Dagiti Mannursuro iti Sao ti Dios Naidagadag a Tungpalenda ti Annongenda
KADAGITI naglabas a bulan, ginasgasut a ribu a mannursuro ti nagtitipon tapno paisuro. Nangrugi idi napalabas a Mayo, naguummongda kadagiti ginasut a “Mannursuro iti Sao ti Dios” a Kombension Distrito dagiti Saksi ni Jehova iti intero a lubong. Naidagadag kadagiti delegado nga isuroda ti bagbagida, nga agbalinda nga ad-adda a kualipikado, ken tungpalenda ti annongenda kas mannursuro.
Tinabunuanyo kadi ti maysa kadagitoy a kombension? No kasta, sigurado nga inapresiaryo ti nasayaat a naespirituan a taraon a naipaay kadagitoy a panagtitipon tapno idayaw ti pudno a Dios, ni Jehova. Apay a dikay makiraman kadakami ita a mangrepaso iti makaisuro a programa ti kombension?
Umuna nga Aldaw—Dagiti Naipaltiing a Kasuratan a Makagunggona iti Panangisuro
Sibabara nga inabrasa ti tserman ti kombension dagiti delegado babaen ti palawag a “Paisurokayo, Dakayo a Mannursuro iti Sao ti Dios.” Nagbalin ni Jesu-Kristo a ti Naindaklan a Mannursuro gapu iti naadalna ken Jehova, ti ‘Naindaklan nga Instruktor.’ (Isaias 30:20; Mateo 19:16) Tapno rumang-aytayo kas mannursuro iti Sao ti Dios, masapul met a paisurotayo ken ni Jehova.
Simmaruno ti paset a “Nasayaat ti Bunga ti Panangisuro Maipapan iti Pagarian.” Babaen ti interbiu kadagiti eksperiensiado a mannursuro iti Sao ti Dios, naitampok dagiti rag-o ken bendision iti panagaramid iti adalan.
Simmaganad ti maysa a makagutugot a palawag a napauluan “Natignay Babaen ti ‘Natan-ok a Bambanag ti Dios.’” Idi umuna a siglo, dagiti “natan-ok a bambanag” a mainaig iti Pagarian ti Dios ti nangtignay kadagiti tattao. (Aramid 2:11) Magutugottayo met dagiti tattao nga agtignay babaen ti panangipakaammo kadagiti “natan-ok a bambanag” kas kadagiti Nainkasuratan a sursuro maipapan iti subbot, panagungar, ken baro a tulag.
Ti simmaganad a palawag pinaregtana dagiti amin a “Pagragsakanda ti Kinalinteg ni Jehova.” (Salmo 35:27) Natulongantayo a mangsapul iti kinalinteg babaen ti panangsursurotayo nga ayaten ti kinalinteg ken guraen ti dakes, babaen ti panangadal iti Biblia, babaen ti aktibo a panangsaranget kadagiti makadangran a naespirituan nga impluensia, ken babaen ti panangpatanor iti kinapakumbaba. Tumulong dagitoy nga addang a mangsalaknib kadatayo kadagiti dakes a timpuyog, kinamaterialistiko iti lubong, ken imoral ken naranggas a panaglinglingay.
Ti pannakatema a palawag a napauluan “Naan-anay a Nakabalan kas Mannursuro iti Sao ti Dios,” impalagipna a pinagbalinnatayo ni Jehova a kualipikado a ministrona babaen ti Sao, nasantuan nga espiritu, ken naindagaan nga organisasionna. No maipapan iti panangusar iti Sao ti Dios, imbalakad kadatayo ti ispiker: “Ti kalattayo ket arigna pidutentayo ti mensahe ti Biblia manipud nayimprenta a panid satay imaldit iti puso dagiti agdengdengngeg kadatayo.”
Ti umuna a simposium ti kombension ket napauluan “Isurotayo ti Bagbagitayo Bayat nga Isursurotayo ti Sabsabali.” Impaganetget ti panglukat a paset nga annurotentayo ti isu met laeng a nangato a pagalagadan ti Nakristianuan a moralidad nga isursurotayo iti sabsabali. Binalakadannatayo ti simmaganad a paset nga ‘aramaten a siuumiso ti sao ti kinapudno.’ (2 Timoteo 2:15) Tapno maisurotayo ti bagbagitayo, napateg ti regular ken naanep a personal a panagadal iti Biblia, uray kasano kabayagtayon nga agserserbi iti Dios. Inlawlawag ti naudi a paset ti simposium a sipsiputan ti Diablo no adda kababalintayo a kas iti kinatangsit, managwaywayas, nalabes a panangipateg iti bagi, imon, apal, rurod, gura, ken managsapul iti biddut. Nupay kasta, agtalaw kadatayo ti Diablo no sipipinget a busorentayo. Tapno masarangettayo, masapul nga umadanitayo iti Dios.—Santiago 4:7, 8.
