Impapusoyo Kadi ti Kinapudno?
“Mapagbalbaliwkayo babaen ti panangpabaroyo iti panunotyo, tapno mapaneknekanyo iti bagbagiyo ti naimbag ken makaay-ayo ken perpekto a pagayatan ti Dios.”—ROMA 12:2.
1, 2. Apay a saan a nalaka ti agbiag kas pudno a Kristiano kadagitoy a tiempo?
SAAN a nalaka ti agbiag kas pudno a Kristiano kadagitoy maudi nga al-aldaw—kadagitoy “napeggad a tiempo a narigat a pakilangenan.” (2 Timoteo 3:1) Kinapudnona, tapno matuladtayo ni Kristo, masapul a parmekentayo ti lubong. (1 Juan 5:4) Lagipenyo ti kinuna ni Jesus maipapan iti dalan a suroten dagiti Kristiano: “Sumrekkayo iti akikid a ruangan; agsipud ta akaba ken nalawa ti dalan nga agturong iti pannakadadael, ket adu dagidiay sumrek iti dayta; idinto ta akikid ti ruangan ken nailet ti dalan nga agturong iti biag, ket bassit dagidiay makasarak iti dayta.” Kinunana pay: “No ti asinoman kayatna ti sumurot kaniak, paglikudanna koma ti bagina ket ibaklayna ti kayona a pagtutuokan iti inaldaw-aldaw ket agtultuloy a surotennak.”—Mateo 7:13, 14; Lucas 9:23.
2 No nasarakannan ti nailet a dalan nga agturong iti biag, ti sumaruno a karit iti maysa a Kristiano isu ti panagtalinaedna iti dayta a dalan. Apay a karit daytoy? Agsipud ta no nagdedikar ken nagpabautisartayo, datayo ti puntiria dagiti pangallilaw ni Satanas. (Efeso 6:11) Palpaliiwenna dagiti pagkapuyantayo ket gundawayanna dagitoy iti panangikagumaanna a mangdadael iti espiritualidadtayo. Pinadasna idi a parukmaen ni Jesus, isu nga apay koma a dina aramiden ti kasta kadatayo?—Mateo 4:1-11.
Dagiti Makaallilaw a Taktika ni Satanas
3. Kasano a nangimula ni Satanas iti panagduadua iti panunot ni Eva?
3 Ti maysa a pamay-an nga ar-aramaten ni Satanas isu ti panangimulana iti panagduadua iti panunottayo. Birokenna no ania dagiti pagkapuyan ti naespirituan a kabaltayo. Idi punganay, dayta ti taktika nga impakatna ken Eva. Insaludsodna: “Pudno aya a kinuna ti Dios, Saankay a mangan iti amin a kayo iti minuyongan?” (Genesis 3:1) Iti sabali a pannao, kastoy ti kayat a sawen ni Satanas, ‘Mabalin aya a paritannakayo ti Dios? Paidamannakay aya iti banag a pagimbaganyo? Kinapudnona, ammo ti Dios nga iti aldaw a pannanganyo iti bunga ti kayo, maluktanto dagiti matayo ket agbalinkayto a kas iti Dios a makaammo iti naimbag ken dakes!’ Nangimula ni Satanas iti bin-i ti panagduadua ket inurayna a tumubo dayta.—Genesis 3:5.
4. Iti tiempotayo, ania ti nalabit pagduaduaan dagiti dadduma?
4 Kasano nga ar-aramaten ita ni Satanas daytoy a taktika? No liwayantayo ti panagbasatayo iti Biblia, personal a panagadal, panagkararag, ken ti Nakristianuan a ministerio ken panaggigimongtayo, mabalin nga umapay kadatayo ti panagduadua nga iparparangarang ti dadduma. Kas pagarigan: “Kasanotay nga ammo nga isu daytoy ti kinapudno nga insuro ni Jesus?” “Pudno kadi a dagitoyen ti maudi nga al-aldaw? Total, addatayon iti maika-21 a siglo.” “Asideg kadin ti Armagedon, wenno mabayag pay?” No rumsua dagiti kastoy a panagduadua, ania ti mabalintay nga aramiden tapno maikkat dagitoy?
5, 6. Ania ti masapul nga aramidentayo no agduaduatayo?
