“Isu Umadaninto Kadakayo”
“[Ti Dios] saan nga adayo iti tunggal maysa kadatayo.”—ARAMID 17:27.
1, 2. (a) No tumangadtayo iti nabituen a langit, ania ti maisaludsodtayo maipapan iti Namarsua? (b) Kasano nga ipanamnama kadatayo ti Biblia a saan a pulos nga ibilang ni Jehova nga awanan serbi dagiti tattao?
NAPADASYO kadin ti timmangad iti nabituen a langit iti naariwanas a rabii ket nagamangakayo? Nakaskasdaaw ti nakaad-adu a bituen ken ti naglawa a tangatang. Iti daytoy naglawa nga uniberso, maysa laeng a tulnek ti daga. Kayatna kadi a sawen a ti Namarsua, “ti Kangatuan iti intero a daga,” ket natan-ok unay tapno maseknan kadagiti tattao wenno adayo unay tapno maam-ammo?—Salmo 83:18.
2 Ipanamnama kadatayo ti Biblia a di pulos ibilang ni Jehova nga awanan serbi dagiti tattao. Kinapudnona, iparegta kadatayo ti Sao ti Dios a birokentayo ni Jehova, a kunkunana: “[Ti Dios] saan nga adayo iti tunggal maysa kadatayo.” (Aramid 17:27; 1 Cronicas 28:9) Kinapudnona, no agaramidtayo iti pamay-an nga umadani iti Dios, ipangagna dagiti panagreggettayo. Iti ania a pamay-an? Kastoy ti makaliwliwa a sungbat ti teksto para iti tawen 2003: “Isu umadaninto kadakayo.” (Santiago 4:8) Usigentayo ti sumagmamano nga agkakaimbag a gunggona nga iburay ni Jehova kadagidiay nasinged kenkuana.
Ti Personal a Sagut ni Jehova
3. Ania ti sagut ni Jehova kadagidiay umadani kenkuana?
3 Umuna, nangisagana ni Jehova iti nagsayaat a sagut kadagiti adipenna. Daytoy a sagut ket saan nga agtaud iti pannakabalin, kinabaknang, ken edukasion nga ituktukon daytoy a sistema ti bambanag. Maysa daytoy a personal a sagut nga ited laeng ni Jehova kadagidiay nasinged kenkuana. Ania dayta? Sumungbat ti Sao ti Dios: “No . . . iyesngawmo ti timekmo maipaay iti mismo a panangilasin, no itultuloymo a sapulen dayta kas iti pirak, ken kas kadagiti nalmeng a gameng itultuloymo a biroken dayta, iti kasta maawatamto ti panagbuteng ken Jehova, ket masarakamto ti mismo a pannakaammo iti Dios. Ta ni met laeng Jehova mangted iti sirib.” (Proverbio 2:3-6) Nagsayaat la ketdi ta dagiti imperpekto a tattao mabalinda a masarakan “ti mismo a pannakaammo iti Dios”! Dayta a sagut—ti pannakaammo a masarakan iti Sao ti Dios—ket mayarig iti “nalmeng a gameng.” Apay?
4, 5. Apay a “ti mismo a pannakaammo iti Dios” mayarig iti “nalmeng a gameng”? Iyilustraryo.
4 Ditay liplipatan a nagdakkel ti pateg ti pannakaammo iti Dios. Ti maysa kadagiti iyegna a gunggona isu ti namnama a biag nga agnanayon. (Juan 17:3) Ngem pasayaatenna ti biagtayo uray ita. Kas pagarigan, kas resulta ti naannad a panagadaltayo iti Sao ti Dios, naammuantayo ti sungbat dagiti napateg a saludsod a kas iti: Ania ti nagan ti Dios? (Salmo 83:18) Ania ti pudpudno a kasasaad dagiti natay? (Eclesiastes 9:5, 10) Ania ti panggep ti Dios agpaay iti daga ken iti sangatauan? (Isaias 45:18) Naammuantayo met a ti kasayaatan a wagas ti panagbiag isu ti panangyaplikar kadagiti nainsiriban a balakad ti Biblia. (Isaias 30:20, 21; 48:17, 18) No kasta, adda nasayaat a giyatayo a tumulong kadatayo a mangdaer kadagiti pakaringgoran iti biag ken agbiag nga addaan iti pudpudno a ragsak ken pannakapnek. Kangrunaan iti amin, naammuantayo dagiti agkakaimbag a galad ni Jehova ken mayadanitayo kenkuana gapu iti panagadaltayo iti Saona. Ania pay koma ti napatpateg ngem iti maaddaan iti nasinged a relasion ken ni Jehova a naibatay iti “mismo a pannakaammo iti Dios”?