Ti naintiempuan a palawag a “Karurodyo ti Nailubongan a Saplit ti Pornograpia” inlawlawagna no kasano a mapagballigian dayta a pangta iti espiritualidadtayo. Kinuna ni propeta Habakuk maipapan ken Jehova: “Nasin-aw unay dagiti matam tapno kumita iti dakes; ket saanmo a kabaelan ti kumita iti riribuk.” (Habakuk 1:13) Masapul a ‘karurodtayo ti dakes.’ (Roma 12:9) Nabagbagaan dagiti nagannak a kontrolenda ti panagusar ti annakda iti Internet ken panagbuya iti telebision. Kinuna ti ispiker a dagidiay nairuam iti pornograpia agpatulongda koma iti gayyem a nataengan iti naespirituan. Makatulong met a mennamennaen ken ikabesa dagiti kasuratan a kas iti Salmo 97:10; Mateo 5:28; 1 Corinto 9:27; Efeso 5:3, 12; Colosas 3:5; ken 1 Tesalonica 4:4, 5.
Iti simmaganad a palawag a “Saluadannakayo Koma ti Talna ti Dios,” naliwliwatayo iti pammatalged a no maringgorantayo, mabalintay ti agkamang ken Jehova. (Salmo 55:22) No ipeksatayo ti rikriknatayo iti kararag, ipaayannatayo ni Jehova iti “talna ti Dios,” ti kinakalmado ken makin-uneg a kinatalingenngen a resulta ti nagpateg a relasiontayo kenkuana.—Filipos 4:6, 7.
Nagngudo ti umuna nga aldaw buyogen ti naisangsangayan a naragsak a panagimdeng iti diskurso a “Papintasen ni Jehova ti Ilina Babaen ti Lawag,” a nangilawlawag iti kaitungpalan ti kapitulo 60 ti Isaias. Nupay nasipnget ti kasasaad ti lubong, tagtagiragsaken “dagiti ganggannaet”—ti rumrumsua a dakkel a bunggoy dagiti marakarnero a tattao—ti lawag ni Jehova a kadua dagiti napulotan a Kristiano. Iti panangtukoyna iti bersikulo 19 ken 20, inlawlawag ti ispiker: “Saanto a ‘lumnek’ ni Jehova a kas iti init wenno ‘bumassit’ a kas iti bulan. Itultuloynanto a papintasen ti ilina babaen ti pananglawagna kadakuada. Anian a nagngayed a pammasiguro dayta kadatayo bayat nga agbibiagtayo iti maudi nga al-aldaw daytoy nasipnget a lubong!” Iti ngudo ti palawag, inyanunsio ti ispiker ti pannakairuar ti libro a Ti Padto ni Isaias—Lawag nga Agpaay iti Sangatauan, Maikadua a Tomo. Nalpasyo kadin a binasa daytoy baro a publikasion?
Maikadua nga Aldaw—Naan-anay a Kualipikado a Mangisuro iti Sabsabali
Kalpasan a napagsaritaan ti teksto iti aldaw ti Sabado, sipapasnek a nagimdengtayo iti maikadua a simposium ti kombension a napauluan “Dagiti Ministro a Babaen Kadakuada Nagbalin a Manamati ti Sabsabali.” Dagiti ispiker iti daytoy nagkatlo a paset a simposium intampokda ti tunggal maysa kadagiti tallo nga addang a kasapulan iti panangtulong kadagiti tattao nga agbalin a manamati—panangisaknap iti mensahe ti Pagarian, panangsukay iti nasarakan nga interes, ken panangisuro kadagiti interesado a mangipangag iti imbilin ni Kristo. Babaen dagiti interbiu ken panangi-akto, nangruna a natulongantayo a mangammo no kasano a maisuro ti sabsabali nga agbalin nga ad-adalan.
Ti simmaganad a paset ket nainaig iti tema nga “Inayonyo ti Nadiosan a Debosion iti Panagibturyo.” Inlawlawag ti ispiker a ti napateg iti kamaudiananna ket ti ‘panagibtur agingga iti panungpalan.’ (Mateo 24:13) Masapul nga usarentayo amin a probision ti Dios—kararag, personal a panagadal, dagiti gimong, ken ti ministerio—a mangpatanor iti nadiosan a debosion. Nasken a ditay ipalubos a dagiti nailubongan a tarigagay ken ar-aramid ti mangdadael iti nadiosan a debosiontayo.