5 Nangipaay ni Santiago iti praktikal a balakad idi insuratna: “No ti asinoman kadakayo agkurang iti sirib, agtultuloy koma nga agdawat iti Dios, ta isu mangted a sipaparabur kadagiti isuamin ket awanan panangumsi; ket maitedto dayta kenkuana. Ngem isu agtultuloy koma nga agdawat buyogen ti pammati, a saan a pulos nga agduadua, ta ti agduadua umasping iti dalluyon ti baybay nga iduron ti angin ket maipalpallayog. Iti kinapudnona, di koma pagarupen dayta a tao nga addanto aniaman nga awatenna manipud ken Jehova; isu ket maysa a di makapangeddeng a tao, managduadua kadagiti amin a daldalanna.”—Santiago 1:5-8.
6 No kasta, ania ti masapul nga aramidentayo? Nasken nga ‘agtultuloy nga idawattay iti Dios’ babaen ti kararag nga ikkannatayo iti pammati ken pannakaawat ken parayrayenna ti reggettayo iti personal a panagadal maipanggep iti aniaman a saludsod wenno banag a pagduaduaantayo. Mabalintay met ti agpatulong kadagidiay natibker iti pammati, a pulos a ditay agduadua nga ited ni Jehova ti tulong a kasapulantayo. Kinuna pay ni Santiago: “Ngarud, ipasakupyo ti bagbagiyo iti Dios; ngem busorenyo ti Diablo, ket isu agtalawto kadakayo. Umadanikayo iti Dios, ket isu umadaninto kadakayo.” Wen, maikkat ti panagduaduatayo no umadanitayo iti Dios babaen ti panagadal ken panagkararag.—Santiago 4:7, 8.
7, 8. Ania ti dadduma kadagiti kangrunaan a pagrukodan a pangdeterminar iti wagas ti panagdayaw nga insuro ni Jesus, ken siasino dagiti mangtungtungpal kadagitoy a pagrukodan?
7 Alaentay a pagarigan daytoy a saludsod: Kasanotay nga ammo nga an-annurotentayo ti wagas ti panagdayaw nga insuro ni Jesus? Tapno masungbatan daytoy, ania a pagrukodan ti masapul nga usigen? Ipakita ti Biblia a dagiti pudno a Kristiano masapul nga adda napaypayso nga ayatda iti tunggal maysa. (Juan 13:34, 35) Masapul a santipikarenda ti nagan ti Dios a Jehova. (Isaias 12:4, 5; Mateo 6:9) Ken masapul nga ipakaammoda dayta a nagan.—Exodo 3:15; Juan 17:26.
8 Ti maysa pay a pakailasinan ti pudno a panagdayaw isu ti panagraem iti Biblia a Sao ti Dios. Dayta ti naisalsalumina a libro a mangipalgak iti personalidad ken kadagiti panggep ti Dios. (Juan 17:17; 2 Timoteo 3:16, 17) Kanayonanna, dagiti pudno a Kristiano iwaragawagda ti Pagarian ti Dios kas ti kakaisuna a pangnamnamaan ti tao iti biag nga agnanayon iti paraiso a daga. (Marcos 13:10; Apocalipsis 21:1-4) Saanda a makinamin iti rinuker a politika ken idianda ti narugit a panagbiag ti lubong. (Juan 15:19; Santiago 1:27; 4:4) Siasino itatta ti talaga a mangtungtungpal kadagitoy a pagrukodan? Nabatad nga ipakita dagiti kasasaad nga adda maymaysa laeng a sungbat—dagiti Saksi ni Jehova.
No Ngay Agduaduatayo?
9, 10. Ania ti mabalintay nga aramiden tapno maparmek ti panagduadua?
9 Kasanon no agduaduatayo? Ania ti rumbeng nga aramidentayo? Kastoy ti sungbat ni masirib nga Ari Solomon: “Anakko, no awatemto dagiti saok, ket ipempenmo kenka dagiti bilinko; iti kasta iyallingagmo ta lapayagmo iti kinasirib, ken ikapetmo ita pusom ti pannakaawat; wen, awagam ti kinasaririt; ket idir-im ta timekmo a maipaay iti pannakaawat; no isu birokem a kas pirak, ken tuntonem a kas nalmeng a gamgameng: iti kasta maawatamto ti panagbuteng ken ni Jehova, ken masarakamto ti pannakaammo iti Dios.” —Proverbio 2:1-5.
