Mapaspasamak Pay Kadi Dagiti Namilagruan a Panangpaimbag?
“AWATEM ni Jesus ket umimbagka!” Dagiti islogan a kas iti daytoy ti nangiturong ken ni Alexandre, kameng ti simbaan nga Ebangheliko, a mamati a ti panagtomar iti agas para iti sakitna kaipapananna ti kinaawan pammatina. Kombinsido a ti laeng pammatina ti makaiyeg iti namilagruan a pannakapaimbagna. Ni Benedita, maysa a napeklan a Katoliko, natignay unay idi nadamagna dagiti namilagruan a panangpaimbag iti santuario ti Aparecida do Norte, idiay estado ti São Paulo, Brazil. Iti panangaramatna iti sumagmamano a misterioso a sasao nga insuro kenkuana ni ikitna, nagkararag ni Benedita iti Our Lady of Aparecida, Anthony, ken dadduma pay a “sasanto” maipaay iti pannakabalin a mangpaimbag kadagiti masakit.
Nabatad, uray iti daytoy arinunos ti maika-20 a siglo, adu pay laeng a tattao ti mamati iti namilagruan a panangpaimbag—ngem apay? Nalabit, maupay ti dadduma no awan maaramidan dagiti doktor a mangagas iti sakit, ut-ot, ken panagsagaba dagiti ipatpategda, nangnangruna dagiti annakda. Mabalin a mapanunot dagidiay agsagsagaba iti nakaro a sakit a gapu iti kinangina ti moderno a medisina, awan mapukaw kadakuada no agpaagasda babaen ti pammati. Dagiti dadduma mabuybuyada iti TV ti nadumaduma nga iglesia ken tattao a mangituktukon iti agas ti AIDS, panagleddaang, kanser, pannakadadael ti panunot, alta presion, ken adu a sabsabali pay a sakit. Mamatida man kadagita wenno saan, padasenda dagitoy kas maudi a remedio. Kaskasdi ti dadduma a mamati a pinagsakit dagiti dakes nga espiritu ipapanda a di makatulong kadakuada ti gagangay a medisina.
Iti sabali a bangir, adda dagidiay sititibker a sumupiat, kondenarenda pay ketdi, ti kapanunotan maipanggep iti namilagruan a panangpaimbag dagiti natay a “sasanto” wenno sibibiag a mangngagas. Sigun iti Jornal da Tarde, patien ni immunologo a Dráusio Varella a ti panamati “tungdayenna ti pammati dagiti maag ken desperado.” Kunana pay: “Tangay mangnamnamada kadagiti milagro, inlaksid ti adu ti napateg a panangagas gapu kadagitoy a manangallilaw.” Ken ilawlawag ti The New Encyclopædia Britannica: “Dagiti karkarna a panangpaimbag adda napalabas a nakainaiganna kadagiti sagrado a lugar ken narelihiosuan a ritual, ket ti medikal a siensia kunana nga amin a kasta a panangpaimbag ket maigapu iti normal nga impluensia ti hipnotismo nga epektibo iti sidong dagiti nasayaat a kasasaad.” Kaskasdi, adu ti mamati a pudpudno a napaimbagda babaen ti milagro. Para kadakuada, epektibo ti panangpaimbag!
Pagaammo dagidiay pamiliar iti Biblia a pinaimbag ni Jesu-Kristo dagiti masakit iti adu a gundaway, nga inaramidna daytoy babaen ti “pannakabalin ti Dios.” (Lucas 9:42, 43) Gapuna maisaludsodda, ‘Ti ngata pannakabalin ti Dios agtigtignay ken mamatpataud pay laeng iti namilagruan a panangpaimbag ita?’ No kasta, apay a di agballigi dagiti mangpadpadas a mangpaimbag? Gapu ngata ta kurang ti pammati ti pasiente wenno gapu ta bassit ti donasionna? Umiso kadi ti namilagruan a panagpaagas ti maysa a Kristiano no agsagsagaba iti naut-ot wenno nalabit din maagasan a sakit? Ken mapasamakto kadi manen ti pudpudno a namilagruan a panangpaimbag a kas ti inaramid ni Jesus? Masarakanyo ti sungbat dagitoy napateg a saludsod iti sumaganad nga artikulo.