“Umadanikayo iti Dios”

“Umadanikayo iti Dios, ket isu umadaninto kadakayo.”​—SANTIAGO 4:8.

1, 2. (a) Ania ti masansan a kunaen dagiti tattao? (b) Ania ti imparegta ni Santiago, ken apay a kasapulan dayta?

“ADDA kadatayo ti Dios.” Mabasa dagita a sasao kadagiti simbolo ti pagilian ken uray kadagiti uniporme dagiti soldado. Dagiti sasao nga “Agtalekkami iti Dios” ket nailanad kadagiti di mabilang a moderno a sensilio ken papel de banko. Gagangay a kunaen dagiti tattao a nasingedda iti Dios. Ngem dikay kadi umanamong a saan nga umdas ti sasao tapno makuna nga adda relasion ti maysa iti Dios?

² Ipakita ti Biblia a posible ti maaddaan iti relasion iti Dios. Ngem kasapulan ti panagregget. Uray ti dadduma a napulotan a Kristiano idi umuna a siglo masapul a palagdaenda ti relasionda ken ni Jehova a Dios. Adda dagidiay masapul a ballaagan ti Kristiano a manangaywan a ni Santiago gapu kadagiti nainlasagan a pagannayasan ken pannakapukaw ti naespirituan a kinadalusda. Naglaon dayta a balakad iti nabileg a pammaregtana: “Umadanikayo iti Dios, ket isu umadaninto kadakayo.” (Santiago 4:1-12) Ania ti kayat a sawen ni Santiago iti ebkas nga “umadanikayo”?

3, 4. (a) Babaen dagiti ebkas nga “umadanikayo iti Dios,” ania ti mabalin a naipalagip kadagiti agbasbasa iti surat ni Santiago idi umuna a siglo? (b) Apay a manamnamatayo a posible ti umadani iti Dios?

³ Inusar ni Santiago ti maysa nga ebkas a pamiliar iti adu nga agbasbasa iti suratna. Ti Mosaiko a Linteg ket nangted kadagiti papadi iti espesipiko a bilbilin no kasano ti ‘umasideg,’ wenno umadani, ken ni Jehova agpaay iti ilina. (Exodo 19:22) Napalagipan ngarud dagidi nga agbasbasa iti surat ni Santiago a dida rumbeng a tagilag-anen ti iyaadani ken ni Jehova. Ni Jehova ti katan-okan iti uniberso.

⁴ Iti sabali a bangir, kas kinuna ti maysa nga eskolar ti Biblia, “makaliwliwa unay dayta a pammaregta [ti Santiago 4:8].” Ammo ni Santiago nga agtultuloy ti naayat nga awis ni Jehova kadagiti imperpekto a tattao nga umadanida Kenkuana. (2 Cronicas 15:2) Ti sakripisio ni Jesus ti naan-anay a nanglukat iti iyaadani ken ni Jehova. (Efeso 3:11, 12) Ita, naluktanen ti gundaway nga umadani iti Dios para iti minilion a tattao! Ngem kasano a maaprobetsartayo dayta a naisangsangayan a gundaway? Usigentayo biit ti tallo a pamay-an tapno makaadanitayo ken ni Jehova a Dios.

Itultuloyyo ti ‘Pananggun-od iti Pannakaammo’ iti Dios

5, 6. Maibatay iti ulidan ni agtutubo a Samuel, ania ti nairaman iti ‘pananggun-od iti pannakaammo’ iti Dios?

⁵ Sigun iti Juan 17:3, kinuna ni Jesus: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” Ania ti kayat a sawen ni Jesus idi dinakamatna ti ‘pananggun-od iti pannakaammo’ iti Dios? Adu nga eskolar ti agkuna a naun-uneg ti kaipapanan ti sao a nausar iti orihinal a Griego​—ipamatmatna ti agtultuloy a proseso, a mabalin pay ketdi nga agturong iti pannakisinninged iti sabali.

