Panagserbi iti Kadaklan Amin nga Artesano

IDI agtawenak pay lat’ pito, inyimtuodkon iti bagik: ‘Apay a masapul a matayak? Maliklikak kadi ni patay?’ Imbagada kaniak nga alaen ti Dios dagidiay naimbag tapno kaduana ida idiay langit. Malaglagipko pay lat’ maysa a kaklasek a nagkuna: “Nasaysayaat no agdakeska ta dagidiay naimbag umun-unada a matay!”

Magustuak idi ti agdrowing, gapuna nagadalak iti art. Idiay eskuelaan, awan gundawayko a mangtaming kadagiti relihiuso a banag, wenno panawen man nga aginteres kadagita. Kinapudnona, kanayonko nga ibaga kadagiti gagayyemko a, nababa la a panagis-isip ti kasapulan no kayat ti maysa nga agbalin a relihiuso. Idi naturposkon nga inadal ti arte, nagbalinak a maestra ti arte iti high school.

Magustuak idit’ trabahok ken interesadoak pay iti Italiano ken baniaga a literatura, ti musika a kamara ken simponiko, agraman opera. Ti laeng relihiuso a banag nga inadalko iti dayta a tiempo isu dagiti ladawan a gapuanan dagiti pintor iti nagduduma a periodo. Idi kuan naramanak ti ganas ti naynay a buybuyaen dagiti tao, ti rikna ti pannakaipabuya dagiti aramidko, ti kaipapanan ti pannakaidayaw, pannakaitan-ok, ken pannakaraem kas maysa nga artesano (artist).

Iti daydi a panawen, nakapatpateg unay kaniak ti lubong dagiti artesano, yantangay idiay ti nakabigbigak ti dakdakkel a makagapu ti panagbiagko. Ngem dagidi parikutko idi pito ti tawenko kaskasdi nga umuk-ukuokda pay la kaniak. Awan ressatna a binirbirukko ti banag a napatpateg, banag a diak pay idi kabaelan nga ilawlawag. Nalaingak nga agbasa ket nagimtuodak kadagiti pilosopo no aniat’ mailawlawagda. Uray aniat’ mapasamak, kayatko idi ti piho a sungbat kadagiti pagduaduaak.

Idi nagasawaak maburburiborak pay laeng. Idi naipasngay ti anakko a babai, ad-adda a rimmegget ti panagbirukkot’ kinapudno. Inkagumaanak a biruken dayta babaen iti panagpinta, panagputar kadagiti daniw, iyiimdeng iti musika, panagbasa kadagiti libro. No tumabunoak iti konsierto ket mangngegko dagiti umuna a nota ti overture, automatiko a nagturong ti isipko iti Dios, iti Kangatuan a Persona a diak am-ammo, ket nagyamanak kenkuana. Kadagidi a panawen, masansan a dayawek ti Dios gapu kadagiti nagimnas a banag a magusgustuak​—ti matmaturog a maladagak, dagiti maris ti landscape. “Nagsayang ketdin,” kadarato kunaek, “a ti arte, idinto ta nagadu a nagpipintas a banag ti mabalin a temana koma, ad-adda ketdi a maus-usar a mangdeskribir iti ipapatay imbes nga iti biag!” Sumagmamano kadagiti kaiimnasan a daniw ken drama ti teatro isu dagiti himno a pesimismo wenno trahedia ti linaonda; sumagmamano kadagiti kapipintasan nga obra maestra dagiti pintor itan-okda ni patay imbes a ti biag ken ti imnasna. Apay?

Dagitoy agsupadi a sentimiento pinagpulkokdak unay, ket nagin-inut a nagturongak iti kinaaleng-aleng. Iti daydi a tiempo immay simmarungkar dagiti Saksi ni Jehova. Bayat nga immimdengak kadakuada, kasla baro a lenguahe ti pannakisaritada kaniak. Ti kari ti Dios a mamagbalin iti daga a paraiso kasla nasam-it a musika kadagiti lapayagko. Inrugik a binasa ti Biblia. Idiay ti nakabirukak ti sungbat kadagiti naynay a kuestionko nanipud pay idi pitot’ tawenko. Saan gayam a kayat ti Dios a matay ti tao no di ket inrantana a bendisionan dagiti matalek nga adipenna babaen iti panangitedna kadakuada ti biag nga agnanayon ditoy daga!

Tawen 1973 idi. Iti simmuno a tawen nagdedikarakon ken Jehova saak nagpabautisar. Nagparigatak a nangikkat iti nadarasudos ken sentimental a kababalinko ket sinuktak iti espiritu ti pudpudno a nainkabsatan nga ayat, ti kinatangsitko sinandiak iti kinapakumbaba, ti personal a paglaingak nagbalin nga espiritu ti panagsakripisio! Kapilitan a tinallikudak ti bagik. Nakatulong unay kaniak dagiti Saksi ni Jehova, agraman dagiti gimong idiay Kingdom Hall.

Ti Dakkel nga Artesano winaknitanna dagiti pagduaduaak ken parparikutko. Anian a yamanko kenkuana! Daytat’ gapuna, a nanipud Setiembre 1984, sinerrekkon ti serbisio a kas regular a payunir, a binusbosko ti 90 oras iti binulan a panangikasabat’ naimbag a damag ti Pagarian ti Dios.

Ti panagserbik iti Dakkel nga Artesano ken Namarsua, a ni Jehova, agraman pamiliak, talaga a makapnek. Segseggaanmi ti tiempo inton ipintana ti kalilibnosan a ladawan; inton ikisapnan ti daan, nadangkes a sistema a nangtulaw ken nangabungot iti daga. Awanton ni patay, ket ti arte naipamaysanton iti panagbiag. Iti kasta, kinaimnasto laengen ti maipabuya, ta babaen ti nalinteg a baro a sistema ti Dios, napukawton nga agnanayon ti sasaibbek ken rigat.​—Naipatulod.