Pannakipagummong Kadagiti Managayat iti Inted-Dios a Wayawaya
DAGITI Saksi ni Jehova ket naidumdumada kadagiti adu a bambanag. Isuda laeng ti agsasao iti “nadalus a pagsasao.” (Sofonias 3:9) Isuda laeng ti nagkaykaysa, nga addaan ti pagilasinan a marka ti ayat a dineskribir ni Jesu-Kristo. (Juan 13:35) Ken isuda laeng ti mangtagtagiragsak iti wayawaya a kuna ni Jesus nga iyeg ti kinapudno, kas nairekord idiay Juan 8:32: “Ket maammuanyonto ti kinapudno, ket ti kinapudno luk-atannakayto.”
Dagidiay a sasao nga inturong ni Jesu-Kristo, ti Anak ti Dios, kadagiti adalanna, ket pimmudnon. Ket dagita ti ad-adda nga ap-apresiaren ita dagiti amin a Saksi ni Jehova a timmabuno iti “Dagiti Managayat iti Wayawaya” a Distrito a Kumbension. Ti programa ti kumbension ti nangilawlawag kadakuada kadagiti nagduduma nga aspeto ti wayawayada, kasanoda nga aramaten dayta, ti panagsungbat a naipakuyog iti wayawayada, ken anian a nabendisionanda iti panagbalinda a nawaya nga ili.
Dagitoy a naintiempuan ken maibagay a kumbension nangrugi idiay Makinamianan a kagudua ti lubong idi Hunio 7, 1991, idiay Los Angeles, California, E.U.A. Nanglukat ti programa iti alas 10:20 t.b. babaen iti tuktukar, a sinaruno ti maysa a kanta ken kararag. Ti panglukat a palawag ket maysa a nadagsen-panagdissona a panangiparang a naibasar iti Santiago 1:25. Sigun iti The Jerusalem Bible, mabasa daytoy a bersikulo: “Ti tao a sisisiray iti perpekto a linteg ti wayawaya ken iyugalina dayta—saan nga iyiimdeng ken pananglipat, no di ket siaaktibo a panangalagad iti dayta—naragsakto iti amin nga aramidenna.” Kas iti ikikitatayo iti maysa a sarming tapno masirpattayo no sadino ti pakasapulantayo a pangparang-ayan iti langatayo, kasta met a kasapulantayo ti agtultuloy iti pannakidanggay iti perpekto a linteg ti Dios nga agpaay iti wayawaya a mangadal no sadino ti kasapulan a pangaramidantayo kadagiti panagbalbaliw iti personalidadtayo. Ken rebbeng nga agtultuloytayo iti ikikita iti dayta a sarming.
Simmaruno isu ti palawag ti tserman a, “Maabrasakayo, Dakayo Amin a Managayat iti Wayawaya.” Dagiti Saksi ni Jehova ayatenda ti wayawaya, ket kayatda ti agtalinaed a nawaya. Kinutar ti nagpalawag dagiti legal nga autoridad a nangipakita a saan a mabalin a mapaadda ti wayawaya no awan ti linteg. Wen, dagiti Kristiano ket saanda a nawaya a mangaramid iti aniaman a kayatda no di ket nawayada a mangaramid iti pagayatan ni Jehova. Kayatda nga aprobitsaren ti wayawayada ngem dida abusuen dayta. Nangnangruna manipud 1919 a dagiti Saksi ni Jehova tagtagiragsakendan ti naparang-ay a wayawaya. Impalagip ti nagpalawag ti pannakaipaganetget ti wayawaya kadagiti tema ti kumbension ken dagiti Nakristianuan a publikasion. Amin dagiti makikumbension ad-adu pay ti maadalda maipapan iti inted-Dios a wayawaya ken no kasanoda nga usaren dayta.
Dagidiay a naintiempuan a kumento ket sinaruno dagiti interbio kadagiti managayat iti wayawaya a nagrag-o iti kaaddada iti kumbension. Ti kakasta a kumbension ket panawen ti panagrag-o, no kasano a dagiti tallo a tinawen a piesta ti Israel ket minarkaan ti dakkel a rag-o. Dagiti sumagmamano nga interbio pinaneknekanda a dagiti kumbension ket makapabileg iti naespirituan a panawen ti panagrag-o.
