“Umaykayo Kaniak, . . . ket Pagin-awaenkayto”
Ti Nakaskasdaaw a Panagrang-ay Kalikagumanna ti Napartak a Kanayonan a Panagibangon
“UMAYKAYO kaniak, . . . ket pagin-awaenkayto,” kinuna ni Jesu-Kristo. (Mateo 11:28) Anian a makatukay nga awis manipud iti Ulo ti kongregasion Kristiano! (Efeso 5:23) No utobentayo dagita a sasao, pudno a maapresiartayo ti napateg a gubuayan ti bang-ar—ti pannakitimpuyog kadagiti naespirituan a kakabsattayo kadagiti Nakristianuan a gimong. Umanamongtayo la ketdi iti salmista a nangikanta: “Anian a nagimbag ken anian a makaay-ayo a dagiti agkakabsat agnaedda a sangsangkamaysa buyogen ti panagtutunos!”—Salmo 133:1.
Wen, dagiti kakaduatayo kadagita a taripnong ti panagdayaw ti kasayaatan a makapulapoltayo, ken ti naespirituan a kasasaad ket natalged ken naragsak. Dayta ti makagapu a maysa nga agtutubo a Kristiano ti nagkuna: “Mabambannogak iti agmalmalem a panageskuela. Ngem dagiti gimong ket kasda la pagkamangan iti desierto, a sadiay a mabang-aranak tapno makapageskuelaak manen iti kabigatanna.” Inyebkas ti maysa nga agtutubo a taga Nigeria: “Natakuatak a babaen ti nasinged a pannakitimpuyog kadagiti mangay-ayat ken Jehova, natulonganak nga agtalinaed a nadekket kenkuana.”
Ti lokal a Kingdom Hall dagiti Saksi ni Jehova ket nasayaat a sentro ti pudno a panagdayaw iti komunidad. Iti kaaduan a lugar, mamindua iti kada lawas a maangay dagiti gimong iti Kingdom Hall, ket maiparegta kadagiti mayad-adalan iti Biblia a tumabuno iti kabiitan a tiempo tapno magunggonaanda iti makapabang-ar a timpuyog sadiay.—Hebreo 10:24, 25.
Naganat a Pakasapulan
Ngem napateg a maammuan a saan nga amin a Saksi ni Jehova ket addaan iti nasayaat a Kingdom Hall. Namataud iti naganat a pakasapulan ti nakaskasdaaw nga iyaadu ti bilang dagiti manangiwaragawag iti Pagarian iti sangalubongan. Rinibu pay a Kingdom Hall ti kasapulan, nangruna kadagiti napanglaw a pagilian.—Isaias 54:2; 60:22.
Kas pagarigan: Adda laeng sangapulo a Kingdom Hall para iti 290 a kongregasion iti kabesera ti Democratic Republic of Congo. Naganat ti pakasapulan iti adu a Kingdom Hall iti dayta a pagilian. Idiay Angola, iti ruar ti paggigimongan ti kaaduan a kongregasion agsipud ta limitado laeng ti bilang dagiti Kingdom Hall. Kasta met laeng ti pakasapulan iti adu a sabali a pagilian.
Sipud idi 1999, maar-aramid ngarud ti organisado a panangikagumaan a tumulong iti panangibangon iti Kingdom Hall kadagiti marigrigat a pagilian. Tapno makatulong kadagiti proyekto ti panagibangon kadagita a pagilian, adda dagiti nasanay a Saksi a nagbulontario a tumulong. No ti kasta a panangikagumaan ket madanggayan iti natulok nga espiritu ken sidadaan dagiti lokal a boluntario, makaparegta unay ti resultana. Magunggonaan met dagiti lokal a Saksi iti pannakasanayda. Tumulong amin dagitoy tapno maibangon dagiti kasapulan a Kingdom Hall iti pagilianda.
