Agbibiagkay Kadi a Mayannurot iti Inkariyo Idi Nagdedikaryo?

“Aniaman ti ar-aramidenyo, aramidenyo dayta nga amin-kararua a kas maipaay ken Jehova, ket saan a maipaay kadagiti tattao.”​—COLOSAS 3:23.

1. Iti tay-ak ti ay-ayam, ania ti ipasimudaag ti sao a “dedikasion”?

KASANO a maragpat dagiti atleta ti pantok ti abilidadda? Iti tennis, soccer, basketball, track and field, golf, wenno aniaman a sabali pay nga ay-ayam, maragpat dagiti kalalaingan nga atleta ti pantok ti abilidadda babaen laeng ti di agbalbaliw a dedikasionda. Napateg ti panangkondision iti bagi ken panunot. Mayanatup unay daytoy iti maysa kadagiti depinasion ti sao a “dedikado”: “naan-anay a naikumit iti partikular a kapanunotan wenno tignay.”

2. Kas naaramat iti Biblia, ania ti kayat a sawen ti “dedikasion”? Iyilustraryo.

² Nupay kasta, ania ti kayat a sawen ti “dedikasion” sigun iti pannakaaramatna iti Biblia? “Agdedikar” ti pannakaipatarus ti Hebreo a berbo a ti kaipapananna ket “agtalinaed a naisina; sumina; lumasin.”a Iti nagkauna nga Israel, nakaaruat ti Nangato a Padi a ni Aaron iti turbante nga addaan iti “nasantuan a pagilasinan ti dedikasion,” maysa a sumilsilap a plata a naaramid iti puro a balitok a nakaikitikitan ti Hebreo a sasao a ti kayatna a sawen ket “Ti kinasanto kukua ni Jehova.” Nagserbi dayta a pammalagip iti nangato a padi a masapul a liklikanna ti aniaman a mangtulaw iti santuario “agsipud ta ti pagilasinan ti dedikasion, ti pangpulot a lana ti Diosna, adda kenkuana.”​—Exodo 29:6; 39:30; Levitico 21:12, NW.

3. Kasano koma a ti panagdedikartayo apektaranna ti kababalintayo?

³ Maawatantayo iti daytoy a konteksto a ti dedikasion ket serioso a banag. Ipasimudaagna ti sibubulos a panagpaadipen iti Dios, ket kalikaguman daytoy ti nadalus a kababalin. Gapuna, matarusantayo no apay nga inadaw ni apostol Pedro ti kinuna ni Jehova: “Agbalinkayo a nasantuan, agsipud ta nasantuanak.” (1 Pedro 1:15, 16) Kas dedikado a Kristiano, addaantayo iti nadagsen a rebbengen nga agbiag a mayannurot iti inkaritayo idi nagdedikartayo, nga agtalinaed a matalek agingga iti panungpalan. Ngem ania ti nairaman iti panagdedikar ti maysa a Kristiano?​—Levitico 19:2; Mateo 24:13.

4. Ania dagiti addang a nangiturong iti panagdedikartayo, ket mayarig dayta iti ania?

⁴ Kalpasan a nakagun-odtayo iti umiso a pannakaammo maipapan ken ni Jehova a Dios ken kadagiti panggepna agraman ken ni Jesu-Kristo ken iti akemna kadagita a panggep, personal a nagdesisiontayo nga agserbi iti Dios iti amin a puso, panunot, kararua, ken pigsatayo. (Marcos 8:34; 12:30; Juan 17:3) Maikuna pay ketdi a maysa dayta a personal a kari, awan kondisionna a panagdedikar iti Dios. Nagdedikartayo saan a gapu iti panangiduron ti emosion. Tiningitingtay a naimbag dayta buyogen ti kararag ken panangtimbeng kadagiti bambanag. No kasta, saan a temporario a desision daytoy . Saantayo a kas iti tao a mangrugi nga agarado ket kalpasanna sumardeng gapu ta marigatan wenno kasla mabayag pay ti panagani wenno dina masigurado no addanto anienna. Alaentay a pagarigan dagiti sumagmamano a ‘nangiggem iti arado’ ti teokratiko a responsabilidad iti baet ti rigat.​—Lucas 9:62; Roma 12:1, 2.