Kalpasanna nadanon ti pannulbek a palawag a, “Ti Panggep ken Usar ti Inted-Dios a Wayawayatayo.” Manipud itoy a palawag naadal dagiti nakikumbension a ni Jehova laeng ti addaan naan-anay a wayawaya gapu ta isu ti Kangangatuan nga Autoridad ken mannakabalin-amin. Maigapu iti naganna ken para iti pagimbagan dagiti pinarsuana, nupay kasta, kednganna no dadduma ti wayawayana babaen ti kinabannayatna nga agpungtot ken panangwatwatna iti panagteppel. Amin dagiti nasaririt a pinarsuana addaanda iti relatibo a wayawaya, gapu ta agpasakopda ken Jehova ken beddengan ida dagiti pisikal ken moral a lintegna. Inikkan ida ni Jehova iti wayawaya para iti panagragsakda ngem nangnangruna tapno isut’ ipaayanda ti dayaw ken rag-o babaen panagdayawda kenkuana. Gapu iti nasayaat a panangusarda iti wayawayada, naragpat dagiti Saksi ni Jehova ti sangalubongan a pammadayaw iti nasayaat a kondukta ken regta iti ministerioda.
Malem ti Biernes
“Okupado—Kadagiti Natay nga Ar-aramid wenno iti Serbisio ni Jehova?” ket isu ti manggutugot-panunot a tema ti palawag a nanglukat ti sesion iti malem ti Biernes. Dagiti natay nga ar-aramid ramanenda saan laeng a dagidiay ar-aramid ti lasag no di ket kasta met dagiti sabsabali pay a natay iti naespirituan, barengbareng, ken awanan bunga—kas kadagiti sikap iti panagurnong ti kuarta. Iti daytoy a banag, ti nasingpet a panangsukimat iti bagi ket napateg tapno maikeddeng no iyun-unatayo met laeng ti Pagarian iti biagtayo.
Addaan iti isu met laeng a ranta ti simmaruno a palawag a, “Panangitungpal iti Komisiontayo kas Ministro ti Dios.” Impakita ti nagpalawag a dagiti Kristiano rebbeng a dida mapnek kadagiti bagbagida iti basta palaypalay a serbisio wenno basta pananggaw-at laeng kadagiti naikeddeng a bilang ti oras. Rebbeng a kayatda ti agbalin nga epektibo iti amin a parupa ti Kristiano a ministerio. Dagitoy a punto ket naipaganetget babaen iti maysa a demostrasion ken dagiti interbio. Amin ket naparayray a mangitungpal iti ministerioda iti aginggat’ kabaelanda.
Iti palawag a “Tattao a Nawaya Ngem Agsungsungbat,” impaganetget ti nagpalawag a nupay tagipatgen ti ili ni Jehova ti wayawaya nga impagteng kadakuada ti kinapudno, rebbeng a laglagipenda a kakuykuyog dayta ti panagsungbat. Rebbeng nga usarenda ti wayawayada, saan a kas pambar iti dakes a kondukta, no di ket tapno idayaw ni Jehova. Kas dagiti Kristiano, agsungsungbatda kadagiti “nangatngato nga agtuturay” ken rebbeng met a makitunosda kadagiti panglakayen ti kongregasion. (Roma 13:1) Kasta pay met, agsungsungbatda iti panagkawkawesda, panaglanglanga, ken konduktada. Rebbeng a pulos a dida liplipatan a “tunggal maysa idatagnanto iti Dios ti kinaisuna met laeng.”—Roma 14:12; 1 Pedro 2:16.