10 Saan kadi a nagsayaat a panunoten dayta? No sitatallugodtayo a mangipangag a sipapasnek iti sirib ti Dios, ‘masarakantayto ti pannakaammo iti Dios.’ Wen, nalakatay a magun-od ti pannakaammo ti Soberano nga Apo ti uniberso no talaga a kayattayo nga awaten ken ipategtayo ti sasaona. Kayat a sawen dayta nga agpannuraytayo ken ni Jehova babaen ti kararag ken personal a panagadal. Dagiti nalmeng a gameng iti Saona maikkatda ti aniaman a panagduadua babaen ti lawag ti kinapudno.
11. Kasano a nagduadua daydi adipen ni Eliseo?
11 Iti 2 Ar-ari 6:11-18, makasaraktayo iti nalawag nga ehemplo no kasano a nakatulong ti kararag iti maysa a managbutbuteng ken managduadua nga adipen ti Dios. Narigat a maawatan ti adipen ni Eliseo dagiti naespirituan a bambanag. Dina ammo nga adda dagiti nailangitan a buyot a madadaan a bumadang iti propeta ti Dios a pinalawlawan ti buyot ti Siria. Sibubuteng a kinuna ti adipen: “Ay, apok! Kasanonto ti aramidentayo?” Ania ti insungbat ni Eliseo? “Dika agbuteng: ta ad-aduda dagiti adda kadatayo ngem kadagiti adda kadakuada.” Ngem kasano a makombinsir ti adipen? Dina makita dagiti nailangitan a buyot.
12. (a) Kasano a naikkat ti panagduadua ti adipen? (b) Kasanotay a maikkat ti aniaman a panagduadua a nalabit mangap-apektar kadatayo?
12 “Ni Eliseo nagkararag, ket kinunana, Agdawatak kenka, O Jehova, a luktam koma dagiti matana, tapno makitana koma. Ket ni Jehova linuktanna dagiti mata di agtutubo a lalaki; ket kimmita: ket, adtoy, a di bantay a napno kadagiti kabkabayo, ken luglugan nga apuy iti aglikmut ken Eliseo.” Iti kasta, linuktan ni Jehova dagiti mata daydi adipen tapno makitana dagiti nailangitan a buyot a mangsalsalaknib ken ni Eliseo. Ngem iti kaaldawantayo, ditay koma namnamaen ti isu met laeng a kita ti tulong nga aggapu iti Dios. Laglagipenyo nga awan pay idi ti kompleto a Biblia a mabalin nga adalen ti adipen ti propeta tapno bumileg ti pammatina. Adda kadatayo ti Biblia. No adalentay a naimbag, mapabileg met ti pammatitayo. Kas pagarigan, mabalintay nga utoben ti sumagmamano a salaysay a mangiladladawan ken ni Jehova iti nailangitan a tronona. Nalawag nga ipakita dagitoy nga adda nailangitan nga organisasion ni Jehova a tumultulong ita kadagiti adipenna iti sangalubongan a trabaho a panangisuro.—Isaias 6:1-4; Ezequiel 1:4-28; Daniel 7:9, 10; Apocalipsis 4:1-11; 14:6, 7.
Agannad Kadagiti Pangallilaw ni Satanas!
13. Ania dagiti us-usaren ni Satanas iti panangpadasna a mangpalukay iti panangpetpettayo iti kinapudno?
13 Ania ti dadduma pay a wagas ni Satanas a mangpakapsut iti espiritualidadtayo ken mangpalukay iti panangpetpettayo iti kinapudno? Imoralidad ti maysa kadagitoy, a nadumaduma ti pannakaiparangarangna. Iti agdama a lubong nga agmauyong iti sekso, ti makunkuna a relasion (nalaglag-an a termino para iti pannakikamalala) wenno ti maysa la a rabii a panagdenna (pannakiabig a kasla awan aniamanna) ket gagangayen kadagiti tattao nga agragut a mangpennek iti derrepda uray ania ti mapasamak. Dagiti pelikula, programa iti TV, ken video itantandudoda ti kastoy a wagas ti panagbiag. Agraraira ti pornograpia iti media, nangruna iti Internet. Agur-uray ti sulisog kadagidiay agusioso.—1 Tesalonica 4:3-5; Santiago 1:13-15.
