Panangpatibker iti Pammatitayo iti Sao ti Dios
AD-ADU a tattao ti nakabasa iti Biblia ngem iti aniaman a sabali a libro. Ngem kasano kaadu ti nangiparangarang iti pammati iti mensahena? Ilawlawag ti Biblia a mismo a ti “pammati saan nga ik-ikutan ti isuamin a tattao.” (2 Tesalonica 3:2) Nalawag, saantay a nayanak nga addaan pammati. Masapul a patanoren daytoy. Uray dagidiay addaan pammati rumbeng a dida tagtagilag-anen daytoy. Mabalin a kumapuy ken mapukaw ti pammati. Gapuna, kasapulan ti panangikagumaan tapno agtalinaed a “nasalun-at iti pammati.”—Tito 2:2.
No kasta, adda naimbag a rason a pinili ti Bagi a Manarawidwid dagiti Saksi ni Jehova ti tema a “Pammati iti Sao ti Dios” para iti 1997/98 a serye dagiti kombension distritoda. Minilion a Saksi ken sabsabali pay ti naaddaan iti pribilehio nga agtataripnong tapno mapatibker ti pammatida iti Sao ti Dios.
Ti Sao ti Dios ket Pudno—Ti Nakaibatayan ti Pammatitayo
Daytoy ti tema ti umuna nga aldaw ti kombension. Nangrugi daytoy babaen ti panangkomendar iti amin a timmabuno. Ti kaadda iti kombension ket pakakitaan iti panagraem iti Biblia. Kaskasdi, addada naidatag a mamagpanunot a saludsod maipanggep iti kalidad ti pammatitayo: ‘Kabaelantay kadi nga idepensa ti pammatitayo, nga usarentayo ti Sao ti Dios kas autoridad? Apresiarentay kadi ti naespirituan a taraon, a ditay tagtagilag-anen ti Biblia, dagiti gimong iti kongregasion, ken naibatay-Biblia a publikasion? Rumangrang-aytay kadi iti ayat, umiso a pannakaammo, ken pannakaawat? Pinaregta ti ispiker ti amin a dumngeg a naimbag, nga imbagana a “daytoy a ‘Pammati iti Sao ti Dios’ a Kombension Distrito ket naisagana a tumulong kadatayo a mangsukimat iti bagbagitayo ken mangsubok iti kadakkel ken kalidad ti pammati nga adda kadatayo kas indibidual.”
Ti pannulbek a palawag ket napauluan “Pannagna Babaen ti Pammati, Saan a Babaen ti Panagkita.” (2 Corinto 5:7) “Ti pammati dagidiay agbalin a Saksi ni Jehova ket saan a basta panamati laeng,” kinuna ti ispiker. Agpayso unay daytoy! Saan a bulsek ti pudno a pammati. Naibatay daytoy iti kinapudno. Kuna ti Hebreo 11:1: “Ti pammati isu ti sigurado a panangsegga kadagiti bambanag a namnamaen, ti nabatad a parangarang dagiti kinapudno nupay saan a nakita.” Kuna ti ispiker: “Tapno pudpudno a makapagnatayo babaen ti pammati, kasapulan a natibker ti pundasion ti pammatitayo.” Gapu ta magmagnatayo babaen ti pammati, saan a babaen ti panagkita, ditay kasapulan dagiti detalye no kasano ken kaano a tungpalen ni Jehova amin nga aspeto ti panggepna. Ti ammotayon maipapan kenkuana ipaayannatayo iti naan-anay a panagtalek iti pannakabalinna a mangtungpal kadagiti karina iti naayat ken nainkalintegan a pamay-an.
Ti palawag a “Dagiti Kristiano nga Agtutubo—Nasken a Paset ti Kongregasion” impalagipna kadagiti agtutubo no kasano ti kinapategda ken Jehova. Naparegtada a rumang-ay iti naespirituan babaen ti panagreggetda a mangbasa iti intero a Biblia ken mangannurot kadagiti ipakalikagum ti dedikasion ken bautismo. Ti panangala iti kanayonan nga edukasion ket personal a banag nga ikeddeng a kadua dagiti nagannak, ngem no gun-oden dayta, rumbeng a ti panggep ket tapno kanayon a makabalan nga agserbi iti Dios iti ad-adda nga epektibo a pamay-an. Ti sekular nga edukasion mabalin a maaddaan iti makagunggona a panggep no ‘siguraduen[tayo] dagiti napatpateg a bambanag’ a mainaig iti pammatitayo.—Filipos 1:9, 10.