Kalpasanna simmaruno ti pannakasalaysay ti kasapulan kadagiti amin a Kristiano nga agbalin nga “Awan Butengna bayat nga Umasideg ti Panungpalan Daytoy a Lubong.” Nupay ti sangatauan ket mabutbuteng maipapan iti ipagteng ti masanguanan, kasapulan a dagiti Kristiano dida agbuteng a mangitungpal iti ministerioda. Ti di panagbuteng ket maysa a resulta ti panagtalek ken Jehova, ta no ad-adda nga agamak ti maysa a Kristiano a mangpaldaang iti Dios, basbassit met ti panagbutengna kadagiti parsua. Ti panangikabesa kadagiti mangliwliwa a kasuratan ti mamabileg iti maysa a tao tapno agbalin a di agbuteng. Tapno agbalin a nabileg iti naespirituan ken awan butengna, dagiti adipen ti Dios kasapulanda met nga aramaten a naimbag amin a gundawayda a makitimpuyog kadagiti kapammatian. Tunggal maysa kasapulanna met a laglagipen ti akem ti kararag iti panagbalin nga awan butengna. Babaen panagtalinaed nga awan butengna, mataginayon dagiti Kristiano ti nasayaat a pannakirelasionda ken Jehova a Dios.
Nagpatingga ti programa ti umuna nga aldaw babaen iti makaisuro unay a drama a Nawayawayaan a Mangparang-ay iti Pudno a Panagdayaw. Impakita daytoy no kasano a ti maysa a moderno-aldaw a pamilia nakaadal ti maysa a leksion manipud ken Esdras ken ti 7,000 a buyotna, a nangted kadagiti daton nga agsubli idiay Jerusalem. Daytoy ti namagbalin iti tunggal mannakikumbension a mangsukimat kadagiti ipangpangrunana ken kitaenna no kasanona a maparang-ay dagiti pribilehiona iti serbisio. Daytoy a drama ket agpaay kadagiti nataengan ken uray kadagiti agtutubo.
Agsapa ti Sabado
Kalpasan dagiti tuktukar, kanta, kararag, ken pannakasalaysay ti inaldaw a teksto iti Biblia, intampok ti programa iti agsapa ti Sabado ti maysa a symposium a napauluan “Wayawaya a Napakuyogan ti Responsabilidad iti Intero a Pamilia.” Iti umuna a paset, “No Kasano a dagiti Amma Matuladda ni Jehova,” nabalakadan dagiti amma kadagiti nagduduma a pamay-an a sadiay matuladda ti nailangitan nga Amatayo. Ti 1 Timoteo 5:8 kiddawenna a mangipaayda saan laeng nga iti namaterialan no di ket uray met iti naespirituan. Tuladenda ni Jehova babaen ti panagbalin a naimbag a mannursuro iti pamiliada ken babaen panangtarawidwidda ti naayat a disiplina no kasapulan. Naiyilustrar dagitoy a punto babaen kadagiti sumagmamano nga interbio.
“Ti Panangsaranay nga Akem ti Asawa a Babai” ket isu ti simmaruno a paset daytoy a symposium. Nangrugi daytoy babaen ti panangipaganetget a ti maysa nga asawa a babai akmenna ti nadayaw a takder iti Kristiano a pamilia, daydiay panagbalinna a manangsuportar. Aniat’ kiddawen daytoy kenkuana? Nga isu ket masapul nga adda iti umiso a panagpasakop, a pulos a dida pilpiliten ti asawada a lalaki a mangaramid ti maysa a banag nga isu laeng ti mangayat. Kasapulan a tamingenna a naimbag dagiti obligasionna ken lakayna ken annakna, ken maadawna ti pudpudno a pannakapnek manipud panangsalimetmetna a nadalus ken naurnos ti pagtaenganna. Ken kas maysa a Kristiano a ministro, mabalin nga isut’ addaan adu a gundaway a makipaset idiay tay-ak ti serbisio. Ti interbio iti maysa a pamilia impaganetgetna ti kinanainsiriban ti kasta a Nainkasuratan a balakad.