Nagtalinaedda a Dedikado

5. Kasano a maysa ni Jeremias a naisangsangayan nga ulidan maipapan iti panagbalin a dedikado nga adipen ti Dios?

⁵ Nagserbi ni Jeremias a kas propeta idiay Jerusalem iti nasurok a 40 a tawen (647-607 K.K.P.), ket saan a nalaka dayta nga annongen. Sipapanunot unay kadagiti pagkapuyanna. (Jeremias 1:2-6) Kasapulanna ti tured ken panagibtur a sumango kadagiti nasubeg nga umili ti Juda iti inaldaw-aldaw. (Jeremias 18:18; 38:4-6) Nupay kasta, nagtalek ni Jeremias ken Jehova a Dios, a nangpakired kenkuana ket nakapagtalinaed a pudpudno a dedikado nga adipen ti Dios.​—Jeremias 1:18, 19.

6. Ania nga ulidan ti impaay kadatayo ni apostol Juan?

⁶ Komusta met ngay ni matalek nga apostol Juan, nga idi lakayen naidestiero iti langalang nga isla ti Patmos gapu iti ‘panagsaona maipapan iti Dios ken panangsaksina ken Jesus’? (Apocalipsis 1:9) Agarup 60 a tawen a nagibtur ken nagbiag kas dedikado a Kristiano. Nalasatanna ti pannakadadael ti Jerusalem iti ima dagiti buyot ti Roma. Naaddaan iti pribilehio a mangisurat iti maysa kadagiti Ebanghelio, tallo a naipaltiing a surat, ken ti libro nga Apocalipsis, a nakasirmataanna iti gubat a maaw-awagan Armagedon. Simmardeng kadi idi naammuanna a saan a dumteng ti Armagedon bayat ti panagbiagna? Nadismaya kadi? Saan, nagtalinaed ni Juan a matalek agingga iti ipapatayna, nga ammona a nupay ‘asideg idin ti naituding a tiempo,’ matungpalto pay laeng dagiti sirmatana iti maud-udi a panawen.​—Apocalipsis 1:3; Daniel 12:4.

Dagiti Mapagulidanan a Dedikado a Tattao iti Moderno a Panawen

7. No maipapan iti Nakristianuan a dedikasion, kasano a nagsayaat a pagwadan ti maysa a kabsat?

⁷ Iti moderno a panawen, rinibu a matalek a Kristiano ti sireregta a nagtultuloy a dedikado nupay saan a dimteng ti Armagedon bayat ti panagbiagda. Maysa kadakuada ni Ernest E. Beavor a taga England. Nagbalin a Saksi idi 1939 idi rugrugi ti Gubat Sangalubongan II. Insardengna ti narang-ay a negosiona a press photography tapno makapagserbi iti amin a tiempo. Gapu ta nagtalinaed a neutral kas Kristiano, naibalud iti dua a tawen. Inandingay ti pamiliana, ket idi 1950 naayaban dagiti tallo nga annakna nga agsanay kas misionero iti Watchtower Bible School of Gilead idiay New York. Nakaregregta a mangasaba ni Kabsat Beavor, isut’ gapuna nga Armageddon Ernie ti awag kenkuana dagiti gagayyemna. Sisusungdo a nagbiag a mayannurot iti karina idi nagdedikar, ket agingga iti ipapatayna idi 1986, inwaragawagna nga asidegen ti Armagedon a gubat ti Dios. Saanna nga imbilang ti panagdedikarna a kas temporario laeng a pannakitulag iti Dios!b​—1 Corinto 15:58.

8, 9. (a) Ania nga ulidan ti impaay ti adu nga agtutubo a lallaki idiay España bayat ti panagturay ni Franco? (b) Aniada a salsaludsod ti mayanatup?

⁸ Taga España ti dadduma pay nga ulidan ti di agbalbaliw a regta. Bayat ti panagturay ni Franco (1939-75), ginasut a dedikado nga agtutubo a Saksi ti nagtalinaed a neutral kas Kristiano. Adu kadakuada ti naipisok kadagiti pagbaludan ti militar iti sangapulo a tawen wenno nasursurok pay. Agdagup iti 22 a tawen a pannakaibalud ti sentensia a naipatay iti maysa a Saksi nga agnagan Jesús Martín. Nakabkabil iti kasta unay bayat ti kaaddana iti pagbaludan ti militar idiay Makin-Amianan nga Africa. Narigat daytoy, ngem saan a nakikompromiso.