Simmaganad ti maysa a simposium ti tallo a palawag iti tema a “Makinpagalagadan ti Sursurotenyo?” Ti pammati iti Sao ti Dios tignayennatayo a mangtungpal kadagiti pagalagadan iti Biblia. Tungtungpalen dagiti Kristiano dagiti linteg ken prinsipio ni Jehova. Kas pagarigan, balakadannatayo ti Kasuratan nga idiantayo dagiti naalas ken nagubsang a sasao. (Efeso 4:31, 32) Insaludsod ti ispiker: “No marurod wenno masuronkayo, bugkawanyo kadi ti asawayo wenno ti annakyo?” Siempre, saan a nakristianuan dayta. Addaan met ti Dios kadagiti pagalagadan maipanggep iti personal a panaglanglangatayo. Rumbeng a kawesan dagiti Kristiano ti bagbagida “iti naimbag-pannakaurnosna a kawes, buyogen ti kinaemma.” (1 Timoteo 2:9, 10) Ti sao a “kinaemma” ipasimudaagna ti kapanunotan a panagraem iti bagi, kinadayaw, kinatakneng, ken kinatimbeng. Matignaytayo iti ayat dagiti sabsabali ken paiwanwan babaen kadagiti prinsipio iti Biblia ken pannakarikna no ania ti mayanatup.
Iti simmaganad a dua a palawag, bersikulo-por-bersikulo a nausig ti Hebreo 3:7-15 ken 4:1-16. Dagitoy a bersikulo iti Biblia pakdaarannatayo maipapan iti peggad a ‘mapatangken babaen ti makaallilaw a pannakabalin ti basol.’ (Hebreo 3:13) Kasanotay a makapagballigi iti pannakidangadangtayo iti basol? Tulongannatayo ni Jehova babaen ti Saona. Kinapudnona, “ti sao ti Dios nabiag ken adda bilegna ken . . . kabaelanna a lasinen dagiti panunot ken dagiti panagem ti puso.”—Hebreo 4:12.
Ti maudi a palawag iti umuna nga aldaw ti kombension ket “Libro Para iti Amin a Tao.” Intampokna ti kinautentiko, kinaumiso, ken praktikal a pateg ti Biblia. Anian a makaparagsak a mangngeg ti panangyanunsio ti ispiker iti pannakairuar ti maysa a baro a 32-panidna a broshur a napauluan Libro Para iti Amin a Tao! Naisagana daytoy baro a publikasion nangnangruna para kadagiti tattao a, nupay de adal, bassit la ti ammoda maipapan iti Biblia. Nagngudo ti palawag babaen ti sasao a: “Masapul a sukimaten a mismo dagiti tattao ti Sao ti Dios. Agtalektayo a no isuda a mismo ti mangsukimat, mautobdanto a daytoy nagpaiduma a libro, ti Biblia, ket talaga a libro para iti amin a tattao!”
Tuladen ti “Manangan-anay iti Pammatitayo”
Daytoy a tema ti maikadua nga aldaw ti kombension inturongna ti atension ken Jesu-Kristo, ti “Manangan-anay iti pammatitayo.” Kasapulan a ‘surotentayo a sisisinged dagiti addangna.’ (Hebreo 12:2; 1 Pedro 2:21) Adu iti Kakristianuan ti napagkunaan: ‘Mamatika ken ni Apo Jesus, ket maisalakanka!’ Ngem kasta laeng aya ti pammati? Kuna ti Biblia a ti ‘pammati nga awanan ar-aramidna ket natay.’ (Santiago 2:26) Ngarud, malaksid iti panamati ken Jesus, masapul nga aramidentayo dagiti inaramidna, nangnangruna babaen ti panangikasaba iti naimbag a damag ti Pagarian ti Dios.
Impamaysa ti programa iti bigat ti trabaho a panagebanghelio. Kas ken Pablo, rumbeng a sigagagartayo a mangideklara iti naimbag a damag ti pannakaisalakan. (Roma 1:14-16) Kinasabaan ni Jesus dagiti tattao iti amin a lugar. Nupay mamatpataud iti nasayaat a resulta ti regular a ministeriotayo iti binalaybalay, umad-adu a tattao ti awan iti pagtaenganda no sumarungkartayo. (Aramid 20:20) Adu ti adda iti eskuelaan, agtartrabaho, aggatgatang, wenno agbibiahe. Gapuna, kasapulantay met ti mangasaba kadagiti publiko a lugar ken sadinoman a pakasarakan kadagiti tattao.
Ti palawag a “Mairamut ken Mapatibkerkayo Koma iti Kinapudno” impalagipna kadatayo ti adu a kabbaro nga adalan a mababautisaran—nga agpromedio iti nasurok a 1,000 kada aldaw! Nasken a dagitoy a kabbaro makaramut a naan-anay ken mapatibkerda iti pammati. (Colosas 2:6, 7) Inlawlawag ti ispiker a dagiti literal a ramut agsependa ti danum ken sustansia kabayatan nga agserserbida met kas angkla wenno suporta ti mula. Umasping iti dayta, babaen iti nasayaat nga ugali iti panagadal ken nasayaat a kakadua, mabalin a tumibker dagiti kabbaro nga adalan iti kinapudno.
