Pinagbalinko Kadi a Personal a Katulongak ti Nasantuan nga Espiritu?
DAGITI teologo, malaksid pay iti kaaduan a tattao, nadumaduma ti kapanunotanda maipapan iti nasantuan nga espiritu ti Dios. Ngem di nasken ti kasta a panagduadua. Nalawag ti kuna ti Biblia no ania ti nasantuan nga espiritu. Imbes a maysa a persona, kas patien ti dadduma, dayta ti nabileg nga aktibo a puersa nga us-usaren ti Dios a mangibanag iti pagayatanna.—Salmo 104:30; Aramid 2:33; 4:31; 2 Pedro 1:21.
Yantangay nainaig unay ti nasantuan nga espiritu iti pannakatungpal dagiti panggep ti Dios, kayattayo ti agbiag a maitunos iti dayta. Kayattayo nga agbalin dayta a personal a katulongantayo.
Katulongan—Apay a Kasapulan?
Gapu ta panawannanton ti daga, impatalged ni Jesus kadagiti adalanna: “Agkiddawakto iti Ama ket ikkannakayto iti sabali a katulongan a maadda kadakayo iti agnanayon.” Kinunana pay: “Nupay kasta, ibagbagak kadakayo ti kinapudno, Agpaay a pagimbaganyo a pumanawak. Ta no diak pumanaw, ti katulongan saanto a pulos umay kadakayo; ngem no mapanak, isu ibaonkonto kadakayo.”—Juan 14:16, 17; 16:7.
Inikkan ni Jesus dagiti adalanna iti serioso nga annongen idi imbilinna kadakuada: “Inkayo ngarud ket mangaramidkayo kadagiti adalan a tattao iti isuamin a nasnasion, a bautisaranyo ida iti nagan ti Ama ken ti Anak ken ti nasantuan nga espiritu, nga isursuroyo kadakuada a tungpalenda dagiti isuamin a bambanag nga imbilinko kadakayo.” (Mateo 28:19, 20) Saan a nalaka daytoy, ta adda dagiti bumusor.—Mateo 10:22, 23.
Malaksid iti ibubusor nga aggapu iti ruar ti kongregasion, adda met dagiti parikut iti uneg. Insurat ni Pablo kadagiti Kristiano sadi Roma idi agarup 56 K.P.: “Ita bagbagaankayo, kakabsat, a siputanyo dagidiay mangparnuay kadagiti pannakabingbingay ken paspasamak a pakaitibkolan a maikaniwas iti sursuro a naadalyo, ket liklikanyo ida.” (Roma 16:17, 18) Kimmaro daytoy a kasasaad idi natayen dagiti apostol. Namakdaar ni Pablo: “Ammok a kalpasan ti ipapanawko sumrekto iti nagtetengngaanyo dagiti manangirurumen a lobo ket didanto tratuen a sidudungngo ti arban, ket manipud kadakayo a mismo tumakderto dagiti tattao ket agsaodanto kadagiti natiritir a bambanag tapno uyotanda dagiti adalan a sumurotda kadakuada.”—Aramid 20:29, 30.
Kasapulanda idi ti tulong ti Dios tapno maparmek dagitoy a tubeng. Tinulonganna ida babaen ken Jesus. Kalpasan ti panagungarna, iti aldaw ti Pentecostes idi 33 K.P., ‘napno amin [dagiti 120 a pasurotna] iti nasantuan nga espiritu.’—Aramid 1:15; 2:4.
Ammo dagiti adalan a ti nasantuan nga espiritu a naiparukpok iti daydi a gundaway isu ti tulong nga inkari ni Jesus. Di pagduaduaan nga ad-adda a naawatandan no ania ti impaay ni Jesus: “Ti katulongan, ti nasantuan nga espiritu, nga ibaonto ti Ama iti naganko, dayta a maysa isuronanto kadakayo ti isuamin a bambanag ket ipalagipna ti isuamin a bambanag nga imbagak kadakayo.” (Juan 14:26) Inawaganna met dayta a ‘ti katulongan, ti espiritu ti kinapudno.’—Juan 15:26.