⁹ Kaaduanna, saan nga ammo dagitoy nga agtutubo no kaanoda a mawayawayaan, no mawayawayaanda man, ta kanayon a masentensiaanda. Ngem nagtalinaedda a natarnaw ken naregtada latta a nangaskasaba bayat nga addada iti pagbaludan. Idi simmayaaten ti kasasaad idi 1973, adu kadagitoy a Saksi, nga apaglabes a 30 ti tawenda idi, ti naruk-atan iti pagbaludan ket simrekda a dagus iti amin-tiempo a serbisio. Adda dagiti nagbalin nga special pioneer ken agdaldaliasat a manangaywan. Uray no naibaludda, nagbiagda a mayannurot iti karida idi nagdedikarda, ket nagtultuloy a kasta ti inaramid ti kaaduan manipud idi nawayawayaanda.c Datayo met ngay ita? Agtultuloytayo met laeng kadi a dedikado kas kadagitoy nasungdo a Saksi?​—Hebreo 10:32-34; 13:3.

Umiso a Panangmatmat iti Panagdedikartayo

10. (a) Kasano ti rumbeng a panangmatmattayo iti panagdedikartayo? (b) Kasano ti panangmatmat ni Jehova iti panagserbitayo kenkuana?

¹⁰ Kasano ti panangmatmattayo iti inkaritayo iti Dios nga aramidentayo ti pagayatanna? Dayta kadi ti kangrunaan iti biagtayo? Aniaman ti kasasaadtayo, agtutubo man wenno nataengan, naasawaan wenno agsolsolo, nasalun-at wenno masakit, ikagumaantay koma ti agbiag a mayannurot iti karitayo idi nagdedikartayo, sigun iti kasasaadtayo. Mabalin a kabaelan ti maysa a tao ti agserbi iti amin a tiempo kas payunir, boluntario iti sanga nga opisina ti Watch Tower Society, misionero, wenno agdaldaliasat a manangaywan. Iti sabali a bangir, mabalin a makumikom dagiti dadduma a nagannak a mangasikaso kadagiti material ken naespirituan a kasapulan ti pamiliada. Basbassit kadi ti pategna iti imatang ni Jehova ti sumagmamano nga oras a mabusbosda iti ministerio iti kada bulan no idilig iti adu nga oras a mabusbos dagiti agserserbi iti amin a tiempo? Saan. Pulos a di namnamaen ti Dios kadatayo ti ditay kabaelan nga aramiden. Kastoy ti prinsipio nga inyebkas ni apostol Pablo: “No ti kinamanagsagana umun-una nga adda, nangnangruna a maawat dayta sigun iti adda iti maysa a tao, saan a sigun iti awan iti maysa a tao.”​—2 Corinto 8:12.

11. Agpannuray iti ania ti pannakaisalakantayo?

¹¹ Iti aniaman a kasasaad, agpannuray ti pannakaisalakantayo, saan nga iti gapuanantayo, no di ket iti di kaikarian a kinamanangngaasi ni Jehova babaen ken Kristo Jesus nga Apotayo. Sibabatad nga inlawlawag ni Pablo: “Amin nagbasol ken agkurang iti dayag ti Dios, ket kas maysa nga awan bayadna a sagut a maidekdeklarada a nalinteg babaen ti di kaikarian a kinamanangaasina baeten iti pannakaluk-at babaen ti subbot nga imbayad ni Kristo Jesus.” Nupay kasta, dagiti aramidtayo paneknekanda nga addaantay iti nabiag a pammati kadagiti kari ti Dios.​—Roma 3:23, 24; Santiago 2:17, 18, 24.

12. Apay a ditay koma agdidinnilig?

¹² Di rumbeng nga idiligtayo kadagiti dadduma ti oras a mabusbostayo iti panagserbi iti Dios, dagiti maipaimatayo a literatura a naibatay iti Biblia, wenno ti kaadu ti iyad-adalantayo iti Biblia. (Galacia 6:3, 4) Aniaman ti magapuanantayo iti Nakristianuan a ministerio, laglagipentay koma amin ti mamagpakumbaba a sasao ni Jesus: “Inton naaramidyon amin dagiti bambanag a naituding kadakayo, kunaenyo, ‘Awan kaes-eskanmi nga ad-adipen. Ti naaramidanmi isu ti rebbengmi nga aramiden.’” (Lucas 17:10) Kasano kasansan a talaga a maikunatayo nga inaramidtayo “amin dagiti bambanag a naituding” kadatayo? Daytoy ngarud ti saludsod, Ania ti rumbeng koma a kalidad ti panagserbitayo iti Dios?​—2 Corinto 10:17, 18.