Daytoy a balakad ket nangnangruna a maitutop para kadagiti kandidato iti bautismo. Wen, iti maikadua nga aldaw ti kombension, umariwekwek a kabbaro nga adalan ti nabautisaran, kas panangsurot iti ulidan ni Jesus. Ti palawag a “Ti Pammati iti Sao ti Dios Mangiturong iti Bautismo” impalagipna kadagiti kandidato a ti naan-anay a pannakaitaneb ket maitutop a simbolo ti pannakatayda iti dati a managimbubukodan a wagas ti panagbiagda. Ti pannakairukuasda irepresentarna ti pannakapagungarda tapno aramidenda ti pagayatan ti Dios.
Ti palawag a “Makidangadangkay a Sipipinget Maipaay iti Pammati” ket naibatay iti libro ti Biblia a Judas. Naparegtatayo a mangsalaknib iti pammatitayo babaen ti panangsaranget kadagiti dakes nga impluensia, kas ti imoralidad, panagrebelde, ken apostasia. Kalpasanna, dagiti nagannak—nangnangruna dagiti amma—naipaayanda iti naipangpangruna nga atension iti palawag a “Taraonanyo ti Sangakabbalayanyo.” Nainkasuratan nga obligasion ti panangipaay iti espiritual, pisikal, ken emosional a kasapulan ti pamilia. (1 Timoteo 5:8) Kalikaguman daytoy ti tiempo, komunikasion, ken kinasinged. Sigurado a maragsakan ni Jehova a Dios iti panangikagumaan dagiti Kristiano a nagannak a mangpadakkel kadagiti annakda iti kinapudno.
Ti sumaganad a simposium, “Mapantayo iti Balay ni Jehova,” pinatanorna ti panangipateg kadagiti Nakristianuan a panaggigimong. Mangipapaay dagitoy iti inana manipud kadagiti pakaringgoran iti daytoy a lubong. Kadagiti gimong addaantayo iti gundaway nga agpipinnaregta, ken maipakitatayo ti ayattayo kadagiti kapammatiantayo. (Hebreo 10:24, 25) Tulongannatay met dagiti gimong a mangpatadem iti abilidadtayo kas mannursuro, ken paunegen dagitoy ti pannakaawattayo iti panggep ti Dios. (Proverbio 27:17) Ditay koma pulos isina ti bagbagitayo iti kongregasion, ken laglagipentayo ti sasao ni Jesus: “No sadino nga adda dua wenno tallo a naguurnong iti naganko, sadiay addaak iti nagtengngaanda.”—Mateo 18:20.
Ti maudi a palawag iti dayta nga aldaw ket “Ti Kalidad ti Pammatiyo—Masubsuboken.” Awan pategna ti pammati a di nasubok, ken di pay ammo ti kalidadna. Mayarig dayta iti tseke a di pay naisukat. Talaga ngata a maalayo ti gatad a nakasurat iti dayta? Umasping iti dayta, ti pammatitayo masapul a masubok tapno mapaneknekan nga adda pategna ken nasayaat ti kalidadna. (1 Pedro 1:6, 7) Kinuna ti ispiker: “No dadduma, adda dagiti warnakan ken agtuturay a sikapan dagiti klero ken apostata tapno mangparboda iti pammabasol kadatayo, a ti la maibagbagada maipapan iti Nakristianuan a pammati ken panagbiagtayo. . . . Ituloktay kadi a pabutngan ken upayendatayo dagidiay binulsek ni Satanas ket impluensiaandatayo a mangibain iti naimbag a damag? Ituloktay kadi a ti panangtiritirda iti kinapudno apektaranna ti regular nga itatabunotayo iti gimong ken panangasaba? Wenno agtibker ken tumuredtayo ken ad-adda pay a determinado a mangipakaammo iti kinapudno maipapan ken Jehova ken iti Pagarianna?”
Agbiag Gapu iti Pammati
Ti tema iti maikatlo nga aldaw ti kombension ket naibatay iti sasao ni Pablo: “A babaen ti linteg awan ti maideklara a nalinteg iti Dios, agsipud ta ‘ti nalinteg agbiagto gapu iti pammati.’” (Galacia 3:11) Ti simposium a, “Naimpadtuan a Sasao ni Joel Para iti Kaaldawantayo,” ti maysa kadagiti tampok a paset iti agsapa. Ti libro a Joel tuktukoyenna ti panawentayo ket kunana buyogen ti kinaganat: “Ay ilala pay ti aldaw! ta asidegen ti aldaw ni Jehova, ket umayto kas pannakadadael nga aggapu iti Mannakabalin-amin!” (Joel 1:15) Kas kadagiti nadawel a dudon, di ipalubos dagiti napulotan a Kristiano ti aniaman a banag a manglapped iti pannakaiwaragawag ti Pagarian iti daytoy panawen ti panungpalan.
