Report Dagiti Manangiwaragawag ti Pagarian

‘Panagani’ Idiay Venezuela

Naminsan inyarig ni Jesus ti panangasaba a trabaho iti tinawen a panagani. (Mateo 9:36-38) Ti Apo ti panagani ket isu ni Jehova a Dios, ket pudno nga adu ti anien iti intero a lubong. Daytoy iramanna ti mammano a matrabaho a teritoria idiay Venezuela.

Ipadamag ti sanga nga opisina ti Watch Tower Society idiay Venezuela no ania ti napasamak idi a maysa a grupo dagiti Saksi trinabahoda ti teritoria a Sabana Grande, Guárico State. Isalaysay dagiti Saksi: “Ti balay a paggiananmi ket naimbag a lugar a paggigimongan, gapuna a dagdagus a rinugianmi nga awisen dagiti tattao kadagiti gimgimong sadiay. Dagiti tattao dida ammo dagiti Saksi ni Jehova. Nupay addada uppat nga ebangheliko a grupo idiay ili, magagaran dagiti tattao a makaadal manipud Biblia.

“Nagtrabahokami iti tallo nga oras iti bigat ken tallo nga oras iti malem, nga agbalaybalaykami ken awisenmi dagiti tattao iti gimong iti sumaganad a rabii. Awan tugawmi, gapuna nga inawismi ida nga awitenda dagiti bukodda a tugaw. Idi umadanin ti oras ti panangrugi ti gimong, nangrugi a sumangpet dagiti tattao, tunggal maysa adda awitna a tugaw. Idi nalpasen ti gimong, kunami kadakuada a kayatmi nga isurat dagiti nagan dagidiay agtarigagay a maaddaan ti libre a panagadal ti Biblia iti pagtaengan. Amin a 29 a timmabuno kinayatda a mailista ti naganda.

“Bayat a serserraanmi ti ridaw idi nakapanawen ti naudi kadagiti bisita, nadlawmi ti tallo a lallaki nga agtaktakder iti suli ti balay. Idi agarup alas nuebe, nakasaganakamin a mangan idi immawagda iti ridaw. Inyimtuodda dagiti salsaludsod kas iti: ‘Ania daytoy a panangasaba nga ar-aramidenyo iti daytoy nga ili? Iti ania a gapu nga adda panaggigimongyo ditoy ita a rabii?’

“Insaludsodmi no adda linteg a nalabsingmi. Simmungbatda iti saan ket kunada nga isuda dagiti pastor kadagiti tallo nga ebangheliko nga iglesia iti ili. Naupayda gapu ta awan karga dagiti simbaanda iti dayta a rabii. Pinaunegmi ida ket inlawlawagmi ti trabahomi. Nangipaimakami met kadagiti literatura kadakuada ket kiniddawmi nga agsublida iti sumaganad a Huebes.

“Iti sumaganad a Huebes nagsubli dagiti papastor ket kaduada ti 22 a sabsabali pay nga indibidual a mayat a dumngeg iti ibagami. Impagarup dagiti papastor a, gapu ta babbaikami, dikam kabaelan ti makirinnason kadakuada. Nupay kasta, naballigi ti panagsasarita no iti panangmatmatmi. Iti ngudona inlawlawagmi nga agar-aramidkami iti listaan dagidiay mayat nga agadal iti ad-adu pay manipud iti Biblia. Adu kadagiti kakadua dagiti papastor ti nayat a mainayon dagiti naganda iti listaan, ket dadduma kunada pay a kayatda ti sumurot kadakami a rummuar iti panangasaba a trabaho.

“Inlawlawagmi a kasapulanda ti ad-adu pay a pannakaammo iti Biblia ken panagsanay sakbay a mabalinda ti makidanggay kadakami iti panangasaba a trabaho. Inaldaw umay dagiti tattao iti balay, a kiddawenda nga ilawlawgmi ti Biblia kadakuada. No dadduma, no agsasaritakami agingga iti adalemen nga oras ti rabii, kiddawenmi nga agawiddan. Idi panawanmin ti teritoria, limdaangda unay ket kunada nga inton agsublikami, kumuyogdanto kadakami iti panangasaba a trabaho. Inkarida nga iti daytanto a tiempo naaramiddan dagiti makiddaw nga irarang-ay.”

Idi pinanawan dagiti Saksi dayta a teritoria, adda idi 40 a tao a mayat nga agadal ti Biblia. Dagiti nagan dagitoy nga interesado a tattao ket naipaw-it iti kaasitgan a kongregasion, nga agarup 50 kilometro ti kaadayuna. Kabayatanna, sumagmamano a Saksi manipud sabali a siudad ti immakar iti daytoy nga ili, ket maysa a grupo dagiti naregta a manangasaba ti naimbag a damag ti nabuangay.