Dagiti agtutubo immawatda ti pannakaasikaso iti paset nga “Annak nga Agimdeng ken Agsursuro.” Babaen panangsanayda kadagiti annakda nga agimdeng ken agsursuro, mangyeg dagiti nagannak ti dayaw ken Jehova ken ipakitada ti ayat kadagiti naespirituan a kakabsatda ken dagiti bukodda nga annak. Mapaadda ti maysa a nalagda a singgalut iti nagbaetan dagiti nagannak ken annak no sangsangkamaysa a busbusenda a nainsiriban ti tiempoda. Masapul a nakabalan dagiti nagannak a mangsungbat kadagiti saludsod dagiti annakda ken pabaraenda ti wawda iti pannakaammo. Manen, impakita dagiti interbio no kasano a maaramidan daytoy.
Simmaruno ti nasayaat a balakad a “Salimetmetan ti Bagiyo a Nawaya nga Agserbi ken Jehova.” Kasano a maaramidan daytoy? Babaen iyaadayo manipud panangsurot kadagiti nailubongan a karera, mangbusbos-panawen nga ar-aramid, ken dagiti materialistiko a kalat. Ni Jesus ken ni apostol Pablo nangituyangda kadagiti naimbag nga ulidan babaen ti panagsakripisio iti bagi. Kasapulan ti ili ni Jehova a salimetmetan ti simple a mata, a naisentro iti intereses ti Pagarian. No maipapan iti pananggun-od kadagiti namaterialan a banag, ad-adda a nainsiriban ti panagurnong itan ket santo gumatang ngem iti igagatang itan ket santo bayadan dayta. Masapul nga agbantay dagiti agtutubo maibusor iti panagar-arapaap maipapan kadagiti seksual a pagragsakan ken dagiti nailubongan a karera. Ti interbio iti maysa a di naasawaan a payunir impakitana dagiti bendision a dumteng no salimetmetan ti maysa ti bagina a nawaya nga agserbi ken Jehova.
Nagngudo ti programa ti agsapa ti Sabado babaen iti palawag a “Sumrek Agturong iti Wayawaya babaen ti Dedikasion ken Bautismo.” Napalagipan dagiti kandidato iti bautismo a nupay ti sangaparsuaan ket naipisok iti pannakaadipen babaen ti iyaalsa ni Adan, ti nabileg a Manangwayawaya, ni Jesu-Kristo, linuktanna ti dalan agturong iti wayawaya babaen ti datonna. Impakita ti nagpalawag no ania ti nairaman iti ilalapsut tapno agaramid iti pagayatan ti Dios ken intampokna dagiti obligasion ken bendision a gunggona dagidiay mababautisaran.
Malem ti Sabado
Nangrugi ti programa ti malem ti Sabado babaen ti mangsukisok-kararua a saludsod a “Makin-Pagimbagan ti Sapsapulenyo?” Isilsilnag ti lubong ti bukod a panagsapul nga espiritu ti Diablo. Nupay kasta, masapul a tuladen dagiti Kristiano ti managsakripisio nga espiritu ni Jesu-Kristo. Anian nga ulidan ti intuyangna! Pinanawanna ti nailangitan a dayag ket kalpasanna indatonna ti natauan a biagna para iti pagimbagantayo. Dagiti karit no makin-pagimbagan ti birbirukentayo ket lumtuad no adda dagiti di pagkikinnaawatan iti nagbaetan dagiti Kristiano maipapan kadagiti negosio wenno pinansial a bambanag, no adda dagiti panagsisimparat iti personalidad, ken dadduma pay. Dagiti kakasta a bambanag suotenna ti Nakristianuan nga ayat. Ngem babaen panangsapul iti pagimbagan dagiti sabsabali, sigurado a mabigbig ti maysa a tao ti dakdakkel a bendision ti panangted, ket maragpatna ti anamong ni Jehova.
