Report Dagiti Manangiwaragawag ti Pagarian
Panangawat iti Naimbag a Damag Idiay Belgium
“ASINO ti nakakita kadagiti kastoy a banag?” kuna ti sanga nga opisina dagiti Saksi ni Jehova idiay Belgium. (Idiligyo ti Isaias 66:8.) Daytoy naimnas a daga inreportnat’ kangatuan a dagup a 24,464 nga agibumbunannag iti 1989 a tawen a panagserbi. Adda pay met ti 4-porsiento nga irarang-ay ti promedio a dagup dagidiay rimmaman iti panangaskasaba iti binulan.
◻ Ti naimbag a damag nga inwaragawag dagiti Saksi ni Jehova isut’ binigbig ti maysa a Katoliko a padi a nagkuna kadagiti parokianona bayat ti Misa ti Domingo: “No umay dagiti Saksi ni Jehova dita ridawyo, pastrekenyo ida. Ikutda ti kinapudno!” Daytoy ti talaga nga inaramid ti maysa a babai. Idi simmarungkar dagiti Saksi, pinastrekna ida ket inawatna ti libro a Life—How Did It Get Here? By Evolution or by Creation? Idi kuan nagorder iti libro a Mabalinyo ti Agbiag nga Agnanayon iti Paraiso a Daga. Nairugi kenkuana ti panangyadal iti Biblia, ngem ni lakayna di nakiadal. Gapuna adda kabsat a lalaki a nangtelepono iti lakayna ket dinamagna no kayatna ti agbiag iti nasaysayaat a lubong a kaduanan baketna? Kas resultana, nakiadal. Dagitoy nga agassawa agkabkabbalayda nupay dida nagkasar, gapuna nagkasarda ket di nagbayag nabautisaranda.
◻ Ti kinapudno binaliwanna ti biag ti maysa a balasang. Idi dandani ag-14, nagbukbukoden. Adda naam-ammona a baro ket nakikadua kenkuana iti lubong dagiti punk, a nagdroga ken addaan espiritut’ kinaranggas. Idi kuan natay ti baro gaput’ pannakaaksidente ti motorna. Ti babai grabet’ sakitna iti nerbios, ket kayatna idin ti agbekkel. ‘Adinot’ pakabirukak ti solusion dagiti problemak?’ inut-utobna. Adda naam-ammona nga espiritista ket namati a mabalinna a kasarita ti natayen a gayyemna. Impadasda ti hipnotismo ken extrasensory perception. Gapu ta dina met latta nabirukan ti liwliwa a namnamaenna, kimmaro ti panagleddaangna. Iti adu a bulan imputputongna a naan-anay ti bagina. Idi kuan adda Saksi ni Jehova a nakaam-ammo kenkuana ket inkagumaanna a tulongan iti naespirituan. Idi damo surat ti namuspusanna, ket idi agangay narisut dagiti problema kalpasan ti adu a panangikagumaan ken bilegna. Itan naluk-atanen manipud impluensiat’ demonio, panagsigarilio, ken kadagiti nasaem a riknat’ pammabasol. Bayat ti ilalabas ti tiempo, ad-adu a pannakaammo iti Biblia ken ti espiritu ni Jehova ti nangtulong unay kenkuana. Kasta met, napabileg kadagiti gimong, bayat a sireregget a nagsagana kadagita. Itan nabautisaranen ket addaan espiritut’ kinapayunir. Adun ti yad-adalannat’ Biblia, ket maysa kadagita isu ti inana, a tumabtabunon kadagiti gimong. Talaga, isut’ tinulongan ni Jehova!
◻ Dagidiay mangaprobetsar kadagiti gundaway idiay eskuelaan sagrapendat’ nasayaat a balligi iti panangisaknap ti naimbag a damag. Adda balasitang a Saksi nga ages-eskuela idiay Belgium a nadutokan nga agdiskurso iti tema a kayatna. Pinilina a salaysayen dagiti Saksi ni Jehova ken ti pammatida, nga imbasarna ti palawagna iti broshur a Jehovah’s Witnesses in the 20th Century. Nasdaaw ti propesorna. Kalpasan ti panagpalawagna iti klase, napalugodan dagiti estudiante nga agimtuod. Adda dagiti kaklasena a nagimtuod kalpasanna no aniat’ aramidenda tapno agbiagda iti Paraiso ti Dios a nadakamatna. Adu, agraman ti propesor, ti nangala ti kopiat’ nadumaduma a broshur nga awitna. Dagiti dadduma a klase nagorderda met kadagiti broshur ken ad-adu pay nga impormasion, ket maysa a propesor ti relihion ti nangsukimat kadagiti broshur ket inrekomendana iti klasena.
Ti natured nga aksion ti balasitang a kabsattayo nabendisionan. Adda 23 a broshur a naiwaras kadagiti dua a propesor ken adu nga estudiante; maysa nga estudiante, kalpasan a nangngegna ti palawag, dinawatna dayta a material tapno ilawlawagna ti trabaho dagiti Saksi ni Jehova idiay klasena.
Adun dagiti mangaw-awat ti naimbag a damag idiay Belgium. Inawatda ti Saot’ Dios, “saan a kas sao dagiti tao, no di ket, kas iti kinapudnona, kas sao ti Dios, nga agkurkurri met kadakayo a mamati.”—1 Tesalonica 2:13.