14. Apay a dagiti dadduma a Kristiano natnagda kadagiti pangallilaw ni Satanas?
14 Adda dagiti Kristiano a nagusioso ket tinulawanda ti panunot ken pusoda babaen ti panagbuyada kadagiti saan unay a nakaro wenno agdadata pay ketdi a pornograpiko a ladawan. Impalubosda a matnagda iti makaawis a palab-og ni Satanas. Kaaduanna, nadadael ti espiritualidad dagidiay nangaramid iti kasta. Saanda a nagtalinaed a “kas ubbing no iti kinadakes.” Saanda a ‘nataengan iti pannakabalin ti pannakaawat.’ (1 Corinto 14:20) Kada tawen, rinibu ti agsagsagaba gapu iti panangyaleng-alengda kadagiti prinsipio ken pagalagadan ti Sao ti Dios. Liniwayanda nga inkawes ken tinaginayon ti “naan-anay a kabal manipud iti Dios.”—Efeso 6:10-13; Colosas 3:5-10; 1 Timoteo 1:18, 19.
Panangipateg iti Adda Kadatayo
15. Apay a marigatan dagiti dadduma a mangapresiar iti naespirituan a tawidda?
15 “Maammuanyonto ti kinapudno, ket ti kinapudno wayawayaannakayto,” kinuna ni Jesus. (Juan 8:32) Nasken idi a panawan ti kaaduan a Saksi ti dati a wagas ti panagbiag ken ti relihionda. Iti kasta, mabalin nga ad-adda a maapresiarda ti wayawaya nga ipaay ti kinapudno. Iti sabali a bangir, dagiti dadduma nga agtutubo a pinadakkel dagiti nagannak nga adda iti kinapudno mabalin a marigatanda a mangapresiar iti naespirituan a tawidda. Saanda a napadasan ti nagbalin a paset ti palso a relihion wenno daytoy a lubong a naigamer iti ragragsak, droga, ken imoralidad. Dayta ti gapuna a saanda a mailasin ti nalawag a nagdumaan ti naespirituan a paraisotayo ken ti rinuker a lubong ni Satanas. Mabalin a padasen pay ketdi ti dadduma a ramanan ti sabidong ti lubong tapno maammuanda no ania ti pakaikapkapisanda!—1 Juan 2:15-17; Apocalipsis 18:1-5.
16. (a) Ania ti mabalintay nga isaludsod iti bagitayo? (b) Ania ti maisursuro ken maidagdagadag nga aramidentayo?
16 Masapul kadi a sinitentayo dagiti ramaytayo tapno mariknatayo ti ut-ot ken rigat? Saantay kadi a makasursuro kadagiti nasaem a kapadasan dagiti dadduma? Masapul kadi a bumaddektayo iti “kapitakan” daytoy a lubong tapno maammuantayo no ania ti pakaikapkapisantayo? (2 Pedro 2:20-22) Pinalagipan ni Pedro dagiti Kristiano idi umuna a siglo a dati a paset ti lubong ni Satanas: “Ti tiempo a naglabas umdasen a panagaramidyo iti pagayatan dagiti nasion idi nagturongkayo kadagiti aramid ti nalulok a kababalin, dagiti kinaderrep, dagiti panaglablabes iti arak, dagiti naariwawa a panagragragsak, dagiti salisal iti panaginum, ken dagiti saan a legal a panagrukbab iti didiosen.” Saanen a masapul pay a lumumlomtayo iti “lugnak ti kinagaramugam” tapno makita no kasano kadakes ti kasta a wagas ti panagbiag. (1 Pedro 4:3, 4) Imbes ketdi, maad-adaltayo dagiti nangato a moral a pagalagadan ni Jehova kadagiti Kingdom Hall a pakasursuruantayo iti Biblia. Maidagdagadag met nga aramatentayo ti pannakabalintayo nga agrason tapno mapaneknekan nga adda kadatayo ti kinapudno ket iti kasta maipapusotayo ti kinapudno.—Josue 1:8; Roma 12:1, 2; 2 Timoteo 3:14-17.
Ti Nagantayo—Saan a Basta Nagan
17. Kasanotay nga agbalin nga epektibo a Saksi ni Jehova?
17 No ipapusotayo ti kinapudno, pagreggetantay nga iranud dayta kadagiti sabsabali iti amin a maitutop a gundaway. Dina kayat a sawen nga ipilittay dayta kadagidiay saan nga interesado. (Mateo 7:6) Imbes ketdi, ditay bumdeng a mangipakaammo a datayo ket Saksi ni Jehova. No mangipakita ti maysa a tao iti uray bassit nga interes babaen ti napasnek a panagsaludsodna wenno panangalana iti publikasion a naibatay iti Biblia, nakasagana ken madadaantayo a mangiranud iti namnamatayo. Siempre, maaramidtayo dayta no kanayon nga addaantayo iti literatura sadinoman ti ayantayo—iti pagtaengan, eskuelaan, panggedan, paglakuan, wenno pagpalpaliwaan.—1 Pedro 3:15.
