Diyo Ipalubos nga Agbalin a Pagkapuyanyo ti Paglainganyo

Babaen kadagiti 16 a benneg ti bagina a di mastrek ti danum, naipagarup a di pulos lumned ti luxury liner a Titanic. Iti damo a panagbiahena idi 1912, kargana ti agarup kagudua laeng iti bilang dagiti masapul a lifeboat. Naidungpar ti barko iti maysa nga iceberg ket limned, a nakapukawan ti nasurok a 1,500 a biag.

NI MANAGBUTENG-DIOS nga Ari Uzzias iti nagkauna a Jerusalem ket masirib a panguluen ti buyot. Agsasaruno a pinarmekna dagiti kabusorna babaen ti tulong ni Jehova. “Ket ti nagan [ni Uzzias] naipadamag iti adayo; ta natulongan idi iti nakaskasdaaw, agingga iti isu napigsa.” Ngem kalpasanna, “ti pusona nagpalangguad . . . ket sinalungasingna ni Jehova a Diosna.” Nagkukutel ni Uzzias gapu iti kinapalangguadna.​—2 Cronicas 26:15-21; Proverbio 16:18.

Isuro kadatayo daytoy dua a salaysay a nalaka nga agbalin a pagkapuyan wenno pagdaksan dagiti paglaingan no saan a matibnokan iti sirib, kinanumo, ken kinapakumbaba. Mamagpanunot daytoy, ta uray kaskasano, adda paglaingan wenno saguday ti tunggal maysa kadatayo, ket kayattayo nga agbalin dagitoy a pagimbagan ken pagtaudan ti rag-otayo ken ti sabsabali, nangnangruna ti Namarsua kadatayo. Wen, rumbeng laeng a naan-anay nga usarentayo ti aniaman a saguday nga inted ti Dios kadatayo ngem maigiddato iti dayta, masapul a timbengen dayta a saguday tapno agtalinaed a pagimbagan.

Kas pagarigan, ti tao a maay-ayo iti trabahona nalakana a mapagbalin a pagkapuyan daytoy a saguday no maigamer iti trabaho (workaholic). Mabalin a saan a nalaka a maluko wenno maallilaw ti naannad a tao, ngem mabalin a naannad unay a di met la makaikeddengen. Nasayaat met a galad ti kinaepisiente, ngem no masobraan, a di maikabkabilangan ti karirikna ti sabsabali, mabalin nga agbanag iti awan pannakipagriknana ken nainget a kasasaad a pakaigapuan ti ladingit. Utobenyo ngarud iti apagbiit dagiti mismo a paglainganyo. Umiso kadi ti panangusaryo kadagitoy? Pakagunggonaan kadi ti sabsabali? Kangrunaan iti amin, us-usarenyo kadi a pakaidayawan ni Jehova, ti Gubuayan ti “tunggal naimbag a sagut”? (Santiago 1:17) Tapno maaramidantayo dayta, usigentayo ti dadduma a pagarigan dagiti paglaingan a mabalin nga agbalin a pagkapuyan, wenno pagdaksan pay ketdi, no mabaybay-an.

Usaren a Nainsiriban ti Kinasaririt

Sigurado a pagimbagan ti kinasaririt. Ngem agbalin a pagkapuyan dayta no agturong iti nalabes a panagkompiansa wenno panagpalangguad, nangnangruna no labsen ti dadduma ti mangkomendar wenno mangpatiray-ok kadatayo. Wenno mabalin a maaddaantayo iti intelektual a panangmatmat iti Sao ti Dios ken kadagiti naibasar iti Biblia a publikasion.

Mabalin a rumsua ti nalabes a panagkompiansa iti nadumaduma a pamay-an. Kas pagarigan, no ti maysa a nautek a tao ket naikkan iti paset iti kongregasion Kristiano, nalabit maysa a palawag iti publiko wenno iti Teokratiko nga Eskuelaan ti Panagministro, mabalin nga apagsambut ti panagsaganana, a nalabit dina pay ketdi ikararag ti pamendision ni Jehova. Imbes ketdi, agtalek iti agdama a pannakaammona ken iti nasariwawek a panagpampanunotna. Mabalin a ti kinaliwayna ket makaluban ti naikasigudan nga abilidad iti sumagmamano a panawen, ngem no awan ti naan-anay a pamendision ni Jehova, bumannayat ti irarang-ay ti espiritualidadna, nalabit agsardeng pay ketdi. Anian a pannakasayang ti nagsayaat a saguday!​—Proverbio 3:5,6; Santiago 3:1.

