 3:1-5) Nupay ti panangiparukpok ti dara, panagtakaw, pannakikamalala, ken panagdayaw ti didiosen ket aglaplapusanan idiay Israel, ni Jehova ‘nakisao iti puso ti Israel.’ (Oseas 2:13, 14; 4:2) Saan nga obligado ni Jehova a mangipakita ti kasta nga asi no di ket aramidenna dayta iti “nakemna a bukod,” la ketdi no dagiti Israelita iparangarangda ti naimpusuan a panagbabawi ken agbaw-ingda manipud panagbasolda. (Oseas 14:4; idiligyo ti Oseas 3:3.) Bayat a mennamennaenyo daytoy a wagas ti naisangsangayan a kinamanangaasi ni Jehova, daytat’ mangtignay ti pusoyo, a papigsaenna ti personal a pannakaisinggalutyo kenkuana.

18. Kalpasan ti panangmennamenna ti asi ni Jehova kas naipaganetget iti Oseas, aniat’ mabalin a maisaludsodyo iti bagiyo?

¹⁸ Ngem, adu pay, ti kasapulan. “Naragsak dagiti manangngaasi, ta lak-amendanto ti asi,” kuna ni Jesus. (Mateo 5:7) Gapuna, kalpasan ti panangripiripyo ti kinamanangaasi ni Jehova kas naipaganetget iti libro ni Oseas, saludsodanyo ti bagiyo: ‘Kasanot’ nasaysayaat a panangtuladko ti kinamanangaasi ni Jehova iti pannakilanglangenko kadagiti dadduma? No ti maysa a kabsat a nakabasol kaniak wenno nakapasakit kaniak ket dumawat ti pammakawan, mamakpakawanak aya “a sirarag-o”?’ (Roma 12:8; Efeso 4:32) No agserserbikayo iti kongregasion kas nadutokan a panglakayen, mabalinyo a saludsodan ti bagiyo: ‘No mangtamtaming kadagiti hudisial a bambanag, kasanot’ panangtuladko a nasaysayaat ken Jehova, a “sisasagana a mamakawan,” nangnangruna no ti nakaaramid ti dakes mangted ti pudpudno a pammaneknek ti naimpusuan a panagbabawi?’ (Salmo 86:5; Proverbio 28:13) ‘Aniat’ rebbeng a birukek kas pangibatayan ti panangipakita ti asi?’​—Idiligyo ti Oseas 5:4 ken 7:14.

19, 20. (a) Aniat’ ibungana no ti panagadaltayo ti Biblia ket maaramid iti naan-anay a pamay-an? (b) Aniat’ kanayonan pay a tulong iti panangsukay ti nadiosan a debosion?

¹⁹ Anian a makagunggona ti personal a panagbasbasa ti Biblia no maaramidan iti kasta a naan-anay a pamay-an! Ti pusoyo dumakkel iti panangapresiar kadagiti nasudi a kualidad ni Jehova. Ken babaen ti agtultuloy a panagregget a mangtulad kadagitoy a kualidad iti panagbiagyo, pappapigsaenyo ti personal a singgalutyo kenkuana. Iti kasta sursurotenyo ti nadiosan a debosion kas maysa a dedikado, bautisado nga adipen ni Jehova.​—1 Timoteo 6:11.

²⁰ Ti mainayon pay a katulongan iti panangsukay itoy nasudi a kualidad ket masarakan ken Jesu-Kristo​—ti perpekto nga ulidan ti nadiosan a debosion. Kasano a ti panangsurot iti ulidan ni Jesus tulongannakayo agpadpada iti panangsukay ken panangiparangarang ti nadiosan a debosion? Ti artikulo iti panid 18 isalaysayna daytoy ken dagiti nainaig a salsaludsod.

[Dagiti Footnote]

Kasanot’ Panangsungbatyo?

◻ Apay a ti bautismo saan nga isut’ maudi nga addang nga alaenyo iti Nakristianuan a kursoyo?

◻ Aniat’ kaipapanan ti “nadiosan a debosion,” ken kasanoyo a maipakita dayta?

◻ Apay a kasapulan ti nainget a panagregget iti panangpatanor ti nadiosan a debosion?

◻ Kasanoyo a masukay a naan-anay ti nadiosan a debosion?