Iti kaaldawantayo, kasano a magin-awaan dagiti mabambannogan ken madagdagsenan? Dayta a saludsod ti sinungbatan ti palawag a “Panangsapul iti Gin-awa iti Panangibaklay iti Sangol ni Kristo.” Siaasi nga inawis ni Jesus dagiti pasurotna nga ibaklayda ti sangolna ket agsursuroda kenkuana. (Mateo 11:28-30) Maibaklaytayo ti sangol ni Jesus babaen ti nainget a panangsurottayo iti simple, balanse a panagbiag nga inyulidanna. Naparayray dagiti kangrunaan a punto daytoy a presentasion babaen ti interbiu kadagiti nangpasimple iti panagbiagda.
Maysa kadagiti tampok ti dadakkel a panagtitipon dagiti Saksi ni Jehova ket ti bautismo dagiti baro a nagdedikar nga adipen ti Dios. Ti kabsat a nangipaay iti diskurso a “Ti Bautismo Mangyeg iti Ad-adu a Gundaway a Mangisuro” ti sibabara a nangabrasa kadagiti kandidato iti bautismo ken inawisna ida a makiraman kadagiti dakdakkel a pribilehio iti panagserbi. Dagiti kabbaro a bautisado a mannursuro iti Sao ti Dios a nangragpat kadagiti Nainkasuratan a kualipikasion ket mabalinda ti gumaw-at kadagiti nadumaduma nga annongen iti kongregasion.
Ti umuna a palawag iti dayta a malem ket napauluan “Tuladenyo ti Naindaklan a Mannursuro.” Iti naunday a tiempo idiay langit, siaannad a pinaliiw ken tinulad ni Jesus ti Amana, isu a nagbalin a Naindaklan a Mannursuro. Idi adda ditoy daga, nagusar ni Jesus iti epektibo a taktika iti panangisuro, kas iti makagutugot a salsaludsod ken simple ngem nabiag nga ilustrasion. Imbasar ni Jesus ti sursurona iti Sao ti Dios ken nagsao buyogen ti kinarayray, kinabara, ken autoridad. Saantayo aya a natignay a mangtulad iti Naindaklan a Mannursuro?
Ti sabali pay a makagutugot a palawag a “Situtulokkayo Kadi nga Agserbi iti Sabsabali?,” ti nangiparegta a tuladentayo ti ulidan ni Jesus iti panagserbi iti sabsabali a tattao. (Juan 13:12-15) Direkta nga indagadag ti ispiker kadagiti kualipikado a lallaki nga agbalinda a kas ken ni Timoteo iti panangaprobetsar kadagiti gundaway a tumulong iti sabsabali. (Filipos 2:20, 21) Naiparegta kadagiti nagannak a tuladenda ni Elcana ken ni Anna iti panangtulong kadagiti annakda a mangragpat iti amin-tiempo a ministerio. Ken nabagbagaan dagiti agtutubo a tuladenda ti ulidan ni Jesu-Kristo ken ti agtutubo a ni Timoteo babaen ti situtulok a panagserbida. (1 Pedro 2:21) Nagutugottayo met iti salaysay dagidiay nangaprobetsar kadagiti gundaway nga agserbi kadagiti sabsabali.
Natemaan ti maikatlo a simposium iti “Magunggonaan a Naan-anay iti Teokratiko nga Edukasion.” Impaganetget ti umuna nga ispiker ti kinapateg ti ad-adda a panagatensiontayo. Tapno maaramid dayta a kalat, mabalintayo ti mangrugi kadagiti ababa a sesion iti personal a panagadal, ket padasentayo nga iyat-atiddog dagita. Pinaregtana met dagiti agdengdengngeg a kitaenda dagiti teksto ken aginotar bayat dagiti gimong. Inalertonatayo ti maikadua nga ispiker mainaig iti kasapulan a panangsalimetmet iti “pagtuladan iti makapasalun-at a sasao.” (2 Timoteo 1:13, 14) Tapno masalaknibantayo manipud kadagiti imoral a presentasion iti media, natauan a pilosopia, higher criticism, ken apostata a sursuro, masapul nga iwayaantayo ti personal a panagadal ken pannakigimong. (Efeso 5:15, 16) Intampok ti naudi nga ispiker ti simposium a kasapulan ti panangyaplikar kadagiti banag a nasursuro tapno naan-anay a magunggonaantayo iti nateokratikuan nga edukasion.—Filipos 4:9.