Kasano a Maysa a Katulongan ti Espiritu?
Nagserbi ti espiritu kas katulongan iti nadumaduma a pamay-an. Umuna, inkari ni Jesus a dayta ti mangipalagip kadagiti adalanna kadagiti imbagana kadakuada. Saan laeng a ti panangtulongna kadakuada a manglagip kadagiti balikas ti kayatna a sawen. Ti espiritu ti tumulong kadakuada a mangtarus iti naun-uneg a kaipapanan ken pateg dagiti insurona. (Juan 16:12-14) Iti ababa a pannao, ti nasantuan nga espiritu iturongna dagiti adalan ni Jesus a maaddaan iti nasaysayaat a pannakaawat iti kinapudno. Insurat ni apostol Pablo idi agangay: “Kadatayo nga impalgak ida ti Dios babaen ti espirituna, ta ti espiritu sukimatenna ti isuamin a bambanag, uray pay dagiti nauneg a bambanag ti Dios.” (1 Corinto 2:10) Tapno mayallatiw dagiti napulotan a pasurot ni Jesus ti umiso a pannakaammo kadagiti sabsabali, masapul a natibker ti nakaibatayan ti pannakaawatda a mismo.
Maikadua, insuro ni Jesus dagiti adalanna nga agkararag ken masansan nga aramidenda dayta. No adda dagiti tiempo a saanda a masinunuo no ania ti rumbeng nga ikararagda, mabalin a mangibabaet wenno tulongan ida ti espiritu. “Iti umasping a pamay-an makikadua met ti espiritu buyogen iti tulong a maipaay ti kinakapuytayo; ta ti parikut a no ania ti ikararagtayo kas iti kasapulantayo ket ditay ammo, ngem ti espiritu met laeng agdawat a maipaay kadatayo buyogen dagiti asug a di mayebkas.”—Roma 8:26.
Maikatlo, ti espiritu tulonganna dagiti adalan ni Jesus a mangidepensa iti kinapudno iti publiko. Pinakdaaranna ida: “Iyawatdakayto kadagiti lokal a pangukoman, ket saplitendakayto kadagiti sinagogada. Ay ket, maisaklangkayto iti sanguanan dagiti gobernador ken ar-ari maigapu kaniak, a maipaay a pangsaksi kadakuada ken kadagiti nasion. Nupay kasta, inton iyawatdakayo, dikay maringgoran no kasano wenno no ania ti sawenyo; ta no ania ti sawenyo maitedto kadakayo iti dayta nga oras; ta dagidiay agsasao saan laeng a dakayo, no di ket ti espiritu ni Amayo ti agsao babaen kadakayo.”—Mateo 10:17-20.
Ti nasantuan nga espiritu tumulong met a mangipabigbig iti kongregasion Kristiano ken mangtignay kadagiti kameng daytoy a mangaramid kadagiti nainsiriban a personal a desision. Detalyado nga usigentayo dagitoy dua a benneg daytoy a topiko ket kitaentayo no ania ti kaipapananda kadatayo ita.
Agserbi a Pagilasinan
Adu a siglo a nagserbi dagiti Judio iti sidong ti Linteg Mosaiko kas ili a pinili ti Dios. Gapu ta linaksidda ni Jesus kas Mesias, impakaunana nga iti saan a mabayag mailaksiddanto: “Dikay aya pulos nabasa kadagiti Kasuratan, ‘Ti bato nga inlaksid dagiti managibangon isu ti nagbalin a kangrunaan a bato a pasuli. Manipud ken Jehova daytoy ket naaramid, ket nakaskasdaaw dayta kadagiti matatayo’? Daytoy ti makagapu a kunak kadakayo, Ti pagarian ti Dios maikkatto kadakayo ket maited iti maysa a nasion a mangpatpataud kadagiti bungana.” (Mateo 21:42, 43) Apaman a naipasdek ti kongregasion Kristiano iti Pentecostes idi 33 K.P., dagiti pasurot ni Kristo ti nagbalin a “nasion a mangpatpataud kadagiti bungana.” Manipud idin, daytoy a kongregasion ti us-usaren ti Dios a makikomunikar. Tapno mabigbig dagiti tattao daytoy a pannakayallatiw ti pabor ti Dios, nangipaay ti Dios iti di mailibak a pagilasinan.