Awan Koma ti Masayang nga Aldaw

13. Ania a kababalin ti kasapulantayo bayat nga agbibiagtayo a mayannurot iti karitayo idi nagdedikartayo?

¹³ Kalpasan a binagbagaan ni Pablo dagiti assawa a babbai ken lallaki, annak, nagannak, ken ad-adipen, kinunana: “Aniaman ti ar-aramidenyo, aramidenyo dayta nga amin-kararua a kas maipaay ken Jehova, ket saan a maipaay kadagiti tattao, ta ammoyo a manipud ken Jehova awatenyonto ti maitutop a gunggona ti tawid. Agpaadipenkayo iti Apo, a ni Kristo.” (Colosas 3:23, 24) Saantay nga agserserbi tapno dayawendatayo dagiti tattao gapu iti gapuanantayo iti panagserbi ken Jehova. Ikagkagumaantayo ti agserbi iti Dios babaen ti panangsurot iti ulidan nga impaay ni Jesu-Kristo. Siaagawa nga intungpalna ti ministeriona iti ababa a panawen.​—1 Pedro 2:21.

14. Ania ti impakpakauna ni Pedro maipapan iti maudi nga al-aldaw?

¹⁴ Narikna met ni apostol Pedro ti kinaganat ti panawen. Iti maikadua a suratna, impakpakaunana nga iti maudi nga al-aldaw, addanto dagiti managuyaw​—dagiti apostata ken managduadua​—a sipapakinakem a pagduaduaanda ti kaadda ni Kristo. Nupay kasta, kinuna ni Pedro: “Saan a nabannayat ni Jehova maipapan iti karina, kas iti panangibilang dagiti dadduma a tattao a kinabannayat, no di ket an-anusannakayo agsipud ta saanna a tarigagayan a madadael ti asinoman no di ket tarigagayanna a makagteng dagiti isuamin iti panagbabawi. Ngem ti aldaw ni Jehova umayto a kasla mannanakaw.” Wen, sigurado a dumteng ti aldaw ni Jehova. Gapuna, inaldaw koma a panunotentayo no kasano katalged ken katibker a talaga ti pammatitayo iti kari ti Dios.​—2 Pedro 3:3, 4, 9, 10.

15. Kasanotay koma a matmatan ti tunggal aldaw iti biagtayo?

¹⁵ Tapno sipapasnek a makapagbiagtayo a mayannurot iti karitayo idi nagdedikartayo, rumbeng nga usarentayo ti tunggal aldaw a mangidayaw ken Jehova. Iti ngudo ti kada aldaw, mabalintay kadi a taliawen dayta ket panunotentayo no kasanotayo a nakatulong iti pannakasantipikar ti nagan ti Dios ken iti pannakaiwaragawag ti naimbag a damag maipapan iti Pagarian? Nalabit babaen ti nasayaat a kababalintayo, makapabileg a pannakisarita, wenno naayat a pannakaseknan iti pamilia ken kadagiti gagayyem. Ginundawayantay kadi nga inranud kadagiti sabsabali ti namnamatayo kas Kristiano? Adda kadi natulongantayo a mangpanunot a sipapasnek kadagiti kari ti Dios? Agurnongtayo iti naespirituan a gameng iti kada aldaw, a kas man la agidepdepositotayo iti naespirituan a bangko.​—Mateo 6:20; 1 Pedro 2:12; 3:15; Santiago 3:13.

Pagtalinaedenyo a Nalawag ti Panangmatmatyo

16. Kadagiti ania a pamay-an nga ikagkagumaan ni Satanas a pakapsuten ti dedikasiontayo iti Dios?

¹⁶ Agbibiagtayo iti tiempo a rumikrikut para kadagiti Kristiano. Ikagkagumaan ni Satanas ken dagiti demoniona a libegen ti nagdumaan ti naimbag ken dakes, nadalus ken narugit, moral ken imoral, umiso ken di umiso a kababalin. (Roma 1:24-28; 16:17-19) Pinagbalinna a nalaka a matulawan ti puso ken panunottayo babaen ti TV wenno kompiuter. Mabalin a kumudrep ti naespirituan a panangmatmattayo, wenno saanen a nakapokus, iti kasta ditay mailasin dagiti pangallilawna. Mabalin a kumapuy ti determinasiontayo nga agbiag a mayannurot iti karitayo idi nagdedikartayo ken lumukay ti panangpetpettayo iti “arado” no ikompromisotayo dagiti naespirituan a prinsipiotayo.​—Lucas 9:62; Filipos 4:8.