5 Adda sabali pay a rason no apay a mayarig ti pannakaammo iti Dios iti “nalmeng a gameng.” Kas iti adu a gameng, manmano la dayta ditoy lubong. Kadagiti innem a bilion a tattao iti lubong, agarup innem a milion nga agdaydayaw ken ni Jehova, wenno agarup 1 iti 1,000 a tattao, ti nakasarak iti “mismo a pannakaammo iti Dios.” Tapno matarusanyo no apay a naisangsangayan a pribilehio a maammuan ti kinapudno iti Sao ti Dios, usigenyo ti uray maysa a Nainkasuratan a saludsod: Ania ti mapasamak iti tattao no matayda? Maibatay iti Kasuratan, ammotayo a matay ti kararua ken awan ammo dagiti natay. (Ezequiel 18:4) Kaskasdi, kaaduan kadagiti relihion ditoy lubong ti mamati iti ulbod a sursuro nga adda maysa a banag iti uneg ti tao nga agtultuloy nga agbiag kalpasan ti ipapatayna. Maysa dayta a pamunganayan a sursuro dagiti relihion ti Kakristianuan. Isursuro met dayta dagiti Budismo, Hinduismo, Islam, Jainismo, Judaismo, Shinto, Sikhismo, ken Taoismo. Panunotenyo—binilion a tattao ti naallilaw iti maysa laeng nga ulbod a doktrina!
6, 7. (a) Siasinoda laeng ti makasarak “iti mismo a pannakaammo iti Dios”? (b) Ania a pagarigan ti mangipakita a pinaraburannatayo ni Jehova iti nauneg a pannakaawat nga awan “kadagiti mamasirib ken nasaririt”?
6 Apay a manmano laeng ti nakasarak “iti mismo a pannakaammo iti Dios”? Saan ngamin a naan-anay a matarusan ti maysa a tao ti kaipapanan ti Sao ti Dios no awan ti tulong ni Jehova. Laglagipenyo a maysa a sagut daytoy a pannakaammo. Ited laeng ni Jehova kadagidiay situtulok nga agsukimat iti Saona buyogen ti kinapasnek ken kinapakumbaba. Mabalin a saan a “mamasirib iti nainlasagan a pamay-an” dagita a tattao. (1 Corinto 1:26) Mabalin pay ketdi nga adu kadakuada ti maibilang nga ‘awanan iti adal ken gagangay’ no idilig iti estandarte ti lubong. (Aramid 4:13) Ngem saan a dayta ti napateg. Paraburannatayo ni Jehova “iti mismo a pannakaammo iti Dios” gapu kadagiti kualidad a makitana iti pusotayo.
7 Usigenyo ti maysa a pagarigan. Adu nga eskolar iti Kakristianuan ti nagaramid iti nakaad-adu a komentario maipapan iti Biblia. Mabalin nga ilawlawag dagita a reperensia ti historikal a nalikudan, kaipapanan dagiti Hebreo ken Griego a sao, ken dadduma pay. Kadagiti amin a pannakaammoda, talaga kadi a nasarakan dagita nga eskolar “ti mismo a pannakaammo iti Dios”? Bueno, nalawag kadi ti pannakaawatda iti tema ti Biblia—ti pannakaalangon ti kinasoberano ni Jehova babaen ti nailangitan a Pagarianna? Ammoda kadi a ni Jehova a Dios ket saan a paset ti Trinidad? Umiso ti pannakaawattayo kadagita a bambanag. Apay? Pinaraburannatayo ni Jehova iti nauneg a pannakaawat kadagiti naespirituan a kinapudno a di matarusan ‘dagiti mamasirib ken nasaririt.’ (Mateo 11:25) Anian a panangbendision ni Jehova kadagidiay nasinged kenkuana!