Anian a gagartayo a nagimdeng iti palawag a “Dagiti Baro a Probision Para iti Naespirituan a Panagrang-aytayo”! Naragsakantayo a makaammo nga asidegen a maipablaak ti libro a napauluan Magunggonaan iti Edukasion nga Ipaay ti Teokratiko nga Eskuelaan ti Panagministro. Magagarantayo unay a makaala iti dayta a libro bayat nga imbinsabinsa ti ispiker ti linaonna. Mainaig iti benneg ti libro a naglaon iti adu a punto a pakabalakadan, kinunana: “Saan a sekular ti wagas a panangidatag daytoy baro a textbook kadagiti 53 nga aspeto ti nasayaat a panagbasa, panagsao, ken panangisuro. Naibatay daytoy kadagiti Nainkasuratan a prinsipio.” Ipakita ti libro no kasano ti nasigo a panangisuro dagiti propeta, ni Jesus, ken dagiti adalanna. Wen, daytoy a libro ken dagiti baro a paset ti Teokratiko nga Eskuelaan ti Panagministro ti sigurado a tumulong kadatayo nga agbalin a nasaysayaat a mannursuro iti Sao ti Dios.
Maikatlo nga Aldaw—Agbalin a Mannursuro Maigapu iti Tiempo
Kalpasan a napagsaritaan ti teksto iti naudi nga aldaw, sipapasnek a nagimdeng ti amin iti naudi a simposium ti kombension a napauluan “Ti Padto ni Malakias Isagananatayo Maipaay iti Aldaw ni Jehova.” Nagipadto ni Malakias agarup ginasut a tawen kalpasan ti panagsubli dagiti Judio manipud Babilonia. Naituggodda manen iti apostasia ken kinadakes, nga imbabainda ti nagan ni Jehova babaen ti di panangikankano kadagiti nalinteg a bilinna ken babaen ti panangidaton kadagiti bulsek, umel, ken masaksakit nga animal. Kanayonanna, insinada dagiti baketen nga assawada, nalabit tapno mangasawa iti pagano a babbai.
Ti umuna a kapitulo ti padto ni Malakias ipatalgedna kadatayo ti ayat ni Jehova iti ilina. Intampokna ti nasken a pannakaadda ti nadayaw a panagbuteng iti Dios kasta met ti panangapresiar kadagiti sagrado a bambanag. Namnamaen ni Jehova nga ipaaytayo kenkuana ti kasayaatan, a dayawentayo gapu iti di agimbubukodan nga ayattayo kenkuana. Saan koma a pormalidad laeng ti sagrado a panagserbitayo, ken masapul a laglagipentayo a manungsungbattayo iti Dios.
Ti panangyaplikarna iti maikadua a kapitulo ti Malakias iti kaaldawantayo, insaludsod ti maikadua nga ispiker ti simposium: “Agan-annadtayo kadi a mismo nga ‘awan ti kinakillo a masarakan kadagiti bibigtayo’?” (Malakias 2:6) Dagidiay mangidadaulo iti panangisuro siguraduenda koma a ti sawenda ket nainget a naibasar iti Sao ti Dios. Masapul a guraentayo ti kinagulib kas iti di nainkalintegan a panangidiborsio.—Malakias 2:14-16.
Iti panangipalawagna iti tema a “Siasinonto ti Makalasat iti Aldaw ni Jehova?,” timmulong ti naudi nga ispiker ti simposium tapno makapagsaganatayo iti aldaw ni Jehova. “Anian a makaliwliwa a maammuan dagiti adipen ni Jehova a mapaspasamaken kadakuada ti kangrunaan a kaitungpalan ti Malakias kapitulo 3, bersikulo 17!” kinuna ti ispiker. “Kuna dayta a teksto: ‘“Sigurado nga agbalindanto a kukuak,” kinuna ni Jehova ti buybuyot, “iti aldaw a panangpataudko iti naisangsangayan a sanikua. Ket ipakitakto ti panangngaasi kadakuada, no kasano a ti maysa a tao ipakitana ti panangngaasi iti anakna nga agserserbi kenkuana.”’”