Mabalin met a maaddaan ti maysa a natadem ti panagpampanunotna iti intelektual a panangmatmat iti Biblia ken kadagiti katulongan iti panagadal iti Biblia. Ngem “mamagtangsit” laeng ti kasta a pannakaammo, wenno padakkelenna ti ulo a kas iti lobo; dina ‘pabilgen’ ti ayat iti nagbabaetan dagiti Kristiano. (1 Corinto 8:1; Galacia 5:26) Iti sabali a bangir, ti naespirituan a tao, kasanoman ti kalaingna, ket kanayon nga agkararag a dumawat ken agpannuray iti espiritu ti Dios. Ti paglainganna ad-addanto a pagimbagan bayat a maparayrayna ti ayat, kinapakumbaba, pannakaammo, ken siribna​—iti natimbeng a pamay-an.​—Colosas 1:9,10.

Ti abilidad ket agbalin met a pagkapuyan no dayta ti panggapuantayo a maaddaan iti nalabes a panangipapan iti bagitayo, a mangipakita iti kinapalangguad. Mabalin a malipatan ti natalunggadingan a tao​—ken ti asinoman a mangpadayaw kenkuana​—a ni Jehova “dina padayawan dagiti asinoman a mamasirib ti puso,” uray no addaanda iti saguday. (Job 37:24) Kuna ti Sao ti Dios: “Kadagiti napakumbaba adda ni sirib.” (Proverbio 11:2) Nupay talaga a nalaing ken de adal ni apostol Pablo, kastoy ti kinunana kadagiti taga Corinto: “Idi immayak kadakayo, kakabsat, diak immay a buyogen ti kinamanaglablabes iti panagsasao wenno iti sirib . . . Immayak kadakayo a sikakapuy ken sibubuteng ken buyogen iti kasta unay a panagpigerger; ket ti panagsasaok ken ti inkaskasabak dida nabuyogan kadagiti makaguyugoy a sasao ti sirib no di ket buyogen iti panangiparangarang ti espiritu ken pannakabalin, tapno ti pammatiyo adda koma, saan nga iti sirib dagiti tattao, no di ket iti pannakabalin ti Dios.”​—1 Corinto 2:1-5.

Ti pudno a masirib a tao saan a paallilaw iti nailubongan a panangmatmat iti kinasaririt, wenno iti pagrukodanna iti balligi. Imbes ngarud nga usarenna dagiti sagudayna a gumun-od iti anamong ti tattao wenno tapno agpabaknang, itedna ti kasasayaatan nga adda kenkuana iti Daydiay nangted iti biag ken abilidadna. (1 Juan 2:15-17) Gapuna, iyun-unana iti biagna dagiti banag nga agpaay iti Pagarian, nga agbalin a kas nabunga a “kayo a naimula iti sibay dagiti ay-ayus ti danum.” Gapu iti pamendision ni Jehova, saan a kadagiti bukodna a naikasigudan a talento, “isuamin nga aramidna rumang-ayto.”​—Salmo 1:1-3; Mateo 6:33.

Pasayaaten Koma ti Kinakristiano ti Paglaingam

Ti Kinakristiano a mismo ket aduan pagsayaatan nga awan kadagiti nailubongan a pilosopia. Kas pagarigan, ti Nakristianuan a wagas ti panagbiag pagbalinenna dagiti tattao a nasayaat nga assawa, nasayaat a kaarruba, ken nasayaat nga empleado​—tattao a mapagpiaran, nadayaw, mannakikappia, ken nagaget. (Colosas 3:18-23) Kanayonanna, ti Nakristianuan a pannakasanay nga agsao ken mangisuro pasayaatenna ti abilidad a makikomunikar. (1 Timoteo 4:13-15 ) Saan ngarud a pagsiddaawan a dagiti Kristiano ket masansan nga ipaayan dagiti amongda kadagiti kanayonan nga annongen ken maital-oda. Ngem mabalin met a maabuso ti kakasta a paglaingan no saan a mabantayan a naimbag. Mabalin a ti pannakaital-o wenno makaawis a tukon a trabaho ket kaipapananna ti panangipamaysa ti atensiontayo iti kompania, a kanayon a malanganan dagiti Nakristianuan a gimong, wenno maisakripisio ti napateg a tiempo nga agpaay koma iti pamilia.