“Ni Jehova Saluadanna Amin Dagidiay Mangay-ayat Kenkuana”
8, 9. (a) Ania a sabali pay a bendision ti dinakamat ni David agpaay kadagidiay nasinged ken ni Jehova? (b) Apay a kasapulan dagiti pudno a Kristiano ti pannalaknib ti Dios?
8 Tagtagiragsaken dagidiay nasinged ken ni Jehova ti sabali pay a bendision—ti pannalaknib ti Dios. Insurat ni salmista David, maysa nga addaan met kadagiti pakarigatan: “Ni Jehova asideg kadagidiay amin nga umaw-awag kenkuana, kadagidiay amin nga umawag kenkuana iti kinapudno. Ti tarigagay dagidiay agbuteng kenkuana aramidennanto, ken ti panagpatulongda denggennanto, ket isalakannanto ida. Ni Jehova saluadanna amin dagidiay mangay-ayat kenkuana.” (Salmo 145:18-20) Wen, nasinged ni Jehova kadagidiay mangay-ayat kenkuana isu a dagus nga agtignay no agpatulongda.
9 Apay a kasapulantayo ti pannalaknib ti Dios? Malaksid a mariknatayo ti epekto ti panagbiag kadagitoy “napeggad a tiempo a narigat a pakilangenan,” dagiti pudno a Kristiano ti kangrunaan a puntiria ni Satanas a Diablo, ti kangrunaan a Kabusor ni Jehova. (2 Timoteo 3:1) Determinado dayta a nasikap a kabusor a ‘mangalun-on’ kadatayo. (1 Pedro 5:8) Idadanes, parigaten, ken sulisogennatayo ni Satanas. Sipsiputanna met dagiti kasasaad ti isip ken puso a mabalinna a gundawayan. Ti panggepna: pakapuyenna ti pammatitayo ken dadaelenna ti espiritualidadtayo. (Apocalipsis 12:12, 17) Yantangay nabileg ti kabusortayo, saan kadi a makapabileg a maammuan a “ni Jehova saluadanna amin dagidiay mangay-ayat kenkuana”?
10. (a) Kasano ti panangsalaknib ni Jehova kadagiti adipenna? (b) Ania ti kapatgan a kita ti pannalaknib, ken apay?
10 Ngem kasano ti panangsalaknib ni Jehova kadagiti adipenna? Nupay inkari ni Jehova a mangipaay iti pannalaknib, dina kayat a sawen a ditay makapasar kadagiti parikut iti daytoy a sistema; wenno obligado ti Dios nga agaramid kadagiti milagro para kadatayo. Kaskasdi, mangipaay ni Jehova iti pisikal a pannalaknib kadagiti adipenna kas maysa nga ili. Ngamin, dinanto pulos ipalubos nga ikisap ti Diablo dagiti pudno nga agdaydayaw ditoy daga! (2 Pedro 2:9) Kangrunaan iti amin, salakniban ni Jehova ti espiritualidadtayo. Kabalannatayo kadagiti kasapulantayo a mangandur kadagiti pakasuotan ken mangsaluad iti relasiontayo kenkuana. Ti naespirituan a pannalaknib ti kapatgan a kita ti pannalaknib. Apay? Bayat a tagtagiragsakentayo ti relasiontayo ken ni Jehova, awan a pulos—uray ni patay—ti permanente a mangdangran kadatayo.—Mateo 10:28.
