Ti Nabingaybingay nga Iglesia​—Agpaut Aya?

“AMIN a mamati iti makaisalakan a kinapudno ni Kristo ket paset ti makita nga Iglesia. Ti pannakabingaybingay ti Kakristianuan​—iti nagbaetan ti Daya ken Laud, ken iti nagbaetan ti Roma ken dagiti iglesia ti Repormasion​—ket pannakabingaybingay iti uneg ti maymaysa nga Iglesia.” (Christians in Communion) Kasta ti panangmatmat ti maysa a mannurat iti Kinakristiano​—kas maysa a nawarawara a pamilia dagiti relihion, nga amin ket agkunkuna a mamatida ken Jesu-Kristo.

Nupay kasta, maysa dayta a nabingaybingay a pamilia, nga addaan kadagiti agsusupadi a pammati ken pagalagadan ti kababalin. “Addaan ti agdama-aldaw a Kinakristiano . . . kadagiti nababbaba a pagalagadan iti pannakikameng iti iglesia ngem dagiti pagalagadan iti panaglugan iti bus,” kuna ti maysa a managpaliiw. Ngarud, kasanotay a kedngan ti naespirituan a kasasaadna? Kuna ti maysa nga obispo a Katoliko a ni Basil Butler: “Talaga a masaksakit ti nabingaybingay a Kinakristiano.” (The Church and Unity) Kasano a nangrugi ti sakit? Adda aya namnamana nga umimbag?

“Ti Tao ti Kinakillo”

Namakdaar ni apostol Pablo a tumanorto ti pannakabingaybingay. Kadagiti Kristiano idiay Tesalonica a nangipagarup nga asideg idin ti kaadda ni Kristo, insuratna: “Awan koma ti asinoman a mangallilaw kadakayo iti aniaman a pamay-an, agsipud ta [ti aldaw ni Jehova] saanto nga umay malaksid no dumteng nga umuna ti panagapostasia ket maipanayag ti tao ti kinakillo, ti anak ti pannakadadael.”​—2 Tesalonica 2:3.

Inserrek daytoy a “tao ti kinakillo” ti apostasia ken yaalsa iti kongregasion Kristiano. Asino daytoy? Saan a maymaysa a tao no di ket, ti klase klero ti Kakristianuan. Intan-ok daytoy a klase ti bagina iti ngatuen ti apostata a kongregasion di nagbayag kalpasan ti ipapatay dagiti apostol ni Jesus, ket idi agangay insurona dagiti pinapagano a pilosopia, kas ti Trinidad ken ti di ipapatay ti kararua ti tao. (Aramid 20:29, 30; 2 Pedro 2:1-3) Kas maysa a makapapatay a virus, inimpektaranna ti agak-aklon a kongregasion Kristiano kadagiti impaltiing-demonio a kapanunotan a nangiturong iti panaglalasin.​—Galacia 5:7-10.

Nangrugi ti impeksion idi pay kaaldawan ni apostol Pablo. Insuratna: “Pudno, ti misterio daytoy a kinakillo agtigtignayen; ngem agingga laeng iti pannakaikkat daydiay agdama nga agtigtignay a kas pangtiped.” (2 Tesalonica 2:7) Dagiti apostol ti nagtignay a kas pangtiped maibusor iti sabidong ti apostasia. Idi naikkat ti mamagkaykaysa nga impluensiada, nagsaknap ti di malapdan nga apostasia a kas gangrena.​—1 Timoteo 4:1-3; 2 Timoteo 2:16-18.

Nagtultuloy dagiti aramid daytoy a “tao ti kinakillo.” Iti maysa a nabiit pay a report maipapan iti “iglesia nga agsagsagaba iti seksual ken teolohikal a rigat,” naadaw ti maysa a panguluen a diakono ti Church of England nga agrekreklamo: “Nailaksid dagiti singasing maipapan iti panangliklik dagiti klero iti seksual nga aramid iti ruar ti panagasawa. Naordenan dagiti aktibo a homoseksual. Pinagbalinda ti naimbag a dakes ket ti dakes, naimbag.”​—The Sunday Times Magazine, Londres, Nobiembre 22, 1992.