Kalpasanna ti mainaig unay a tema a “Panangbigbig ken Panangparmek kadagiti Naespirituan a Pagkapuyan.” Impaganetget daytoy a palawag ti kasapulan a panangilasin kadagiti simtoma ti naespirituan a pagkapuyan ket kalpasanna agtignay a dagus iti pannakidangadang tapno maparmek ni Satanas ken dagiti silona. Dagiti adipen ni Jehova masapul a sukayanda ti nauneg nga ayat kenkuana ken pananggura no ania ti dakes. Daytoy kiddawenna nga am-ammuenda ni Jehova babaen ti regular, addaan panggep a personal a panagadal ti Biblia kasta met ti pamilia. Masapul a liklikanda ti amin a porma ti paglinglingayan a mangipadayag iti kinaranggas ken seksual nga imoralidad. (Efeso 5:3-5) Ti regular a panagkararag ken itatabuno kadagiti gimong ket napateg met iti panagballigi iti panangparmek kadagiti naespirituan a pagkapuyan.
Nalabit ti paset a nagsasaritaan nga ad-adda ngem iti aniaman a sabali a palawag a naipaay iti kumbension ket isu ti napauluan “Ti Kadi Panagassawa ti Tulbek iti Kinaragsak?” Ipagarup ti adu nga agtutubo a kasta! Ngem pinagminar ti nagpalawag nga adda dagiti di mabilang a matalek nga espiritu a parsua a naragsak nupay dida naasawaan, kasta met nga adu a dedikado a Kristiano ti nakaragragsak nupay saanda a naisangol iti panagassawa. Kasta pay met, adu a pagassawaan ti saan a naragsak, kas ipabigbig ti nangato a bilang dagiti panagdiborsio. Kasapulan laeng ti maysa a tao nga utoben ti adu a bendision a tagiragsaken amin a dedikado a Kristiano tapno mabigbigna a ti panagassawa, nupay mabalin daytoy a bendision, ket saan nga isu ti tulbek iti kinaragsak.
Sinaruno daytoy ti symposium a napauluan “Nakristianuan a Wayawaya iti Kaaldawantayo.” Ti immuna a managpalawag sinalaysayna ti “Panangtingiting kadagiti Parupa ti Nakristianuan a Wayawayatayo.” Dagitoy iramanda ti wayawaya manipud ulbod a relihiuso a pannursuro kas iti Trinidad, di ipapatay ti natauan a kararua, ken ti agnanayon a panagtutuok. Kalpasanna adda wayawaya manipud mangtagabo a pannakaadipen iti basol. Nupay dagiti Kristiano ket imperpektoda, nawayadan manipud kadagiti dakes nga ar-aramid kas iti panagtabako, panagsugal, kinamanagbartek, ken seksual a panaggampur. Adda met wayawaya manipud kinaawan namnama, gapu ta addaanda ti namnama iti Paraiso a manggutugot kadakuada a mangibaga kadagiti sabsabali maipapan iti dayta.
Ti simmaruno a nagpalawag inyimtuodna ti saludsod a “Personal Kadi a Tagipatgenyo ti Kasta a Wayawaya?” Ti tagipatgen kaipapananna ti salimetmetan a nasudi, taraknen buyogen panangannad. Tapno maaramidan dayta, ti maysa nga adipen ti Dios masapul nga agbantay maibusor iti pannakasulisog a lumabes kadagiti pagbeddengan ti Nakristianuan a wayawaya. Ti wayawaya ti lubong ket makaallilaw a kinaulbod, ta agtungpal dayta iti pannakaadipen iti basol ken panagrupsa.
Ti naudi a nagpalawag iti daytoy a symposium nagsao iti tema a “Dagiti Managayat iti Wayawaya Agtibkerda.” Tapno maaramidan dayta, dagiti Kristiano masapul a dumekketda kadagiti nailangitan a nagannakda, ni Jehova ken ti kas asawa nga organisasionna. Di mabalin nga ipalubos ti ili ni Jehova a pakapuyen ida dagiti panangsikap dagiti apostata; masapul a laksidenda dagidiay dumteng buyogen imoral a gandat. Tapno makapagtibkerda iti nadiosan a wayawaya, masapul a dagiti Kristiano “agbiagda gapu iti espiritu.”—Galacia 5:25.