11. Ania dagiti probision ni Jehova agpaay iti naespirituan a pannakasalaknib ti ilina?
11 Nakaad-adu ti probision ni Jehova a mangsalaknib iti espiritualidad dagidiay nasinged kenkuana. Babaen ti Saona, ti Biblia, ipaayannatayo iti sirib a mangdaer kadagiti nadumaduma a pakasuotan. (Santiago 1:2-5) Maysa ngamin a salaknib ti panangyaplikar iti praktikal a balakad ti Kasuratan. Kanayonanna, ipaay ni Jehova ti “nasantuan nga espiritu kadagidiay agdawdawat kenkuana.” (Lucas 11:13) Dayta nga espiritu ti kabilgan a puersa iti uniberso, isu a sigurado a matulongannatayo a mangparmek iti aniaman a pakasuotan wenno sulisog a sumangbay kadatayo. Babaen ken Kristo, nangipaay ni Jehova “kadagiti sagut a tattao.” (Efeso 4:8) Dagitoy a lallaki a kualipikado iti naespirituan ikagkagumaanda nga iyanninaw ti naimpusuan a kinamanangngaasi ni Jehova no tulonganda dagiti padada nga agdaydayaw.—Santiago 5:14, 15.
12, 13. (a) Iti ania a wagas nga ipapaay kadatayo ni Jehova ti naespirituan a taraon iti umiso a tiempo? (b) Ania ti makunayo kadagiti probision ni Jehova agpaay iti naespirituan a pagimbagantayo?
12 Adda pay ipapaay ni Jehova a mangsalaknib kadatayo: ti naespirituan a taraon iti umiso a tiempo. (Mateo 24:45) Ipaay ni Jehova ti kasapulantayo no tiempona babaen dagiti nayimprenta a publikasion, agraman dagiti pagiwarnak a Ti Pagwanawanan ken Agriingkayo!, ken babaen dagiti gimong, asamblea, ken kombension. Adda kadi malagipyo a nangngegyo kadagiti Nakristianuan a gimong, asamblea, wenno kombension a nangtukay iti pusoyo ken nangpabileg wenno nangliwliwa kadakayo? Adda kadi nabasayo nga artikulo iti maysa kadagiti pagiwarnak a nadakamat ket mariknayo a kasla naisurat dayta para kadakayo?
13 Ti pannakaupay ket maysa kadagiti kaepektibuan nga armas ni Satanas, ket mabalintayo a mapasaran dayta. Ammona a pakapuyennatayo ti agtultuloy a pannakaupay, a mamagpeggad pay ketdi kadatayo. (Proverbio 24:10) Gapu ta gundawayan ni Satanas dagiti negatibo a rikna, kasapulantayo ti tulong. Masansan nga itampok ti magasin a Pagwanawanan ken Agriingkayo! dagiti artikulo a tumulong kadatayo a mangdaer iti pannakaupay. Insurat ti maysa a Kristiano a sister maipapan iti kasta nga artikulo: “Nganngani inaldaw a basaek dayta nga artikulo, ket makasangitak latta. Adda a kanayon iti pagiddaak tapno mabasak no makariknaak iti pannakaupay. Babaen kadagiti kastoy nga artikulo, mariknak ti mangsalaknib a panangkepkep ni Jehova.”a Saantayo kadi nga agyaman ken ni Jehova gapu ta ipapaayna kadatayo ti naintiempuan a naespirituan a taraon? Laglagipenyo, dagiti probisionna agpaay iti naespirituan a pagimbagantayo ket pammaneknek a nasinged ken salaknibannatayo.
Pannakisarita iti “Managdengngeg iti Kararag”
14, 15. (a) Ania a personal a bendision ti iburay ni Jehova kadagidiay nasinged kenkuana? (b) Apay a naisangsangayan a pribilehio ti maaddaan iti nawaya a pannakisarita ken ni Jehova?
14 Nadlawyo kadi a bayat a dumakdakkel ti pannakabalin ken autoridad dagiti tattao, narigrigat ida a kasarita dagiti iturayanda? Ngem komusta ni Jehova? Adayo unay kadi ti Dios tapno aginteres kadagiti ibagbaga kenkuana dagiti tattao? Saan a pulos! Ti sagut a kararag ket sabali pay a bendision ni Jehova kadagidiay nasinged kenkuana. Pudno a naisangsangayan a pribilehio ti maaddaan iti nawaya a pannakisarita iti “Managdengngeg iti kararag.” (Salmo 65:2) Apay?