Maipapaay ngarud ti nagduduma a praktikal a tulong iti panangibangon iti Kingdom Hall a mausar dagiti lokal a metodo ken materiales. Ti kalat ket saan laeng a tapno makaibangon iti adu a kasapulan a Kingdom Hall no di ket tapno makapataud iti programa ti panangmantener a maibagay kadagiti lokal a kasasaad.—2 Corinto 8:14, 15.
Dagiti Makaparegta nga Irarang-ay
Ania ti resultana dagitoy a panangikagumaan a mangibangon kadagiti lugar a pagdayawan? Idi rugrugi ti 2001, kuna ti maysa a report manipud Malawi: “Talaga a makapasiddaaw ti nagapuanan iti daytoy a pagilian. Kadagiti sumaganad a dua a bulan, mangiringpaskami kadagiti kanayonan a Kingdom Hall.” (Ladawan 1 ken 2) Idiay Togo, nakaibangon dagiti boluntario iti adu a simple a Kingdom Hall kadagiti kallabes a bulan. (Ladawan 3) Ti nasayaat a trabaho dagiti natulok a boluntario ket tumultulong met tapno maibangon dagiti nasayaat a Kingdom Hall idiay Mexico, Brazil, ken dadduma pay a pagilian.
Madlaw dagiti kongregasion a no maibangon ti maysa a Kingdom Hall, patien dagiti lumugar nga agtalinaed dagiti Saksi ni Jehova. Adu dagiti kasla agkedked a makitimpuyog kadagiti Saksi idi awan pay ti nasayaat a pasdek a pagdayawan. Impadamag ti Nafisi Congregation idiay Malawi: “Ita ta addaankamin iti nasayaat a Kingdom Hall, mangipapaay daytoy iti nasayaat a panangsaksi. Isu a nalaka ti mangirugi iti panagadal iti Biblia.”
Iti napalabas, dagiti kakabsat iti Krake Congregation idiay Benin ti nagibtur iti pannakalalais agsipud ta daan unayen ti sigud a Kingdom Hall no maidilig iti dadduma a simbaan. (Ladawan 4) Ita, addaanen ti kongregasion iti napintas a baro a Kingdom Hall a mangirepresentar iti pudno a panagdayaw iti simple ngem nadayaw a pamay-an. (Ladawan 5) Daytoy a kongregasion ket addaan iti 34 nga agibumbunannag iti Pagarian, a 73 ti promedio a tumabtabuno kadagiti gimong iti Domingo. Nupay kasta, 651 ti timmabuno iti dedikasion ti Kingdom Hall. Kaaduan kadakuada ket umili a nasdaaw idi makitada ti nagbiit a panangibangon dagiti Saksi iti pasdek. Iti panangiladawanda iti naglabas a nagapuananda iti daytoy a banag, insurat ti sanga nga opisina ti Zimbabwe: “Iti uneg ti makabulan a panangibangon iti maysa a baro a Kingdom Hall, kaaduanna a doble ti bilang dagiti tumabuno.”—Ladawan 6 ken 7.
Di pagduaduaan a ti adu a baro a Kingdom Hall ket tumulong tapno adda dagiti lugar a mausar maipaay iti naespirituan a pannakapabang-ar dagiti dedikado a Kristiano ken interesado a tattao. “Maragsakankami unay,” kinuna ti maysa a Saksi idiay Ukraine kalpasan a rugian ti lokal a kongregasion nga usaren ti baro a Kingdom Hall. “Personal a nakitami no kasano a tultulongan ni Jehova ti ilina.”
[Kahon/Dagiti Ladawan iti panid 10, 11]
Naapresiar ti Naparabur a Tulong
Maragsakan dagiti Saksi ni Jehova a makita ti napartak a panagrang-ay a nagapuanan tapno maibangon dagiti baro a Kingdom Hall a kasapulan unay iti sangalubongan. Masapul ti pannakaibangon dagiti baro a Kingdom Hall iti masanguanan gapu iti agtultuloy nga iyaadu ti bilang dagiti agdaydayaw ken ni Jehova kadagiti nadumaduma a pagilian. Ngamin, bayat ti 2001 a tawen serbisio, adda promedio a 32 a baro a kongregasion ti nabuangay iti kada lawas! Agkasapulan dagita a kongregasion iti lugar a pagtaripnongan ken pagdayawan.