Mangipaay met ti libro a Joel iti namnama, a kunana: “Uray siasino nga umawagto iti nagan ni Jehova, maisalakanto.” (Joel 2:32) Saan a basta panangusar laeng iti nagan ni Jehova ti kaipapanan daytoy. Kasapulan ti naimpusuan a panagbabawi, ket ramanen daytoy ti panangtallikudtayo iti kinadakes. (Joel 2:12, 13) Ditay koma mangitungtungkua ta asidegen nga ukomen ni Jehova dagiti nasion, kas ti inaramidna idi iti Moab, Ammon, ken iti kabambantayan a rehion ti Seir idi kaaldawan ni Ari Josafat ti Juda.—2 Cronicas 20:1-30; Joel 3:2, 12.
Naparegta ti amin iti palawag nga “Ipakita ti Pammati Babaen ti Panaguray ken Jehova.” Ita ta adayo ti nagtengantayon iti panawen ti panungpalan, mabalintay a taliawen ti kaitungpalan ti adu kadagiti kari ni Jehova, ken segseggaantayo dagiti banag a mapasamakto pay laeng. Masapul nga agtultuloy nga aganus ti ili ni Jehova, a laglagipenda a matungpalto amin nga inkari ti Dios.—Tito 2:13; 2 Pedro 3:9, 10.
Nagngudo ti programa iti bigat iti drama a “Pagtalinaedenyo a Simple ti Matayo.” Daytoy realistiko a drama pinaregtanatayo a mangsukimat iti motibotayo maipanggep kadagiti material a kalat. Sadinoman ti pagnanaedantayo, no kayattayo nga awan pakaringringgorantayo iti biag, masapul a surotentayo ti balakad ni Jesus a pagtalinaedentayo a simple ti matatayo, a silalawag a naiturong iti Pagarian ti Dios.—Mateo 6:22.
Ti palawag publiko ket addaan makaawis a paulo a “Ti Pammati ken ti Masanguananyo.” Nangipaay daytoy iti pammaneknek iti kinaawan kabaelan dagiti natauan a pangulo a mangrisut kadagiti parikut iti lubong. (Jeremias 10:23) Maulit-ulit laeng ti pakasaritaan ti tao—nasaksaknap ken ad-adda a makadangran. Kasanot’ panagrikna dagiti Saksi ni Jehova maipapan iti masanguanan? Mamatitayo a ti matalek a sangatauan addaan naraniag a masakbayan iti sidong ti Pagarian ti Dios. (Mateo 5:5) Tungpalento ti Dios dagiti karina a pakagunggonaan ti amin nga addaan pammati iti Saona, a mangidagdagadag: “Sapulenyo ni Jehova ita ta masarakan pay; umawagkayo kenkuana ita ta asideg pay.”—Isaias 55:6.
Nangibangon ni Jesus iti napateg a saludsod maipanggep iti kaaldawantayo. Insaludsodna: “Inton dumteng ti Anak ti tao, pudno aya a masarakannanto ti pammati ditoy daga?” (Lucas 18:8) Narepaso iti maudi a palawag ti programa iti kombension ken impakitana no kasano a nangipaay daytoy iti natibker a pammaneknek nga adda dagiti mamati iti Sao ti Dios, nupay agbibiagtayo iti lubong nga awanan pammati ken makasekular.
Kaskasdi, maisaludsod ti tunggal maysa kadatayo, ‘Maysaak kadi kadagidiay addaan iti di maisin a pammati iti Dios ken iti Saona?’ Ti “Pammati iti Sao ti Dios” a Kombension Distrito rumbeng a tulongannatayo a mangsungbat iti wen iti dayta a saludsod. Ket anian a yamantayo ken Jehova gapu iti panangpatibkerna iti pammatitayo kenkuana ken iti naipaltiing a Saona, ti Biblia!
[Dagiti Ladawan iti panid 24]
Adu a boluntario ti siraragsak a nagtrabaho tapno maserbian dagiti rinibu a delegado
[Dagiti Ladawan iti panid 25]
Nausar dagiti dadakkel nga estadium a kas iti daytoy iti intero a lubong
[Ladawan iti panid 25]
Inruar ni L. A. Swingle iti Bagi a Manarawidwid ti baro a broshur
[Ladawan iti panid 26]
Adu ti nabautisaran kas simbolo ti dedikasionda ken Jehova
[Dagiti Ladawan iti panid 27]
Sirarag-o a nagkanta dagiti kombensionista iti kanta ti Pagarian. Naisingit a retrato: ti drama a “Pagtalinaedenyo a Simple ti Matayo”