15 Kas panangyilustrar: Adu ti annongen ti chief executive iti dakkel a korporasion. Ikeddengna no ania a bambanag ti personal nga asikasuenna ken no ania ti ipaaramidna kadagiti dadduma. Umasping iti dayta, ti Soberano nga Agturay iti uniberso ket addaan iti karbengan a mangikeddeng no ania a bambanag ti pakibianganna ken no ania ti italekna. Panunotenyo ti amin nga intalek ni Jehova iti dungdungnguenna nga Anak, ni Jesus. Naited iti Anak ti “autoridad a mangukom.” (Juan 5:27) ‘Naipasakup dagiti anghel kenkuana.’ (1 Pedro 3:22) Iti aniaman a kanito, mabalin nga usaren ni Jesus ti nabileg a nasantuan nga espiritu ni Jehova tapno iwanwanna dagiti adalanna ditoy daga. (Juan 15:26; 16:7) Gapuna, maikuna ni Jesus: “Isuamin nga autoridad naiteden kaniak idiay langit ken ditoy daga.” (Mateo 28:18) Ngem no maipapan iti kararagtayo, inkeddeng ni Jehova ti personal a pannakiramanna. Dayta ti makagapu nga imbilin ti Biblia nga iturongtayo ti kararagtayo ken ni Jehova laeng, nga aramidentayo dayta baeten ti nagan ni Jesus.—Salmo 69:13; Juan 14:6, 13.
16. Apay a makapagtalektayo a talaga nga ipangag ni Jehova dagiti kararagtayo?
16 Talaga kadi nga ipangag ni Jehova dagiti kararagtayo? No mangidumduma wenno awan pannakaseknan ni Jehova, dina koma pulos indagadag a ‘reggetantayo ti agkararag’ wenno iyallatiwtayo kenkuana dagiti pakadagsenan ken pakaringgorantayo. (Roma 12:12; Salmo 55:22; 1 Pedro 5:7) Dagiti matalek nga adipen idi panawen ti Biblia ket naan-anay a nagtalekda nga ipangag ni Jehova ti kararagda. (1 Juan 5:14) Gapuna, kinuna ni salmista David: “[Ni Jehova] mangngegna ti timekko.” (Salmo 55:17) Addaantayo met ti rason nga agtalek nga asideg ni Jehova, a sidadaan nga umimdeng iti tunggal pampanunoten ken pakaseknantayo.
Gunggonaan ni Jehova Dagiti Adipenna
17, 18. (a) Ania ti panangmatmat ni Jehova iti matalek a panagserbi dagiti adda panunotna a parsuana? (b) Ilawlawagyo no kasano nga ipakita ti Proverbio 19:17 a kitkitaen ni Jehova dagiti iparparangarangtayo a kinamanangngaasi.
17 Saan a maapektaran ti saad ni Jehova kas Sapasap a Soberano aniaman ti aramiden wenno di kayat nga aramiden dagiti tattao. Kaskasdi, manangapresiar a Dios ni Jehova. Talaga nga ipategna ti matalek a panagserbi dagiti adda panunotna a parsuana. (Salmo 147:11) Gapuna, daytoy ti sabali pay a gunggona a tagtagiragsaken dagidiay nasinged ken ni Jehova: Bendisionanna dagiti adipenna.—Hebreo 11:6.
18 Nalawag nga ipakita ti Biblia nga ipateg ni Jehova ti ar-aramiden dagiti agdaydayaw kenkuana. Kas pagarigan, mabasatayo: “Daydiay mangipakpakita ti pabor iti daydiay nanumo agpapautang ken Jehova, ket ti panangtratona Isu supapakannanto kenkuana.” (Proverbio 19:17) Nayanninaw iti Mosaiko a Linteg ti naasi a konsiderasion ni Jehova kadagiti nanumo. (Levitico 14:21; 19:15) Ania ti rikna ni Jehova no tuladentayo ti kinamanangngaasina no kalangentayo dagiti nanumo? No mangtedtayo kadagiti nanumo, nga awan ti namnamaentayo a subalitna, matmatan dayta ni Jehova kas pautang Kenkuana. Inkari ni Jehova a bayadanna dayta nga utang babaen ti pabor ken bendision. (Proverbio 10:22; Mateo 6:3, 4; Lucas 14:12-14) Wen, no kaasiantayo ti pada nga agdaydayaw nga agkasapulan, matukay ti rikna ni Jehova. Anian a yamantayo a makaammo a makitkita ti nailangitan nga Amatayo dagiti iparparangarangtayo a kinamanangngaasi!—Mateo 5:7.