⁶ Saan a baro a banag idi kaaldawan ni Jesus ti pannakaadda iti nauneg a pannakaammo iti Dios. Kas pagarigan, iti Hebreo a Kasuratan, mabasatayo nga idi ubing ni Samuel, “saanna pay a naammuan ni Jehova.” (1 Samuel 3:7) Kayatna kadi a sawen a nagbassit ti pannakaammo ni Samuel maipapan iti Diosna? Saan. Sigurado nga adu ti insuro kenkuana dagiti dadakkelna ken dagiti papadi. Ngem sigun iti maysa nga eskolar, ti Hebreo a sao a nausar iti dayta a bersikulo ket mabalin a “mausar iti kasingedan a pagayam.” Sakbay a nagbalin a pannakangiwat ti Dios, saan nga am-ammo unay ni Samuel ni Jehova. Ngem bayat ti panagmataenganna, naam-ammona a naimbag ni Jehova, ket simminged ti relasionna kenkuana.​—1 Samuel 3:19, 20.

7, 8. (a) Apay a ditay maupay kadagiti nauneg a sursuro ti Biblia? (b) Ania ti sumagmamano a nauneg a kinapudno iti Sao ti Dios a nasken nga adalentayo?

⁷ Gumunggun-odkayo kadi iti pannakaammo maipapan ken Jehova tapno sumingedkayo kenkuana? Tapno maaramidyo dayta, masapul a “patanorenyo ti panagtarigagay” kadagiti naespirituan a taraon nga ipapaay ti Dios. (1 Pedro 2:2) Ditay koma mapnek kadagiti pamunganayan a sursuro ti Biblia. Ikagumaanyo a tarusan dagiti nauneg a sursuro ti Biblia. (Hebreo 5:12-14) Maupaykayo kadi gapu ta kasla narigat dagita a matarusan? No kasta, laglagipenyo a ni Jehova ti ‘Naindaklan a Manangisuro.’ (Isaias 30:20) Ammona no kasanona nga isuro dagiti nauneg a kinapudno kadagiti imperpekto a tattao. Ken bendisionanna dagiti panagreggetyo a mangtarus kadagiti isursurona.​—Salmo 25:4.

⁸ Apay a diyo sukimaten ti bagiyo mainaig kadagiti “nauneg a bambanag ti Dios”? (1 Corinto 2:10) Saan a makauma dagitoy a topiko, a basta pagdedebatean dagiti teologo ken klero. Doktrina dagitoy a mangyeg kadagiti makapainteres a pannakaawat maipapan iti pampanunot ken rikna ti naayat nga Amatayo. Kas pagarigan, dagiti suheto a kas iti subbot, ti “sagrado a palimed,” ti nadumaduma a tulag nga inusar ni Jehova tapno bendisionanna ti ilina ken tungpalenna dagiti panggepna, ken dadduma pay nga umasping a suheto​—ket makapainteres ken makagunggona a material para iti personal a panagsukimat ken panagadal.​—1 Corinto 2:7.

9, 10. (a) Apay a napeggad ti agtangsit, ken ania ti tumulong kadatayo a mangliklik iti dayta? (b) No maipapan iti pannakaammo ni Jehova, apay a nasken nga ikagumaantayo ti agpakumbaba?

⁹ Bayat a rumang-ay ti pannakaammoyo kadagiti nauneg a naespirituan a kinapudno, agannadkayo iti peggad a mabalin nga iyeg ti pannakaammo​—ti kinatangsit. (1 Corinto 8:1) Napeggad ti agtangsit, ta iyadayona ti tao iti Dios. (Proverbio 16:5; Santiago 4:6) Laglagipenyo nga awan ti rason ti tao tapno ipagpannakkelna ti pannakaammona. Kas panangyilustrar, usigenyo dagitoy a sasao manipud iti introduksion ti libro a nangsurbey kadagiti kabbaro nga idudur-as iti siensia a gapuanan ti tao: “Bayat nga umad-adu ti pannakaammotayo, ad-adda a mabigbigtayo a nagbassit ti ammotayo. . . . Awan pakaimudingan dagiti naadaltayo kadagiti bambanag a ditay pay naadal.” Nagsayaat ti kasta a kinapakumbaba. Ita, no maipapan iti katan-okan a pannakaammo​—ti pannakaammo ni Jehova a Dios​—dakdakkel ti rasontayo nga agtalinaed a napakumbaba. Apay?