Nalabit maisaludsodyo, ‘Kasanotayo a maponduan dagita a proyekto a kas iti panangibangon kadagiti Kingdom Hall, nangruna kadagiti pagilian a marigrigat dagiti kakabsat?’ Dayta ket babaen ti tulong ti Dios ken kinamanagparabur dagiti tattao.
Kas inkarina, ibukbok ni Jehova ti nasantuan nga espirituna kadagiti adipenna, tapno mabalin “nga agaramidda iti naimbag, nga agbalinda a nabaknang iti nasayaat nga ar-aramid, nga agbalinda a naparabur, sisasagana a mangiranud.” (1 Timoteo 6:18) Ti espiritu ti Dios tignayenna dagiti Saksi ni Jehova a sumuporta iti trabaho a panangikasaba iti Pagarian iti tunggal pamay-an—nga ipaayda ti panawen, pigsa, serbisio, ken dadduma pay a sanikuada para iti Nakristianuan nga aktibidad.
Ti kinamanagparabur ti mangtignay kadagiti Saksi ken dagiti sabsabali a tumulong iti pinansial a pamay-an iti trabaho a panangpalawa ken panangibangon. Malaksid iti pannakitinnulongda a regular iti paggastosan ti lokal a kongregasion, agidonarda met para iti trabaho a panagibangon kadagiti sabali a pagilian.
Iti tunggal kongregasion, adda dagiti kahon a namarkaan iti “Contributions for the Worldwide Work—Matthew 24:14.” Ditoy nga itinnag dagiti indibidual dagiti boluntario a donasion no tarigagayanda. (2 Ar-ari 12:9) Maapresiar amin a donasion, adu man wenno bassit dagitoy. (Marcos 12:42-44) Mausar dagitoy a pondo iti nagduduma a pamay-an sigun iti pakasapulan, agraman ti panangibangon kadagiti Kingdom Hall. Dagitoy a pondo ket saan a mausar a pangsueldo kadagiti administrador agsipud ta awan ti agsusueldo kadagiti Saksi ni Jehova.
Matungtungpal kadi ti nakairantaan dagiti kontribusion para iti sangalubongan a trabaho? Wen. Idiay Liberia, a maysa a pagilian nga agrigrigat gapu iti gerra sibil, inreport ti sanga nga opisina a kaaduan kadagiti lokal a Saksi ti awanan trabaho ken marigrigatan iti pinansial. Kasano a maaddaan dagiti agdaydayaw ken Jehova iti daytoy a pagilian kadagiti nasayaat a lugar a pagdayawan? “Dagiti naparabur a kontribusion dagiti kakabsat kadagiti sabali a pagilian ti mausar tapno maponduan daytoy a trabaho,” kuna ti sanga nga opisina. “Anian a nainsiriban ken naayat nga urnos!”
Tumulong met dagiti kakabsat iti dayta a lugar iti laksid ti bassit a kabaelanda. Impadamag ti Sierra Leone a pagilian ti Africa: “Dagiti kakabsat iti dayta a lugar bimmadangda kadagiti panagregget ket pakaragsakanda ti mangipaay iti mabalinanda ken aniaman a pinansial a kontribusion tapno masuportaran ti panangibangon kadagiti Kingdom Hall.”
Kamaudiananna, daytoy panagibangon a trabaho ket mangyeg iti pakaidayawan ni Jehova. Sirarayray a kinuna dagiti kakabsat idiay Liberia: “Ti panangibangon kadagiti nasayaat a lugar a pagdayawan iti intero a pagilian ti mangipakita kadagiti tattao a maaramid a permanente ti pudno a panagdayaw ditoy ken mangitan-ok ken mangipadayag iti naindaklan a nagan ti Diostayo.”