Idiay Australia, maysa a Kristiano a panglakayen ken ama ti pamilia, a nakabalballigi pay a negosiante, “ti naaddaan iti gundaway a bumaknang ken maidayaw.” Ngem pinagkedkedanna ti awis nga agballigi iti daytoy a sistema. “Kayatko nga ad-adu ti tiempo a mabusbosko iti pamiliak ken iti Nakristianuan a ministerio,” kinunana. “Napagnumuanmi ngarud nga agassawa a kissayak ti tiempo a busbusbosek iti sekular a trabahok. Apay a masapul nga agtrabahoak iti lima nga aldaw kada lawas no saan met a nasken?” innayonna. Babaen ti sumagmamano a naimbag pannakautobna a panagbalbaliw iti biagna, maaywanan latta daytoy a panglakayen ti pamiliana uray tallo wenno uppat laeng nga aldaw kada lawas nga agtrabaho. Idi agangay, naawis iti dadduma pay a pribilehio iti serbisio, kas iti panagserbi iti lokal nga Assembly Hall Committee ken iti pannakaimaton ti kombension distrito. Ti nainsiriban a pannakausar dagiti paglainganna ti nangipaay kenkuana ken iti pamiliana iti rag-o ken pannakapnek.

Natimbeng a Panangmatmat Kadagiti Pribilehio

Maiparparegta kadagiti Kristiano a lallaki a gumaw-atda kadagiti pribilehio mainaig iti panagserbi iti kongregasion. “No ti asinoman a lalaki ragragpatenna ti akem a manangaywan [wenno ministerial nga adipen], isu tartarigagayanna ti nasayaat nga aramid.” (1 Timoteo 3:1) Kas kadagiti nadakamaten a paglaingan, masapul met a ti kinamasindadaan nga umawat kadagiti annongen ket matibnokan iti kinatimbeng. Awan koma ti asinoman nga umawat iti nakaad-adu nga annongen no pakapukawanto met laeng ti rag-ona nga agserbi ken Jehova. Wen, makomendaran ti espiritu ti kinamasindadaan, kinapudnona nasken dayta, ta kagura ni Jehova ti tao a dina kayat ti agsakripisio; ngem masapul met a ti kinamasindadaan iyanninawna ti kinaemma ken “kinasimbeng ti panunot.”​—Tito 2:12; Apocalipsis 3:15,16.

Gapu ta naemma, mannakaawat, ken mannakipagrikna ni Jesus, saan nga alusiisen uray dagiti kanumuan a tattao a makilangen kenkuana. Kasta met ita, saan nga alusiisen dagiti tattao kadagidiay mannakipagrikna ken naasi. Iti kongregasion Kristiano, pudno a maipatpateg a kas “sagut a tattao” dagiti kasta a nadungngo ken nalaka a maasitgan a panglakayen. “Maysa[da] a paglemmengan no agangin, ken maysa[da] a paglinongan no agbagyo, kas ay-ayus dagiti danum iti disso a namaga, kasla linong ti maysa a dakkel a bato iti daga a napaksuyan.”​—Efeso 4:8; Isaias 32:2.

Ngem masapul a timbengen dagiti panglakayen ti tiempo a busbusbosenda iti panangtulong kadagiti sabsabali iti tiempo a kasapulanda para iti personal a panagadal, panagmennamenna, panagkararag, ken panangasaba. Siempre, masapul nga adda met tiempo dagiti naasawaan a panglakayen iti pamiliada, nga agbalinda koma kadagitoy nga ad-adda a nalaka a maasitgan.