Ti maysa pay a naitampok iti kombension ket ti full-costume a drama a “Raemenyo ti Autoridad ni Jehova,” a nangitampok kadagiti annak ni Kore. Iti laksid ti rebelioso a kababalin ti amada maibusor ken ni Moises ken Aaron, nagtalinaedda a nasungdo ken Jehova ken kadagiti pannakabagina. Nupay nadadael ni Kore ken dagiti pasurotna, nakalasat dagiti annakna. Ti naipakuyog a palawag a “Sisusungdo nga Agpasakupkayo iti Nadiosan nga Autoridad,” inyaplikarna ti linaon ti drama iti tunggal maysa kadatayo. Pinakdaarannatayo ti ispiker maibusor iti innem a banag a nakatinnagan ni Kore ken dagiti pasurotna: saanda a sisusungdo a sinuportaran ti autoridad ni Jehova; nagpaiturayda iti kinatangsit, ambision, ken apal; ti kitkitaenda ket ti kinaimperpekto dagidiay dinutokan ni Jehova; nagbalinda a managreklamo; saanda a nakontento kadagiti pribilehioda a panagserbi; ken napatpateg kadakuada ti pannakigayyem wenno singgalut ti pamilia ngem ti kinasungdo ken Jehova.
Ti pannakatema ti palawag publiko ket “Asino ti Mangisursuro iti Kinapudno Kadagiti Amin a Nasion?” Ti nailawlawag a kinapudno ket saan a ti pangkaaduan a kinapudno no di ket ti kinapudno maipapan iti panggep ni Jehova nga inkaskasaba ni Jesu-Kristo. Ti patpatien a dinakamat ti ispiker ket mainaig iti kinapudno, ti kinapudno maipapan iti wagas ti panagdayaw, ken ti kinapudno a mainaig iti personal a kababalin. Babaen ti panangidilig kadagiti Kristiano idi umuna a siglo kadagiti Saksi ni Jehova ita, napabileg ti panamatitayo a ‘ti Dios pudno nga adda iti tengngatayo.’—1 Corinto 14:25.
Kalpasan ti sumario ti maadal nga artikulo ti Pagwanawanan, amin a timmabuno a mannursuro iti sao ti Dios ket nagutugot nga agtignay babaen ti pangserra a palawag a, “Sigaganetget a Panangitungpal iti Annongentayo a Mangisuro.” Babaen ti ababa a pannakarepaso ti programa, naipaganetget a napateg nga usarentayo ti Kasuratan iti panangisuro, dagiti pamay-an a mabalintayo ti agbalin a kualipikado a mannursuro, ken ti kasapulan a kaadda ti panagkompiansa iti kinapudno nga isurotayo iti sabsabali. Imbalakad kadatayo ti ispiker nga ‘iparangarangtayo ti panagrang-aytayo’ ken ‘itultuloytayo nga asikasuen ti bagitayo ken ti isursurotayo.’—1 Timoteo 4: 15, 16.
Anian a naespirituan a piesta ti tinagiragsaktayo iti “Mannursuro iti Sao ti Dios” a Kombension Distrito! Tuladentayo koma ti Naindaklan nga Instruktortayo, ni Jehova, ken ti Naindaklan a Mannursurotayo, ni Jesu-Kristo, iti panangisuro iti sabsabali maipapan iti sao ti Dios.
[Kahon/Dagiti Ladawan iti panid 28]
Dagiti Baro A Publikasion A Mangpennek Kadagiti Naisangsangayan A Pakasapulan
Dagiti delegado iti “Dagiti Mannursuro iti Sao ti Dios” a Kombension Distrito sigagagar nga inawatda ti dua a publikasion a makatulong unay iti panangisuro iti Nainkasuratan a kinapudno kadagiti tattao iti nagduduma a paset ti lubong. Makatulong nga alikamen ti tract a napauluan ti Addaanka Aya iti Imortal nga Espiritu? a mangirugi iti pannakisarita kadagidiay agnanaed kadagiti daga nga iti pagsasaoda ket awan nagdumaanna ti “kararua” ken “espiritu.” Nalawag nga ipakita ti baro a tract a ti espiritu a puersa ket naiduma iti espiritu a parsua ken dagiti tattao saanda nga agbalin nga espiritu a parsua no matayda.
Ti broshur a Makapnek a Biag—No Kasano a Masagrap ket nairuar iti ngudo ti maikadua nga aldaw ti kombension. Naisagana daytoy a broshur a mangirugi iti panagadal ti Biblia kadagidiay saan a mamati iti maysa a Namarsua nga addaan iti personalidad ken iti maysa a libro nga impaltiing ti Dios. Inusaryo kadin dagitoy a baro a publikasion iti ministerioyo?
[Dagiti Ladawan iti panid 26]
Idiay Milan, Italia, ken dagiti kombension iti aglikmut ti lubong, ginasgasut ti nabautisaran
[Ladawan iti panid 29]
Natukay dagiti nagbuya iti drama a “Raemenyo ti Autoridad ni Jehova”