¹⁰ Imutektekanyo ti sumagmamano a kunaen ti Biblia maipapan ken Jehova. “Nauneg unay dagiti panunotmo.” (Salmo 92:5) “Ti pannakaawat [ni Jehova] di maibinsabinsa.” (Salmo 147:5) “Awan pannakasukimat ti pannakaawat [ni Jehova].” (Isaias 40:28) “O nagunegen ti kinabaknang ken sirib ken pannakaammo ti Dios!” (Roma 11:33) Nalawag a ditay kabaelan nga ammuen ti amin a banag maipapan ken ni Jehova. (Eclesiastes 3:11) Adu a nakaskasdaaw a banag ti insurona kadatayo. Kaskasdi, di aggibus ti pannakaammo a mabalintay pay nga adalen. Saan kadi nga agpada a makapagagar ken mamagpakumbaba dayta a pribilehio? Gapuna, bayat nga agad-adaltayo, usarentayo koma a kanayon ti pannakaammotayo nga umadani ken ni Jehova ken tumulong kadagiti sabsabali a mangaramid iti kasta​—a di pulos usaren a pagpannakkel kadagiti sabsabali.​—Mateo 23:12; Lucas 9:48.

Ipakitam ti Panagayatmo ken ni Jehova

11, 12. (a) Ania koma ti epektona kadatayo ti pannakaammo a magun-odtayo maipapan ken ni Jehova? (b) Ania ti mangipakita no pudno met laeng ti panagayat ti maysa iti Dios?

¹¹ Maitutop a pinagnaig ni apostol Pablo ti pannakaammo ken ti ayat. Insuratna: “Daytoy ti agtultuloy nga ikarkararagko, a ti ayatyo umadu koma nga ad-adda pay buyogen ti umiso a pannakaammo ken naan-anay a panangilasin.” (Filipos 1:9) Imbes nga ipagpannakkeltayo, mangparayray koma iti panagayattayo iti nailangitan nga Amatayo ti tunggal agkakapateg a kinapudno a maadaltayo maipapan ken ni Jehova ken kadagiti panggepna.

¹² Siempre, saan a pudno ti kuna ti adu nga ay-ayatenda ti Dios. Mabalin a pudno ti nasged nga emosion a marikriknada iti pusoda. Nasayaat ti kasta a rikna ken makomendaran pay ketdi no maitunos iti umiso a pannakaammo. Ngem saan nga umdas dayta a mangpaneknek iti pudno a panagayat iti Dios. Apay? Imutektekam ti kuna ti Sao ti Dios maipapan iti kasta nga ayat: “Daytoy ti kaipapanan ti ayat iti Dios, a tungpalentayo dagiti bilinna.” (1 Juan 5:3) No kasta, sa la makuna a pudno nga ay-ayatem ni Jehova no agtulnogka kenkuana.

13. Kasano a tulongannatayo ti panagbuteng iti Dios a mangipakita iti panagayattayo ken ni Jehova?

¹³ Ti panagbuteng iti Dios tulongannatayo nga agtulnog ken Jehova. Dumakkel ti panagamanga ken panagraemtayo ken ni Jehova no gumun-odtayo iti pannakaammo maipapan kenkuana, nga ammuentayo ti agnanayon a kinasanto, kinadayag, pannakabalin, kinahustisia, kinasirib, ken ayatna. Napateg ti kasta a panagbuteng iti iyaadani kenkuana. Kinapudnona, imutektekam ti kuna ti Salmo 25:14: “Ti kinasinged ken Jehova kukua dagidiay agbuteng kenkuana.” No kasta, mayadanitayo iti Dios no adda umiso a panagbutengtayo a mangpagura iti dungdunguentayo a nailangitan nga Ama. Ti panagbuteng iti Dios tulongannatayo a mangipangag iti nainsiriban a balakad a nairekord iti Proverbio 3:6: “Isu imutektekam iti amin a daldalanmo, ket isu palintegennanto dagiti danam.” Ania ti kaipapanan dayta?

