Mabalinyo Kadi ti Maaddaan iti Natalna a Panunot?

Idi 1854, insurat ti Americano nga autor a ni Henry Thoreau: “Nupay saan a napanayag, desperado ti biag ti kaaduan a tattao.”

Agparang nga adu a tattao idi kaaldawanna ti di nangtagiragsak iti natalna a panunot. Nupay kasta, dandani 150 a tawenen ti naglabas. Nagbaliwen kadi dagiti kasasaad? Wenno pudno pay la kadi agingga ita dagiti sinao ni Thoreau? Dakayo met ngay? Kontento ken natalna kadi ti biagyo? Wenno masiksikorankayo, a diyo ammo no ania ti adda iti masanguanan, ‘saan a napanayag ngem desperadokayo,’ kas kinuna ni Thoreau?

MAKAPALADINGIT ta adu a bambanag iti lubong ti mangburibor iti panunot dagiti tattao. Inaganantayo ti sumagmamano: Iti adu a pagilian, makapaupay ti biag gapu iti kinapanglaw nga itden ti kinaawan panggedan ken bassit a sueldo. Iti dadduma a pagilian, adu a tattao ti mangus-usar iti pigsada tapno agpabaknang ken manggun-od iti ad-adu a sanikua. Nupay kasta, ti ambisioso nga estilo ti panagbiag ket masansan nga agresulta iti pannakaringgor, saan a talna. Saan met a natalna dagiti tattao gapu iti sakit, gubat, krimen, kinaawan hustisia, ken panangirurumen.

Kayatda ti Maaddaan iti Natalna a Panunot

Adu ti di makaanus iti agdama a kasasaad ti lubong. Ni Antônioa ket lider dagiti mangmangged iti maysa a dakkel a paktoria idiay São Paulo, Brazil. Gapu iti ayatna a mapasayaat ti kasasaad ti panagbiag, nakiraman kadagiti panagprotesta ken panagwelga, ngem saan a daytoy ti nangted kenkuana iti natalna a panunot.

Namnamaen ti dadduma a ti panagasawa ti mangted kadakuada iti natalna a biag, ngem mabalin a madismayada. Naballigi a negosiante ni Marcos. Timmapog iti politika ket nagbalin a mayor iti maysa a narang-ay a siudad. Nupay kasta, nariribuk ti biag ti pamiliana. Idi nagtalaw dagiti annakna, nagsinada nga agassawa gapu ta dida agkatunosan.

Maysa ni Gerson a walang nga ubing idiay Salvador, Brazil. Kaykayatna ti makigasanggasat. Nagtawtawataw iti nadumaduma a siudad babaen ti pannakiluganna kadagiti trak. Di nagbayag, naadikto iti droga ket takawanna dagiti tattao tapno adda pangsuportana iti bisiona. Namin-adun a tiniliw ti polis. Ngem nupay agresibo ken naranggas, sapsapulen ni Gerson ti natalna a panunot. Matagiragsakna ngata dayta?

Ubing pay ni Vania idi natay ti inana. Naipabaklay kenkuana ti panangaywan iti pagtaengan ken iti masakit nga adingna a babai. Nakimismisa ni Vania ngem iti panagriknana, isut’ binaybay-an ti Dios. Saan a natalna ti panunotna.

Adda met dita ni Marcelo. Ragragsak la ti kayatna. Magusgustuanna ti maki-party kadagiti padana nga agtutubo​—panagsala, panagbartek, ken panagdroga. Naminsan, nakaapa ken nadangranna ti maysa nga agtutubo. Kalpasanna, napalalo ti babawina gapu iti dayta nga inaramidna ket inkararagna ti tulong ti Dios. Kayatna met ti maaddaan iti talna ti panunot.

Iyilustrar dagitoy a kapadasan ti sumagmamano a kasasaad a mabalin a mangburibor iti panunot. Mabalinan kadi daydiay lider dagiti mangmangged, daydiay politiko, daydiay walang nga ubing, daydiay babai a nagabsuonan iti trabaho, ken daydiay nairuam iti party a maaddaan iti talna ti panunot a sapsapulenda? Adda kadi aniaman a masursurotayo iti napasaranda? Agpadpada a wen ti sungbat kadagitoy a dua a saludsod, kas makitatayo iti sumaruno nga artikulo.

[Footnote]

[Ladawan iti panid 3]

Il-iliwenyo kadi ti maaddaan iti natalna a panunot?