18. Kasano a dakkel ti maitulongna kadatayo no ibatadtayo ti takdertayo kas Kristiano?
18 No ibatadtayo ti takdertayo kas Kristiano, bumileg ti depensatayo maibusor kadagiti makaallilaw a panangatakar ni Satanas. No adda birthday wenno Christmas party wenno loteria iti opisina, masansan a kuna dagiti katrabahuantayo, “Bay-am isunan. Maysa dayta kadagiti Saksi ni Jehova.” Kasta met, mabalin a saanda nga agestoria kadagiti narugit nga angaw no addatayo. No kasta, dakkel ti maitulongna kadatayo no ibatadtayo ti takdertayo kas Kristiano, kas kinuna ni apostol Pedro: “Pudno unay, siasino ti tao a mangdangranto kadakayo no agregtakayo iti naimbag? Ngem uray no agsagabakayo maipagapu iti kinalinteg, naragsakkayo.”—1 Pedro 3:13, 14.
19. Kasanotay nga ammo nga addatayon iti arinunos ti maudi nga al-aldaw?
19 Maysa pay, no ipapusotayo ti kinapudno, kombinsidotayo a talaga a dagitoyen ti maudi nga al-aldaw ti agdama a sistema ti bambanag. Ammotayo nga adu kadagiti padto ti Biblia ti matungtungpal iti tiempotayo.a Dagiti nakaam-amak a pasamak iti napalabas a siglo umdas a pasingkedanda ti impakpakauna ni Pablo a “kadagiti maudi nga al-aldaw dumtengto dagiti napeggad a tiempo a narigat a pakilangenan.” (2 Timoteo 3:1-5; Marcos 13:3-37) Iti di pay nabayag, naipablaak iti diario ti maysa nga artikulo maipapan iti maika-20 a siglo a napauluan “Malaglagipto kas Panawen ti Kinadangkok.” Kinuna ti artikulo: “Ti 1999 ti karanggasan a tawen iti maikadua a kagudua ti karanggasan a siglo.”
20. Itan ti panawen nga aramidentayo ti ania?
20 Saan a panawen daytoy ti panagpangadua. Nalawag a bembendisionan ni Jehova ti kadakkelan pay laeng a trabaho a panangisuro iti Biblia a maar-aramid iti intero a lubong kas pammaneknek kadagiti nasion. (Mateo 24:14) Ipapusoyo ti kinapudno, ken iranudyo dayta kadagiti sabsabali. Ti agnanayon a masakbayanyo agpannuray iti aramidenyo ita. Dinatay paraburan ni Jehova no agpamayantayo. (Lucas 9:62) Imbes ketdi, panawen daytoy ti ‘panagbalin a natibker, di magaraw, a kankanayon nga aduan ti aramiden iti trabaho ti Apo, nga ammoyo a ti panagbannogyo saan nga ubbaw mainaig iti Apo.’—1 Corinto 15:58.
[Footnote]
a Kitaenyo ti Pagwanawanan, Enero 15, 2000, panid 12-14. Rinepaso ti parapo 13-18 ti innem a nalagda a pammaneknek nga agbibiagtayon iti maudi nga al-aldaw sipud pay idi 1914.
Malagipyo Kadi?
• Kasanotay a maikkat ti panagduadua?
• Ania ti maadaltayo iti adipen ni Eliseo?
• Kadagiti ania a moral a sulisog a masapul nga agannadtayo a kanayon?
• Apay nga ibatadtayo ti takdertayo kas Saksi ni Jehova?
[Dagiti Ladawan iti panid 10]
Ti regular a panagadal iti Biblia ken panagkararag matulongannatayo a mangikkat iti panagduadua
[Ladawan iti panid 11]
Babaen ti sirmata, naikkat ti panagduadua ti adipen ni Eliseo
[Ladawan iti panid 12]
Kadagiti Kingdom Hall a kas iti daytoy idiay Benin, maad-adaltayo dagiti nangato a moral a pagalagadan ni Jehova