14, 15. (a) Ania ti sumagmamano a desision a nasken nga aramiden iti kada aldaw? (b) Kasanotayo a makaaramid kadagiti desision a mangyanninaw iti panagbuteng iti Dios?

¹⁴ Adda dagiti desision a nasken nga aramidem iti kada aldaw, dakkel man wenno bassit. Kas pagarigan, kasano ti pannakisaritayo kadagiti katrabahuan, kaeskuelaan, wenno kaarrubayo? (Lucas 6:45) Igaedyo kadi nga ibanag ti naited a trabahoyo, wenno parparawpaw nga aramidenyo dayta? (Colosas 3:23) Makisinningedkayo kadi kadagidiay apaganem-em wenno awanan iti panagayat ken ni Jehova, wenno ikagumaanyo a pasingeden ti relasionyo kadagidiay naespirituan ti panagpampanunotda? (Proverbio 13:20) Ania ti aramidenyo, uray babassit a pamay-an, a mangitandudo kadagiti interes ti Pagarian ti Dios? (Mateo 6:33) No dagiti Nainkasuratan a prinsipio, kas kadagiti nadakamat, ti mangiwanwan kadagiti inaldaw a desisionmo, pudno nga ikabkabilangam ni Jehova “iti amin a daldalanmo.”

¹⁵ Kada agdesisiontayo, kastoy koma ti panunotentayo: ‘Ania ti kayat ni Jehova nga aramidek? Ania ti kangrunaan a makaay-ayo kenkuana?’ (Proverbio 27:11) Ti panangipakita iti panagbuteng iti Dios iti kastoy a pamay-an ket maysa a nagsayaat nga ebkas ti panagayat ken ni Jehova. Tignayennatayo met ti panagbuteng iti Dios nga agtalinaed a nadalus​—iti naespirituan, moral, ken pisikal. Laglagipem nga iti isu met laeng a bersikulo nga indagadag ni Santiago kadagiti Kristiano nga ‘umadanida iti Dios,’ imparegtana met: “Dalusanyo dagiti imayo, dakayo a managbasol, ket gugoranyo dagiti pusoyo, dakayo a di makapangngeddeng.”​—Santiago 4:8.

16. No mangtedtayo ken ni Jehova, ania ti ditay pulos maaramid, ngem ania met ti mabalintayo a maipakita?

¹⁶ Siempre, ti panagayat ken ni Jehova ket saan laeng a basta panangliklik iti dakes. Ti ayat tignayennatayo met nga agaramid iti naimbag. Kas pagarigan, ania ti tignaytayo iti aglaplapusanan a kinaparabur ni Jehova? Insurat ni Santiago: “Tunggal naimbag a sagut ken tunggal naan-anay a rangkap aggapu iti ngato, ta bumaba dayta manipud iti Ama dagiti nailangitan a lawag.” (Santiago 1:17) Pudno, saan a bumaknang ni Jehova no itedtayo kenkuana dagiti ik-ikutantayo. Kukuana ti amin a banag. (Salmo 50:12) Kasta met, no itedtayo ken ni Jehova ti panawen ken pigsatayo, saantayo a mangipapaay iti maysa a banag a dina kabaelan a gun-oden. Uray no agkedkedtayo a mangikasaba iti naimbag a damag maipapan iti Pagarian ti Dios, mabalinna a pagikkisen dagiti bato! Apay ngarud nga itedtayo ken ni Jehova ti sanikua, panawen, ken pigsatayo? Kangrunaan iti amin, kayattayo ngamin nga iyebkas ti panagayattayo kenkuana buyogen ti amin a puso, kararua, isip, ken bilegtayo.​—Marcos 12:29, 30.