Dagiti Trigo ken Dagiti Dakes a Ruot

Insuro ni Jesu-Kristo a mismo a temporario a mailinged ti pudno a Kinakristiano. Kinunana a mayarig ti pannakabangon ti kongregasion Kristiano iti maysa a tao a nagmula iti nasayaat a bin-i iti talonna. Ngem, kinuna ni Jesus, “ti kabusorna immay ket nagimula met kadagiti dakes a ruot iti nagbabaetan dagiti trigo.” Idi sinaludsod dagiti adipenna no rebbeng a parutenda dagiti dakes a ruot, kinuna ti akinkukua iti talon: “Saan; amangan ketdi ta, bayat nga um-ummongenyo dagiti dakes a ruot, maparutyo dagiti trigo a maikuyog kadakuada.” Kasano kapaut daytoy a panaglaok dagiti trigo ken dagiti dakes a ruot? Kinuna ti akinkukua iti talon: “Bay-anyo nga agpadpadada a dumakkel agingga iti panagani.”​—Mateo 13:25, 29, 30.

Agingga iti “panagani,” wenno tiempo ti panamaglalasin kabayatan dagiti maudi nga al-aldaw ti “sistema ti bambanag,” naggiddan a dimmakkel dagiti sinsinan Kristiano ken dagiti pudno a Kristiano. (Mateo 28:20) Inusar ni Satanas a Diablo dagiti apostata a nangpataud iti rinuker ken nabingaybingay a sinsinan a kongregasion Kristiano. (Mateo 13:36-39) Nangparnuayda iti nakababain a palso a Kinakristiano. (2 Corinto 11:3, 13-15; Colosas 2:8) Bayat a nabingaybingay ti iglesia iti panaglabas dagiti siglo, nagbalin a narigat nga ilasin dagiti pudno a Kristiano.

Dagiti Baro a Dibision

Iti di pay unay nabayag iti moderno a panawen, kuna ti The Testing of the Churches​—1932-1982, “nagparang dagiti [b]aro a dibision, kangrunaanna ti karismatiko a tignay, a mangipagpaganetget iti personal a pammati ken kapadasan.” Makapainteres, ibilang dagiti dadduma dagiti mayanak manen, karismatiko a tignay kas pagilasinan ti naespirituan a panagimbag imbes a baro a dibision. Kas pagarigan, napasaran ti Makin-amianan nga Irlandia ti kasta a pannakaisubli idi 1850’s. Dakkel ti ninamnamada. Dinakamat ti maysa a report ti “nainkabsatan a panagkaykaysa . . . dagiti ministro a Presbiteriano, Wesleyan, ken Independiente” ken kinunana nga “inaldaw nga adda dagiti baro a report maipapan kadagiti pannakaimayeng, pannaturog, sirmata, tagtagainep ken milagro.”​—Religious Revivals.

Imbilang dagiti adu dagitoy a dramatiko a parangarang kas pammaneknek a bibiagen ti espiritu ti Dios ti iglesiana. “Ti iglesia ti Dios,” kuna ti maysa a managpaliiw, “iti kangatuan nga anagna ket naisubli kadagitoy a distrito.” Ngem, nupay naiwaragawag daytoy a partikular a pannakaisubli kas “nadayag ken awan pay kapadana a panawen iti narelihiusuan a pakasaritaan ti Ulster,” saan a nakapataud daytoy ken dagiti dadduma pay a pannakaisubli a kas iti dayta iti narelihiusuan a panagkaykaysa iti nagbabaetan dagidiay agak-aklon a nayanak a nabaliwan iti naespirituan.

Ikalintegan dagiti kasta a tattao a nagkaykaysada kadagiti kapapatgan ken kangrunaan a banag. Ngem kasta met laeng ti argumento nga us-usaren dagiti dadduma pay a paset ti Kakristianuan, nga ikalkalinteganda a “napatpateg nga adayo ita daydiay mamagkaykaysa kadagiti Kristiano ngem dagiti bambanag a mamagsisina pay laeng kadakuada.” (The Church and Unity) Kuna ti Kakristianuan: “Nairamut iti pannakabautisarmi ken Kristo ti kangrunaan a nagkaykaysaanmi ken kadagiti amin a padami a Kristiano.” (Christians in Communion) Nupay kasta, ti panangikuna a saan a napateg dagiti panaglalasin gapu iti maymaysa a pammati ken Jesus ket arigna ti panangikuna a saan a serioso ti kanser no la ket ta napigsa ta pusom.