Ti maudi a palawag iti dayta nga aldaw ket pudno a makapnek. Daytat’ napauluan “Ti Katan-okan a Tao a Nagbiag Pay Laeng.” Ni Jesu-Kristo isu ti katan-okan a tao, ta nabilbileg panangapektarna iti biag ti sangatauan ngem amin nga armada, buybuyot a pakigubat, manangaramid linteg, ken dagiti ar-ari uray agtitiponda. Isu ti Anak ti Dios, a timmaud idiay langit sakbay iyaayna ditoy daga. Nagsayaat unay ti panangtulad ni Jesus iti nailangitan nga Amana iti insaona ken insurona ken no kasanot’ panagbiagna gapu ta naibagana: “Ti nakakita kaniak nakitana metten ti Ama.” (Juan 14:9) Anian a nagsayaat ti panangipakita ni Jesus a “ti Dios ket ayat”! (1 Juan 4:8) Kalpasan atiddug a panangisaritana kadagiti galad ni Jesus, pinagminar ti nagpalawag a dagiti serie ti artikulo a napauluan “Ti Biag ken Ministerio ni Jesus” ket naipablaak idiay Ti Pagwanawanan manipud idi Oktubre 1985. Kas sungbat kadagiti adu a kiddaw, iruar itan ti Sosiedad ti baro a libro a Ti Katan-okan a Tao a Nagbiag Pay Laeng. Addaan daytoy iti 133 a kapitulo ken naiyimprenta iti natayengteng a kolor. Ti material kadagiti serie ket naisagana a naimbag, ket nairatipda amin kadagiti 448 a panid ti libro. Pudno unay, nagpatingga daytoy nga aldaw ti kumbension iti naipangpangruna a rag-o!
Bigat ti Domingo
Kadagiti immuna a paset ti sesion iti agsapa ti Domingo ket ti symposium a “Panagserbi kas Dumadaklis kadagiti Tao.” Ti palawag a “Panagdaklis—Literal ken Simboliko” imbalabalana dagiti pamuon para kadagiti simmaganad a palawag. Impakita ti nagpalawag a kalpasan panangaramid ni Jesus iti namilagruan a panagdaklis iti ikan, inawisna dagiti nainaig a dumadaklis tapno agbalinda a dumadaklis kadagiti tao. Iti nabayag bassit, sinanay ni Jesus dagiti adalanna tapno agbalin a dumadaklis kadagiti tao, ket nangrugi idi Pentecostes 33 K.P., naballigida iti panangtulong kadagiti umariwekwek a lallaki ken babbai tapno agbalin nga ad-adalan.
Ti simmaruno a nagpalawag sinalaysayna ti pangngarig iti iket a nairekord idiay Mateo 13:47-50. Pinagminarna a ti simboliko nga iket iramanna agpada dagiti napulotan a Kristiano ken ti Kakristianuan, ti naud-udi gapu iti naaramidan a trabaho a panagipatarus, panangipablaak, ken panangiwaras kadagiti Biblia, nupay dagitoy a panagregget inurnongna ti bunggoy dagiti di maikari nga ikan. Nangnangruna manipud 1919 nga addan panamaglalasin-lasin a trabaho, ket dagiti di maikari nga ikan naibellengda, idinto a dagiti maikari ket naurnongda kadagiti arigna pagkargaan a kongregasion a timmulong a mangsalaknib ken mangitalimeng kadagiti pudno a Kristiano maipaay iti nadiosan a serbisio.
Ti maikatlo a palawag a, “Panagdaklis kadagiti Tao kadagiti Sangalubongan a Dandanum,” impaganetgetna ti obligasion dagiti amin a dedikado a Kristiano a makipaset iti sangalubongan a panagdaklis. Ita nasurok nga 4,000,000 ti makipaspaset iti daytoy a trabaho iti nasurok a 200 a dagdaga, ket kadagiti kallabes a tawen nasurok a 230,000 ti nabautisaran iti tinawen. Amin iti ili ni Jehova ket naparayray a mangparang-ay kadagiti laingda iti panagdaklis, ket sumagmamano a naballigi unay a “dumadaklis” ti nainterbio.