17. Ania ti mangtignay kadatayo a mangted a siraragsak ken ni Jehova?

¹⁷ No mangtedtayo ken ni Jehova, aramidentayo koma dayta a siraragsak, “ta ti Dios ayatenna ti naragsak a manangited.” (2 Corinto 9:7) Ti prinsipio a nailanad iti Deuteronomio 16:17 ket makatulong kadatayo a mangted a siraragsak: “Ti sagut ti tunggal ima ti maysa rebbeng a mairukod iti pamendision ni Jehova a Diosmo nga intedna kenka.” No utobentayo ti kinaparabur kadatayo ni Jehova, mariknatayo a kayattayo met ti sibubulos a mangted kenkuana. Maragsakan ti pusona iti kasta a panangted, no kasano a maragsakan dagiti nagannak iti simple a sagut ti dungdungnguenda nga anak. Mayadanitayo ken ni Jehova no iyebkastayo ti panagayattayo iti kasta a wagas.

Makisinninged Babaen ti Kararag

18. Apay a nasayaat nga usigentayo no kasano a parang-ayen ti kalidad dagiti kararagtayo?

¹⁸ Mangipaay iti nagsayaat a gundaway dagiti pribado a kararagtayo​—gundaway a maaddaan iti nasinged, kompidensial a pannakisarita iti nailangitan nga Amatayo. (Filipos 4:6) Yantangay ti kararag ket napateg a pamay-an iti iyaadani iti Dios, nasayaat no usigentayo ti kalidad ti kararagtayo. Saan a masapul a naisangsangayan ti linaon ken kinaurnos dagiti kararagtayo, ngem nasken a pudpudno a nagtaud iti puso dagita a sasao. Kasano a maparang-aytayo ti kalidad dagiti kararagtayo?

19, 20. Apay nga agmennamenna sakbay nga agkararagtayo, ken ania ti sumagmamano a maitutop a tema a mennamennaentayo?

¹⁹ Padasentayo ti agmennamenna sakbay nga agkararagtayo. No agmennamennatayo a nasakbay, maaramidtayo nga espesipiko ken nabagas dagiti kararagtayo, iti kasta maliklikantayo nga ulit-uliten dagiti ebkas a pamiliar ken nalaka a sumiplot iti panunottayo. (Proverbio 15:28, 29) Mabalin a makatulong no utoben ti dadduma a tema a dinakamat ni Jesus iti modelo kararagna, sa usigen no kasano a mainaigda iti kasasaadtayo. (Mateo 6:9-13) Kas pagarigan, mabalin nga imtuodentayo iti bagitayo no ania ti nanumo a maitulongtayo iti pannakatungpal ti pagayatan ni Jehova ditoy daga. Iyebkastayo kadi ti tarigagaytayo nga agpausar ken ni Jehova iti aniaman a pamay-an ken agpatulongtayo kenkuana a mangitungpal iti aniaman nga annongen nga intedna kadatayo? Maringgorantayo unay kadi kadagiti material a kasapulantayo? Ania dagiti basoltayo a masapul a mapakawan, ken siasino dagiti nangnangruna a pakawanentayo? Ania dagiti sulisog a mangparparigat kadatayo, ken mabigbigtayo kadi no kasano kaganat a kasapulantayo ti pannalaknib ni Jehova iti dayta a banag?

²⁰ Maysa pay, mabalin a panunotentayo dagiti tattao nga ammotayo nga agkasapulan iti tulong ni Jehova. (2 Corinto 1:11) Ngem ditay koma liplipatan ti agyaman. No usigentayo dayta, sigurado a makapanunottayo kadagiti rason nga agyaman ken mangidayaw ken ni Jehova iti inaldaw gapu iti naruay a kinaimbagna. (Deuteronomio 8:10; Lucas 10:21) Adda kanayonan a pagimbaganna no aramidentayo dayta​—matulongannatayo a maaddaan iti positibo, napnuan iti apresasion a panangmatmat iti biag.