Idi Pentecostes, inikkan ti nasantuan nga espiritu dagiti adalan iti pannakabalin nga agsao iti nadumaduma a pagsasao a pulos a dida inadal. Nasdaaw dagiti nakaimatang ket insaludsodda: “Kasano a mangmangngegtayo, tunggal maysa kadatayo, ti bukodna a pagsasao a nakayanakantayo?” (Aramid 2:7, 8) Ti pannakabalin nga agsao iti di nakayanakan a pagsasao, agraman dagiti ‘adu a tanda ken pagilasinan a nangrugi a mapasamak babaen kadagiti apostol,’ ti nangipabigbig iti agarup tallo ribu a tattao a pudno nga agtigtignay ti espiritu ti Dios.—Aramid 2:41, 43.
Kasta met, babaen ti panangpataudda iti “bunga ti espiritu”— ayat, rag-o, talna, mabayag a panagitured, kinamanangngaasi, kinaimbag, pammati, kinaalumamay, panagteppel—silalawag a naipabigbig dagiti adalan ni Kristo kas ad-adipen ti Dios. (Galacia 5:22, 23) Kinapudnona, ayat ti kangrunaan a pakailasinan ti pudno a kongregasion Kristiano. Impakauna ni Jesus: “Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.”—Juan 13:34, 35.
Dagiti kameng ti nagkauna a kongregasion Kristiano nagpaidalanda iti nasantuan nga espiritu ti Dios ken inaprobetsarda ti tulong nga impaayna. Nupay ammo dagiti Kristiano ita a ti Dios ket saanen a mangpagpagungar kadagiti natay ken mangar-aramid kadagiti milagro a kas idi umuna a siglo, bay-anda a ti bunga ti espiritu ti Dios ti mangipabigbig kadakuada kas pudpudno nga adalan ni Jesu-Kristo.— 1 Corinto 13:8.
Katulongan iti Panangaramid Kadagiti Personal a Desision
Ti Biblia ket produkto ti nasantuan nga espiritu. Gapuna, no agpaidalantayo iti Biblia, kas man la isursuronatayo ti nasantuan nga espiritu. (2 Timoteo 3:16, 17) Matulongannatayo a mangaramid kadagiti nainsiriban a desision. Ngem agpapaidalantayo kadi?
Komusta ti panagpilitayo iti pagsapulan wenno trabaho? Tulongannatayo ti nasantuan nga espiritu a mangmatmat sigun iti panangmatmat ni Jehova iti trabaho a panggeptayo a serken. Masapul a maitunos ti trabahotayo kadagiti prinsipio ti Biblia, ket aginggat’ mabalin tulongannatay koma dayta a mangragpat kadagiti teokratiko a kalat. Pudno a saan unay a napateg ti sueldo wenno ti kinalatak ken dayaw a nainaig iti trabaho. Ti napatpateg ket no maipaayna kadatayo dagiti kangrunaan a masapsapul iti biag ken ikkannatayo iti umdas a panawen ken gundaway a mangtungpal kadagiti obligasiontayo kas Kristiano.