Kinaagpaysona, dagiti kasta a moderno a relihiuso a tignay pinakaroda ti pannakariro ken nangpataudda iti naespirituan nga anarkia bayat nga agur-urnong dagiti mannursuro a nalaing a mangallukoy kadagiti pasurotda. Da Jim Jones ken ni David Koresh ti nabiit pay a pagarigan dagiti naespirituan a panguluen a nangallilaw iti rinibu a tattao. (Mateo 15:14) Adda maysa a ministro a Baptist a maysa a kangrunaan a kameng ti Ku Klux Klan. Innaigna ti kampaniana a maipaay iti kinatan-ok dagiti puraw iti maysa a baro a relihiuso a tignay ket kinunana a dagidiay makipaset iti dayta “maikkandanto iti pigsa manipud iti nasantuan a panangidalan, ken maikkandanto iti tured Daydiay natay iti Kalbario [ni Jesu-Kristo].”

Dagiti met ngay kunkunada a milagro, mannakabalin nga ar-aramid, ken pagilasinan a maar-aramid iti nagan ni Jesus? Laglagipenyo ti nainget a ballaag ni Jesu-Kristo, saan a dagidiay agkunkuna laeng iti “Apo, Apo” ti anamonganna, no di ket, ‘dagidiay mangar-aramid ti pagayatan ni Amana.’ Adu ita ti di man la makaammo iti nagan ti Amana, ni Jehova. Namakdaar ni Jesus maipapan kadagidiay ‘mangparuar kadagiti sairo iti naganna, ken mangaramid iti adu a mannakabalin nga ar-aramid iti daytoy a nagan’ ket kaskasdi a maibilangda nga “agar-aramid ti kinakillo.”​—Mateo 7:21-23.

“Rummuarkayo Kenkuana Tattaok”

Ania ti namnama ti masakit a Kakristianuan nga umimbag? Bassit laeng. Ngarud, rebbeng aya nga ipangagtayo ti balakad ti obispo a Katoliko a ni Butler, a “kumappon [iti iglesia] nga awan ti adu pay la a sao ken tumulongtayo iti agtultuloy a ‘pannakadalus’ dagiti miembrona”? Saan! Saan nga agpaut ti nabingaybingay ken mamagsisina a Kakristianuan. (Marcos 3:24, 25) Paset dayta ti sangalubongan nga imperio ti ulbod a relihion a maawagan iti Babilonia a Dakkel. (Apocalipsis 18:2, 3) Sangsanguen daytoy a relihiuso a sistema a nakabasol iti dara ti umad-adani a pannakadadael iti ima ti Dios.

Saan nga isingsingasing ti Biblia nga agtalinaed dagiti pudno a Kristiano iti daytoy rinuker a relihiuso nga organisasion ken padasenda a baliwan dayta manipud iti uneg. Ngem ketdi, balakadannatayo: “Rummuarkayo kenkuana, tattaok, no dikay kayat ti makiraman kenkuana kadagiti basolna, ken no dikay kayat ti umawat iti paset dagiti saplitna. Ta dagiti basolna namuntuonda a tumukno sadi langit, ket ti Dios linagipna dagiti aramidna a di kinahustisia.”​—Apocalipsis 18:4, 5.

‘Rummuar’ nga agturong iti sadino? Laglagipenyo, inkari ni Jesus nga iti tiempo ti panagani, maurnongto manen dagiti pudno a Kristiano iti sangalubongan a panagkaykaysa. Impadto met ni propeta Mikias ti kasta a panangurnong manen babaen kadagitoy a sasao: “Pagkaykaysaekto ida, kas maysa a pangen iti pagaraban.” (Mikias 2:12) Mapaspasamaken aya daytoy?

Wen! Maur-urnong itan dagiti pudno a Kristiano iti nagkaykaysa a panagkakabsat iti intero a daga. Siasinoda? Isu ti kongregasion Kristiano dagiti Saksi ni Jehova, a sangsangkamaysa a mangiwarwaragawag iti naimbag a damag maipapan iti Pagarian ti Dios iti 231 a dagdaga. Linaksidda dagiti mamagsisina a sursuro ti Kakristianuan ken ikagkagumaanda ti agdaydayaw iti Dios a mayannurot iti kinapudno ti Saona.​—Juan 8:31, 32; 17:17.

Sibabara a maawiskayo a makisarita kadakuada. No kayatyo a maammuan ti ad-adu pay maipapan kadagiti Saksi ni Jehova, pangngaasiyo ta makiumankayo kadakuada iti lugaryo wenno babaen ti tumutop a direksion iti panid 2 daytoy a magasin.

[Ladawan iti panid 7]

“Ti Dios linagipna dagiti aramidna a di kinahustisia”