21. Ania dagiti pagarigan iti Kasuratan a no adalentayo, makatulongda iti panagkararagtayo ken ni Jehova?

²¹ Makatulong met ti panagadal iti panagkararagtayo. Adda dagiti makatukay a kararag dagiti matalek a lallaki ken babbai a nailanad iti Sao ti Dios. Kas pagarigan, no naipasangotayo iti nadagsen a parikut, a mangyeg iti panagdanag ken panagamak di la ket ta adda dakes a mapasamak kadatayo wenno kadagiti ingungotentayo, mabalin a basaentayo ti inkararag ni Jacob idi dandani agsangoda iti managibales a kabsatna a ni Esau. (Genesis 32:9-12) Wenno mabalin nga adalentayo ti kararag ni Ari Asa idi nagbalin a pangta iti ili ti Dios ti agarup maysa a  milion nga Etiope a puersa. (2 Cronicas 14:11, 12) No makapasartayo iti parikut a mabalin a pakaumsian ti naimbag a reputasion ni Jehova, nasayaat nga usigen ti inkararag ni Elias iti imatang dagiti agdaydayaw ken ni Baal idiay Bantay Carmel, uray ti kararag ni Nehemias mainaig iti nakalkaldaang a kasasaad ti Jerusalem. (1 Ar-ari 18:36, 37; Nehemias 1:4-11) Ti panangbasa ken panangmennamenna kadagita a kararag ket mangpabileg iti pammatitayo ken mangted iti ideya no kasano ti kasayaatan nga iyaadani ken ni Jehova no malapunostayo kadagiti pakadanagan.

22. Ania ti teksto para iti tawen 2003, ken ania ti kanayon nga iyimtuodtayo iti bagitayo kabayatan dayta a tawen?

²² Nalawag nga awan ti nasaysayaat pay a pribilehio, natantan-ok a kalat, ngem iti panangipangag iti balakad ni Santiago nga ‘umadani iti Dios.’ (Santiago 4:8) Sapay koma ta maaramidtayo dayta babaen ti agtultuloy a panangammotayo iti Dios, panangikagumaan nga iyebkas ti naun-uneg a panagayattayo kenkuana, ken pannakisinninged kenkuana iti kararag. Kabayatan ti tawen 2003, bayat a silalagiptayo iti Santiago 4:8 kas teksto ti tawen, itultuloytayo a sukimaten ti bagitayo no pudno met laeng nga umad-adanitayo ken ni Jehova. Ngem komusta met ti maudi a paset dayta a teksto? Iti ania nga anag nga ‘umadani kenka’ ni Jehova, a mangyeg kadagiti ania a gunggona? Dayta ti mausig iti sumaruno nga artikulo.

Malagipyo Kadi?

• Apay a matmatan a serioso a banag ti iyaadani ken ni Jehova?

• Ania dagiti kalat a mabalintayo nga ipasdek no maipapan iti pananggun-od iti pannakaammo ken ni Jehova?

• Kasano a maipakitatayo a pudpudno ti panagayattayo ken ni Jehova?

• Kadagiti ania a wagas nga agbalintayo a nasingsinged ken ni Jehova iti kararag?

[Blurb iti panid 12]

Ti teksto para iti tawen 2003 ket: “Umadanikayo iti Dios, ket isu umadaninto kadakayo.”​—Santiago 4:8.

[Ladawan iti panid 8, 9]

Bayat a nagmataengan, naam-ammo a naimbag ni Samuel ni Jehova

[Ladawan iti panid 12]

Nasayaat nga ulidan para kadatayo ti kararag ni Elias idiay Bantay  Carmel