Iti simmaganad a palawag, a napauluan “Panagtalinaed a Siririing iti ‘Panawen ti Panungpalan,’” imbinsabinsa ti nagpalawag dagiti pito a katulongan tapno mabadangan ti ili ni Jehova nga agtalinaed a siririing: panangsaranget kadagiti pakasingaan, panagkararag, panangipangngeg iti pakdaar maipapan iti panungpalan daytoy a sistema, idedekket iti organisasion ni Jehova, panangsukimat iti bagi, panangmennamenna kadagiti natungpalen a padto, ken pananglaglagip a ti pannakaisalakanda ket as-asidegen ngem idi namatida.
Nagngudo ti programa iti agsapa babaen ti maysa a panangsalaysay iti “Siasinonto dagiti Makalasat iti ‘Panawen ti Ladingit’?” Impakita ti nagpalawag no kasano nga addaan kaitungpalan ti padto ni Joel kadagiti panawen dagiti apostol, addaan ad-adda a kaitungpalan itan, ken maaddaanto ti naan-anay a kaitungpalan iti asidegen a masanguanan.
Malem ti Domingo
Nangrugi ti programa iti malem babaen iti palawag publiko a, “Panangitan-ok iti Baro a Lubong ti Wayawaya ti Dios!” Daytoy a palawag intultuloyna ti tema a wayawaya ti kumbension. Napagminar a ti Sao ti Dios ipakpakaunana ti maysa a baro a lubong a sadiay addanto wayawaya manipud panangparigat dagiti ulbod a relihiuso, politikal, ekonomiko, ken maipapan iti rasa a bambanag. Addanto met wayawaya manipud basol ken ipapatay. Maisublinton ti perpekto a salun-at tapno dagiti tao makapagbiagdanto nga agnanayon iti kinaragsak iti maysa a paraiso a daga. Ngarud, dagiti managayat iti kinalinteg addaanda iti amin a rason tapno idayawda ti Nangaramid iti baro a lubong babaen panangidir-i: “Pagyamanan, Jehova, ta adda met laengen ti wayawaya!”
Ti palawag publiko ket sinaruno ti maysa a baro a banag para kadagiti distrito a kumbension—maysa a panangsalaysay iti adalen para iti lawas idiay Ti Pagwanawanan. Kalpasanna nagngudo ti kumbension babaen ti makapabara a palawag ken pammaregta a “Dagiti Managayat iti Wayawaya, Agtultuloy nga Agabante.” Ti nagpalawag tinamingna biit dagiti tampok ti tema a wayawaya ti kumbension. Impaganetgetna nga anian a nagragsak ti ili ni Jehova gapu iti wayawayada, imbinsabinsana dagiti pamay-an a rimmang-ayan dagiti Kristiano, ken pinarayrayna ida nga agtultuloy nga agabante a sangsangkamaysa tapno apitenda dagiti ad-adu pay a bendision. Isut’ nagngudo kadagiti sasao a: “Bayat nga aramidentayo daytoy, sapay koma ta itultuloynatayo amin a bendisionan ni Jehova tapno agtultuloytayo koma nga agabante kas dagiti managayat iti wayawaya.”
“Ti sangaparsuaan ket inturayan ti kinabarengbareng, saan a babaen iti nakemna no di gapu iti daydi nangituray kenkuana, iti pananginanama a ti met laeng sangaparsuaan maluk-atanto iti pannakaadipen ti panagrupsa ket maaddaan iti nadayag a wayawaya dagiti annak ti Dios.”—Roma 8:20, 21.
[Dagiti ladawan iti panid 25]
Maysa nga agtutubo a delegado iti kumbension idiay Prague, Czechoslovakia
[Dagiti ladawan iti panid 26]
1. Dagiti kandidato agturong iti pagbautisaran idiay Prague, Czechoslovakia
2. Panagpabautisar kas maysa kadagiti Saksi ni Jehova idiay Tallinn, Estonia
3. Dagiti baro a publikasion nangiyegdat’ rag-o
kadagiti mannakikumbension idiay Usolye-Sibirskoye, Siberia
4. Panangiruar iti “New World Translation of the Holy Scriptures” iti Czech ken Slovak iti kumbension idiay Prague