17. Kasano a ti balakad ni Pablo matulongannatayo a mangtaginayon iti relasiontayo iti Dios?

¹⁷ Naintiempuan la unay ngarud ti kinuna ni Pablo iti kongregasion sadi Tesalonica: “Daytoy ti pagayatan ti Dios, ti pannakasantipikaryo, nga adaywanyo ti pannakiabig; a tunggal maysa kadakayo ammona koma no kasano ti panangtagikuana iti bukodna a basehas iti pannakasantipikar ken dayaw, saan nga iti naagum a panaggartem iti sekso a kas met ti adda kadagidiay nasnasion a di makaam-ammo iti Dios.” (1 Tesalonica 4:3-5) Gapu iti imoralidad, nailaksid dagiti dadduma iti kongregasion Kristiano​—dagidiay nanglipat iti karida idi nagdedikarda iti Dios. Impalubosda a kumapuy ti relasionda iti Dios, isut’ gapuna a saandan nga ikabkabilangan ni Jehova iti biagda. Ngem kinuna ni Pablo: “Inayabannatayo ti Dios, saan a buyogen ti panangpawayway iti kinarugit, no di ket mainaig iti pannakasantipikar. Iti kasta, ngarud, ti tao a mangipakita iti di panangikankano dina ikankano, saan a ti tao, no di ket ti Dios, a mangikabil iti nasantuan nga espirituna kadakayo.”​—1 Tesalonica 4:7,  8.

Ania ti Determinasionyo?

18. Ania koma ti determinasiontayo?

¹⁸ No maawatantayo ti kinaserioso ti panagdedikartayo ken ni Jehova a Dios, ania ti rumbeng a determinado nga aramidentayo? Ti natibker a determinasiontayo isu koma ti panangtaginayon iti nadalus a konsiensia agpadpada no maipapan iti kababalin ken ministeriotayo. Imbalakad ni Pedro: “Salimetmetanyo ti naimbag a konsiensia, tapno iti daydiay banag a pangsawanda iti maibusor kadakayo mabainanda isuda nga agsasao buyogen ti panangtagibassit iti naimbag a kababalinyo mainaig ken Kristo.” (1 Pedro 3:16) Mabalin nga agsagaba ken irurumendatayo gapu iti Nakristianuan a kababalintayo, ngem kasta met ti napasaran ni Kristo gapu iti pammati ken kinasungdona iti Dios. “Gapuna,” insurat ni Pedro, “yantangay nagsagaba ni Kristo iti lasag, kabalanyo met ti bagbagiyo iti isu met laeng a pagannayasan ti isip; agsipud ta ti tao a nagsagaba iti lasag simmardengen kadagiti basol.”​—1 Pedro 4:1.

19. Ania ti kayattay a maikuna maipapan kadatayo?

¹⁹ Wen, ti natibker a determinasiontayo nga agtalinaed a dedikado salaknibannatayo kadagiti palab-og ti lubong ni Satanas a masakit iti naespirituan, moral, ken pisikal. Ngem saan la a dayta, makapagtalektayo nga adda kadatayo ti pabor ti Dios, a nasaysayaat nga amang ngem iti aniaman a maitukon ni Satanas ken dagiti pasurotna. Gapuna, pulos a dinto koma maikuna a pinanawantayo daydi ayat nga adda kadatayo idi damo a naammuantayo ti kinapudno. Imbes ketdi, maikuna koma maipapan kadatayo ti kas iti naikuna maipapan kadagiti kameng ti kongregasion idiay Tiatira idi umuna a siglo: “Ammok dagiti aramidmo, ken ti ayat ken pammati ken ministerio ken panagibturmo, ket dagiti aramidmo a naud-udi ad-aduda ngem dagidiay immun-una.” (Apocalipsis 2:4, 18, 19) Wen, saan koma nga apaganem-em ti dedikasiontayo, no di ket ‘nasgedtay koma iti espiritu,’ naregta agingga iti panungpalan​—ket ti panungpalan asidegen.​—Roma 12:11; Apocalipsis 3:15, 16.

[Footnotes]

Malagipyo Kadi?

• Ania ti ramanen ti panagdedikar?

• Siasino dagiti mapagulidanan a dedikado nga adipen ti Dios idi ugma ken iti moderno a panawen a maikari a tuladentayo?

• Kasano ti rumbeng a panangmatmattayo iti panagserbitayo iti Dios?

• Ania koma ti determinasiontayo no maipapan iti panagdedikartayo iti Dios?

[Ladawan iti panid 15]

Nagtalinaed a matalek ni Jeremias iti baet ti ibubusor

[Ladawan iti panid 16]

Nangipakita ni Ernest Beavor iti ulidan kadagiti annakna kas maysa a naregta a Kristiano

[Ladawan iti panid 17]

Ginasut a naibalud nga agtutubo a Saksi idiay España ti nagtalinaed a matalek

[Dagiti Ladawan iti panid 18]

Agurnongtayo iti naespirituan a gameng iti kada aldaw