Normal ken umiso ti agtarigagay a mangtagiragsak iti biag. (Eclesiastes 2:24; 11:9) No kasta, ti natimbeng a Kristiano mabalinna ti agaliwaksay ken agpalpaliwa. Ngem pilienna koma ti paglinglingayan a mangyanninaw iti bunga ti espiritu, saan a daydiay mangitampok kadagiti “aramid ti lasag.” Inlawlawag ni Pablo: “Ita dagiti aramid ti lasag maiparangarangda, ket isuda ti pannakiabig, kinarugit, nalulok a kababalin, panagrukbab iti didiosen, panangannurot iti espiritismo, guranggura, ringgor, imun, dagiti irarasuk ti unget, dagiti rinnupir, pannakabingbingay, dagiti sekta, ap-apal, panagbibinnartek, naariwawa a panagragragsak, ken bambanag nga umasping kadagitoy.” Nasken met a ditay agbalin a “manangipasindayaw iti bagi, a mangsulsulbog iti panagsasalisal ti maysa ken maysa, nga agiinnapal iti maysa ken maysa.”—Galacia 5:16-26.
Kasta met laeng no maipapan iti panagpili kadagiti gagayyem. Nainsiriban a pilien ida sigun iti espiritualidad, saan a sigun iti makinruar a langa wenno sanikua. Nalawag a ni David ket gayyem ti Dios, ta inawagan ti Dios a “lalaki a mayannugot iti puso[na].” (Aramid 13:22) Saan a ti makinruar a langa ti nangibatayan ti Dios a nangpili ken David kas ari ti Israel no di ket sigun iti prinsipio a: “Ni Jehova saan a kumita a kas iti ikikita ti tao; ta ti tao kitaenna iti akinruar a panagparang, ngem ni Jehova kitaenna ti puso.”—1 Samuel 16:7.
Rinibu a panaggagayyem ti nadadael gapu ta naibatay dagitoy iti makinruar a langa wenno sanikua. Mabalin a kellaat nga agpatingga ti panaggayyem a naibatay iti kinabaknang a pagduaduaan. (Proverbio 14:20) Balakadannatayo ti impaltiing-espiritu a Sao ti Dios nga iti panagpili kadagiti gagayyem, nasken a pilientayo dagidiay makatulong kadatayo nga agserbi ken Jehova. Ibagbagana kadatayo a ti panangted imbes a ti panangawat ti panunotentayo agsipud ta naragragsak ti mangted. (Aramid 20:35) Karaman ti panawen ken pammateg kadagiti kapatgan a banag a maitedtayo iti gagayyemtayo.
Iti maysa a Kristiano nga agpangpanggep a makiasawa, mangipaay ti Biblia iti balakad nga impaltiing ti espiritu. Kas man la ibagbagana: ‘Saan a ti langa ken pigura ti kitaem. Kitaem dagiti saka.’ Dagiti saka? Wen, iti daytoy nga anag: Maus-usar kadi dagitoy a mangitungpal iti trabaho ni Jehova a panangikasaba iti naimbag a damag, ket iti kasta makaay-ayoda, no ar-arigen, iti imatangna? Naaruatanda kadi iti mensahe ti kinapudno ken iti naimbag a damag ti talna? Mabasatayo: “Naglibnosen kadagidiay bambantay dagiti saksaka ti mangyeg kadagiti naimbag a damdamag, a mangiwarnak iti talna, a mangyeg kadagiti naimbag a damdamag ti kinaimbag, a mangiwaragawag iti pannakaisalakan, a kunana iti Sion, Ti Diosmo agari!”—Isaias 52:7; Efeso 6:15.
Yantangay agbibiagtayo kadagiti “napeggad a tiempo a narigat a pakilangenan,” kasapulantayo ti tulong tapno maaramidtayo ti pagayatan ti Dios. (2 Timoteo 3:1) Ti katulongan, ti nasantuan nga espiritu ti Dios, sibibileg a sinuportaranna ti trabaho dagiti Kristiano idi umuna a siglo, ken dayta ti personal a katulonganda. Ti naanep a panagadal iti Sao ti Dios, a produkto ti nasantuan nga espiritu, ti kangrunaan a pamay-an a mapagbalintay met a personal a katulongantayo ti nasantuan nga espiritu. Pudno kadi dayta kadatayo?
[Ladawan iti panid 23]