Report Dagiti Manangiwaragawag ti Pagarian
Agtultuloy a Maikaskasaba ti Kinapudno iti Biblia Idiay Ireland
KADAGITI napalabas a tawen ti nadayag a pagilian ti Ireland nagbalin a lugar ti nakaro a riribuk. Iti dayta met laeng a panawen, nangipangag dagiti taga-Ireland iti mensahe ti Biblia maipapan iti namnama nga inyeg kadakuada dagiti Saksi ni Jehova. Dagiti sumaganad a kapadasan manipud Ireland pasingkedanda daytoy.
◼ Idiay Dublin maysa kadagiti Saksi ni Jehova ken ti balasitangna ti makiramraman idi iti trabaho a panangasaba iti binalaybalay. Naam-ammoda ti maysa a babai nga agnagan Cathy nga okupado unay kadagiti adu nga annakna. Kiniddaw ti Saksi no mabalin nga iranud ti balasitangna, nga agsursuro no kasanot’ mangasaba, ti maysa laeng nga ababa a mensahe kenkuana. Immanamong ni Cathy, ket nangipaay ti balasitang iti nalawag, naisagana a naimbag a presentasion. Nasdaaw ni Cathy iti nabatad a kinapasnek ken kinadayaw ti balasitang, ket inawatna ti tukon a tract iti Biblia.
Idi agangay pinampanunot ni Cathy ti nasayaat a panagsagana ken ugali ti balasitang a sangailina. “Nasdaawak unay a ti maysa a bassit a balasitang makairanud iti kasta a makaay-ayo a mensahe a di isursuro kenkuana dayta,” kinunana. “Inkeddengko nga iti sumaganad nga isasarungkar dagiti Saksi ni Jehova, dumngegakto kadakuada.”
Kabayatanna immakar ni Cathy iti bassit nga ili iti umabagatan a laud nga Ireland iti asideg ti pagbeddengan ti rehion ti Cork ken Kerry. Di nagbayag kalpasanna simmarungkar iti pagtaenganna dagiti Saksi ni Jehova, ket pinastrekna ida. Inawatna ti regular a panagadal iti Biblia ket ita tumabtabunon kadagiti gimong iti kongregasion a kaduana ti sumagmamano kadagiti annakna. Agyamyaman ni Cathy iti napudno a tarigagay ti balasitang a mangiranud iti naimbag a damag kenkuana.
◼ Iti lugar ti Tullamore, nakisarsarita maipapan iti Biblia dagiti Saksi iti maysa a babai nga agnagan Jean iti las-ud ti pito a tawen. Pasaray nangipakita iti interes ken immaw-awat iti literatura, ngem kadagiti sabali a gundaway awan interesna. Maysa nga aldaw, idi simmarungkar ken Jean ti maysa a Saksi nga agnagan Frances ken ti kaduana, nadanonda a makasursuron unay. “Aniaman ti imbagami,” kuna ti Saksi, “ad-adda a nasuron. Kamaudiananna, pinapanawnakami ket pinanalbaagna ti ruangan.”
Pinanunot ni Frances nga amangan no kastanto manen ti panagtignayna kadagiti sumaganad nga isasarungkar. ‘Nalabit awanen serserbina ti isasarungkar kenkuana no saan a talaga nga interesado iti mensahe,’ pinampanunot ni Frances. Nupay kasta, dinakamatna dayta a banag ken ni lakayna, a ni Thomas, ket isut’ ad-adda a positibo. Iti sumaganad a gundaway nga addada iti dayta a lugar, sinarungkaranda manen ni Jean. Mannakigayyemen ken immawat kadagiti kopia ti magasin a Pagwanawanan ken Agriingkayo! Makaparagsak dagiti simmaganad pay nga isasarungkar, ket rinugian da Thomas ken Frances ti regular a panangyadal iti Biblia kenkuana iti pagtaengan.
Apay nga adda panagbalbaliw? Inlawlawag ni Jean nga iti daydi tiempo a nasabrak kadagiti Saksi, kaan-anak ken karuruarna iti ospital. Gapu iti panangpasusona iti kappasngay a maladagana ken panangpakanna iti inauna nga anakna, maysa ket kagudua nga oras laeng ti turogna iti rabii. “Ti maudi a banag a kayatko nga aramiden,” kuna ni Jean, “isut’ makisarita maipapan iti relihion.”
Iti las-ud ti dua a bulan tumabtabunon ni Jean kadagiti amin a panaggigimong iti kongregasion, ket iti uppat a bulan makiramramanen iti ministerio iti tay-ak. Sangapulo a bulan manipud idi nangrugi a makipagadal iti Biblia, nabautisaran. Ita, ti mismo a kapadasan ni Jean ti tumultulong kenkuana iti ministerio. Kunana: “No makasarakak iti maysa a nasabrak, ikagumaak ti agbalin nga ad-adda a mannakaawat. Kanayon nga ilistak dayta. Mabalin nga agbalbaliw ti kasasaad iti panagsublik; mabalin a nasaysayaatton ti panagrikna ti tao ken madadaan nga umawat.”