19. (a) Apay a manamnamatayo nga apresiaren ni Jehova ti pannakiramantayo iti trabaho a panangasaba ken panagaramid iti adalan? (b) Kasano a gunggonaan ni Jehova dagiti gapuanan nga agpaay iti Pagarianna?
19 Nangnangruna nga apresiaren ni Jehova ti ar-aramidentayo agpaay iti Pagarianna. No umadanitayo ken ni Jehova, natural laeng a kayattayo nga usaren ti panawen, pigsa, ken ik-ikutantayo tapno naan-anay a makiramantayo iti panangikasaba iti Pagarian ken panagaramid iti adalan sigun iti kabaelantayo. (Mateo 28:19, 20) No dadduma, mariknatayo a kasla nagbassit ti magapgapuanantayo. Mabalin pay ketdi nga iturongnatayo ti imperpekto a pusotayo nga agduadua no maay-ayo met laeng ni Jehova kadagiti panagreggettayo. (1 Juan 3:19, 20) Ngem ipateg ni Jehova ti amin a sagut—kasano man kabassit—a nagtaud iti puso a tinignay ti ayat. (Marcos 12:41-44) Ipanamnama kadatayo ti Biblia: “Saan a nakillo ti Dios tapno lipatenna ti aramidyo ken ti ayat nga impakitayo maipaay iti naganna.” (Hebreo 6:10) Kinapudnona, lagipen ken gunggonaan ni Jehova uray dagiti kabassitan a gapuanan nga agpaay iti Pagarianna. Malaksid iti nabaknang a naespirituan a bendision ita, manamnamatayo ti ragsak iti sumungsungad a baro a lubong, inton sibubulos nga iburay ken penken ni Jehova dagiti nalinteg a tarigagay ti amin a nasinged kenkuana!—Salmo 145:16; 2 Pedro 3:13.
20. Iti intero a tawen 2003, kasano a malaglagiptayo dagiti sasao ti teksto ti tawen, ken ania ti resultana?
20 Iti intero a tawen 2003, imtuodentayo ti bagitayo no agtultuloy met laeng ti panagreggettayo nga umadani iti nailangitan nga Amatayo. No wen, masiguradotayo a tungpalenna ti inkarina. Total, “ti Dios . . . saanna a mabalin ti agulbod.” (Tito 1:2) Umadani kadakayo ti Dios no umadanikayo kenkuana. (Santiago 4:8) Ania ti resultana? Aglaplapusanan a bendision ita ken ti gundaway nga ad-adda a suminged ken ni Jehova iti agnanayon!
[Footnote]
a Maysa a reaksion iti artikulo a “Dakdakkel ni Jehova Ngem iti Pusotayo,” iti Mayo 1, 2000 a ruar Ti Pagwanawanan, panid 28-31.
Malagipyo Kadi?
• Ania ti sagut ni Jehova kadagidiay umadani kenkuana?
• Ania dagiti probision ni Jehova agpaay iti naespirituan a pannakasalaknib ti ilina?
• Apay a naisangsangayan a pribilehio ti maaddaan iti nawaya a pannakisarita ken ni Jehova iti kararag?
• Kasano nga ipakita ti Biblia nga apresiaren ni Jehova dagiti matalek a panagserbi dagiti adda panunotna a parsuana?
[Ladawan iti panid 15]
Pinaraburannatayo ni Jehova iti nauneg a pannakaawat kadagiti naespirituan a kinapudno
[Dagiti Ladawan iti panid 16, 17]
Mangipaay ni Jehova iti naespirituan a pannalaknib
[Ladawan iti panid 18]
Asideg ni Jehova, a sidadaan nga umimdeng iti tunggal kararagtayo