Natalunggadingan a Babbai​—Naisangsangayan a Bendision

Kas kadagiti natalunggadingan a panglakayen, pakairanudan met ti organisasion ni Jehova dagiti naespirituan ti panagpampanunotda a babbai. Kaaduanna, natalunggadingan dagiti babbai iti interes iti sabali a tattao​—maysa a galad nga ipatpateg ken iparparegta ni Jehova. Kastoy ti insurat ni apostol Pablo: “Itultuloyyo a kitaen, saan a ti personal a panaginteres kadagiti laeng bukodyo a bambanag, no di ket kasta met ti personal a panaginteres kadagiti bambanag ti sabsabali.” (Filipos 2:4) Ngem adda limitasion daytoy a “personal a panaginteres,” ta awan ti Kristiano a kayatna ti agbalin a “mannakibiang kadagiti pakaseknan ti sabali a tattao”; wenno agbalin a manangidanondanon.​—1 Pedro 4:15; 1 Timoteo 5:13.

Adu pay ti saguday dagiti babbai. Kas pagarigan, mabalin a ti Kristiano nga asawa a babai ket naut-utek ngem ni lakayna. Nupay kasta, kas “natalunggadingan a babai” nga agbuteng ken Jehova, raemenna ni lakayna ket usarenna ti sagudayna a tumulong, saan a mangkompetensia ken ni lakayna. Ket imbes nga apalan wenno kagurana ni baketna, ti masirib, napakumbaba nga asawa a lalaki ipategna ken pagrag-oanna dagiti paglaingan ti asawana. Paregtaenna ni baketna a mangaramat a naan-anay kadagiti talugadingna a mangpabileg iti pamiliana ken mangtulong kadagiti annakna nga “agbuteng ken ni Jehova,” kas iti ar-aramidenna. (Proverbio 31:10, 28-30; Genesis 2:18) Dagiti kasta a nanumo, napakumbaba nga assawa ket mangpatanor iti panagasawa a pudno a pakaidayawan ni Jehova.

Panangmedmed iti Natibker a Personalidad

Ti natibker a personalidad a nabuyogan iti kinalinteg ken amin-kararua a panangaramid iti pagayatan ni Jehova ket pagimbagan no matimbeng iti kinanumo ken kinapakumbaba. Ngem agbalin dayta a pagkapuyan no ituggodna ti maysa a tao a mangdominar wenno mamutbuteng iti sabsabali. Nangnangruna a pudno daytoy iti uneg ti kongregasion Kristiano. Nalag-an koma ti rikrikna dagiti Kristiano iti maysa ken maysa, kas koma no kaduada dagiti panglakayen ti kongregasion.​—Mateo 20:25-27.

Kasta met kadagiti panglakayen, nalag-an koma ti rikriknada iti maysa ken maysa. Ket no agmimitingda, ti nasantuan nga espiritu koma ti mangiwanwan kadagiti pangngeddengda, saan a ti bileg ti personalidad. Kinapudnona, mabalin nga iwanwan ti nasantuan nga espiritu ti asinoman kadagiti panglakayen, uray ti kaubingan wenno managbabain unay a panglakayen. No kasta, uray ipagarup dagidiay addaan iti natibker a personalidad nga isuda ti husto, masapul a pengdanda ti paglainganda a sursuruenda nga ikabilangan ti rikna ti dadduma, iti kasta ‘ipakpakitada a padpadayawanda’ dagiti padada a panglakayen. (Roma 12:10) Kastoy ti naayat a pakdaar ti Eclesiastes 7:16: “Dika aglabes nga aglinteg; dika met agsirib nga aglablabes: apay a dadaelem koma ta bagim?”

Ni Jehova, a Gubuayan ti “tunggal naimbag a sagut,” matimbengna a naan-anay dagiti nakaskasdaaw a paglainganna. (Santiago 1:17; Deuteronomio 32:4) Ket isu ti Mannursurotayo! Agsursurotayo ngarud kenkuana ket pagreggetantayo, agpadpada iti panangpasayaat kadagiti saguday, wenno paglaingantayo, ken panangusar kadagita iti nainsiriban, nanumo, ken naayat a pamay-an. Iti kasta, talaga a bendisiontayto kadagiti sabsabali!

[Dagiti Ladawan iti panid 27]

Ti irarang-ay ti espiritualidad agpannuray iti napasnek a panagadal ken panagpannuray ken Jehova

[Ladawan iti panid 29]

Maysa a bendision ti personal a panaginteres a mabuyogan iti kinanumo

[Picture Credit Line iti panid 26]

Courtesy of The Mariners’ Museum, Newport News, VA